Baibol na wene ohwo

• UKPE RE VWIẸRẸ: 1941

• ẸKUOTỌ RO NURHE: BENIN

• IKUEGBE: ỌSHARE RỌ RỌVWỌN EYA BUEBUN, RỌ JE VWỌSO ISERI RI JIHOVA

AKPỌ MI YERIN JOVWO:

Cotonou rọ dia orere rode vwẹ Benin yen e de vwiẹ vwẹ. Ẹga rẹ Ifada yen me ra, dedena, ọ dia ọkieje yin mi vwo kpo ishọshi-i. Ihwo buebun ri kpo ẹga rẹ Ifada vwẹ asan me dia vwẹ eya buebun kidie vwẹ ọke yena, urhi rhọnvwere nẹ ọshare se vwo eya ibuebun. Ukuotọ rọyen, me da rọvwọn eya ẹne.Ọke rẹ ẹvwọsuọ re vwo wene usuon vwọ tonphiyọ vwẹ ukpe ri 1970, ki mi roro nẹ o che fierere kẹ ẹkuotọ mẹ. Me nabọ bicha ẹvwọsuọ na, ọ da nẹrhẹ mi vwobọ vwẹ oseghe rẹ usuon. Kidie nẹ Iseri ri Jihova vwomaba oseghe rẹ usuo-on, ivun rẹ Iseri na ki miovwon ihwo re vwọso usuon na. Mẹvwẹ ọvo usun rẹ ihwo re vwọso Iseri na. Ọke ra vwọ djẹ Iseri ri Jihova re dia imishọnari nẹ ẹkuotọ na vwẹ ukpe rẹ 1976, o muvwẹro nẹ ayen gbi che rhivwin rhe-e.

OBORẸ BAIBOL NA WENE UVWE WAN:

Ẹvwọsuọ re vwo wene usuon na de rhi vwoba vwẹ 1990. O gbevwunu nẹ Iseri ri Jihova re dia imishọnari na rhoma rhivwin rhe. Ki mi roro nẹ ọ sa ghene dianẹ Ọghẹnẹ vẹ ihwo nana herọ. Vwẹ uvwre ọke yena, mi de wene asan rẹ mi de ru iruo. Ohwo ọvo re me vẹ ọyen gba wian, ọyen Oseri ri Jihova, o hwọke ọ ke vuẹ ihwo kpahen esegbuyota rọye-en. O dje awọreta evo vwẹ Baibol na kẹ vwẹ ri dje Jihova phiyọ Ọghẹnẹ rẹ ẹguọnọ ro ji brorhiẹn rẹ ọsoso. (Urhi Rivẹ 32:4; 1 Jọn 4:8) Iruemu yena je vwe mamọ. Mi guọnọ yono kpobarophiyọ kpahen Jihova, ọtiọyena, mi de rhiabọreyọ uyono ri Baibol.

O kriri-i, ki mi kpo emẹvwa rẹ Iseri ri Jihova. Ẹguọnọ rẹ ayen djephia te vwe ẹwẹn mamọ​​—ayen nama vwo uruemu rẹ omaẹfẹnẹ fikirẹ ohọroma yẹrẹ ẹdia rẹ ohwo hepha-a. Mi vwo siẹkẹrẹ ayen phiyọ ye, ko rhi muvwẹro nẹ ayen yen Inenikristi rẹ uyota.​—Jọn 13:35.

Mi de brorhiẹn nẹ ofori mi vwo vrẹn nẹ ẹga rẹ Ifada me da guọnọ ga Jihova. Orhiẹn yena dia obo re lọhọ kẹ vwẹ-ẹ, kidie oshọ rẹ oborẹ ihwo cha ta mu vwe. Ọke vwọ yanran na, womarẹ ukẹcha ri Jihova, mi de fiudugberi siọbe rhe ayen nẹ mi rhe che kpo ishọshi rẹ ega rẹ Ifada-a.

O ji vwo ewene rode ọfa ro fori nẹ mi ru. Baibol na yono uvwe nẹ Ọghẹnẹ rhọnvwephiyọ orọnvwe rẹ ọshare ọvo vẹ eya ibuebu-un. (Jẹnẹsis 2:​18-​24; Matiu 19:​4-6) Vwẹ ẹro ri Jihova, orọnvwe rẹsosuọ mẹ ọvo yen ọ rhọnvwephiyọ. Ọtiọyena, mi de ru orọnvwe rẹ aye rẹsosuọ mẹ na vwo nene urhi, mi de siobọnu eya ichekọ mẹ na ji ru ọrhuẹrẹphiyotọ me vwọ vwẹrote ọdavwẹ rayen. Ọke vwọ yanran na, ivẹ usun rẹ eya mẹ ri jovwo da rhe dia Iseri ri Jihova.

ERERE RE ME MRẸRE:

Dede nẹ aye mẹ ji kpo ẹga rẹ Ifada, o muọghọ kẹ orhiẹnbro mẹ me vwọ ga Jihova. Avwanre ihwo ivẹ rhe mrẹvughe nẹ me rhe dia omamọ ọshare re.

Mi ke roro nẹ me sa vwẹ ukẹcha kẹ ihwo rẹ orere mẹ womarẹ oseghe rẹ usuon, ẹkẹvuọvo, ẹgbaẹdavwọn mẹ eje shefia. Enẹna me rhe mrẹvughe re nẹ Uvie rẹ Ọghẹnẹ ọvo yen se si ebẹnbẹn rẹ ihworakpọ eje no. (Matiu 6:9, 10) Me kpẹvwẹ Jihova nẹ o dje oborẹ mi se vwo yeren akpọ rẹ omavwerhovwẹn kẹ vwẹ.

• UKPE RE VWIẸRẸ: 1977

• ẸKUOTỌ RO NURHE: BRAZIL

• IKUEGBE: IPASTỌ RẸ ISHỌSHI RI PENTECOSTAL

AKPỌ MI YERIN JOVWO:

Otafe orere rẹ Itu rọhẹ São Paulo yen me dia ghwanre. A riẹn ihwo rehẹ ẹbẹre rẹ orere nana phiyọ ihwo ri gbozighi mamọ.

Mẹvwẹ onogbozighi ro ji gbe ọfanrhiẹn mamọ. Vwọba, me je shẹ ihuvwun egangan. Ọke vwọ yanran na, me da rhe mrẹvughe nẹ oka rẹ akpọ tiọyena sa nẹrhẹ e mu vwe phiyọ uwodi yẹrẹ so ughwu kẹ vwẹ, ọtiọyena, me da dobọ rọyen ji. Me da vwomaba Ishọshi ri Pentecostal, ukuko na, me da rhe dia ipastọ.

Mi rorori nẹ me sa womarẹ iruo mẹ vwẹ ishọshi na vwọ chọn ihwo efa uko. Me tobọ womarẹ iredio rẹ orho na vwo ghwoghwota kẹ ihwo, ọnana da nẹrhẹ mi titi vwẹ ekogho na. Ememerha na, me da rhe mrẹvughe nẹ ishọshi na davwerhọn rẹ ihwo ri kpo ẹga na-a​​—ayen tobọ vwo ọdavwaro kpahen obo re cha ghwa ujiri bru Ọghẹnẹ rhe-e. Mi niro nẹ ọdavwẹ rayen ghwa igho na ọvo. Ọtiọyena, mi de brorhiẹn mi vwo nẹ ishọshi na.

OBORẸ BAIBOL NA WENE UVWE WAN:

Ugege me ghwa vwọ ton uyono ri Baibol phiyọ vẹ Iseri ri Jihova yen me vwọ mrẹvughe nẹ ayen fẹnẹ ẹga efa. Vwọ kẹ vwẹ, erọnvwọn ivẹ kiriguo yen je vwe vwẹ oma rayen. Ẹsosuọ, ọ dia ayen de ta ota kpahen ẹguọnọ rẹ Ọghẹnẹ vẹ ọrivẹ rayen ọvo-o; ayen djephia. Ọrivẹ, ayen vwobọ vwẹ oseghe rẹ usuon yẹrẹ ifovwi-in. (Aizaya 2:4) Erọnvwọn ivẹ nana yen nẹrhẹ o muvwẹro nẹ me mrẹ ẹga rẹ uyota, rọ dia idjerhe ọhwahwa ro suẹn kpo arhọ ri bẹdẹ na re.​​—Matiu 7:​13, 14.

Me rhe mrẹvughe nẹ ofori mi vwo ruẹ ewene evo kiriguo ọ da dianẹ me guọnọ ru obo re cha nẹrhẹ oma vwerhen Ọghẹnẹ. Ofori nẹ mi nene orua mẹ ghwọrọ ọke kugbe. O ji fo nẹ me vwomakpotọ phiyọ. Ọ lọhọ kẹ vwẹ mi vwo ru ewene ri fori-i, ẹkẹvuọvo, mi se phikparobọ womarẹ ukẹcha ri Jihova. Ewene mẹ vwerhen aye mẹ oma mamọ. Ọyen ka ton uyono ri Baibol phiyọ, ẹkẹvuọvo asaọkiephana, ọ yan obaro vwẹ uyono rọyen ghwraghwraghwra. O hwọke o ki mu avwanre ẹro nẹ avwanre guọnọ dia Iseri ri Jihova-a. Ẹdẹ vuọvo yen avwanre vwo bromaphiyame.

ERERE RE ME MRẸRE:

Me vẹ aye mẹ chọn emọ erha avwanre uko vwo vwo uvi rẹ oyerinkugbe vẹ Jihova. Oma vwerhen avwanre ihwo eje rehẹ uvun rẹ orua na. Me kpẹvwẹ Jihova rọ vwọ nẹrhẹ mi mrẹ uyota ri Baibol na vughe. O ghini wene ohwo! Akpeyeren mẹ dje ọnana phia.

• UKPE RE VWIẸRẸ: 1957

• ẸKUOTỌ RO NURHE: AUSTRALIA

• IKUEGBE: Ọ RIOJA VWẸ ỌKIEMỌ

AKPỌ MI YERIN JOVWO:

Newcastle vwẹ New South Wales yen me dia ghwanre. Mẹvwẹ yen ọmọkpako vwẹ usun rẹ emọ ighwrẹn, ọsẹ mẹ ọgbaudi kugbe ohwo ro gbe ozighi, oni mẹ dede ji vwo omavwerhovwẹn kpahen ozighi egbe. Oni mẹ vwẹ ekan vwọ họ vwẹ ji hwe vwe. Kọke kọke yen ọ vwọ vuẹ vwẹ nẹ mẹ vwẹ orharhe ọmọ, nẹ me cha rioja vwẹ erhanre ri bẹdẹ. Eta rọyen phi oshọ phiyọ oma mẹ.

Ọkiọvo mi kpo isikuru-u fikirẹ era rẹ ehwe na re vọn oma mẹ. Me vwọ hẹ ẹgbukpe 11, ihwo rẹ igọmẹti de mu vwe jẹ ọsẹ vẹ oni mẹ vwo, ukuotọ rọyen e de rhe mu vwe kpo uwevwin rẹ ishọshi ra da vwẹrote emọ. Mi vwo te ẹgbukpe 14, me da djẹ nẹ uwevwin rẹ ishọshi na. Me guọnọ rhivwin kpo bru ọsẹ vẹ oni mẹ ra-a, ọtiọyena, urhuvwu rẹ Kings Cross, vwẹ Sydney kọyen me dia.

Ọke me vwọ dia urhuvwun na, ke me reyọ ihuvwun egangan, da udi vrẹ oma, nẹ ihoho rẹ ihwo re banphiyọ ji gbe ọfanrhiẹn. Emuọvo phiare rọ nẹrhẹ oshọ mu vwe. Uvun ọvo vwẹ uwevwin rẹ ohwo ọvo ro vwo nightclub yen me dia. Ovwọnvwọn rẹ ẹdẹ ọvo, eshare ivẹ de bro rhe. Ọ da vuẹ vwẹ nẹ mi kpo o bẹ uvun, ẹkẹvuọvo mi nyo oborẹ ayen ta. Ohwo ro vwo club na jiroro rọ vwọ shẹ vwẹ kẹ eshare ivẹ na. Ayen guọnọ sivwe nu vwẹ okuna ro kpo Japan rere me rha wian vwẹ asan ra da shẹ idi vẹ erọnvwọn efa. Ke me phariẹ, me da wan ovakpo rẹ uwevwin na djẹ guọnọ ukẹcha.

Me da mrẹ ọshare ọvo rọ rhe Sydney, me da vuẹ kpahen ẹdia mẹ na vẹ ẹwẹn nẹ ọ cha kẹ vwẹ igho. Ukperẹ ọtiọyen, o de durhie uvwe kpo uwevwin rọyen rere me sa vwọ họ je riemu. Fikirẹ oborẹ ekuakua hepha, mi rhe vrẹn nẹ etiyi-in. Ẹgbukpe ọvo vwọ wan nu, avwanre da rọvwọn.

OBORẸ BAIBOL NA WENE UVWE WAN:

Me vwọ ton uyono ri Baibol phiyọ vẹ Iseri ri Jihova, ẹwẹn mẹ da rhe yanghan ku. Ophu de mu vwe ọke mi vwo yono nẹ Idẹbono yen so umiovwo rẹ akpọ na; E yono uvwe jovwo nẹ Ọghẹnẹ yen nẹrhẹ avwanre rioja. Uyono rẹ erhanre ri bẹdẹ na phi oshọ phiyọ ovwẹ oma rhanvwẹ ọke emọ, ẹkẹvuọvo, me rhe vwọ riẹn nẹ Ọghẹnẹ cha vwẹ oja re ihwo vwẹ erhanre ri bẹdẹ-ẹ, ẹwẹn mẹ di rhi te otọ.

Oborẹ Iseri na brorhiẹn vwo nene iyono ri Baibol na, je vwe mamọ. Ayen ruẹ nene oborẹ ayen segbuyota. Me ghwa dia ohwo ra sa rua-a, ẹkẹvuọvo, Iseri na dje ẹguọnọ ji muọghọ kẹ vwẹ, o toro oborẹ me tare yẹrẹ ruru-u.

Mi vwo wene ẹro mi vwo nẹ oma mẹ kueku yen ma bẹn kẹ vwẹ. Mi vwo utuoma kpahen oma mẹ, dede nẹ mi bromaphiyame kerẹ Oseri ri Jihova ọke grongron re. Me riẹnre nẹ mi vwo ẹguọnọ ri Jihova, ẹkẹvuọvo, o muvwẹro nẹ o che se vwo ẹguọnọ rẹ ohwo kerẹ omẹvwẹ-ẹ.

Omarẹ ẹgbukpe 15 mi vwo bromaphiyame nu yen ẹro mi vwo nẹ oma mẹ vwo wene. Vwẹ ota ọvo ra tare vwẹ Ọguan Ruvie rẹ Iseri ri Jihova, ọtota na da rionbọ kpo Jems 1:​23, 24. Awọreta yena dje Ota rẹ Ọghẹnẹ phiyọ ughegbe re vwo nẹ oma rẹ avwanre kirobo ri Jihova mrẹ avwanre phiyọ. Ki mi roro sẹ oborẹ mi no oma mẹ fẹnẹ oborẹ Jihova mrẹ vwẹ wan. Ẹsosuọ me ka sen iroro yena. Mi ji roro nẹ Jihova vwo vwo ẹguọnọ mẹ dia oborẹ mi se rhẹro rọye-en.

Ẹdẹ evo vwọ wan nu, mi de se ẹkpo ri Baibol ọvo ro wene akpeyeren mẹ. Ẹkpo ri Baibol na yen Aizaya 1:​18, vwẹ etiyin Jihova da ta: “Mọ vwo ọke na re avwanre jẹn iroro kugbe; . . . ọ da dianẹ imwemwu wẹn họhọ isene, e cha họhọ ẹton rẹ ogegede.” Kọ ghwa họhọ nẹ Jihova ta kẹ vwẹ: “Yanrhe, Vicky, rere a jẹ iroro kugbe. Mi vughe uwe, me riẹn imwemwu wo ruru, me riẹn obo rehẹ udu wẹn​​—mi ji vwo ẹguọnọ wẹn.”

Me sa vwerhẹn vwẹ ason yena-a. Mi ji vwo ẹwẹn ivivẹ se Jihova ghini se vwo ẹguọnọ mẹ, ẹkẹvuọvo, mi de roro kpahen izobo rẹ ọtanhirhe ri Jesu. Ugege yena, me da mrẹvughe nẹ o krire rẹ Jihova vwo vwo odirin mẹ cha re, ro vwo dje kẹ vwẹ vwẹ idjerhe sansan nẹ o vwo ẹguọnọ mẹ. Ẹkẹvuọvo, kọ ghwa họhọ nẹ me ta kẹ Jihova: “Me riẹnre nẹ wo che se vwo ẹguọnọ mẹ-ẹ. Izobo rẹ ọtanhirhe rẹ Ọmọ wẹn che te vwo phoro imwemwu mẹ no-o.” Kọ ghwa họhọ nẹ me sen izobo rẹ ọtanhirhe na. Ẹkẹvuọvo, asaọkiephana, kidie nẹ mi roro kokodo kpahen okẹ rẹ ọtanhirhe na, o di rhi muvwẹro nẹ Jihova vwo ẹguọnọ mẹ mamọ.

ERERE RE ME MRẸRE:

Oma vwerhen ovwẹ enẹna, mi rhe vwo ẹwẹn rẹ abe yẹrẹ vwo utuoma kpahen oma mẹ-ẹ. Orọnvwe mẹ yovwinphiyọ enẹna, oma je vwerhen ovwẹ nẹ me sa vwẹ obo ri mi rhiẹromrẹ vwọ chọn ihwo efa uko. Ki mi siẹkẹrẹ Jihova phiyọ.

• UKPE RE VWIẸRẸ: 1974

• ẸKUOTỌ RO NURHE: RUSSIA

• IKUEGBE: OHWO RO VWO ẸGUỌNỌ RẸ UHWORO EGANGAN

AKPỌ MI YERIN JOVWO:

Votkinsk yen de vwiẹ vwẹ, asan vuọvo yena yen de ji vwiẹ Pyotr Ilich Tchaikovsky rọ dia ohwo ro titiri ro siẹ ine. Avwanre ivwiogbere. Ọsẹ mẹ vwo iruemu iyoyovwin buebun, ẹkẹvuọvo, ọyen ọgbaudi, ọtiọyena, ẹghwọ kọ dia uwevwin na ọkieje.

Me ghwa riẹn ọbe ọtiọye-en, ọke vwọ yanran na, ki mi nẹ oma mẹ kueku. Ọtiọyena, me rha vwẹroso ihwo-o, ki mi siomareyọ nẹ asan ihwo hepha. Ofu rẹ isikuru ko dje vwe. Kerẹ udje, ọke ra vwọ vuẹ vwẹ nẹ me rhe ta ota vwẹ iklasi, me sa ta fiotọ-ọ, dede nẹ ọyen oborẹ me sa ta jovwo. Ọke mi vwo wontọ nẹ Junior Secondary School, e de si phiyọ repọt kadi mẹ nẹ, “ọ sa ta obo rehẹ ẹwẹn rọye-en.” Eta yena hra ẹwẹn mẹ te otọ, kọ nẹrhẹ mi nẹ oma mẹ kueku phiyọ. Ki mi roro sẹ akpọ mẹ vwo otọ.

Vwẹ ọke ighene mẹ, me da ton udi ẹda phiyọ. Ẹsosuọ, udi na nẹrhẹ ẹwẹn mẹ te otọ. Ẹkẹvuọvo, me da da udi na bun nọ, ẹwẹn obrorhiẹn mẹ ko kpokpo uvwe. Kọ ghwa họhọ nẹ akpọ mẹ rhe vwo otọ-ọ. Ofu rẹ akpọ ko dje vwe phiyọ, ọkiọvo, vwẹ ẹdẹ buebun me tobọ yan phia nẹ uwevwi-in. Ọtiọyena, ki mi vwo iroro mi vwo hwe oma mẹ.

Mi vwo te ẹgbukpe 20, me da mrẹ orọnvwọn rọ kẹ vwẹ onẹrhẹvwe ọmọke, ọyen uhworo rẹ ọgangan. Uhworo na kẹ vwẹ ẹgba, ọtiọyena, ki mi mu igbeyan vẹ ihwo ri vwo ẹguọnọ rẹ oka rẹ uhworo ọtiọyen. Me da yanjẹ ẹto mẹ vwo nẹ o gron mamọ, sa uphrophro phiyọ erhọn mẹ je sẹn osẹnvwe kerẹ ibuine ri mi vwo ẹguọnọ rayen. Ememerha na, ki mi yerẹn akpọ yanghan yanghan ji muophu ọgangan, ọke buebun mẹ vẹ orua mẹ ke ghwọ.

Mi rorori nẹ uhworo rẹ ọgangan re me kerhọ kẹ na cha nẹrhẹ oma vwerhen ovwẹ, ẹkẹvuọvo, o ru ọtiọye-en. Me rhoma braphiyọ! Ọke mi vwo nyo kpahen erọnvwọn ebrabra rẹ ibuine evo ri je vwe ruru, ẹwẹn mẹ da kuọrọn.

Vwẹ obọ ọfa, mi de vwo iroro mi vwo hwe oma mẹ​​—ọ rẹ udje nana ganre mamọ. Orọnvwọn ovọ rọ da vwẹ obọ ji yen mi vwo roro kpahen obo ro che djobọte oni mẹ te. O vwo ẹguọnọ mẹ mamọ, ọ je davwen kẹ vwẹ mamọ re. Ẹdia mẹ na muoshọ mamọ. Mi gbe guọnọ yeri-in, jẹ me guọnọ hwe oma mẹ-ẹ.

Rere ẹwẹn mẹ se vwo te otọ, ki mi se ọbe rẹ ikuegbe rẹ ihwo ri Russia siri. Ikuegbe ọvo ri mi seri shekpahen ọshare ọvo rọ ga vwẹ ishọshi ọvo. Ugege yena, mi de vwo owenvwe ọgangan mi vwo ru orọnvwọn kẹ Ọghẹnẹ vẹ ihwo efa. Mi ku ubiudu mẹ eje kẹ Ọghẹnẹ vwẹ ẹrhovwo, rọ dia oborẹ mi ji ru dẹvo-o. Me vuẹ Ọghẹnẹ nẹ o dje oborẹ mi se vwo yeren omamọ akpọ kẹ vwẹ. Me vwọ nẹrhovwo na, ẹwẹn mẹ de rhi te otọ. Obo ri tobọ me gbevwunu yen obo re phiare me vwọ nẹrhovwo na nu. Inọke ivẹ vwọ wan nu, Oseri ri Jihova ọvo de hworo ẹchẹ mẹ je vwẹ uyono ri Baibol vwo mu kẹ vwẹ. O muvwẹro nẹ ọnana yen ẹkpahọnphiyọ rẹ ẹrhovwo mẹ. Ẹde yena yen akpeyeren rẹ omavwerhovwẹn mẹ tonphiyọ.

OBORẸ BAIBOL NA WENE UVWE WAN:

Dede nẹ ọ ghwa lọhọ kẹ vwẹ-ẹ, mi do kemu kemu mi vwori eje ri churobọ si uhworo egangan kufia. Ẹkẹvuọvo, ine na fobọ ni ẹwẹn mẹ-ẹ. Kọke kọke me da yan wan asan re de hworo ine tiọyena yen me vwọ karophiyọ oka rẹ akpọ mi yerin jovwo. Me guọnọre nẹ erọnvwọn ebrabra re phia wanre djobọte erọnvwọn iyoyovwin re phia vwẹ akpeyeren mẹ enẹna-a. Ọtiọyena, ke me kẹnoma kẹ asan re de hworo ine tiọyena. Kọke kọke iroro tiọyena da kọn ro ubiudu mẹ, ki mi muomaphiyọ ẹrhovwo ẹnẹ. Ọnana mi ruẹ na nẹrhẹ mi se vwo “ufuoma rẹ Ọghẹnẹ rọ nọ ẹruọ ejobi.”​​—Filipae 4:7.

Mi vwo yono Baibol na, me da mrẹvughe nẹ Inenikristi vwo oghwa rẹ ayen vwọ vuẹ ihwo efa kpahen oborẹ ayen segbuyota. (Matiu 28:​19, 20) O muvwẹro nẹ mi che se ruo-o. Dedena, erọnvwọn kpokpọ ri mi yono na kẹ vwẹ omavwerhovwẹn vẹ ufuoma. Me riẹnre nẹ ofori ihwo efa ji vwo yono uyota nana. Dede nẹ oshọ mu vwe, me je vuẹ ihwo efa oborẹ mi yono. O gbevwunu nẹ, mi vwọ nene ihwo efa ta ota kpahen Baibol na nẹrhẹ me vwẹ omamọ ẹro vwo nẹ oma mẹ. Ọ je kpuriẹn phiyọ oborẹ mi segbuyota.

ERERE RE ME MRẸRE:

Me riavwerhen rẹ orọnvwe mẹ enẹna, me je mrẹ aghọghọ mi vwo yono ihwo buebun kpahen Baibol na, evo usun rẹ ihwo mi yonori yen oniọvo mẹ ọmọtẹ vẹ oni mẹ. Me vwọ ga Ọghẹnẹ je vwẹ ukẹcha kẹ ihwo efa vwo yono kpahọn, nẹrhẹ mi yeren omamọ rẹ akpọ.