2 Vhathesalonika

1 Nṋe Paulo na Silvano na Timotheo ndi ṅwalela tshivhidzo tsha Vhathesalonika vha re vhathihi na Mudzimu ane a vha Khotsi ashu na Murena Yesu Kristo ndi ri:

2 Vhuthu vhuhulu na mulalo zwi bvaho ha Mudzimu Khotsi na Murena Yesu Kristo nga zwi vhe na inwi.

3 Vhahashu, ri a kombetshedzea u livhuha Mudzimu tshifhinga tshoṱhe nga nṱhani haṋu. Zwenezwi zwo tea, ngauri lutendo lu khou engedzea vhukuma na lufuno lune na funana ngalwo lu khou engedzea. 4 Nga nṱhani ha zwenezwo, ri a ḓihudza nga inwi musi ri vhukati ha zwivhidzo zwa Mudzimu nga u konḓelela haṋu na u vha haṋu na lutendo musi ni tshi tovholwa na kha maṱungu ane na khou ṱangana nao. 5 Hezwi ndi vhuṱanzi ha uri khaṱulo ya Mudzimu yo luga, zwine zwa ita uri ni dzhiiwe ni tshi fanelea Muvhusoni wa Mudzimu, une na khou tambulela wone.

6 Khaṱulo yeneyo ya Mudzimu yo luga, ngauri u khou lifhedza vhe vha ni tambudza nga u vha tambudza. 7 Fhedzi inwi vhane na khou tambula, Mudzimu u ḓo ni vhofholola khathihi na riṋe musi hu tshi dzumbululwa Murena Yesu a tshi bva ṱaḓulu e na vharuṅwa vhawe vha maanḓa 8 e kha mulilo u dugaho, musi a tshi ḓa u lifhedza vhane vha si ḓivhe Mudzimu na vhane vha si thetshelese mafhungo maḓifha a ambaho nga ha Murena washu Yesu. 9 Murena washu u ḓo haṱula vhenevho. Khaṱulo yavho i ḓo vha ndozwo ya lini na lini, nga zwenezwo, ha tsha ḓo vha lavhelesa kana u vha thusa nga maanḓa awe mahulu, 10 nga tshifhinga tsha musi a tshi ḓa uri a huliswe khathihi na vhakhethwa vhawe na u kanukiwa nga vhoṱhe vha tendaho, ngauri no tenda zwe ra zwi ṱanziela.

11 Ndi ngazwo ri tshi dzula ri tshi ni rabelela uri Mudzimu washu a ni dzhie no fanelwa nga vhutshilo he a ni vhidzela hone na uri nga maanḓa awe a khunyeledze zwithu zwoṱhe zwavhuḓi zwine a zwi takalela na u khunyeledza mushumo u ṱuṱuwedzwaho nga lutendo. 12 Zwenezwo zwo tou ralo uri dzina ḽa Murena washu Yesu ḽi huliswe kha inwi, na inwi ni huliswe khathihi nae, u ya nga vhuthu vhuhulu ha Mudzimu washu na ha Murena Yesu Kristo.