Ẹguọnọ vẹ Ọdavwaro Yen Mu Ohwo Vwo Bromaphiyame

1-2. Kirobo rẹ Iruo Rẹ Iyinkọn Na 8:27-31, 35-38 tare, die yen muẹ ọshare rẹ Ẹtiopia na vwo bromaphiyame?

WỌ GUỌNỌ bromaphiyame kerẹ odibo ri Jesu? Ẹguọnọ vẹ ọdavwaro mu ihwo buebun vwọ jẹ ojẹ nana re. Roro kpahen udje rẹ ohwo rode ọvo rọ wian kẹ ovie aye rẹ Ẹtiopia.

² Ọshare rẹ Ẹtiopia na bromaphiyame ugege ro vwo yono vwẹ Baibol na nẹ ofori o vwo ru ọtiọyen. (Se Iruo Rẹ Iyinkọn Na 8:27-31, 35-38.) Die yen muro vwo ru ọtiọyen? O vwo ọdavwẹ rẹ Ota rẹ Ọghẹnẹ kọyensorọ ro vwo se ẹkpo evo vwẹ ọbe rẹ Aizaya, ọke rọ vwọ hẹ akpẹrẹ rọyen. Ọke ri Filip vwo dje obo ro se na fiotọ kẹ, o de rhi vwo ọdavwaro kpahen oborẹ Jesu ru kẹ. Jẹ, die yen mu ọshare na kpo Jerusalẹm? Kidie, o vwo ẹguọnọ ri Jihova jovwore. Mavọ yen avwanre ru riẹn? O ghwe nẹ ẹga cha vwẹ Jerusalẹm. Ọ sa dianẹ ọshare nana yanjẹ ẹga re de vwiẹ vwo rhi kuomakugbe ẹgborho re vwomakpahotọ kẹ Ọghẹnẹ rẹ uyota na jovwore. Ẹguọnọ ro vwo kpahen Jihova na yen ji muo vwọ jowọ ọghanghanre ọfa ro vwo bromaphiyame kerẹ odibo ri Jesu.—Mat. 28:19.

 3. Die yen sa dobọ rẹ ohwo ji ro vwo jẹ oma ebrophiyame? (Ni ekpeti na, “Oka rẹ Otọ vọ Yen Udu Wẹn Họhọre?”)

³ Ẹguọnọ wo vwo kpahen Jihova se mu we vwo bromaphiyame. Jẹ, ẹguọnọ je sa dobọ wẹn ji. Diesorọ? Roro kpahen idje evo. Wo se vwo ẹguọnọ kpahen ihwo rẹ orua yẹrẹ igbeyan wẹn re ga Jihova-a mamọ, ọtiọyena, udu se bru we nẹ ayen che vwo utuoma kpahen owẹ siẹrẹ wo de bromaphiyame. (Mat. 10:37) Wo ji se vwo ẹguọnọ kpahen iruemu evo ri tu Jihova oma, je mrẹ bẹnbẹn wo vwo siobọnu ayen. (Une 97:10) Ọ sa dianẹ nẹ ọkiemọ rhe yen wo vwo vwobọ vwẹ erẹ evo re ruẹ vwẹ ẹga rẹ efian. Ọtiọyena, wọ mrẹ bẹnbẹn wọ vwọ dobọ rẹ erẹ yena ji. (1 Kọr. 10:20, 21) Gba nọ oma wẹn, “Die yẹrẹ ono yen mi me vwo ẹguọnọ kpahen?”

 4. Die yen emu ọvo kiriguo ro che mu we vwo bromaphiyame?

⁴ O vwo erọnvwọn iyoyovwin ro fori nẹ wo dje ẹguọnọ vẹ ọdavwaro phia kpahen. Kerẹ udje, ọ sa dianẹ wo vwo ọdavwẹ okokodo kpahen Baibol na tavwen wọ ke ton uyono ri Baibol phiyọ vẹ Iseri ri Jihova. Ọ je sa dianẹ wo vwo ẹguọnọ ri Jesu jovwore. Enẹna wọ rhe vwọ riẹn Iseri ri Jihova re na, ọkiọvo wọ guọnọ vwomaba ayen. Jẹ enana che ghwe se mu we vwọ vwomakpahotọ kẹ Jihova ji bromaphiyame-e. Emu ọvo kiriguo ro che mu we vwo bromaphiyame yen ẹguọnọ ru wo vwo kpahen Jihova. Ọ da dianẹ Jihova yen wo me vwo ẹguọnọ kpahen, wọ cha rhọnvwe nẹ orọnvwọn yẹrẹ ohwo vuọvo gbowọphiyọ ẹga ru wọ vwọ kẹ Jihova-a. Ẹguọnọ yena che mu we vwo bromaphiyame, je fuevun ga Jihova siẹrẹ wo de bromaphiyame nu.

 5. Enọ vọ yen avwanre che roro kpahen?

⁵ Jesu tare nẹ avwanre vwẹ udu, ẹwẹn, iroro kugbe ẹgba avwanre eje vwo vwo ẹguọnọ ri Jihova. (Mak 12:30) Mavọ yen wo se vwo vwo ẹguọnọ ji muọghọ okokodo tiọyena kẹ Jihova? Siẹrẹ avwanre de roro kpahen ẹguọnọ ri Jihova vwo kpahen avwanre, ọnana che mu avwanre vwo vwo ẹguọnọ rọyen rhivwin. (1 Jọn 4:19) Die yen che phia siẹrẹ wo de vwo ẹguọnọ nana nu?b

 6. Vwo nene eta rehẹ Rom 1:20, ọrhọ yen idjerhe ọvo re se vwo yono kpahen Jihova?

⁶ Yono kpahen Jihova womarẹ emama rọyen. (Se Rom 1:20; Ẹvwọ. 4:11) Frẹkotọ roro kpahen idjerhe rẹ aghwanre ra vwọ ma ekankọn vẹ eranvwe. Yono kpahen obo ra ma ugboma wẹn na wan. (Une 139:14) Ji roro kpahen ẹgba rọhẹ evunrẹ uvo ri Jihova mare na. Karophiyọ nẹ uvo na ọyen ọvo usun rẹ isio iduduru buebun rẹ Ọghẹnẹ mare.c (Aiz. 40:26) Ọghọ ru wo muẹ kẹ Jihova che kodophiyọ siẹrẹ wo de roro kpahen emama rọyen. Ẹkẹvuọvo, wọ vwọ riẹn kpahen aghwanre vẹ ẹgba ri Jihova, ọyen ẹbẹre ọvo rẹ uchivwo rẹ oyerinkugbe wẹn vẹ Jihova. Oyerinkugbe wẹn vẹ ọ ri Jihova sa vwọ ganphiyọ, ofori nẹ wo yono kpahọn kpobarophiyọ.

 7. Imuẹro vọ yen ofori nẹ wo vwo, wo da guọnọ nẹ ẹguọnọ wo vwo kpahen Jihova kodophiyọ?

⁷ Ofori nẹ o muwẹro nẹ Jihova vwẹrote we komobọ. Wọ mrẹ bẹnbẹn wo vwo vwo imuẹro nẹ Ọmemama rẹ idjuvwu vẹ akpọ na vughe uwe, nẹ ọ je vwẹrote we komobọ? Ọ da dia ọtiọyen, gba karophiyọ nẹ Jihova “sheri kẹ avwanre ohwo ọvuọvo-o.” (Iruo 17:26-28) Kirobo ri Devid vuẹ Solomọn, Jihova “hiẹn ubiudu” eje, o ji ve kẹ wẹ nẹ, “wọ da guọnọ, ku wọ mrẹ.” (1 Ikun 28:9) Vwọrẹ uyota, wo yono Baibol na enẹna fikiridie Jihova “guọnọ owẹ.” (Jer. 31:3) Wo vwo dje ọdavwaro phia kpahen obo ri Jihova ru kẹ wẹ ye, ẹguọnọ ru wo vwo kpahọn kọ cha ganphiyọ.

 8. Mavọ wo se vwo dje ọdavwaro phia kpahen ẹguọnọ ri Jihova?

⁸ Idjerhe ọvo wo se vwo dje ọdavwaro phia kpahen ẹguọnọ ri Jihova ọyen wọ vwọ nẹrhovwo rhe. Ẹguọnọ ru wo vwo kpahọn che kodophiyọ siẹrẹ wọ da ta ọdavwẹ wẹn kẹ je kpẹvwẹ fikirẹ obo ro ruẹ kẹ wẹ. Oyerinkugbe wẹn vẹ ọ ri Jihova cha ganphiyọ siẹrẹ wọ da mrẹ obo rọ kpahenphiyọ ẹrhovwo wẹn. (Une 116:1) Ko che rhi muwẹro nẹ Jihova riẹn wẹn dẹn. Jẹ oyerinkugbe na sa vwọ ganphiyọ, ofori nẹ wọ riẹn ẹro ro vwo nẹ emu. Ofori nẹ wọ je riẹn obo rọ guọnọ mie we. Wo se vwo erianriẹn nana siẹrẹ wo de yono Ota rẹ Ọghẹnẹ.

 9. Mavọ wo se vwo djephia nẹ wọ vwẹro ọghanghanre vwo ni Baibol na?

⁹ Vwẹro ọghanghanre vwo ni Baibol na. Baibol na ọvo yen vuẹ avwanre uyota kpahen Jihova vẹ ọhọre rọyen kẹ avwanre. Wo che djephia nẹ wọ vwẹro ọghanghanre vwo ni Baibol na siẹrẹ wo de se, nabọ muegbe rẹ uyono wẹn je reyọ oborẹ wo yono vwo ruiruo. (Une 119:97, 99; Jọn 17:17) Wo vwo ọrhuẹrẹphiyotọ rẹ isese ri Baibol romobọ? Wọ yan nene je nabọ se Baibol na kẹdẹ kẹdẹ?

10. Emu oyoyovwin vọ yehẹ Baibol na?

¹⁰ Emu oyoyovwin ọvo rọhẹ Baibol na yen ikuegbe rẹ ihwo ri rhiẹromrẹ Jesu si kpahọn. Ọbe nana ọvo yen wọ da sa mrẹ evuẹ ọgbagba ro shekpahen oborẹ Jesu ru kẹ wẹ. Wo vwo se eta ri Jesu vẹ obo ro ruru na, wẹ vẹ ọyen ko che vwo uvi rẹ oyerinkugbe.

11. Mavọ yen wo se vwo vwo ẹguọnọ ri Jihova?

¹¹ Wo de vwo ẹguọnọ ri Jesu, ẹguọnọ ru wo vwo kpahen Jihova kọ cha ganphiyọ. Diesorọ? Kidie Jesu nabọ vwẹrokere iruemu rẹ Ọsẹ rọyen gbagba. (Jọn 14:9) Ọtiọyena, wo vwo yono kpahen Jesu phiyọ ye, ku wọ cha riẹn Jihova phiyọ ji muọghọ kẹ. Roro kpahen erorokẹ rẹ Jesu dje kẹ ihwo re niri kueku kerẹ igbere, ihwo re mwọga vẹ ihwo re vwiẹrẹre. Ji roro kpahen uchebro sansan rọ vwọ kẹ wẹ kugbe obo rẹ akpeyeren wẹn yovwẹnphiyọ ọke wo de ruẹ nene ayen.—Mat. 5:1-11; 7:24-27.

12. Wo vwo yono kpahen Jesu na, die yen ọnana che mu we vwo ru?

¹² Ẹguọnọ wo vwo kpahen Jesu sa ganphiyọ siẹrẹ wo de roro kpahen obo ro ruru wọ sa vwọ mrẹ evwoghovwo rẹ umwemwu rẹ avwanre. (Mat. 20:28) Wọ da rhe riẹn nẹ ọ dia a gba Jesu vwo ghwu kẹ wẹ-ẹ, ọnana se mu we vwo kurhẹriẹ je guọnọ evwoghovwo ri Jihova. (Iruo 3:19, 20; 1 Jọn 1:9) Ẹguọnọ ru wo vwo kpahen Jesu vẹ Jihova vwọ ganphiyọ na, ku wo che vwo ẹwẹn wo vwo sikẹrẹ ihwo ri ji vwo ẹguọnọ rayen.

13. Amono yen Jihova sa reyọ vwọ chọn wẹ uko?

¹³ Vwo ẹguọnọ rẹ igbeyan ri Jihova. Ihwo rẹ orua vẹ igbeyan wẹn rehẹ ukoko na-a che ghwe vwo ẹruọ rẹ oboresorọ ru wọ vwọ guọnọ vwomakpahotọ kẹ Jihova-a. Ayen sa tobọ mukpahen owẹ. Jihova cha vwẹ iniọvo rẹ ukoko na vwọ chọn wẹ uko. Wo de sikẹrẹ iniọvo na, wọ cha mrẹ obicha vẹ ẹguọnọ ru wọ guọnọre. (Mak 10:29, 30; Hib. 10:24, 25) Ọke vwọ yanran na, ihwo rẹ orua wẹn evo dede sa rhe vwomaba wẹ ga Jihova ji yeren akpọ nene irhi rọyen.—1 Pita 2:12.

14. Kirobo rẹ 1 Jọn 5:3 tare, die yen wo niso kpahen iwan ri Jihova?

¹⁴ Ni irhi ri Jihova ghanghanre ji ru nene ayen. Ọ sa dianẹ o vwo oborẹ wo yeren akpọ wẹn wan tavwen wọ ke rhe riẹn Jihova, jẹ enẹna, ku wọ rhe mrẹvughe nẹ iwan ri Jihova yen me yovwin. (Une 1:1-3; se 1 Jọn 5:3.) Roro kpahen uchebro ri Baibol na vwọ kẹ eshare, eya, emiọvwọn kugbe emọ. (Ẹfe. 5:22–6:4) Wo vwo oniso rẹ erere ro te orua wẹn obọ ru wo vwo ruẹ nene uchebro yena? Uruemu wẹn yovwẹnphiyọ ru wọ vwọ vwẹ aghwanre sane igbeyan wẹn kirobo ri Jihova tare? Oma vwerhen owẹ enẹna vrẹ obo ri jovwo? (Isẹ 13:20; 1 Kọr. 15:33) Ẹkpahenphiyọ wẹn sa dia e.

15. Die wo se ru siẹrẹ ọ da bẹn ru wọ vwọ vwẹ iji ri Baibol na vwo ruiruo?

¹⁵ Ọkiọvo, ọ sa bẹn wọ vwọ vwẹ iji ri Baibol ru wo yono na vwo ruiruo. Kọyensorọ, Jihova vwọ womarẹ ukoko rọyen kẹ wẹ ẹbe vẹ erọnvwọn efa re sa chọn wẹ uko vwo vughe emu esiri vẹ ọbrabra. (Hib. 5:13, 14) Siẹrẹ wọ da frẹkotọ se ji yono ayen, wọ cha mrẹ aghwanre rehẹ evun rayen je mrẹ asan ru wọ da vwẹ ayen ruiruo. Ọnana che si we kẹre ukoko ri Jihova phiyọ.

16. Mavọ yen Jihova rhuẹrẹ ihwo rọyen phiyọ wan?

¹⁶ Vwo ẹguọnọ rẹ ukoko ri Jihova ji bicha. Jihova rhuẹrẹ ihwo rọyen phiyọ ikoko sansan, Ọmọ rọyen Jesu yen ọgbuyovwin rayen eje. (Ẹfe. 1:22; 5:23) Jesu vwẹ ẹmẹko rẹ eshare ra jẹreyọ vwo mu re vwẹrote owian rọ vwọ kẹ avwanre eje. Jesu se ẹko rẹ eshare nana “odibo esiri na.” Ayen vwẹ iruo rẹ ayen vwọ sẹro rẹ oyerinkugbe wẹn vẹ Jihova na heha-a. (Mat. 24:45-47) Idjerhe ọvo rẹ odibo esiri na vwọ vwẹrote we yen womarẹ ekpako ri muwan re vwo mu. (Aiz. 32:1, 2; Hib. 13:17; 1 Pita 5:2, 3) Ekpako na choma ọkieje rẹ ayen vwo bru we uche je chọn wẹ uko vwo sikẹre Jihova. Jẹ emuọvo rọ ma ghanre ayen se ru kẹ wẹ yen, ayen vwọ chọn wẹ uko vwo yono ihwo efa kpahen Jihova.—Ẹfe. 4:11-13.

17. Mavọ yen Rom 10:10, 13, 14 vwo dje oboresorọ a vwọ vuẹ ihwo efa kpahen Jihova?

¹⁷ Chọn ihwo efa uko vwo vwo ẹguọnọ ri Jihova. Jesu vuẹ idibo rọyen nẹ ayen yono ihwo efa kpahen Jihova. (Mat. 28:19, 20) Avwanre se ru nene iji nana kidie avwanre niro nẹ ọyen uwevwin re ji avwanre. Ẹkẹvuọvo, ẹguọnọ wo vwo kpahen Jihova vwọ rhuaphiyọ ye, ku wọ cha vwẹro rẹ ọyinkọn Pita vẹ Jọn vwo ni iruo nana, ji vwo no rẹ ayen vwọ ta: “Obo rẹ avwanre mrẹre kugbe ọ re nyori na, o vwọ ọke re vwo jẹ ayen ẹta-a.” (Iruo 4:20) Oma vwerhen avwanre siẹrẹ a da sa chọn ohwo uko vwo vwo ẹguọnọ ri Jihova. Vwẹro roro oborẹ oma vwerhen Filip te rọ vwọ chọn ọshare rẹ Ẹtiopia na uko vwọ riẹn Isiesi Ọfuanfon na ji bromaphiyame! Wo che djephia nẹ wọ guọnọ dia Oseri ri Jihova siẹrẹ wọ da vwẹrokere Filip ji kerhọ rẹ iji ri Jesu re vwo ghwoghwota na. (Se Rom 10:10, 13, 14.) Ọke yena, wọ sa nọ onọ rẹ ọshare rẹ Ẹtiopia na nọre ye nẹ “Kidie rha djẹ vwẹ [“omaebrophiyame,” NW]?”—Iruo 8:36.

18. Die yen e che yono vwẹ uyono rọ vwọ kpahen ọnana?

¹⁸ Omaebrophiyame yen orhiẹn-ebro rọ ma ghanre wo che bru vwẹ akpeyeren. Ofori nẹ wọ nabọ roro kpahọn kidie ọnana orhiẹn ọghanghanre. Die yen ofori nẹ wọ riẹn kpahen omaebrophiyame? Die ofori nẹ wo ru tavwen wo ki brọmaphiyame vẹ ọke wo de bromaphiyame nu? A cha kpahenphiyọ enọ yena vwẹ uyono rọ vwọ kpahen ọnana.