UYONO 4
Ono Yin Jesu Kristi?
1. Tivọ yin Jesu nurhe?
Iruemu vọ yen nẹrhẹ Jesu dia ohwo rẹ a sa rua?—MATIU 11:29; MAK 10:13-16.
Jesu fẹnẹ ihworakpọ keridie ọ ka dia odjuvwu tavwen ọ ke rhe otọrakpọ na. (Jọn 8:23) Jesu yen emama ẹsosuọ rẹ Ọghẹnẹ. Ọyen nene Ọghẹnẹ ma erọnvwọn ri chekọ eje. Ọyen ohwo vuọvo ri Jihova vwẹ obọ rọyen ma, kọyen sorọ e vwo se nẹ “Ọmọ ọvuọvo” rẹ Ọghẹnẹ. (Jọn 1:14) Jesu jẹ Ọtota rẹ Ọghẹnẹ, ọyen sorọ e ji vwo se “Ota na.”—Se Isẹ 8:22, 23, 30; Kọlose 1:15, 16.
2. Diesorọ Jesu vwọ rhe Otọrakpọ na?
Ọghẹnẹ ji ọmọ rọyen rhe akpọ na ro vwo phi arhọ rọyen phiyọ evun rẹ ọmọtobẹ rọ dia ohwo ri Ju re se Meri. Kọyen sorọ Jesu rhe vwo ọsẹ aruakpọ-ọ. (Luk 1:30-35) Jesu rhe akpọ na: (1) ro vwo yono ihwo uyota kpahen Ọghẹnẹ, (2) ro vwo djudje robo re ruẹ ọhọre rẹ Ọghẹnẹ, ọ da tobọ dianẹ avwanre hẹ ẹdia rẹ ebẹnbẹn kugbe (3) rọ je vwọ vwẹ arhọ ọgbagba rọyen vwo ru ‘ọtanhirhe.’—Se Matiu 20:28.
3. Diesorọ avwanre vwọ guọnọ ọtanhirhe?
Ọtanhirhe ọyen osa ra hware re se vwo sivwin ohwo nẹ ẹdia rẹ imwoshọ rẹ ughwu. (Eyanno 21:29, 30) Ọ diẹ ọhọre Ọghẹnẹ rẹ ihworakpọ vwọ ghwo, ayen mi ji ghwu vwẹ ọke rọ vwọ ma aye-en. Mavọ avwanre vwọ riẹn ọyena? Ọghẹnẹ vuẹ Adam nẹ, o de ru “umwemwu” ko ghwu. Kọyẹn, Adam rhe ru umwemwu jovwo-o, o re ghwu-u. (Jẹnẹsis 2:16, 17; 5:5) Baibol na tare nẹ womarẹ Adam ọyen ughwu wan ‘ro’ akpọ na. Avwanre eje da riuku rẹ umwemwu vẹ ughwu nẹ obọ rẹ Adam rhe. Ọtiọyena, avwanre guọnọ ọtanhirhe rere avwanre sa vwọ vrabọ rẹ ughwu ra riuku rọyen mie Adam na.—Se Rom 5:12; 6:23.
Ono yen sa hwosa rẹ ọtanhirhe na rere avwanre vwọ vrabọ rẹ ughwu? Ohwo de ghwu, osa rẹ umwemwu rọyen ọvo, ọyen ọ hware. O vwo ohwo vuọvo ro jẹ-ẹgba rọ sa hwosa rẹ umwemwu rẹ ohwọfa-a.—Se Une Rẹ Ejiro 49:7-9.
4. Diesorọ Jesu vwo ghwu?
Jesu fẹnẹ avwanre keridie ọyen ohwo rọ gbare. Fikirẹ ọnana, o rhe vwo oboresorọ o vwo ghwu-u, kiridie o ru umwemwu vuọvo-o. Ukperẹ ọtiọyen, Jesu ghwuru fikirẹ umwemwu rẹ ihworakpọ eje. Ọghẹnẹ dje ẹguọnọ roghẹresan kẹ ihworakpọ ro vwo ji Ọmọ rọyen rhe nẹ o rhi ghwu kẹ avwanre. Jesu ji dje ẹguọnọ kẹ avwanre ro vwo nyupho rẹ Ọsẹ rọyen vwọ vwẹ arhọ rọyen kpahotọ kẹ avwanre.—Se Jọn 3:16; Rom 5:18, 19.
Ni ividio na Diesorọ Jesu Vwo Ghwu?
5. Die yin Jesu ruẹ asaọkiephana?
Ọke ri Jesu vwọ hẹ akpọ na, O sivwin ihwo re họnvwọ ega, ọ rhọnvwọ ihwo ri ghwuru, o de ji si ihwo nẹ oja. Ọ vwẹ enana dje obo ro che ru kẹ ihwo ri ruẹ ọhọre rẹ Ọghẹnẹ vwẹ ọke rọ cha obaro na. (Matiu 15:30, 31; Jọn 5:28) Jesu vwo ghwu nu, Ọghẹnẹ da rhọnvwọ nẹ ushi rhe kerẹ ohwo rẹ ẹwẹn. (1 Pita 3:18) Jesu da rhe hẹrhẹ vwẹ obọrhe rẹ Ọghẹnẹ re te ọke ri Jihova vwọ kẹ ẹgba ro vwo sun akpọ na eje. (Hibru 10:12, 13) Enẹna, Jesu suẹn kerẹ Ovie vwẹ odjuvwu. Idibo rọyen ghwoghwo iyẹnrẹn esiri nana vwẹ akpọ na eje.—Se Daniẹl 7:13, 14; Matiu 24:14.
O rhe che kri-i, Jesu cha vwẹ ẹgba rẹ usuon rọyen vwo si ojaẹriọ kugbe ihwo re so ojaẹriọ no. Ihwo ri vwo esegbuyota kpahen Jesu, ri nyupho rọyen cha re avwerhen ri paradaisi vwẹ otọrakpọ na.—Se Une Rẹ Ejiro 37:9-11.