UYONO 03
Wọ Sa Vwẹroso Baibol Na?
Baibol na vọnre vẹ uchebro kugbe ive buebun. Ọkiọvo wọ guọnọ riẹn kpahen obo ro yonori, jẹ wọ mrẹ bẹnbẹn wọ vwọ vwẹrosuọ. Ofori nẹ wọ vwẹroso ive vẹ uchebro rehẹ ọbe awanre nana? Wọ sa vwẹroso oborẹ Baibol na ta kpahen obo re se vwo yerin omamọ akpọ enẹna vẹ ọke rọ cha vwẹ obaro na? Iduduru rẹ ihwo ru ọtiọyen re. E jẹ e no sẹ wo se ru ọtiọyen.
1. Baibol na, ọbe rẹ uyota gbanẹ ọbe rẹ esia?
Baibol na tare nẹ eta rehẹ evun rọyen “eta rẹ uyota.” (Aghwoghwo 12:10) Ikuegbe rehẹ evun rọyen churobọ si ihwo ri ghini yerin dẹn. (Se Luk 1:3; 3:1, 2.) Igbikuegbe buebun vẹ ihwo re tọn otọ guọnọ ekuakua awanre rhọnvwephiyọ ẹdẹ, ihwo, asan, vẹ irueru re djisẹ rọyen vwẹ Baibol na.
2. Diesorọ a sa vwọ tanẹ Baibol na kpo awanre-e?
Ọke re vwo si Baibol na, e djunute emu buebun ra tobọ riẹn kpahen jovwo-o. Kerẹ udje, ọ ta eta ri shekpahen isayẹnsi. Ihwo buebun rhọnvwephiyọ erọnvwọn buebun rọ ta kpahen isayẹnsi ọke re vwo sio-o. Asaọkiephana, isayẹnsi rhọnvwephiyọ eta rehẹ Baibol na. “A vwẹ ayen mu bẹdẹ bẹdẹ.”—Une Rẹ Ejiro 111:8.
3. Diesorọ o vwo fo nẹ a vwẹroso oborẹ Baibol na ta kpahen obaro na?
Baibol na vọnre vẹ aroẹmrẹa ri shekpahen “imu ri ji ru-u.” (Aizaya 46:10) Ọ mraro ọgbagba kpahen erọnvwọn ọke grongron tavwen e ke phia. O ji djisẹ rẹ erọnvwọn eje re phia vwẹ akpọ na nonẹna. Vwẹ uyono nana, a cha fuẹrẹn aroẹmrẹ ri Baibol evo rẹ orugba rayen gbe ohwo unu mamọ!
HIẸ KODO
Fuẹrẹn oborẹ isayẹnsi vwọ rhọnvwephiyọ Baibol na, wọ me je fuẹrẹn aroẹmrẹ ri Baibol evo.
4. Isayẹnsi vẹ Baibol na rhọnvwephiyọ ohwohwo
Vwẹ ọke awanre, ihwo buebun vwo imuẹro nẹ e mu akpọ na kpahen enu rẹ orọnvwọn ọvo. Hworo IVIDIO na.
Jokaphiyọ oborẹ ọbe ri Job tare omarẹ ẹgbukpe 3,500 re wanre. Se Job 26:7, ovwan ta ota kpahen onọ nana:
Diesorọ o vwo gbe ohwo unu nẹ Baibol na tare nẹ a “vwẹ akpọ na ya enu rẹ odiodi”?
Omarẹ ẹgbukpe 200 re wanre yen a vwọ nabọ vwo ẹruọ rẹ okinriariẹ rẹ ame rọhẹ akpọ na. Dedena, jokaphiyọ oborẹ Baibol na tare omarẹ ẹgbukpe 3,500 re wanre. Se Job 36:27, 28, ovwan ta ota kpahen enọ nana:
Diesorọ idjedje ọlọlọhọ rẹ okinriariẹ rẹ ame na vwọ dia obo ra jokaphiyọ?
Ẹkpo ri Baibol wo ghwe se na kpuriẹnphiyọ ẹroẹvwọsuọ wẹn kpahen Baibol na?
5. Baibol na mraro kpahen erọnvwọn sansan re phiare
Se Aizaya 44:27–45:2, ovwan ta ota kpahen onọ nana:
Erhọ yen erọnvwọn evo rẹ Baibol na mraro rọyen omarẹ ẹgbukpe 200 tavwen a ke ghwọrọ Babilọn?
Ikuegbe djerephia nẹ Ovie Sairọs, rọ dia ovie ri Pẹsha vẹ isodje rọyen phi orere ri Babilọn kparobọ vwẹ 539 B.C.E.b Ayen da kpọ urhie rọ sẹro rẹ orere na kpo asan ọfa. Ayen da ro orere na rẹ anurhoro rọyen rhiephiyọ na, ji phio kparobọ ababọ rẹ ofovwin. Nonẹna, ọ vrẹ ẹgbukpe 2,500 re ri Babilọn vwo hirhephiyọ iwurhie re. Jokaphiyọ oborẹ Baibol na mraro rọyen.
Se Aizaya 13:19, 20, ovwan ta ota kpahen onọ nana:
Mavọ yen aroẹmrẹ nana rugba wan?
Oborẹ Babilọn hepha enẹna vwẹ asan re se Iraq nonẹna
6. Baibol na mraro kpahen erọnvwọn ra mrẹ nonẹna
Baibol na se ọke rẹ avwanre de yerẹn nonẹna “oba rẹ ẹdẹ na.” (2 Timoti 3:1) Jokaphiyọ oborẹ Baibol na ta kpahen oba rẹ ẹdẹ na.
Se Matiu 24:6, 7, ovwan ta ota kpahen onọ nana:
Mavọ yen Baibol na djisẹ rẹ ẹdẹ re koba na wan?
Se 2 Timoti 3:1-5, ovwan ta ota kpahen enọ nana:
Iruemu vọ yen Baibol na djisẹ rọyen nẹ ihwo che vwo vwẹ ẹdẹ rẹ oba na?
Evọ usun rẹ iruemu nana yen wo rhiẹromrẹ re?
IHWO EVO TA: “Baibol na ọyen ọbe rẹ esia.”
Die yen ghene ma kẹ wẹ imuẹro nẹ a sa vwẹroso Baibol na?
ỌDJẸKOKO
Ikuegbe, isayẹnsi, vẹ aroẹmrẹ djerephia nẹ wọ sa vwẹroso Baibol na.
Ẹrhomafuẹrẹn
Baibol na, ọbe rẹ uyota gbanẹ ọbe rẹ esia?
Ẹdia vọ yen isayẹnsi vẹ Baibol na vwọ rhọnvwephiyọ ohwohwo?
Wo rorori nẹ Baibol na sa ta oborẹ obaro na cha dia? Diesorọ wọ vwọ ta ọtiọyen?
HIẸ GUỌNỌ
O vwo asan rẹ Baibol na de shechọ vwẹ ẹbẹre rẹ isayẹnsi?
“Isayẹnsi vẹ Baibol na Rhọnvwephiyọ Ohwohwo?” (Uyovwinrota rọhẹ jw.org)
Die yen a riẹn kpahen “oba rẹ ẹdẹ na”?
“Aroẹmrẹ rẹ Baibol 6 ri Ruẹgba Nonẹna” (Uwevwin Orhẹrẹ ri May 1, 2011)
Yono kpahen oborẹ aroẹmrẹ ri Baibol na ro shekpahen Usuon ri Grik vwo rugba.
Mrẹ oborẹ aroẹmrẹ ri Baibol na vwo wene ẹro rẹ ọshare ọvo vwo ni Baibol na.
“Mi Vwo Imuẹro nẹ Ọghẹnẹ Herọ-ọ” (Uwevwin Orhẹrẹ Ukeri 5 2017)
a Aroẹmrẹ churobọ si evuẹ ri nẹ obọ rẹ Ọghẹnẹ rhe kpahen obaro na.
b B.C.E. mudiaphiyọ “A ke mrẹ ọke ri Kristi,” C.E. de rhe mudiaphiyọ “Ọke ri Kristi.”