Iniruo re Vwẹrote Uchuru Na

ỌKE rẹ Jesu vwọ hẹ otọrakpọ na, o djerephia nẹ ọyehẹ “osuigegede rẹ esiri” na. (Jọn 10:11) Ọ vwọ mrẹ ihwo buebun ri tue nene, “ẹro da dọn, fikiridie ayen da hra ke ro ẹnwan kerẹ igegede ri vwo osu-un.” (Mat. 9:36) Pita vẹ iyinkọn ri chekọ vwo oniso rẹ ẹguọnọ rọyen. Jesu fẹnẹ isun rẹ efian rẹ ihwo rẹ Izrẹl, re kpairoro vrẹ uchuru na te ẹdia rẹ igegede na da hra nene asan eje, owẹnvwe rẹ ota rẹ Ọghẹnẹ ko hwe ayen! (Izi. 34:7, 8) Jesu nabọ phi omamọ udje phiyotọ ro vwo yono je vwẹrote igodẹ na te ẹdia rẹ o de ghwu kẹ ayen, ọnana yono iyinkọn na kpahen oborẹ ayen sa vwọ vwẹ ukẹcha kẹ ihwo ri vwo esegbuyota vwo rhivwin bru Jihova rhe, rọ dia “Osuigegede kugbe Ọrhẹrotọ rẹ ẹnwẹn [rayen].”—1 Pita 2:25.

² O vwo ọke ọvo rẹ Jesu vwọ ta ota kẹ Pita, ọ da kanrunumu ọghanrovwẹ ra vwọ ghẹrẹ je vwẹrote igegede na. (Jọn 21:15-17) Aphro herọ-ọ, ọnana te Pita ẹwẹn mamọ, ọ da nẹrhẹ ọ vwẹ uchebro kẹ ekpako rẹ ukoko rẹ Inenikristi rẹsosuọ: “Ghẹrẹ uchuru rẹ Ọghẹnẹ ra vwọ kẹ wẹ yọnre na, ọ dia ọ rẹ ẹgbahọ-ọ ẹkẹvuọvo ọ ro nẹ udu rhe, ọ dianẹ ra vwọ mrẹ erere rẹ omaẹvuọ-ọ ẹkẹvuọvo re ruo vẹ evun phẹnphẹn, ọ dianẹ ke do ku ayen otu ra vwọ kẹ wẹ yọnre na-a ẹkẹvuọvo dia oniru kẹ uchuru na.” (1 Pita 5:1-3) Eta ri Pita na ji shekpahen iniruo rehẹ ukoko na nonẹna. Vwọrẹ ẹroevwokere ri Jesu, ofori nẹ ekpako vwẹ ubiudu rayen eje vwọ dia oniru vwọ kẹ uchuru na, ayen me je kobaro rẹ ẹga ri Jihova.—Hib. 13:7.

³ Oma vwerhen avwanre mamọ fikirẹ iniruo ra vwẹ ẹwẹn ọfuanfon jẹreyọ rehẹ ukoko na. Avwanre mrẹ erere buebun fikirẹ ẹroevwote rayen. Kerẹ udje, ekpako na vwẹ uchebro kẹ iniọvo rehẹ ukoko na, ayen ji vwo ọdavwẹ romobọ kpahen ayen ohwo ọvuọvo. Kudughwrẹn kudughwrẹn, ọyen ayen vwọ vwẹrote emẹvwa rẹ ukoko na re bọn esegbuyota rẹ iniọvo na gan. (Rom 12:8) Ẹgbaẹdavwọn rẹ ayen vwọ sẹro rẹ uchuru na vwo nẹ erharhe ihwo toroba ofuvwegbe rẹ avwanre. (Aiz 32:2; Tai. 1:9-11) Ayen kobaro rẹ iruo aghwoghwo na, ọnana nẹrhẹ avwanre vwo oruru re vwo ghwoghwo iyẹnrẹn esiri na kemeranvwe kemeranvwe. (Hib. 13:15-17) Jihova vwẹ eshare nana vwo “ru ẹse” kẹ avwanre rere ukoko na sa vwọ gan.—Ẹfe. 4:8, 11, 12.

⁴ A sa vwọ nabọ vwẹrote ukoko na vwẹ idjerhe rẹ abavo, a guọnọ eshare ri che yerin mu iwan rehẹ Baibol na tavwen a ke sa vwẹ ayen mu iniruo. Ayen de muwan, ka sa tanẹ ẹwẹn ọfuanfon na yen vwẹ ayen mu. (Iruo 20:28) Vwọrẹ uyota, iwan rẹ ekpako che yerin mu na ghini kpenu, kidie ra vwọ dia oniruo ọyen oghwa rode. Ẹkẹvuọvo, iwan na kpenu gan nọ-ọ, Onenikristi ro ghini vwo ẹguọnọ ri Jihova, ro ji vwo ẹwẹn ro vwo ruiruo rọyen se yerin mu iwan nana. Ofori nẹ kohwo kohwo mrẹvughe nẹ ekpako na eyen ihwo re vwẹ uchebro ri Baibol na vwo ruiruo vwẹ akpeyeren rayen.

⁵ Ọyinkọn Pọl djunute iwan evo kiriguo rẹ ekpako che yerin mu vwẹ ileta rẹsosuọ ro si rhe Timoti vẹ ileta ro si rhe Taitọs. Vwẹ 1 Timoti 3:1-7, avwanre de se: “Ọ da dianẹ ohwo pharhere nẹ ọye dia Osun [yẹrẹ oniruo], yọ guọnọ iruo ro vwo ọghọ. Osun [yẹrẹ oniruo] na rhe vwo ekan vwẹ oma-a, ẹsiẹvo goi ọ rọvwọ, fuefu, ro vwo iroro, ohwo vẹ udidi, ro ru ẹse, rọ goma rẹ uyono, ọ dia ọgba-udi-i, ọ dia ohwo gudu gudu-u ẹkẹvuọvo ohwo dẹndẹn, ọ dia ohwo rẹ ẹghwọ-ọ, o nenesi rẹ igho-o. Ohwo rọ nabọ suẹn uwevwi rọye, ro yono emọ rọye phihọ ọghọ emuo vwẹ omaevwokpotọ vwẹ idjerhe kidjerhe; kidie ọ da dianẹ ohwo se sun evwruwevwi rọye-e, komavọ ọ sa vwẹ ẹro te [“ukoko,” NW] rẹ Ọghẹnẹ? Ọ dia ohwo ro kurhẹriẹ vwobọ-ọ, eyẹ o de rhi phuoma ro de roro ọ rẹ oma rọye ọvo o de rhi mu ufi rẹ idẹbono; ọ rọ marho e jẹn ihwo rẹ obada ta omamọ ota kpahọ, ọ rha dia eriyi-in unuakpọ ko muo re she phihọ ufi rẹ Idẹbono.”

⁶ Pọl de rhe si rhe Taitọs: “Ọna re sorọ me vwọ yan je uwe vwo vwẹ obi Krit, rere wọ vwọ rhuẹrẹ obo ri miovwiri vwẹ oboyi phihọ, rere wọ rha vwẹ ekpako mu vwi korho korho kirobo ri mi dje kẹ wẹ, eshare ri vwo abe-e, re rọvwọre ẹsiẹvo kpoi, rẹ emọ rọye vwo esegbuyota, re ghwọ-ọ, re re họnra-a, ri yivwaro-o. Kidie Osun [yẹrẹ oniruo], kerẹ odibo rẹ Ọghẹnẹ, o vwo abe-e, o mu oma kpenu-u eyẹ ọ fobọ mu ophu-u eyẹ ọ dia ogbaudi-i eyẹ o gbe ozighi-i eyẹ o vwo urhuru rẹ erere-e, ẹkẹvuọvo o ru ẹse, ivun rẹ erhuvwu vwerhọ, o se sun oma rọye rọ dia ohwo rẹ ọsoso, fuanfon, dẹndẹn; rọ nabọ yọnrọn uyota rọ hẹ evun rẹ uyono na, rere o vwo se bruche vwẹ evun rẹ uyono na, kugbe o vwo se dje kẹ otu re phra aphro.”—Taitọs 1:5-9.

⁷ Dede nẹ e se no nẹ iwan nana bun nọ, jẹ ofori nẹ eshare re dia Inenikristi pharhe rẹ ayen vwọ yan mu ayen. Ayen de vwo iwan nana ra guọnọ mie iniruo na, ọ cha nẹrhẹ ihwo efa ji ru ọtiọyen vwẹ ukoko na. Pọl siri nẹ a vwẹ eshare nana vwo “ru ẹse kẹ” avwanre “vwọ kẹ omaẹcha rẹ ihwo efuanfon na, vwọ kẹ iruo rẹ odibo egbe, vwọ kẹ ebanbọn rẹ ugboma ri Kristi, bẹsiẹ rẹ avwanre ejobi che vwo te okugbe rẹ esegbuyota na, kugbe erianriẹn rẹ Ọmọ rẹ Ọghẹnẹ na, rhi te omiragua, rhi te ovwanvwọn rẹ omaerhuọ rẹ ọvọnvọn ri Kristi.”—Ẹfe. 4:8, 12, 13.

⁸ Ekpako ghwa dia imitete ghevweghe-e yẹrẹ eshare ri kurhẹriẹ obọ-ọ. Ukperẹ ọtiọyen, ayen ihwo ri tedje, re riẹn oborẹ akpeyeren rẹ Onenikristi hepha, ri vwo erianriẹn vẹ ẹruọ okokodo ri Baibol na, kugbe obọdẹn rẹ ẹguọnọ vwọ kẹ ukoko na. Ayen fiudugberẹ vwọ kpọ ihwo ri ruchọ viẹ, je sẹro rẹ igegede na vwo nẹ abọ rẹ erharhe ihwo. (Aiz. 32:2) Ihwo eje rehẹ ukoko na nabọ mrẹvughe nẹ ekpako na eyen eshare ri tedje, ri ji vwo ọdavwẹ rẹ uchuru rẹ Ọghẹnẹ.

⁹ Ofori nẹ eshare re che vwo mu kerẹ iniruo dia ihwo ri dje aghwanre phia vwẹ akpeyeren rayen. Oniruo na da rọvwọn re, ofori nẹ o ni orọnvwe kirobo rẹ Ọghẹnẹ niro, kọyen ọ cha dia ọshare rẹ aye ọvo vẹ ohwo rọ nabọ suẹn uwevwin rọyen. Oniruo na de vwo emọ ri vwo esegbuyota re vwomakpotọ vwẹ kidjerhe kidjerhe, re họnra-a, ri yivwaro-o, iniọvo rehẹ ukoko na ki se brora ghwologhwolo vwọ kẹ uchebro ro shekpahen akpeyeren rẹ orua vẹ ọ rẹ Onenikristi. Ofori nẹ oniruo na vwo ekan vwẹ oma-a, o vwo abe-e, ihwo rẹ obada dede me je ta omamọ ota kpahọn. E jẹ e nyo nẹ o vwobọ vwẹ orharhe rẹ uruemu rọ sa ghwa ekan rhe ukoko na-a. Ọ dia ohwo ra ghwa ghwọku okrinọ na-a. Iniọvo rehẹ ukoko na vwo owenvwe rẹ ayen vwọ vwẹrokere omamọ udje rọyen, ayen je vwomakpahotọ yan nene odjekẹ rọyen.—1 Kọr. 11:1; 16:15, 16.

¹⁰ Vwevunrẹ ukoko na, owian rẹ eshare nana ri muwan na wian ghwa họhọ e rẹ ekpako rẹ Izrẹl awanre re djisẹ rayen nẹ i vwo aghwanre, “ẹriẹn kugbe evughe.” (Urhi 1:13) Dede nẹ ekpako na gbare-e, ihwo rehẹ ukoko na vẹ ekogho na riẹn ayen phiyọ ihwo esiri re djoshọ rẹ Ọghẹnẹ kidie ayen djerephia vwẹ ọke grongron re nẹ ayen yeren akpọ nene iji ri Baibol na. Uruemu esiri rayen nẹrhẹ ayen vwo ugbomọphẹ rẹ ota vwevunrẹ ukoko na.—Rom 3:23.

¹¹ Eshare re che vwo mu kerẹ iniruo dia fuefun ji vwẹ uruemu abavo vwo nene ihwo efa yerẹn. Ayen dia egbaphro-o. Ukperẹ ọtiọyen, ayen ihwo ri vwo uruemu abavo ri ji se sun oma rayen. Ayen dje uruemu nana phia vwẹ emuọre, udiẹda, ehaẹha, kugbe erọnvwọn ra vwọ diotọ. Ayen da udi vrẹka-a rere e vwo jẹ ayen ese ọgbaudi-i. Ohwo rọ da udi vrẹka se sun oma rọye-en, ọtiọyena ọ cha sa vwẹrote ukoko na-a.

¹² Ohwo ke sa dia oniruo vwevunrẹ ukoko na, ofori nẹ ọ dia dẹndẹn. A cha mrẹ omamọ rẹ uruemu rọyen na vwẹ osẹnvwe rọyen, uwevwin rọyen vẹ kemu kemu ro ruẹ vwẹ akpeyeren rọyen. Ohwo tiọyena bibe-e; ọ mrẹ obo ra guọnọre, ko ji muegbe hẹrhẹ. Ọ yan nene odjekẹ ri Baibol na.

¹³ Ofori nẹ oniruo dia ohwo ro vwo iroro, o mi ji nene ekpako ri chekọ wiankugbe. E jẹ ọ vwẹ ẹro abavo vwo ni oma rọyen vẹ ihwo efa. Kidie nẹ ọyen ohwo ro vwo iroro, o tinka muẹ ọrọyen ọvo-o, yẹrẹ ko no nẹ iroroẹjẹ rọyen yovwin nọ ọ rẹ ekpako ri chekọ-ọ. Ihwo efa se vwo iruemu vẹ ona ro je vwo. Ọkpako se djephia nẹ o vwo iroro siẹrẹ o de mu orhiẹn-ebro rọyen kpahen Baibol na je davwẹngba vwọ vwẹrokere udje ri Jesu. (Fil. 2:2-8) Ọkpako dia ohwo rẹ ẹghwọ-ọ yẹrẹ ohwo gudu gudu-u, ukperẹ ọtiọyen o muọghọ kẹ ihwo efa, o ji no nẹ ayen yovwin nọ ọyen. O mu oma kpenu-u, o siọrha-an yẹrẹ gba ihwo vwọ reyọ iroroẹjẹ rọye-en. Ọ fobọ mu ophu-u, ẹkẹvuọvo o nene ihwo efa yerẹn vwọrẹ ufuoma.

¹⁴ O ji fo nẹ oniruo dia ohwo rẹ ọsoso vwevunrẹ ukoko na. Ọnana mudiaphiyọ nẹ ọyen ohwo ro roro emu fiotọ, o brokpakpa brorhiẹ-ẹn. Ọ nabọ vwo ẹruọ rẹ irhi ri Jihova vẹ obo ra reyọ ayen vwo ruiruo wan. Ohwo tiọyena rhiabọreyọ uchebro vẹ odjekẹ. Ọ dia ohwo ro meruẹ-ẹ.

¹⁵ Pọl karophiyọ Taitọs nẹ oniruo ọyen ohwo rẹ ivun rẹ erhuvwu vwerhan. Ọyen ohwo rọ pha fuanfon rọ je fuevun. A mrẹ iruemu nana womarẹ obo ro nene ihwo yerẹn wan, kugbe oruru ro vwo kpahen obo ri yovwirin. Ẹga ri Jihova yen ọ vwọ kobaro ọkieje, ọ je nabọ yọnrọn irhi rọyen. Ọ sẹro rẹ odjahọn. O ji ru ẹse ghwologhwolo, ọ vwẹ oma rọyen wian kẹ ihwo efa, ọ je vwẹ ekuakua rọyen vwọ vwẹ ukẹcha kẹ ihwo.—Iruo 20:33-35.

¹⁶ Oniruo sa vwọ nabọ ruiruo rọyen fiotọ, ofori nẹ ọ goma rẹ uyono. Kirobo rẹ Pọl vuẹ Taitọs, oniruo “nabọ yọnrọn uyota rọ hẹ evun rẹ uyono na, rere o vwo se bruche vwẹ evun rẹ uyono na, kugbe o vwo se dje kẹ otu re phra aphro.” (Tai. 1:9) Ọ riẹn obo re dje ota fiotọ kẹ ihwo vẹ imuẹro, obo re se vwo te ubiudu rẹ ihwo ri vwo ẹwẹn ivivẹ vẹ obo ra reyọ Baibol na vwo ruiruo rere ihwo se vwo vwo imuẹro kpahọn, ji kpurhiẹnphiyọ esegbuyota rayen. Oniruo na reyọ ona rẹ uyono nana vwo ruiruo ọkieje, otoro ẹdia rọ hepha-a. (2 Tim. 4:2) O vwo odirin ra guọnọre a ke sa vwẹ ẹwẹn ri dẹndẹn vwọ ghwọku ohwo rọ yan chọ, yẹrẹ vwẹ ọkpọvi kẹ ohwo ro vwo ẹwẹn ivivẹ je chọn uko vwo ru emu esiri womarẹ esegbuyota. Ohwo da sa dia uvi rẹ oyono, owenẹ o yono otu yẹrẹ ohwo ọvuọvo, kọyen ọ yan mu uwan nana ra guọnọ mie oniruo na.

¹⁷ Ọyen obo re ghanre ekpako vwo vwobọ vwẹ iruo aghwoghwo na vọnvọn. Ofori nẹ a mrẹ phephẹn nẹ ayen vwẹrokere Jesu, ro phi iruo aghwoghwo na phiyọ ẹdia rẹsosuọ vwẹ akpeyeren rọyen. Jesu vwo ọdavwẹ rẹ idibo rọyen, ọ chọn ayen uko vwọ dia ewena vwẹ iruo aghwoghwo na. (Mak 1:38; Luk 8:1) Ekpako na ghwe vwo ọke-e, dedena ayen de vwo oruru vwẹ iruo aghwoghwo na, ọ cha nẹrhẹ oruru rẹ iniọvo rehẹ ukoko na ganphiyọ. Ekpako na vẹ erua rayen de nene iniọvo na wiankuẹgbe vwẹ iruo aghwoghwo na, ọ cha nẹrhẹ e “ru esegbuyota rẹ ohwohwo gan.”—Rom 1:11, 12.

¹⁸ E se roro nẹ iwan rehẹ Baibol na ra guọnọ mie ohwo re che vwo mu oniruo na gan nọ. Vwọrẹ uyota, o vwo oniruo vuọvo rọ cha sa yan mu iwan nana gbagba-a, jẹ ọ dia ọnana mudiaphiyọ nẹ ọvo vwẹ usun rẹ iwan ra guọnọ mie ọkpako vwọ kanre ohwo na te ẹdia rọ da teyomaphia gbonozẹ nẹ ọ yan mu uwan na-a. Ekpako evo se vwo ena iyoyovwin evo, efa se vwo ena efa. Ukuotọ rọyen, ekpako na eje mi rhi vwo ena iyoyovwin ra guọnọre rere ayen sa vwọ vwẹrote ukoko na.

¹⁹ Ekpako na nabọ karophiyọ eta rẹ ọyinkọn Pọl siẹrẹ ayen de jiri ohwo rẹ ayen che vwo mu ẹdia rẹ oniruo, rọ vwọ ta: “Me rẹ ohwo ọvuọvo vwẹ ohri rẹ ọvwan nẹ e jẹn ohwo ọvo rhe roro oma rọye rhuarho nọ obo rọ epha jovwo-o, ẹkẹvuọvo ovwan vwẹ oma kpotọ dẹndẹn, ọvuọvo kerẹ ọtiẹ esegbuyota rẹ Ọghẹnẹ vwọ kẹ.” (Rom 12:3) E jẹ ọkpako ọvuọvo ni oma rọyen kerẹ ohwo rọ ma hanvwe. Ekpako da fuẹrẹn iwan re vwo jiri ohwo phiyọ ẹdia rẹ ọkpako, e jẹ ọkpako vuọvo dia “ọvwata nọ-ọ.” (Aghwo. 7:16) Ọ vwọ dianẹ ekpako na eje riẹn iwan rehẹ Baibol na ra guọnọ mie ohwo re che vwo mu oniruo na, kẹ ayen nabọ fuẹrẹn oniọvo re jirẹ na sẹ ọ nabọ yan mu iwan na te ẹdia ro shephiyọ. Ọ dia jẹgba rẹ ohworakpọ yẹrẹ eta rẹ efian ri muẹro-o yen ekpako na vwọ fuẹrẹn ohwo na-a, ukperẹ ọtiọyen ayen fuẹrẹn ohwo na vwo nene irhi ri Jihova vẹ obo re cha ghwa erhuvwu rhe ukoko na. Ayen nabọ nẹrhovwo kpahen ihwo rẹ ayen che jiri na, ayen ji nene odjekẹ rẹ ẹwẹn ọfuanfon na. Ọnana ọvo usun rẹ oghwa rode rẹ ayen muẹ, ofori nẹ ayen ruo nene eta ri Pọl nana: “Wọ vwẹ ohwo guẹ ẹdjọ rẹ okpakpa-a.”—1 Tim. 5:21, 22.

²⁰ Eshare nana re vwo mu na djerephia nẹ ẹwẹn ọfuanfon na yen sun ayen, ayen ji dje omamọ rọyen phia vwẹ akpeyeren rayen. Ẹbẹre irhirin rẹ omamọ rẹ ẹwẹn ọfuanfon na rẹ Pọl djunute na yen “ẹguọnọ, aghọghọ, ufuoma, ako echiro, ufuefu, uyoyovwi, esegbuyota, dẹndẹn, oma echiro.” (Gal. 5:22, 23) Ekpako tiọyena nẹrhẹ ẹwẹn rẹ iniọvo na totọ, ayen je nẹrhẹ iniọvo rehẹ ukoko na kuomakugbe ga Jihova. Iruemu vẹ ẹgbaẹdavwọn rayen ghwa odjephia nẹ ẹwẹn ọfuanfon ri Jihova yen vwẹ ayen vwo mu.—Iruo 20:28.

²¹ Ọyen emu ọghanghanre ekpako vwo toroba oyerinkugbe rọhẹ evunrẹ ukoko na. Dede nẹ iruemu rayen sa fẹnẹ ohwohwo, ẹro rẹ ayen vwo ni emu sa je fẹnẹ ohwohwo, ayen nabọ kerhọ rẹ ohwohwo je sẹro rẹ oyerinkugbe rẹ ukoko na. Ayen muegbe ayen vwọ nuẹ ji bicha orhiẹn rẹ ekpako na takpẹ e vwọso odjekẹ ri Baibol vuọvo-o. A vwọ nuẹ ghwa odjephia rẹ “aghwanre ro nẹ obenu rhe,” rọ vọnre vẹ “ufuoma, dẹndẹn.” (Jems 3:17, 18) E jẹ ọkpako vuọvo roro nẹ ọyen yovwin nọ ekpako ri chekọ-ọ yẹrẹ ọ davwẹngba vwo suẹn ekpako ri chekọ-ọ. Ekpako na da wiankugbe kerẹ ẹko, ka sa tanẹ ayen vẹ Jihova yen gba wiankuẹgbe vwọ kẹ erhuvwu rẹ ukoko na.—1 Kọr., uyovwin 12; Kọl. 2:19.

²² Ofori nẹ eshare ri tedje pharhe ayen vwọ dia iniruo. (1 Tim. 3:1) Ẹkẹvuọvo, a vwọ ga kerẹ ọkpako guọnọ owian vẹ ẹwẹn rẹ omaevwoze. Ọnana mudiaphiyọ nẹ ọkpako na cha vwomakpahotọ vwọ vwẹ ukẹcha kẹ iniọvo na, je vwẹ ota rẹ Ọghẹnẹ vwo yono ayen. A vwọ pharhe vwọ dia oniruo mudiaphiyọ nẹ a cha davwẹngba vwọ yan mu iwan rehẹ Baibol ra guọnọ mie ọkpako.

²³ Oniọvo rọ fuevun ga vwẹ ikpe grongron rhire sa muọga yẹrẹ emuọvo se shechọ vwẹ oma rọyen siẹvuọvo. Ọ sa dianẹ fikirẹ ọghwo o rhe se ruiruo rọyen kerẹ oniruo-o. Dedena, ofori nẹ e ji muọghọ kẹ ji no kerẹ ọkpako kidie e ji sio nẹ ẹdia na-a. Ọ ghwa dianẹ ko che wontọ nẹ ẹdia rẹ ọkpako na fikirẹ jẹ omakpokpọ evwo rọyen na-a. O ji muwan rẹ ọghọ rẹ ọhwọhwọ ivẹ ro fori nẹ e mu kẹ ekpako ejobi re davwẹngba rayen eje vwọ vwẹrote uchuru na.

²⁴ Ẹkẹvuọvo, oniọvo ọshare se no nẹ o che yovwin siẹrẹ o de wontọ nẹ ẹdia rẹ ọkpako na kidie ẹdia rọyen ro weneri na cha nẹrhẹ ọ bẹn rọ vwọ ga kerẹ ọkpako. (1 Pita 5:2) Dedena, o ji fo nẹ e muọghọ kẹ ohwo tiọyena. Dede nẹ ọ rha ga kerẹ ọkpako-o, o ji se ru erọnvwọn buebun vwevunrẹ ukoko na.

²⁵ Ekpako vwẹrote iruo sansan vwevunrẹ ukoko na. O vwo ọrọvwẹrote iruo rẹ ekpako na, osiẹbe, oniruo rọvwẹrote iruo rẹga na, ọrọvwẹrote uyono rẹ ọbe Uwevwin Orhẹrẹ, kugbe oniruo rẹ Uyono rẹ Akpeyeren Avwanre vẹ Iruo Ruvie Na. Ekpako buebun ga kerẹ oniruo rọvwẹrote ẹko aghwoghwo. E bru ọke phiyotọ rẹ ekpako re ga vwẹ ẹdia nana eje cha ga te-e. Ẹkẹvuọvo, siẹrẹ oniọvo rọhẹ ẹdia na da kua kpo asan ọfa, yẹrẹ o rhe se ruiruo na fikirẹ jẹ omakpokpọ evwo-o, yẹrẹ ke siro nẹ ẹdia na kidie nẹ ọ rha yan mu iwan ra guọnọ mie ekpako-o, a sa vwẹ ọkpako ọfa vwo mu ẹdia yena. Vwẹ ikoko ri ghwe vwo ekpako bu-un, iruo rẹ ọkpako ọvo che ru sa vrẹ ọvo rhi te ọke rẹ oniọvo ọshare ọfa vwo muwan rọ vwọ dia ọkpako.

²⁶ Ọrọvwẹrote iruo rẹ ekpako na yen dia ochidiagbara rẹ echidiotọ rẹ ekpako. Dedena, ọ vwomakpotọ vwo nene ekpako ichekọ wiankuẹgbe vwọ vwẹrote igodẹ rẹ Ọghẹnẹ. (Rom 12:10; 1 Pita 5:2, 3) Ofori nẹ ọ dia ohwo ro ru ẹrọnvwọn nene ọrhuẹrẹphiyotọ, rọ sa vwẹrote echidiotọ vwẹ idjerhe abavo.—Rom 12:8.

²⁷ Osiẹbe na yen vwẹrote iyẹnrẹn rẹ ukoko na, ọ je vwẹ evuẹ eghanghanre vwo te obọ rẹ ekpako ri chekọ. O de shephiyọ, ọkpako ọfa yẹrẹ odibo rowian ro muwan sa vwẹ ukẹcha vwọ kẹ.

²⁸ Oniruo rọvwẹrote iruo rẹga na yen vwẹrote ọrhuẹrẹphiyotọ rẹ iruo aghwoghwo na vẹ ẹdia efa ri churobọ sio. O vwo ọrhuẹrẹphiyotọ rọ vwọ reyọ udughwrẹn ọvo kemeranvwe kemeranvwe vwọ kọn bru ẹko aghwoghwo ọvuọvo ra. Vwẹ ikoko itete ri ghwe vwo ẹko aghwoghwo buebu-un, ọ sa kọn bru ẹko ọvuọvo ra abọ ivẹ vwẹ ẹgbukpe. Ọ da kọn bru ayen ra, ọyen cha vwẹrote omẹvwa rẹ aghwoghwo na, o che nene iniọvo rehẹ ẹko na wiankugbe, je vwẹ ukẹcha kẹ ayen vwẹ orhivwinbrura vẹ uyono ri Baibol rayen.

²⁹ Ọvo usun rẹ uphẹn rẹ ẹga rehẹ ukoko na yen ra vwọ ga kerẹ oniruo rọvwẹrote ẹko aghwoghwo. Ewian rọyen churobọ si (1) ro vwo nenesi rẹ ọyọnregan rẹ ohwo ọvuọvo rọhẹ ẹko na; (2) rọ vwọ vwẹ ukẹcha kẹ ohwo ọvuọvo vwẹ ẹko na, o vwo vwobọ vwẹ iruo aghwoghwo na vọnvọn; kugbe (3) ro vwo yono ji vwẹ ukẹcha kẹ idibo rowian rehẹ ẹko na rere ayen se vwo yerin tedje ji muwan rẹ ewian efa vwẹ ukoko na. Ẹko rẹ ekpako na yen brorhiẹn rẹ eshare ri me muwan ri se ruiruo nana eje.

³⁰ Fikirẹ oborẹ iruo rẹ iniruo revwẹrote ẹko aghwoghwo na hepha na, ko fori nẹ ayen dia ekpako. Ẹkẹvuọvo, odibo rowian ro muwan sa vwẹrote iruo nana bẹsiẹ a vwọ mrẹ ọkpako rọ cha reyọ ẹdia na. Odibo rowian ra vwẹ iruo nana kẹ, ọyen e se odibo rọvwẹrote ẹko aghwoghwo, kidie ọ dia oniruo vwẹ ukoko na-a. Ẹkẹvuọvo, o ruiruo nana vwẹ otọ rẹ odjekẹ rẹ ekpako na.

³¹ Iruo ọghanghanre ọvo rẹ oniruo rọvwẹrote ẹko aghwoghwo ruẹ, ọyen ọ vwọ kobaro rẹ iruo aghwoghwo na. Oruru ro vwo kpahen iruo aghwoghwo na toroba oruru rẹ ihwo rehẹ ẹko na. O che yovwin siẹrẹ a da rhuẹrẹ iruo aghwoghwo rẹ ẹko na phiyọ ọke ro me shephiyọ kẹ ihwo buebun kidie iniọvo na vwẹ ẹro ọghanghanre vwo ni ọbọngan vẹ ukẹcha rẹ iniọvo efa. (Luk 10:1-16) Ofori nẹ oniruo na vwo imuẹro nẹ asan buebun herọ ra cha wian. Ọyen yen cha vwẹrote omẹvwa rẹ aghwoghwo na je ghare iniọvo na phiyọ ada. Ọ da dianẹ ọ cha sa rhe-e, e jẹ ọ vuẹ ọkpako ọfa yẹrẹ odibo rowian nẹ ọ vwẹrote iruo nana, ẹkẹvuọvo iniọvo nana rha herọ-ọ, ọ sa vuẹ oghwoghwota ro tedje nẹ o ruiruo nana rere iniọvo na se vwo nene odjekẹ ro fori.

³² Ofori nẹ oniruo rọvwẹrote ẹko aghwoghwo muegbe hẹrhẹ ẹcha rẹ oniruo rọvwẹrote iruo rẹga na, e jẹ ọ vuẹ ihwo rehẹ ẹko rọyen kpahọn vẹ erere rẹ ayen cha mrẹ norhe. Ihwo rẹ ẹko na eje da nabọ riẹn kpahen ọrhuẹrẹphiyotọ na, kẹ ayen se nene vẹ omavwerhovwẹn.

³³ Ihwo rehẹ ẹko vuọvo ghwe buẹ-ẹn. Ọnana nẹrhẹ oniruo rọvwẹrote ẹko na nabọ vughe ihwo rehẹ ẹko rọyen. Kerẹ osuigodẹ ro vwo ẹguọnọ, o vwo ọdavwẹ rẹ ohwo ọvuọvo. Ọ davwẹngba vwọ vwẹ ukẹcha vẹ uchebro vwọ kẹ ohwo ọvuọvo vwẹ iruo aghwoghwo na vẹ oborẹ ayen se vwo vwobọ vwẹ emẹvwa rẹ Inenikristi vọnvọn. O ji ru kemu kemu ra guọnọre ọ sa vwọ vwẹ ukẹcha kẹ ohwo ọvuọvo vwọ yọnre gan. Ihwo re muọga vẹ e rẹ ofu dje cha mrẹ erere siẹrẹ ọ da kọn bru ayen ra. Omamọ rẹ iroroẹjẹ yẹrẹ ota rẹ uchebro rọyen sa nẹrhẹ iniọvo evo yan obaro ji muwan vwọ kẹ uphẹn rẹ ẹga efa vwẹ ukoko na, iniọvo nana me je vwẹ ukẹcha kẹ iniọvo rayen. Aphro herọ-ọ, ihwo rehẹ ẹko rọyen yen oniruo rọvwẹrote ẹko aghwoghwo na cha ma ghwọrọ ọke vwọ kẹ. Ẹkẹvuọvo, kerẹ ọkpako vẹ osuigodẹ, o vwo ọdavwẹ rẹ iniọvo na eje rehẹ ukoko na, ọ je choma rọ vwọ vwẹ ukẹcha kẹ kohwo kohwo rọ guọnọ ukẹcha.—Iruo 20:17, 28.

³⁴ Iruo ọvo ro te oniruo rọvwẹrote ẹko aghwoghwo, ọyen ro vwo koko iyẹnrẹn rẹ ihwo rehẹ ẹko rọyen vwẹ oba rẹ emeranvwe. Ọ me reyọ iyẹnrẹn nana vwọ kẹ osiẹbe rẹ ukoko na. Oghwoghwota ọvuọvo da fobọ niyẹnrẹn rọyen, jẹ ọ vwẹ ukẹcha kẹ oniruo rọvwẹrote ẹko na. Ayen sa vwẹ iyẹnrẹn na vwọ kẹ oniruo rọvwẹrote ẹko na siẹrẹ emeranvwe de ghwe re, yẹrẹ ayen se phio phiyọ ekpeti ra rhuẹrẹ vwọ kẹ vwevunrẹ Ọguan Ruvie.

³⁵ O vwo ewian evo rẹ Umẹ Rọvwẹrote Iruo rẹ Ẹga rẹ Ukoko na ruẹ; ọrọvwẹrote iruo rẹ ekpako na, osiẹbe na, vẹ oniruo rọvwẹrote iruo rẹga na yehẹ evunrẹ umẹ nana. Kerẹ udje, umẹ rọvwẹrote iruo rẹ ẹga rẹ ukoko na yen ghwobọphiyọ ọrhuẹrẹphiyotọ ra vwọ vwẹ Ọguan Ruvie na vwo ru irueru rẹ orọnvwe vẹ orivwin esho, ayen yen je ghare ighwoghwota na phiyọ ẹko sansan. Umẹ nana yen ghwobọphiyọ ifọmu rẹ ọkobaro ọkieje, ọ rẹ ubrọke, kugbe e rẹ uphẹn rẹ ẹga efa. Umẹ rọvwẹrote iruo rẹ ẹga na wian vwẹ otọ rẹ odjekẹ rẹ ekpako na.

³⁶ Oghọn ukoko nabọ vwẹ odjekẹ phia kpahen iruo rẹ iniọvo nana ọvuọvo vẹ e rẹ ọrọvwẹrote Uyono rẹ Uwevwin Orhẹrẹ, oniruo rẹ Uyono rẹ Akpeyeren Avwanre vẹ Iruo Ruvie Na, kugbe ekpako efa.

³⁷ Vwẹ ukoko ọvuọvo ekpako na vwoma nọke ra ruọke ayen vwọ ta eta ri shekpahen ẹyan obaro rẹ ukoko na. Vwọba omẹvwa rẹ ekpako re ruẹ ọke rẹ oniruo okinriariẹ da rhe, oniruo okinriariẹ na de kpo nu ekpako na je vwoma omarẹ emeranvwe erha da wan nu. Ẹkẹvuọvo, ekpako na sa vwoma vwẹ ọke efa fikirẹ emu ọvo yẹrẹ ọfa.

³⁸ Iniruo na gbare-e; dedena, e jiriro kẹ ihwo eje rehẹ ukoko na nẹ ayen vwomakpotọ kẹ ayen kidie ọnana ọrhuẹrẹphiyotọ ri Jihova. Ọ cha nọ ekpako na orhiẹn kpahen oborẹ ayen wian te. Ayen ruiruo nana vwọ kẹ Ọghẹnẹ, ayen ji nene usuon rọyen. Hibru 13:17 da ta: “Mu ọghọ kẹ isun rẹ ovwan vwẹ oma kpotọ kẹ ayen; kidie ayen re sẹro re ẹnwẹn rẹ ovwan, ayen je hẹ ihwo re cha nẹ iyẹnrẹ kpahe ovwan. We jẹn ayen ru ọna vẹ omavwerhe, ọ dia ọ rẹ opharo emuohọ-ọ, kidie ọyena fi erere kẹ wẹ-ẹ.” Kirobo rẹ Jihova vwẹ ẹwẹn ọfuanfon na vwọ vwẹ ọshare vwo muẹ na, ọtiọyen ọ je cha vwẹ ẹwẹn ọfuanfon yena vwo si ọshare vwo nẹ ẹdia rẹ oniruo ọ da dianẹ o rhe dje omamọ rẹ ẹwẹn ọfuanfon na phia-a, o rhe ji yeren akpọ nene irhi ri Baibol na-a.

³⁹ Wo vwo ọdavwaro kpahen iruo ọgangan vẹ omamọ udje rẹ iniruo rẹ ukoko na? Ọke rẹ Pọl vwo siẹ rhe ukoko rọhẹ Tẹsalonaika, ọ da vuẹ iniọvo na: “Imoni, avwanre rẹ ovwan, rere we mu ọghọ kẹ ihwo re wian owian vwẹ ohri rẹ ovwan re phihọ nẹ i sun ovwan ri yono ovwan, we mu ayen kpenu, we tete ayen vwẹ evun rẹ ẹguọnọ vwi fiki rẹ iruo rayen. Ovwan yeri kugbe wurhie wurhie vwẹ ohri rẹ ovwan.” (1 Tẹsa. 5:12, 13) Iruo ọgangan rẹ ekpako na nẹrhẹ avwanre riavwerhen rẹ ẹga ra vwọ kẹ Jihova. Vwọba, vwẹ ileta rẹsosuọ ro si rhe Timoti, Pọl de djunute uruemu ro fori nẹ iniọvo na vwo kpahen iniruo na, ọ da ta: “E jẹn otu rẹ ekpako na re riẹn sun vwo omamọ rẹ ọghọ re mu kẹ ayen, marho kẹ otu re wian owian rẹ eghwoghwo kugbe uyono.”—1 Tim. 5:17.

⁴⁰ Ọkiọvo, a vwẹ ekpako evo vwo muẹ re Kọn Brẹ Iniọvo rẹ Oma Rayen jẹ Gan vwevunrẹ họspito. Efa ga vwẹ Umẹ Rọvwẹrote Omaesivwo, ayen jiro vwọ kẹ idọktọ sansan vwẹ họspito buebun nẹ Iseri ri Jihova guọnọ omamọ rẹ omaesivwo ababọ rẹ ọbara. Iniruo efa ji vwẹ ukẹcha phia vwọ bọn je vwẹrote Eguan Ruvie vẹ Eguan Romẹvwa yẹrẹ ga vwẹ Umẹ Rọvwẹrote Ọghwẹkoko. Ihwo rehẹ ukoko na eje vwo ọdavwaro kpahen owian ọgangan rẹ iniọvo nana vẹ owenvwe rẹ ayen vwo ruiruo na. Vwọrẹ uyota, avwanre “mu ọghọ kẹ oghẹre rẹ [ihwo] ọtiọye.”—Fil. 2:29.

⁴¹ Ẹko Rọvwẹrote na vwo ọrhuẹrẹphiyotọ ra vwọ reyọ ekpako ri muwan vwo muẹ kerẹ iniruo okinriariẹ. Oghọn ukoko yen ji ayen kpo ikoko rehẹ okinriariẹ rayen, ọke buebun abọ ivẹ ẹgbukpe. Vwẹ ọke sansan, ayen je kọn brẹ ekobaro rehẹ asan ri bẹn ete. Ayen nabọ rhuẹrẹ oyan rayen phiyọ, kẹ ayen vuẹ ukoko ọvuọvo phiyotọ krekri rere ekion rayen na vwọ ghwa ebruphiyọ buebun rhe.

⁴² Ọrọvwẹrote iruo rẹ ekpako na yen kobaro rẹ egbemuo na, rọ vwọ rhuẹrẹ erọnvwọn phiyọ rere ihwo eje vwọ mrẹ ọbọngan vwo nẹ ekion na rhe. (Rom 1:11, 12) Ovuẹ rẹ ikiekin na de te ukoko na obọ, kugbe ọdavwẹ rẹ oniruo okinriariẹ na vẹ aye rọyen (siẹrẹ ọ da rọvwọn nure), ọrọvwẹrote iruo rẹ ekpako na kọ cha womarẹ iniọvo efa vwo muegbe rẹ asan rọ cha dia vẹ erọnvwọn efa. O che vwo imuẹro nẹ ihwo eje ji te oniruo okinriariẹ na riẹn kpahen ọrhuẹrẹphiyotọ nana.

⁴³ Oniruo okinriariẹ na cha nokpẹn rẹ evuẹ ri shekpahen ọrhuẹrẹphiyotọ rẹ uyono vẹ echidiotọ sansan kugbe iruo aghwoghwo na vwo mie ọrọvwẹrote iruo rẹ ekpako na. E che muegbe rẹ erọnvwọn nana vwo nene iroroẹjẹ rẹ oniruo okinriariẹ na vẹ odjekẹ ro nẹ oghọn ukoko rhe. E che jẹ ihwo eje riẹn kpahen ọke vẹ asan re de che ru uyono, echidiotọ rẹ ekobaro vẹ ekpako kugbe idibo rowian, ọtiọyen ji te ọke vẹ asan ra da cha vwoma vwo kpo ada.

⁴⁴ Vwẹ oghẹruvo ri Tuesday, oniruo okinriariẹ na kọ cha fuẹrẹn Congregation’s Publisher Records, iyẹnrẹn rẹ ihwo re rhe uyono, iyẹnrẹn rẹ ekogho rẹ ukoko na de ghwoghwo, kugbe igho rẹ ukoko na. Ọnana cha nẹrhẹ ọ riẹn ọdavwẹ rẹ ukoko na vẹ obo rọ sa vwọ vwẹ ukẹcha kẹ ihwo re vwẹrote ewian nana. Ofori nẹ ọrọvwẹrote iruo rẹ ekpako na vwo ọrhuẹrẹphiyotọ rere iyẹnrẹn nana eje vwọ fobọ te oniruo okinriariẹ na obọ.

⁴⁵ Oniruo okinriariẹ na da rhe, o nene oniọvo ọvuọvo ta ota kuẹgbe vwẹ uyono, iruo aghwoghwo na, ọke rẹ emuọre, vẹ ọke efa. Vwọba, ọ vẹ ekpako na kugbe idibo rowian vwoma, vwevunrẹ omẹvwa na, ọ kẹ ayen uchebro ri Baibol na, iroroẹjẹ, kugbe ọbọngan re sa vwẹ ukẹcha kẹ ayen vwọ vwẹrote uchuru na. (Isẹ 27:23; Iruo 20:26-32; 1 Tim. 4:11-16) Ọ vẹ ekobaro na je vwoma rere ọ sa vwọ bọn ayen gan vwẹ iruo rayen, ọ me je vwẹ ukẹcha vwọ kẹ ayen kpahen ebẹnbẹn rẹ ayen rhiẹromrẹ vwẹ iruo aghwoghwo na.

⁴⁶ Eta efa da je herọ ro fori nẹ a rhuẹrẹphiyọ, oniruo okinriariẹ na cha davwẹngba vwọ rhuẹrẹphiyọ vwevunrẹ udughwrẹn na. Ọ rha sa rhuẹrẹphiyọ vwẹ uvwre rẹ udughwrẹn na-a, oniruo okinriariẹ na kọ cha vwẹ ukẹcha kẹ ekpako na yẹrẹ ihwo rẹ ota na shekpahen vwo ru ehiahiẹ kpahen odjekẹ ri Baibol na ri shekpahen ẹdia na. Ọ da dianẹ ofori nẹ oghọn ukoko ru orọnvwọn kpahen ota na, ọ vẹ ekpako na ki che si obo re phiare eje vwo rhe oghọn ukoko kpahen ota na.

⁴⁷ Oniruo okinriariẹ na nene ukoko na kpo uyono rẹ udughwrẹn na vwẹ ọke ro de kiẹn ayen na. E se wene ọrhuẹrẹphiyotọ nana vwo nene odjekẹ ro nẹ oghọn ukoko rhe. Ofori nẹ eta rọyen bọn ukoko na gan ji mu ayen vwo ru obo ri yovwirin. Ọ vwẹ ukẹcha vwọ kẹ iniọvo na rere ayen vwo vwo ẹguọnọ ri Jihova, Jesu Kristi, kugbe ukoko na.

⁴⁸ Erere ọvo rẹ ekion rẹ oniruo okinriariẹ ghwa cha ọyen ro vwo toroba oruru rẹ iruo aghwoghwo na, kọ je vwẹ iroroẹjẹ ro shephiyọ vwọphia. Iniọvo buebun rhuẹrẹ ọke rayen phiyọ rere ayen se vwo vwobọ vwẹ iruo aghwoghwo na vọnvọn vwẹ udughwrẹn yena, ọkiọvo ayen se vwobọ vwẹ iruo rẹ ọkobaro ubrọke vwẹ emeranvwe yena. Kohwo kohwo rọ guọnọ nene oniruo okinriariẹ na yẹrẹ aye rọyen wiankugbe se si odẹ rọyen phiyotọ. Erhuvwu buebun che norhe siẹrẹ oniruo okinriariẹ yẹrẹ aye rọyen de nene avwanre kpo orhivwinbrura vẹ uyono ri Baibol. Ẹgbaẹdavwọn wẹn wo vwo bicha ọrhuẹrẹphiyotọ rẹ udughwrẹn rẹ ekion na pha ghanghanre mamọ.—Isẹ 27:17.

⁴⁹ Kukpe kukpe, isikoko ivẹ yen e muegbe rọyen vwọ kẹ okinriariẹ ọvuọvo. Oniruo okinriariẹ na yen vwẹrote ọrhuẹrẹphiyotọ rẹ isikoko nana. Oniruo okinriariẹ na yen vwẹ ọkpako rọ vwẹrote osikoko na vwo muẹ, ọtiọyen ji te ọ rọ vwẹ ukẹcha vwọ kẹ. Ayen nabọ nene oniruo okinriariẹ na wiankuẹgbe vwẹ ẹroevwote rẹ osikoko na. Ọnana cha nẹrhẹ oniruo okinriariẹ na mu ẹwẹn kpahen ọrhuẹrẹphiyotọ rẹ osikoko na. Ọ je vwẹ iniọvo ri tedje vwo muẹ, re vwẹrote akon iruo sansan. Osikoko ọvuọvo de kuphiyọ nu, o ji vwo ọrhuẹrẹphiyotọ ra vwọ fuẹrẹn igho rehẹ ekpu rẹ okinriariẹ na. Vwẹ osikoko ọvo vwẹ ukpe na, e ji ọtota ọvo nẹ oghọn ukoko cha, kọ ga kerẹ ọtota ọrhorha re ji rhe. Ọ da dianẹ asan rẹ okinriariẹ na de kpo osikoko pha shesheri yẹrẹ asan re de che ru osikoko na pha hanhanvwe, a sa ghare ikinriariẹ evo ẹkuẹko e mi ru osikoko vwọ kẹ ẹko ọvuọvo.

⁵⁰ Oniruo okinriariẹ na niyẹnrẹn rọyen rhe oghọn ukoko vwẹ oba rẹ emeranvwe na. Ọ da dianẹ ukoko ro kiẹn na sa hwa igho rọ ghwọrọ phiyọ erọnvwọn kerẹ omaẹfan, emuọre, asan rọ cha dia, vẹ erọnvwọn efa rọ guọnọre vwẹ iruo rọye-en, o se si rhe oghọn ukoko kpahọn. Iniruo ri kiẹn vwo imuẹro nẹ ayen de phi Uvie ri Jihova phiyọ ẹdia rẹsosuọ, e che ru edavwẹ ri chekọ kẹ ayen kirobo rẹ Jesu veri. (Luk 12:31) Ọnana uphẹn ọghanghanre rẹ ukoko na vwo ruẹse kẹ ekpako nana re vwomakpahotọ vwọ ga ayen na.—3 Jọn 5-8.

⁵¹ Vwẹ akpọneje, vwẹ oghọn ukoko ọvuọvo rẹ Iseri ri Jihova, ọ da hanvwe a vwẹ ekpako erha ri tedje vwo muẹ, kẹ ayen ga kerẹ Umẹ Rọvwẹrote Oghọn Ukoko, ayen yen mu usiokọ rẹ iruo aghwoghwo na vwẹ ẹkuotọ sansan rẹ oghọn na vwẹrote. Ọvo usun rẹ iniọvo rehẹ umẹ nana ga kerẹ ọrọvwẹrote iruo rẹ Umẹ Rọvwẹrote Oghọn Ukoko na.

⁵² Iniọvo re ga vwẹ Umẹ Rọvwẹrote Oghọn Ukoko na nenesi rẹ eta ri shekpahen ikoko na eje rẹ oghọn na vwẹrote. Umẹ na yen vwẹrote iruo aghwoghwo na vwẹ kasan kasan rẹ oghọn na vwẹrote, ayen je vwẹ ikoko vẹ ikinriariẹ vwo muẹ re sa vwẹrote edavwẹ rẹ ekogho na. Umẹ Rọvwẹrote Oghọn Ukoko na je vwẹrote iruo rẹ imishọnare, ọkobaro oghẹresan, ọ rẹ ọkieje, kugbe ọ rẹ ubrọke. Vwẹ ọke rẹ osikoko vẹ eghwẹkoko, umẹ nana yen ru ọrhuẹrẹphiyotọ je ghare iruo sansan rere “e ru emu na ejobi dẹndẹn utute.”—1 Kọr. 14:40.

⁵³ A vwẹ Umẹ rẹ Ẹkuotọ vwo muẹ vwẹ ẹkuotọ evo rehẹ otọ rẹ ẹroevwote rẹ Umẹ Rọvwẹrote Oghọn Ukoko rẹ ẹkuotọ ọfa. Ọnana nẹrhẹ a nabọ vwẹrote iruo na vwẹ asan rẹ Umẹ rẹ Ẹkuotọ hepha. Umẹ nana vwẹrote eta ri shekpahen Bẹtẹl, ọtiọyen ji te ileta vẹ iyẹnrẹn, kugbe iruo aghwoghwo na. Umẹ rẹ Ẹkuotọ na vẹ Umẹ Rọvwẹrote Oghọn Ukoko wiankuẹgbe rere ọdavwẹ rẹ Uvie na vwọ yan obaro.

⁵⁴ Ẹko Rọvwẹrote na yen vwẹ iniọvo rehẹ Umẹ Rọvwẹrote Oghọn Ukoko vẹ e rehẹ Umẹ rẹ Ẹkuotọ vwo muẹ.

⁵⁵ Nọke ra ruọke, Ẹko Rọvwẹrote vwo ọrhuẹrẹphiyotọ rere iniọvo eshare ri tedje vwo kin oghọn ukoko ọvuọvo vwẹ akpọneje. Oniọvo nana yen e se oniọvo re ji nẹ esiri ukoko rhe. Iruo rọyen kiriguo ọyen rọ vwọ bọn orua ri Bẹtẹl gan ji vwẹ ukẹcha kẹ Umẹ Rọvwẹrote Oghọn Ukoko na vwọ rhuẹrẹ ebẹnbẹn phiyọ je kpahenphiyọ enọ ri shekpahen iruo aghwoghwo na. Oniọvo nana ji nene iniruo okinriariẹ evo vwoma, o ji nene imishọnare vwoma vwẹ ọke evo. O nene ayen ta ota kpahen ebẹnbẹn vẹ edavwẹ rayen, ọ je vwẹ uchebro ro fori vwọ kẹ ayen kpahen iruo aghwoghwo na.

⁵⁶ Oniọvo re ji nẹ esiri ukoko rhe vwo ọdavwẹ kpahen oborẹ iruo aghwoghwo na yan obaro te vwẹ ẹkuotọ na, ọtiọyen ji te iruo rẹ ukoko na efa. Ọke da herọ, o se kpo asan re de ruiruo rẹ efanfan. Oniọvo re ji nẹ esiri ukoko rhe na je davwẹngba vwo vwobọ vwẹ iruo aghwoghwo na vwẹ oghọn ro kiẹn na.

⁵⁷ Avwanre mrẹ erere gbidiki vwo nẹ iruo ọgangan vẹ ẹroevwote rẹ eshare ri tedje. Avwanre da vwomakpotọ yan nene odjekẹ rẹ iniruo re vwẹrote igodẹ na, ọ cha nẹrhẹ e vwo oyerinkugbe vẹ Ọgbuyovwin rẹ ukoko na, Jesu Kristi. (1 Kọr. 16:15-18; Ẹfe. 1:22, 23) Ọtiọyena, ẹwẹn ọfuanfon rẹ Ọghẹnẹ kọ cha nabọ dia evunrẹ ikoko rehẹ akpọneje, Ota rẹ Ọghẹnẹ ko ji che sun iruo na vwẹ akpọneje.—Une 119:105.