Vharoma

13 Vhathu vhoṱhe nga vha ḓiṱukufhadzele vhavhusi vhavho, ngauri a hu na muvhuso u sa bvi ha Mudzimu; hune vhavhusi vha vha hone vho tendelwa nga Mudzimu. 2 Ngauralo, ane a pikisa muvhusi u khou lwisana na ndugiselelo ya Mudzimu; vhane vha lwisana nae vha ḓo haṱulwa. 3 Arali u sa ṱoḓi u ofha muvhusi, bvela phanḓa u tshi ita zwivhuya nahone u ḓo takalelwa nga muvhusi; 4 ngauri ndi muḓinḓa wa Mudzimu ane a u itela zwivhuya. Fhedzi arali u tshi tshinya, u ofhe: ngauri ho ngo sokou fara banga. Ndi muḓinḓa wa Mudzimu, ndi mulifhedzi a re na mbiti kha ane a tshinya.

5 Ngauri hu na tshiitisi tshi ni kombetshedzaho uri ni ḓiṱukufhadze, a si mbiti fhedzi, fhedzi na luvalo lwaṋu. 6 Ndi ngazwo ni tshi bvisa mithelo; ngauri ndi vhashumeli vha Mudzimu vha shumelaho vhathu tshifhinga tshoṱhe u itela yeneyo ndivho. 7 Vhoṱhe ni vha ṋee zwo vha fanelaho, ane a ṱoḓa muthelo, ni mu ṋee muthelo; ane a ṱoḓa u luvhiwa, ni mu luvhe; ane a ṱoḓa u ofhiwa, ni mu ofhe; ane a ṱoḓa u huliswa, ni mu hulise.

8 Ni songo vha na mulandu na muthihi na muṅwe muthu, nga nnḓa ha uri ni funane; ngauri ane a funa wahawe u ḓadzisa mulayo. 9 Mulayo uri, “U songo ṱonḓola, U songo vhulaha, U songo tswa, U songo emula,” na ndaela naho i ifhio ine ya vha hone, yo katelwa nga maipfi ane a ri: “U tea u funa wahau vhunga u tshi ḓifuna.” 10 A re na lufuno ha iteli wahawe vhuvhi; ngauri lufuno lu ḓadzisa mulayo.

11 Zwenezwi zwi iteni ni tshi ḓivha uri tshifhinga tsho swika tsha uri ni karuwe khofheni, ngauri zwino u tshidzwa hashu hu tsini u fhira musi ri tshi kha ḓi bva u vha vhatendi. 12 Ḽi vho tsha; hu si kale hu ḓo vha masiari. Kha ri bvule mishumo ya swiswi nahone ri ambare mafumo a tshedza. 13 Kha ri tshimbile zwavhuḓi sa vha tshimbilaho masiari, ri songo ya kha zwimima zwi sa langei nahone ri songo vha zwidakwa, ri songo ḓifara luvhi nga zwa vhudzekani, ri songo ḓifara nga nḓila i shonisaho, ri songo vusa dzinndwa na u vha na vivho. 14 Fhedzi ambarani Murena Yesu Kristo, ni songo dzula no dzudzanya uri ni fushe nyemulo dza ṋama.