Nzumbululo

19 Nga murahu ha zwenezwi zwithu, nda pfa zwine zwa nga ipfi ḽa gogo ḽihulu ngei ṱaḓulu. Ḽa ri: “Rendani Yah!* U tshidzwa na vhugala na maanḓa ndi zwa Mudzimu washu, 2 ngauri khaṱulo yawe ndi ya ngoho nahone yo luga. Ngauri o haṱula iḽa phombwe khulu ye ya tshinya ḽifhasi nga vhupombwe hayo, o lifhedzela malofha a vhalanda vhawe a re zwanḓani zwayo.” 3 Nga u ṱavhanya ḽa amba lwa vhuvhili ḽa ri: “Rendani Yah! Vhutsi vhu bvaho khayo ha duba lini na lini.”

4 Vhahulwane vha fumbili-iṋa (24) na zwivhumbwa zwiṋa zwi tshilaho vha gwadama vha rabela Mudzimu o dzulaho kha khuluṋoni, vha ri: “Amen! Rendani Yah!”

5 Zwiṅwe hafhu, ha pfala ipfi kha khuluṋoni ḽi tshi ri: “Rendani Mudzimu washu, inwi vhalanda vhawe noṱhe, vhane na mu ofha, vha vhuimo ha fhasi na ha nṱha.”

6 Nda pfa zwine zwa nga ipfi ḽa gogo ḽihulu na ḽine ḽa nga muungo wa maḓi manzhi na ḽine ḽa nga mibvumo mihulu. Ḽa ri: “Rendani Yah, ngauri Yehova Mudzimu washu, Ramaanḓaoṱhe, o thoma u vhusa sa khosi. 7 Kha ri takale ri pembele ri mu ṋee vhugala, ngauri munyanya wa mbingano ya Ngwana wo swika nahone mufumakadzi wayo o ḓilugisa. 8 O tendelwa uri a ambare zwiambaro zwa labi ḽi penyaho, ḽo kunaho, ḽavhuḓi—ngauri labi ḽo kunaho ḽi imela mishumo yo lugaho ya vhakhethwa.”

9 A amba na nṋe a ri: “Ṅwala uri: Hu takala vho rambiwaho munyanyani wa mbingano ya Ngwana.” A dovha a amba na nṋe a ri: “Enea ndi maipfi a ngoho a Mudzimu.” 10 Ndi tshi pfa zwenezwo nda gwadama phanḓa hawe uri ndi mu rabele. Fhedzi a amba na nṋe a ri: “U songo ita nga u ralo! Na nṋe ndi mulanda nga iwe na vhahau vhane vha vha na mushumo wa u ṱanziela nga ha Yesu. Rabela Mudzimu; ngauri u ṱanziela nga ha Yesu ndi zwine zwa ṱuṱuwedza vhuporofita.”

11 Nda vhona ḽiṱaḓulu ḽo vulea, nda vhona bere tshena. We a vha o i ṋamela o vha a tshi pfi A Fulufhedzeaho na Wa Ngoho, nahone u haṱula na u lwa nndwa yo lugaho. 12 Maṱo awe o vha a tshi nga khavhu ya mulilo, ṱhohoni yawe o ambara khare nnzhi. O ṅwalwa dzina ḽine hu si vhe na ane a ḽi ḓivha, fhedzi ḽi ḓivhiwa nga ene muṋe, 13 o ambara tshiambaro tsha nga nnḓa tsho shashiwaho nga malofha, nahone dzina ḽine a vhidzwa ngaḽo ḽi pfi, Ipfi ḽa Mudzimu. 14 Zwiṅwe hafhu, mavhuthu a ṱaḓulu o vha a tshi khou mu tevhela o ṋamela dzibere tshena, o ambara zwiambaro zwitshena, zwo kunaho, zwavhuḓi. 15 Mulomoni wawe hu tshi bva banga ḽilapfu ḽi re na vhuhali, uri a kone u vhulaha dzitshaka ngaḽo, nahone u ḓo vha lisa nga lubaḓa lwa tsimbi. Zwiṅwe hafhu, u sukekanya nḓirivhe bonḓeloni ḽa waini ya mbiti dza Mudzimu Ramaanḓaoṱhe. 16 Kha tshiambaro tshawe tsha nga nnḓa na kha tshirumbi, ho vha ho ṅwalwa dzina ḽa uri, Khosi ya mahosi na Murena wa marena.

17 Nda dovha nda vhona muruṅwa o ima kha ḓuvha, a vhidzelela nga ipfi ḽihulu, a amba na zwiṋoni zwoṱhe zwi fhufhaho lutomboni a ri: “Iḓani ngeno ni kuvhanganele tshilalelo tshihulu tsha Mudzimu, 18 uri ni ḽe ṋama ya mahosi na ya vhalangammbi na ya vhanna vha maanḓa na ya bere na ya vhaṋameli vhadzo, na ṋama ya vhoṱhe vho vhofholowaho khathihi na ya vhalanda na ya vha vhuimo ha fhasi na ha nṱha.”

19 Nda vhona ḽivhanda na mahosi a ḽifhasi na mmbi dzavho vho kuvhangana uri vha lwe na o ṋamelaho bere na mmbi yawe. 20 Ḽivhanda ḽa farwa khathihi na muporofita wa u zwifha we a vha a tshi ita maḓembe phanḓa haḽo, a tshi xedza vha re na luswayo lwa ḽivhanda na vhane vha rabela tshifanyiso tshaḽo. Vha poswa vhoṱhe vha tshi kha ḓi tshila dzivhani ḽa mulilo ḽi dugaho tsevhela. 21 Fhedzi vhaṅwe vhoṱhe vha vhulahwa nga banga ḽilapfu ḽe ḽa vha ḽi tshi khou bva mulomoni wa we a vha o ṋamela bere. Zwiṋoni zwoṱhe zwa fura nga ṋama dzavho.