Mateo

24 Musi Yesu a tshi bva thembeleni, vhafunziwa vhawe vha ḓa khae vha mu sumbedza zwifhaṱo zwa thembele. 2 A vha fhindula a ri: “Naa izwi zwifhaṱo zwoṱhe ni khou zwi vhona? Ngoho ndi a ni vhudza ndi ri: A hu na tombo ḽine ḽa ḓo sala ḽi nṱha ha ḽiṅwe ḽi songo piḓimulwa.”

3 Musi Yesu o dzula Thavhani ya Miṱwari, vhafunziwa vhawe vha ḓa khae vhe vhoṱhe, vha mu vhudzisa vha ri: “Ri vhudze, izwi zwithu zwoṱhe zwi ḓo itea lini, nahone tshiga tsha u vha hone hau na tsha vhufhelo ha ano maitele a zwithu tshi ḓo vha tshifhio?”

4 Yesu a vha fhindula a ri: “Ni ṱhogomele uri hu si vhe na muthu ane a ni xedza, 5 ngauri vhanzhi vha ḓo ḓa nga dzina ḽanga, vha ri, ‘Ndi nṋe Kristo,’ nahone vha ḓo xedza vhanzhi. 6 Ni ḓo pfa nga ha dzinndwa na nga ha mivhigo ya dzinndwa; zwi tshi ralo ni songo tshuwa. Ngauri zwenezwi zwithu zwi fanela u itea, fhedzi vhufhelo a vhu athu swika.

7 “Lushaka lu ḓo lwa na luṅwe lushaka; muvhuso wa lwa na muṅwe muvhuso, zwiḽiwa zwi ḓo ṱahela ha vha na midzinginyo fhethu ho fhamba-fhambanaho. 8 Zwenezwi zwithu zwoṱhe ndi hone u ranga ha maṱungu a fanaho na a u beba.

9 “Vhathu vha ḓo ni kumedzela maṱunguni nahone vha ḓo ni vhulaha, ni ḓo vhengwa nga tshaka dzoṱhe nga nṱhani ha dzina ḽanga. 10 Zwiṅwe hafhu, vhanzhi vha ḓo khukhuliswa, vha ambululana nahone vha vhengana. 11 Hu ḓo vha na vhaporofita vha mazwifhi vhanzhi nahone vha ḓo xedza vhanzhi, 12 nga nṱhani ha u engedzea ha vhuvhi, lufuno lwa vhanzhi lu ḓo fhungudzea. 13 Fhedzi ane a konḓelela u swika vhufheloni ndi ene ane a ḓo tshidzwa. 14 Huno mafhungo maḓifha aya a Muvhuso a ḓo ḓivhadzwa ḽifhasini ḽoṱhe uri zwi vhe vhuṱanzi kha tshaka dzoṱhe, nga murahu ndi hone vhufhelo vhu tshi ḓo ḓa.

15 “Ngauralo, musi ni tshi vhona tshithu tshi nengisaho tshi ḓisaho mutshinyalo, samusi zwo ambiwa nga muporofita Daniele, tshi fhethu hukhethwa (muvhali nga a shumise ṱhalukanyo), 16 nga zwenezwo, vha re Yudea kha vha thome u shavhela dzithavhani. 17 Muthu a re kha ṱhanga a songo tsa a ya a dzhia thundu dzi re nḓuni yawe; 18 a re tsimuni a songo tsha humela hayani u itela u dzhia tshiambaro tshawe tsha nga nnḓa. 19 Khombo vho vhifhaho muvhilini na vha mamisaho vhana misini yeneyo! 20 Ni dzule ni tshi rabela uri mushavho waṋu u si vhe hone vhuriha, kana nga Sabatha, 21 ngauri nga tshenetsho tshifhinga hu ḓo vha na maṱungu mahulu a sa athu vhuya a vha hone u bva tshee shango ḽa sikwa u swika zwino, nahone ha tsha ḓo dovha a vha hone. 22 Zwi re zwone ndi uri arali maḓuvha ayo a sa fhungudzwa, a hu na muthu ane a ḓo tshidzwa, fhedzi maḓuvha ayo a ḓo fhungudzwa u itela vho nangiwaho.

23 “Arali muthu a amba na inwi a ri, ‘Vhonani! Kristo khoyu,’ kana, ‘Khouḽaa!’ ni songo tenda. 24 Ngauri hu ḓo vuwa Vhokristo vha mazwifhi na vhaporofita vha mazwifhi nahone vha ḓo ita zwiga zwihulu na zwithu zwi mangadzaho, arali zwi tshi konadzea vha xedza na vho nangiwaho. 25 Vhonani! ndi khou dzula ndo ni vhudza zwi sa athu itea. 26 Ngauralo, arali vhathu vha ni vhudza uri, ‘Vhonani! U sogani,’ ni songo ya; arali vha ri, ‘Vhonani! U ngomu kamarani,’ ni songo tenda. 27 Ngauri u ḓa ha Murwa-muthu hu ḓo fana na lupenyo lu tshi bva vhubvaḓuvha nahone lwa vhonetshela vhukovhela. 28 Huṅwe na huṅwe hune ha vha na tshitumbu, magoni a kuvhangana henefho.

29 “Nga u ṱavhanya nga murahu ha maṱungu a misi yeneyo, ḓuvha ḽi ḓo swifhala, ṅwedzi a u tsha ḓo vhonetshela, ṋaledzi dzi ḓo wa dzi tshi bva ṱaḓulu, na maanḓa a ḽiṱaḓulu a ḓo dzinginyea. 30 Tshiga tsha u vha hone ha Murwa-muthu tshi ḓo vhonala ṱaḓulu, tshaka dzoṱhe dza kha ḽifhasi dzi ḓo lila dzo ṱungufhala nahone dzi ḓo vhona Murwa-muthu a tshi ḓa e kha makole a ṱaḓulu e na maanḓa na vhugala vhuhulu. 31 U ḓo ruma vharuṅwa vhawe vhe na phalaphala khulu, vha ḓo kuvhanganya vhanangiwa vhawe vha tshi bva thungo nṋa, u bva magumoni maṅwe a ḽiṱaḓulu u ya magumoni maṅwe.

32 “Zwino gudani kha tshifanyiso tsha muhuyu: Nga u ṱavhanya musi matavhi awo a tshi ṱuma lurere, ni mbo ḓi ḓivha uri tshilimo tshi tsini. 33 Nga hu fanaho, musi ni tshi vhona zwenezwi zwithu zwoṱhe, ni ḓivhe uri Murwa-muthu u tsini u muṋangoni. 34 Ngoho ndi a ni vhudza uri murafho uyu u nga si lovhe hezwi zwithu zwoṱhe zwi sa athu itea. 35 Ḽiṱaḓulu na ḽifhasi zwi ḓo lovha, fhedzi maipfi anga ha nga lovhi.

36 “A hu na ane a ḓivha nga ha ḽeneḽo ḓuvha kana tshifhinga, na vharuṅwa vha ṱaḓulu na Murwa a vha ḽi ḓivhi, ḽi ḓivhiwa nga Khotsi fhedzi. 37 U vha hone ha Murwa-muthu hu ḓo fana na misini ya Noaxe. 38 Samusi zwo vha zwo tou ralo musi hu sa athu vha na Maḓi Mahulu, vhathu vho vha vha tshi ḽa, vha tshi nwa, vha tshi vhinga vha tshi vhingwa, ha vhuya ha swika ḓuvha ḽe Noaxe a dzhena ngaḽo gungwani, 39 nahone a vho ngo ṱhogomela tshithu u swika hu tshi vha na Maḓi Mahulu nahone wa vha kumba vhoṱhe, na u vha hone ha Murwa-muthu zwi ḓo tou ralo. 40 Nga ḽeneḽo ḓuvha vhanna vhavhili vha ḓo vha vhe tsimuni: Muṅwe wavho u ḓo ṱanganedzwa nahone muṅwe a laṱwa; 41 vhafumakadzi vhavhili vha ḓo vha vha tshi khou sinḓa mutulini muthihi: Muṅwe wavho u ḓo ṱanganedzwa nahone muṅwe a laṱwa. 42 Ngauralo, dzulani no fhaṱuwa, ngauri a ni ḓivhi ḓuvha ḽine Murena waṋu a ḓo ḓa ngaḽo.

43 “Fhedzi tshine na fanela u tshi ḓivha ndi hetshi: Arali muṋe wa muḓi o vha a tshi ḓivha uri mbava i ḓo ḓa nga tshifhinga-ḓe, o vha a nga si ḓo eḓela nahone o vha a nga si tende uri nnḓu yawe i pwashiwe. 44 Nga nṱhani ha zwenezwo, na inwi dzulani no lindela, ngauri Murwa-muthu u ḓo ḓa nga tshifhinga tshine ni si tshi humbulele.

45 “Ndi nnyi ane zwa vhukuma a vha mulanda a fulufhedzeaho na wa vhuṱali we Muṋe wawe a mu vhea uri a ṱhogomele vha nnḓu yawe, uri a vha ṋee zwiḽiwa zwavho nga tshifhinga tsho teaho? 46 Mulanda onoyo u ḓo takala musi Muṋe wawe a tshi swika a mu wana a tshi khou ita nga u ralo! 47 Ngoho ndi a ni vhudza ndi ri: U ḓo mu vhea uri a lange thundu dzawe dzoṱhe.

48 “Fhedzi arali mulanda onoyo muvhi a vhuya a amba mbiluni yawe a ri, ‘Muṋe wanga u khou lenga,’ 49 a thoma u rwa vhalanda ngae nahone a ḽa na u nwa na zwidakwa, 50 Muṋe wa onoyo mulanda u ḓo ḓa nga ḓuvha ḽe a si ḽi lavhelele na nga tshifhinga tshine a si tshi ḓivhe 51 nahone u ḓo mu pfisa vhuṱungu vhuhulu na u mu dzudza na vhadzia-muhoyo. Henefho ndi hune a ḓo lila na u shenganya maṋo.