Ẹgbaẹdavwọn Wo Vwo Bromaphiyame Cha kẹ Wẹ Omavwerhovwẹn!

Jesu tare nẹ ofori nẹ Inenikristi bromaphiyame. (Se Matiu 28:19, 20.) Die yen omaebrophiyame? Die yen ohwo che ru o ki se yerin te ẹdia rẹ omaebrophiyame?

1. Die yen omaebrophiyame?

A reyọ ubiota na “bromaphiyame” vwo nẹ ota ri Grik ro mudiaphiyọ “e vwo duvwo” ohwo phiyọ otọ rẹ ame. Ọke rẹ Jesu vwo bromaphiyame, e bruro phiyọ Urhie ri Jọdan, a da kparọ “nẹ evun rẹ ame na.” (Mak 1:9, 10) Vwẹ idjerhe vuọvo na, e brẹ Inenikristi phiyame womarẹ e vwo duvwu ayen yẹrẹ brẹ ayen phiyame riẹriẹriẹ.

2. Die yen omaebrophiyame djephia?

Omaebrophiyame ọyen odjephia nẹ ohwo vwomakpahotọ kẹ Jihova re. Mavọ yen ohwo sa vwọ vwomakpahotọ? Tavwen ohwo ki bromaphiyame, ọ vuẹ Jihova vwẹ ẹrhovwo romobọ rọyen nẹ Ọyen ọvo yen ọ cha ga bẹdẹ. O veri nẹ ọyen cha ga Jihova ọvo; eruo rẹ ọhọre rẹ Ọghẹnẹ yen je cha ma ghanre vwẹ akpeyeren rọyen. O brorhiẹn rọ vwọ “sen oma rọye . . . re o nene” iyono ri Jesu vẹ udje rọyen. (Matiu 16:24) Omaẹvwọkpahotọ vẹ omaebrophiyame rọyen yen sa nẹrhẹ o vwo oyerinkugbe ọkpẹkpẹkpẹ vẹ Jihova kugbe idibo rọyen efa.

3. Mavọ yen ohwo se vwo yerin te ẹdia rẹ omaebrophiyame?

Wo se muegbe vwọ kẹ omaebrophiyame womarẹ wo vwo yono kpahen Jihova ji ru esegbuyota wo vwo kpahọn ganphiyọ. (Se Hibru 11:6.) Erianriẹn vẹ esegbuyota wẹn vwọ rhuaphiyọ ye, jẹ ẹguọnọ wẹn kpahen Jihova ganphiyọ. O muẹro nẹ wọ guọnọ vuẹ ihwo efa kpahọn je yan nene irhi rọyen. (2 Timoti 4:2; 1 Jọn 5:3) Ohwo de yerin eyeren ro “fo kẹ Ọrovwohwo, re uruemu rẹ . . . [ohwo] vwo se je,” ko se brorhiẹn rọ vwọ vwomakpahotọ kẹ Ọghẹnẹ ji bromaphiyame.—Kọlose 1:9, 10.a

HIẸ KODO

4. Die yen e se yono nẹ omaebrophiyame ri Jesu rhe?

Se Matiu 3:13-17 rere wo yono emu efa kpahen omaebrophiyame ri Jesu. Ovwan ta ota kpahen enọ nana:

• Jesu ọmọboba ọke ro vwo bromaphiyame?

• Mavọ yen e bruro phiyame wan? A de fẹrẹ ame kuo?

Jesu bromaphiyame nu tavwen ọ ke tuẹn iruo ọghanghanre Ọghẹnẹ vwọ kẹ phiyọ. Se Luk 3:21-23 kugbe Jọn 6:38, ovwan ta ota kpahen enọ nana:

• Iruo vọ yen Jesu vwọ kobaro vwẹ akpeyeren ọke ro vwo bromaphiyame nu?

5. Omaebrophiyame ọyen obo ra vwọtua wọ sa yan mu

Iroro rẹ omaẹvwọkpahotọ vẹ omaebrophiyame na se mu we rọ vwẹ ẹsosuọ. Ẹkẹvuọvo, wọ sa yan obaro te ẹdia wo de fiudugberi brorhiẹn ọghanghanre nana. Wọ vwọ mrẹ ihwo evo ri ru ọtiọyen, hworo IVIDIO na.

IVIDIO: Bọn Oyerinkugbe Wẹn vẹ Jihova Gan (1:11)

Se Jọn 17:3 kugbe Jems 1:5, ovwan ta ota kpahen enọ nana:

• Die yen sa chọn ohwo uko vwo muegbe vwọ kẹ omaebrophiyame?

1. Avwanre vwomakpahotọ womarẹ a vwọ vuẹ Jihova nẹ a guọnọ ga bẹdẹ

2. E de bromaphiyame, jẹ e ghwe djephia kẹ ihwo eje nẹ avwanre vwomakpahotọ kẹ Ọghẹnẹ re

6. Omaebrophiyame mudiaphiyọ nẹ avwanre hẹ ẹbẹre ọvo rẹ orua ri Jihova

Ọke re de bromaphiyame, avwanre me dia ẹbẹre ọvo rẹ orua akpọeje ri Jihova. Dede nẹ ẹkuotọ vẹ ẹkuruemu avwanre fẹnẹ ohwohwo, avwanre eje vwo esegbuyota vuọvo ji yerẹn akpọ nene iwan vuọvo. Se Une Rẹ Ejiro 25:14 kugbe 1 Pita 2:17, ovwan ta ota kpahen enọ nana:

• Mavọ yen omaebrophiyame vwo wene oyerinkugbe rẹ ohwo vẹ Jihova kugbe ọ rẹ ihwo re vwẹ ẹga vwọ kẹ?

ỌDJẸKOKO

Jesu tare nẹ ofori nẹ Inenikristi bromaphiyame. A sa vwọ yanmuo, ofori nẹ ohwo ru esegbuyota ro vwo kpahen Jihova ganphiyọ, yerin akpọ nene iwan rọyen, je vwomakpahotọ kẹ.

Ẹrhomafuẹrẹn

• Die yen omaebrophiyame, kẹ diesorọ ọ vwọ ghanre?

• Mavọ yen omaẹvwọkpahotọ vẹ omaebrophiyame vwo churobọ si ohwohwo?

• Die yen ohwo che ru ọ ke sa vwomakpahotọ ji bromaphiyame?

HIẸ GUỌNỌ

Mrẹ oborẹ omaebrophiyame mudiaphiyọ vẹ obo ro mudiaphiyọ-ọ.

“Die Yen Omaebrophiyame?” (Uyovwinrota rọhẹ jw.org)

Roro kpahen idjerhe rẹ ohwo se vwo yerin te ẹdia rẹ omaebrophiyame.

“Ẹguọnọ vẹ Ọdavwaro Yen Mu Ohwo Vwo Bromaphiyame” (Uwevwin Orhẹrẹ ri March 2020)

Se kpahen ọshare ọvo ro brorhiẹn ro vwo bromaphiyame, jẹ ọ dia iroro ghevweghe ọvo yen o mu orhiẹn na kpahe-en.

“Ayen Guọnọ nẹ Mi Vwo Imuẹro Ọgangan Kpahen Uyota Na” (Uwevwin Orhẹrẹ ri February 1, 2013)

Roro kpahen oboresorọ omaebrophiyame vwọ dia obo ra sa yan mu kugbe obo re se vwo muegbe vwọ kẹ.

“Ofori nẹ Mi Bromaphiyame?” (Questions Young People Ask—Answers That Work, Ukori 2, uyovwinrota 37)