Mi rhi no nẹ me sa vwẹ ukẹcha kẹ ihwo efa enẹna re

Acul yen e de vwiẹ vwẹ. Orere na hẹ asan ro siuvun vwẹ ugbenu rọhẹ ẹbẹre ọnre shera rẹ Guatemala. Orua mẹ ihwo rẹ Ixil, re dia ihwo ri nẹ uvwiẹ rẹ Maya rhe. Vwọba ejajẹ rẹ Spanish, ejajẹ rẹ orere rẹ avwanre ọyen me jẹ vwo nẹ ọkiemọ rhe. Ọke re vwo phi ofovwin rọ reyọ ẹgbukpe 36 vwẹ Guatemala yen e vwo vwiẹ vwẹ. Ihwo rẹ Ixil buebun ghwuru vwẹ ọke yena.

Me vwọ hẹ ẹgbukpe ẹne, oniọvo mẹ rọhẹ ẹgbukpe ighwrẹn kọ vwẹ ibọmbu vwọ heha vwọrẹ jẹriẹn, ọtiọyena ibọmbu na da sa. Ọnana da nẹrhẹ ẹro mẹ rhu; ọ da vwẹ mamọ nẹ oniọvo mẹ na ghwuru. Ọtiọyena, isikuru ra da vwẹrote emọ ri rhuẹro vwẹ Guatemala City kọyen me da ghwanre, etiyin kọyen mi de yono obo re se Braille. Fikirẹ oborẹ me riẹnre-e, ewiowian rẹ isikuru na de jurhi kẹ vwẹ nẹ mi rhe nene emọ efa ta ota-a, emọ rẹ iklasi mẹ ke tobọ kẹnoma kẹ vwẹ. Ọkieje yen me vwọ hẹ ẹdia rẹ ọruvwohwo, me vwọ rhẹro rẹ emeranvwe ivẹ me ghwọrọ kuẹgbe kukpe kukpe vẹ oni mẹ, rọ dia omamọ rẹ ohwo ro ji dje erorokẹ phia. Ọ da ohwo mamọ nẹ me vwọ hẹ ẹgbukpe ihwe, oni mẹ de ghwu. Ẹwẹn mẹ da kuọrọn totọ kidie mi niro nẹ ohwo vuọvo ro vwo ẹguọnọ mẹ vwẹ akpọ na ghwure.

Me vwọ hẹ ẹgbukpe 11, mi de rhivwin kpo orere mẹ, mi de rhe nene oniọvo mẹ ọkpako vẹ orua rọyen dia. Dede nẹ ayen vwẹrote ọdavwẹ ugboma mẹ, jẹ o vwo ohwo vuọvo rọ sa chọn vwẹ uko vwo phi ẹnwan mẹ kparobọ-ọ. Ọke evo, ke me viẹ kperẹ se Ọghẹnẹ me vwọ ta: “Diesorọ oni mẹ vwo ghwu? Diesorọ mi vwo rhuẹro?” Ihwo vuẹ vwẹ nẹ ebẹnbẹn mi rhiẹromrẹ na ọyen ọhọre rẹ Ọghẹnẹ. Ki mi no nẹ Ọghẹnẹ vwo ọdavwẹ rẹ ohwo-o, o ji vwo erorokẹ-ẹ. Oboresorọ mi churu ghwu-u ọyen kidie mi vwo obo mi se vwo ruo-o.

Kidie nẹ mi rhuẹro, me rha sa vwẹrote ugboma vẹ ẹdia rẹ iroro mẹ-ẹ. Ọke buebun, e gbe vwe ẹgua me vwọ hẹ omotete. Me sa niyẹnrẹn rọye-en; kidie mi rorori nẹ ohwo vuọvo vwo ọdavwẹ mẹ-ẹ. Ihwo fobọ ta ota kẹ vwẹ-ẹ, mi ji nene ohwo vuọvo ta ota-a. Mi sioma nẹ ihwo, ofu ji dje vwe, me nama vwẹroso ohwo vuọvo-o.

Ọke me vwọ hẹ ẹgbukpe 13 fie 15, Iseri ri Jihova ivẹ (aye gbe ọshare) de bru vwe rhe vwẹ ọke omaerovwo vwẹ isikuru. Ọvo usun rẹ iyono rehẹ isikuru mẹ rẹ aro mẹ dọn fikirẹ ẹdia re me hepha yen vuẹ ayen nẹ ayen bru vwe rhe. Ayen vuẹ vwẹ kpahen ive ri Baibol na nẹ ihwo ri ghwure che vrẹn, ayen je tanẹ ẹdẹ ọvo irhuẹro cha rhoma mromrẹ. (Aizaya 35:5; Jọn 5:28, 29) Oborẹ ayen yonori na te vwe ẹwẹn, jẹ ọ bẹn kẹ vwẹ mi vwo nene ayen ta ota rọ vwọ dianẹ me vẹ ihwo efa ta ota-a. Ẹkẹvuọvo, dede nẹ me vẹ ihwo ta ota kuẹgbe-e, ayen vwo edirin ji dje erorokẹ phia rẹ ayen vwo bru vwe cha rere ayen se vwo yono uvwe kpahen Baibol na. Aye gbe ọshare nana yan imaili 6 (iroko 10) ji yerin ugbenu tavwen ayen ki te orere mẹ.

Oniọvo mẹ da guọnọ djisẹ rayen, kọ tanẹ ayen ihwo re nabọ sẹn osẹnvwe rọ fonro ri ghwe vwo igho-o. Dedena, ọkieje yen ayen vwo djephia nẹ ayen vwo ọdavwẹ mẹ, ji ruẹse kẹ vwẹ. Mi niro nẹ Inenikristi uyota ọvo yen se dje uruemu rẹ omaevwoze tiọyena phia.

Womarẹ ẹbe ri Braille yen mi vwo yono Baibol na. Dede nẹ mi vwo ẹruọ rẹ obo mi yono na, ẹkẹvuọvo, ọ bẹnre mi vwo rhiabọreyọ iyono evo. Kerẹ udje, me mrẹ bẹnbẹn mi vwo vwo imuẹro nẹ Ọghẹnẹ ghini vwo ọdavwẹ mẹ komobọ yẹrẹ ihwo efa se ji dje oka rẹ ọdavwẹ tiọyena kẹ vwẹ. Me riẹn oboresorọ Jihova vwọ rhọnvwe nẹ umwemwu dia akpọ na, ẹkẹvuọvo ọ pha bẹnbẹn mi vwo no kerẹ Ọsẹ ro ghini vwo ẹguọnọ.a

Ememerha na, obo mi yono nẹ Baibol na rhe da chọn vwẹ uko vwo wene ẹro mi vwo ni emu. Kerẹ udje, mi yonori nẹ Ọghẹnẹ vwo erorokẹ okokodo kpahen ihwo re rioja. Vwọ kpahen ihwo re ga ra vwẹ oja ria, Ọghẹnẹ da ta: “Me mrẹ oma ẹlaghọ rẹ ihwo mẹ . . . me riẹn oja rayen.” (Eyanno 3:7) Me vwọ nabọ vwo ọdavwaro kpahen iruemu ri Jihova, ọnana da nẹrhẹ me vwomakpahotọ vwọ kẹ. Vwẹ 1998, mi de bromaphiyame kerẹ Oseri ri Jihova.

Omarẹ ẹgbukpe ọvo mi vwo bromaphiyame nu, mi de kpo uyono ọvo re ru kẹ ihwo ri rhuẹro vwẹ orere rẹ Escuintla. Ọkpako ọvo rọhẹ ukoko me hepha de rhi vwo oniso rẹ ẹgbabọse mi hirharokuẹ mi se vwo kpo uyono vwẹ orere mẹ. Ukoko rọ ma kẹrẹ ovwẹ sheri te ugbo rẹ iniọvo ri yono uvwe na yan ayen ki te orere mẹ ọke rẹ ayen vwo yono uvwe, ọ bẹn kẹ vwẹ mi vwọ yan oyan tiọyena. A vwọ chọn vwẹ uko, ọkpako na da ta ota kẹ orua rẹ oniọvo ọvo vwẹ Escuintla rọ rhọnvwere nẹ mi rhi nene ayen dia, ro ji che rhe mu vwe kpo emẹvwa na. Te ọke nana, ayen je vwẹrote vwe kerẹ ohwo rẹ orua rayen.

Mi se ji gbikun rẹ ihwo efa vwevunrẹ ukoko na ri dje uvi rẹ ẹguọnọ kẹ vwẹ. Ikuegbe rẹ obo re mi rhiẹromrẹ nẹrhẹ o muvwẹro nẹ kerẹ ọvo usun rẹ Iseri ri Jihova, me hẹ usun rẹ Inenikristi rẹ uyota.—Jọn 13:34, 35.

Mi rhe ni oma mẹ saka kerẹ ohwo ro vwo iphiẹrophiyọ-ọ. Akpọ mẹ rhi vwo otọ enẹna re. Kerẹ oghwoghwota ro vwobọ vwẹ iruo rẹ eyono rẹ Iseri ri Jihova ruẹ, me tẹnrovi oborẹ mi se vwo yono ihwo uyota eghanghanre rehẹ Baibol na ukperẹ oshechọ romobọ mẹ. Vwọba, mi ji vwo uphẹn me vwọ ga kerẹ ọkpako je ta ota rotu vwevunrẹ ikoko sansan. Mi tobọ vwo uphẹn me vwọ vwẹ ota phia vwẹ eghwẹkoko, rọ dia asan ihwo uriorin buebun de siomakoko.

Vwẹ 2010, mi de wontọ nẹ Isikuru rẹ Uyono rẹ Ewiowian (re se Isikuru rẹ Ihwo ri Ghwoghwo Uvie Na enẹna) re ruru vwẹ El Salvador. Isikuru nana chọn vwẹ uko vwo ruiruo ra vwọ kẹ vwẹ vwẹ ukoko na yovwinphiyọ. Uyono nana nẹrhẹ mi riẹn nẹ Jihova vwo ẹguọnọ mẹ o ji ni vwe ghanghanre, kidie ọyen ọvo yen se ru ohwo vwo muwan vwọ kẹ iruo rọyen.

Jesu da ta: “Ẹrhovwo [“omavwerhovwẹn,” NW] herọ kẹ ọkokẹ nọ ohwo ra kẹ.” (Iruo Rẹ Iyinkọn Na 20:35) Nonẹna, me sa tanẹ oma vwerhen ovwẹ dede nẹ mi rorori jovwo nẹ ọyena cha sa phia-a. Asaọkiephana, mi rhi no nẹ me sa vwẹ ukẹcha kẹ ihwo efa re.