UYONO 19
Iseri ri Jihova Yen Inenikristi rẹ Uyota?
Avwanre Iseri ri Jihova, vwo imuẹro nẹ avwanre yen Inenikristi rẹ uyota. Diesorọ? Roro kpahen oborẹ avwanre mu esegbuyota avwanre kpahen, odẹ rọ nẹrhẹ avwanre fẹnẹ kugbe ẹguọnọ rẹ avwanre vwo kpahen ohwohwo.
1. Die yen Iseri ri Jihova mu esegbuyota rayen kpahen?
Jesu da ta: “Ota [rẹ Ọghẹnẹ] . . . hẹ uyota.” (Jọn 17:17) Kerẹ Jesu, ọkieje yen Iseri ri Jihova vwo mu esegbuyota rayen kpahen Ota rẹ Ọghẹnẹ. Kerẹ udje, roro kpahen ikuegbe rẹ avwanre. Vwẹ ukpe ri 1870, ẹmẹko rẹ Emọ-uyono ri Baibol evo da tuẹn eyono rẹ Ota rẹ Ọghẹnẹ phiyọ. Ayen mu esegbuyota rayen kpahen oborẹ Baibol na tare, ọ da tobọ dianẹ e fẹnẹ iyono rẹ ishọshi na. Ọtiọyena, ayen da vuẹ ihwo efa kpahen uyota ri Baibol rẹ ayen yono na.a
2. Diesorọ avwanre vwọ reyọ odẹ na Iseri ri Jihova?
Jihova se ihwo re ga Iseri rọyen kidie ayen vuẹ ihwo uyota ro shekpahọn. (Hibru 11:4–12:1) Kerẹ udje, vwẹ ọke awanre Ọghẹnẹ da vuẹ ihwo rọyen: “Ovwan iseri mẹ.” (Se Aizaya 43:10.) E se Jesu “Oseri rẹ Uyota na.” (Ẹvwọphia 1:5) Ọtiọyena, vwẹ 1931 avwanre da reyọ odẹ na Iseri ri Jihova. Oma vwerhen avwanre kpahen odẹ na.
3. Mavọ yen Iseri ri Jihova vwọ vwẹrokere ẹguọnọ ri Jesu?
Jesu vwo ẹguọnọ rẹ idibo rọyen mamọ te ẹdia rẹ ayen vwọ họhọ orua rọyen. (Se Mak 3:35.) Vwẹ idjerhe vuọvo na, Iseri ri Jihova kuomakugbe, ayen orua rẹ akpọeje. Kọyensorọ avwanre vwo se ohwohwo iniọvo. (Filimọn 1, 2) Avwanre je yọnrọn urhi nana: “Guọnọ imoni.” (1 Pita 2:17) Iseri ri Jihova dje ẹguọnọ nana phia vwẹ idjerhe sansan. Kerẹ udje, ayen vwẹ ukẹcha kẹ iniọvo rayen rehẹ akpọneje vwẹ ọke rẹ ebẹnbẹn.
HIẸ KODO
Yono kpobarophiyọ kpahen ikuegbe rẹ Iseri ri Jihova rere wọ sa vwọ mrẹ obo ri djerephia nẹ avwanre yen Inenikristi rẹ uyota.
Inenikristi rẹ uyota mu esegbuyota rayen kpahen Baibol na, ayen je vuẹ ihwo efa kpahọn
4. Avwanre mu esegbuyota rẹ avwanre kpahen Baibol na
Jihova tarọphiyotọ nẹ a cha mrẹ uyota rehẹ Baibol na. Se Daniẹl 12:4, ovwan ta ota kpahen onọ nana:
Die yen “che bu phihọ” vwẹ uvwre ihwo rẹ Ọghẹnẹ rẹ ayen vwo yono Baibol na?
Roro kpahen oborẹ Emọ-uyono ri Baibol na ji te Charles Russell vwo yono Ota rẹ Ọghẹnẹ. Hworo IVIDIO na, ovwan ta ota kpahen onọ ro nenire.
Vwevunrẹ ividio na, ona vọ yen Charles Russell vẹ Emọ-uyono ri Baibol na vwo yono Baibol na?
Wọ riẹnre jovwo?
Vwẹ ọke evo, avwanre ru ewene phiyọ iyono avwanre. Diesorọ? Kirobo rẹ ọnre na lophiyọ a da mrẹ asan eje ye, eriyin Ọghẹnẹ je nẹrhẹ avwanre vwo erianriẹn rẹ Ota rọyen ememerha. (Se Isẹ 4:18.) Dede nẹ Baibol na wene-e, avwanre wene iyono avwanre vwo nene ẹruọ re vwo kpahen Baibol na.
5. Avwanre yerẹn mu odẹ avwanre
Diesorọ avwanre vwọ reyọ odẹ na Iseri ri Jihova? Hworo IVIDIO na, ovwan ta ota kpahen onọ ro nenire.
Diesorọ odẹ na Iseri ri Jihova vwo fo avwanre?
Diesorọ Jihova vwọ sanẹ ihworakpọ nẹ e dia Iseri rọyen? Kidie ayen che ghwoghwo uyota ro shekpahen Jihova rọ vwọ dianẹ e gun efian buebun nyẹ re. E jẹ a ta ota kpahen ivẹ usun rẹ efian nana.
Ẹga evo yono ihwo rayen nẹ Ọghẹnẹ guọnọ nẹ a reyọ ema vwọ ba ga ẹga. Ẹkẹvuọvo, se Livitikọs 26:1, ovwan ta ota kpahen enọ nana:
Die yen uyota na? Ẹro vọ yen Ọghẹnẹ vwo ni ema?
Ilori rẹ ẹga evo yonori nẹ Jesu yen Ọghẹnẹ. Ẹkẹvuọvo, se Jọn 20:17, ovwan ta ota kpahen enọ nana:
Die yen uyota na? Ọghẹnẹ vẹ Jesu ohwo vuọvo?
Mavọ yen oma ru we wọ vwọ riẹn nẹ Jihova ji Iseri rọyen re ghwoghwo uyota ro shekpahọn vẹ Ọmọ rọyen?
6. Avwanre vwo ẹguọnọ rẹ ohwohwo
Baibol na vwẹ Inenikristi vwo dje ẹbẹre sansan rẹ ugboma rẹ ohworakpọ. Se 1 Kọrẹnt 12:25, 26, ovwan ta ota kpahen enọ nana:
Die yen ofori nẹ Onenikristi rẹ uyota ru siẹrẹ Onenikristi ọfa da rioja?
Die yen wo niso kpahen ẹguọnọ rẹ Iseri ri Jihova dje kẹ omoma rayen?
Iseri ri Jihova evo da rioja vwẹ ẹbẹre ọvo rẹ akpọ na, Iseri ri Jihova rehẹ akpọneje yen brokpakpa vwẹ ukẹcha phia. Wọ da guọnọ mrẹ udje ọvo, hworo IVIDIO na. Ovwan ta ota kpahen onọ ro nenire.
Idjerhe vọ yen iruo rẹ ukẹcha rẹ Iseri ri Jihova vwo djephia nẹ ayen vwo ẹguọnọ?
Inenikristi rẹ uyota dje ẹguọnọ kẹ ihwo re guọnọ ukẹcha
IHWO EVO TA: “Iseri ri Jihova ọyen ẹga kpokpọ.”
Rhanvwẹ ọke vọ yen Jihova vwo se ihwo re ga Iseri rọyen?
ỌDJẸKOKO
Iseri ri Jihova eyen Inenikristi rẹ uyota. Avwanre orua rẹ akpọeje. Avwanre mu esegbuyota rẹ avwanre kpahen Baibol na ji ghwoghwo uyota ro shekpahen Jihova.
Ẹrhomafuẹrẹn
Diesorọ avwanre vwọ reyọ odẹ na Iseri ri Jihova?
Mavọ yen avwanre nene ohwohwo yerẹn wan?
Wo rorori nẹ Iseri ri Jihova yen Inenikristi rẹ uyota?
HIẸ GUỌNỌ
Yono kpobarophiyọ kpahen ikuegbe avwanre.
Iseri ri Jihova—Esegbuyota ro Ruiruo, Ẹbẹre 1: Jẹ Urhukpẹ na Lo (1:00:53)
Ni udje ọvo ro dje idjerhe ọvo rẹ Iseri ri Jihova vwo tueghe iyono efian.
Mrẹ ẹkpahọnphiyọ vwọ kẹ enọ wo se vwo kpahen Iseri ri Jihova.
“Enọ Redje Ẹnẹnọ Kpahen Iseri rẹ Jihova” (ẹbẹre rọhẹ jw.org)
Stephen vwo utuoma kpahen ihwo ri nẹ ẹkuotọ efa rhe te ẹdia rọ da vwọso ayen. Vwo oniso rẹ obo rọ mrẹ vwẹ oma rẹ Iseri ri Jihova ro muro vwo ru ewene.
“Akpeyeren Mẹ Braphiyọ Braphiyọ” (Uwevwin Orhẹrẹ ri July 1, 2015)
a Rhanvwẹ ukpe ri 1879 yen ihwo ri Jihova vwọ teyen Uwevwin Orhẹrẹ na phia rere o se vwo dje uyota rehẹ Baibol na phia.