Bugu Ya U Thoma Ya Dzikhosi

1 Khosi Davida o vha o no kalaha,+ o no vha wa maḓuvha, naho vha tshi mu fukedza nguvho o vha a sa pfi vhududo. 2 Vhashumeli vhawe vha amba nae vha ri: “Thovhela muṋe washu nga a ṱoḓelwe musidzana* uri a ṱwe na khosi a tshi i ṱhogomela. Onoyo musidzana u ḓo lala tsini na khosi uri thovhela muṋe washu a dudelwe.” 3 Vha ṱoḓa musidzana o nakaho shangoni ḽoṱhe ḽa Isiraele, vha wana Abisaga+ wa Musunema,+ vha mu ḓisa ha khosi. 4 Onoyo musidzana o vha o naka nga maanḓa, a tshi ṱwa na khosi a tshi i ṱhogomela, fhedzi khosi ya si ite zwa vhudzekani nae.

5 Nga tshenetsho tshifhinga, Adonia+ murwa wa Hagithi o vha a tshi khou ḓihudza a tshi ri: “Ndi ḓo vha khosi!” A wana gariki na vhaṋameli vha bere na vhanna vha 50 vha u gidima phanḓa hawe.+ 6 Fhedzi khotsi awe ho ngo vhuya a mu kaidza a ri: “Ndi ngani wo ita zwenezwo?” Zwiṅwe hafhu, o vha o naka nga maanḓa, e murathu wa Abesalomo. 7 Adonia a langana na Yoaba murwa wa Tseruya na tshifhe Abiathara,+ vhenevho vha mu thusa na u mu tikedza.+ 8 Fhedzi tshifhe Tsadoko,+ Benaya+ murwa wa Yehoyada, muporofita Nathani,+ Shimei,+ Rei na vhahali+ vha Davida a vho ngo tikedza Adonia.

9 Adonia a ita tshiṱhavhelo+ tsha nngu, kholomo na zwifuwo zwo nonaho tomboni ḽa Tsohelethe, hune ha vha tsini na Eni-rogele, a ramba vharwa vhoṱhe vha khosi na vhanna vhoṱhe vha Yuda vha re vhashumeli vha khosi. 10 Fhedzi a si rambe muporofita Nathani, Benaya, vhahali kana Salomo murathu wawe. 11 Nathani+ a amba na Batseba+ mme a Salomo a ri:+ “Naa wo zwi pfa uri Adonia+ murwa wa Hagithi ndi khosi na uri Davida muṋe washu ha ḓivhi tshithu ngazwo? 12 Ndi khou humbela uri u ḓe ndi u eletshedze uri u ḓitshidze u dovhe u tshidze na murwa wau Salomo.+ 13 Iya kha Khosi Davida u ambe nae uri: ‘Naa a si iwe thovhela muṋe wanga we wa anela mushumeli wau wa ri: “Salomo murwa wau u ḓo vha khosi vhudzuloni hanga, ndi ene ane a ḓo dzula kha khuluṋoni yanga”?+ Zwino ndi ngani Adonia e khosi?’ 14 Musi u tshi kha ḓi amba na khosi, ndi ḓo dzhena nda khwaṱhisedza zwine wa ḓo vha u tshi khou zwi amba.”

15 Batseba a ya kha khosi pfamoni yayo. Khosi yo vha yo no kalaha vhukuma, i tshi khou ṱhogomelwa nga Abisaga+ wa Musunema. 16 Batseba a khotha, a luvha khosi, khosi ya ri: “Iwe u khou ṱoḓa mini?” 17 A i fhindula a ri: “Thovhela, ndi iwe we wa anela mushumeli wau nga dzina ḽa Yehova Mudzimu wa ri: ‘Murwa wau u ḓo vha khosi vhudzuloni hanga, ndi ene ane a ḓo dzula kha khuluṋoni yanga.’+ 18 Fhedzi Adonia ndi ene khosi, thovhela muṋe wanga ha ḓivhi tshithu.+ 19 O ita zwiṱhavhelo zwa mboho, zwifuwo zwo nonaho na nngu nnzhi, o ramba vharwa vhoṱhe vha khosi, tshifhe Abiathara na Yoaba mulangammbi;+ fhedzi ho ngo ramba Salomo mushumeli wau.+ 20 Zwino thovhela muṋe wanga, vhathu vhoṱhe vha Isiraele vho lavhelesa iwe uri u vha vhudze uri ndi nnyi ane a ḓo dzula kha khuluṋoni vhudzuloni hau thovhela muṋe wanga. 21 Ngauri thovhela muṋe wanga a tshi tou vhulungwa na vhomakhulukuku wawe, nṋe na murwa wanga Salomo ri ḓo dzhiiwa sa vhafheṱi.”

22 Musi a tshi kha ḓi amba na khosi, muporofita Nathani a dzhena.+ 23 Khosi ya vhudzwa uri: “Muporofita Nathani o swika!” A dzhena a ima phanḓa ha khosi a luvha khosi. 24 Nathani a ri: “Thovhela muṋe wanga, naa wo ri: ‘Adonia u ḓo vha khosi vhudzuloni hanga, ndi ene ane a ḓo dzula kha khuluṋoni yanga’?+ 25 Ngauri ṋamusi o ya u ita zwiṱhavhelo+ zwa mboho, zwifuwo zwo nonaho na nngu nnzhi, o ramba vharwa vhoṱhe vha khosi, vhalangammbi na tshifhe Abiathara.+ Vha khou u ḽa na u nwa nae henengei, vha tshi ri: ‘Khosi Adonia nga a lalame!’ 26 Fhedzi ho ngo ramba nṋe mushumeli wau kana tshifhe Tsadoko kana Benaya+ murwa wa Yehoyada kana Salomo mushumeli wau. 27 Naa thovhela muṋe wanga o zwi tendela a songo vhudza mushumeli wawe uri ndi nnyi ane a fanela u dzula kha khuluṋoni vhudzuloni ha thovhela muṋe wanga?”

28 Khosi Davida a fhindula a ri: “Mmbidzeleni Batseba.” A dzhena a ima phanḓa ha khosi. 29 Khosi ya ita muano ya ri: “Ndi ana nga Yehova a tshilaho, we a nndamulela khomboni dzoṱhe,+ 30 samusi ndo u anela nga Yehova Mudzimu wa Isiraele, nda ri: ‘Salomo murwa wau u ḓo vha khosi vhudzuloni hanga, ndi ene ane a ḓo dzula kha khuluṋoni yanga!’ ndi ḓo ita zwenezwo ṋamusi.” 31 Batseba a khotha o kwatamisa tshifhaṱuwo a luvha khosi a ri: “Ngavhe Thovhela muṋe wanga Davida a tshi tshila nga hu sa fheli!”

32 Nga u ṱavhanya Khosi Davida a ri: “Mmbidzeleni tshifhe Tsadoko, muporofita Nathani na Benaya+ murwa wa Yehoyada.”+ Vha dzhena vha ima phanḓa ha khosi. 33 Khosi ya amba navho ya ri: “Ṱuwani na vhashumeli vhanga, ni ṋamedze murwa wanga Salomo meila,+ ni mu ise Gihoni.+ 34 Tshifhe Tsadoko na muporofita Nathani vha fanela u mu vhea+ uri a vhe khosi ya Isiraele henefho; ni lidze luṋanga ni ri: ‘Khosi Salomo nga a lalame!’+ 35 Ni kone u vhuya no mu sala murahu, u ḓo dzhena a dzula kha khuluṋoni yanga; a vha khosi vhudzuloni hanga, ndi ḓo mu vhea uri a vhe murangaphanḓa wa Isiraele na wa Yuda.” 36 Nga u ṱavhanya Benaya murwa wa Yehoyada a amba na khosi a ri: “Amen! Ngavhe Yehova Mudzimu wa thovhela muṋe wanga a tshi zwi khwaṱhisedza. 37 Yehova nga a vhe na Salomo,+ samusi o vha e na thovhela muṋe wanga, ngavhe khuluṋoni yawe i tshi vha khulwane u fhira khuluṋoni ya thovhela muṋe wanga Davida.”+

38 Tshifhe Tsadoko, muporofita Nathani, Benaya+ murwa wa Yehoyada, Vhakireti na Vhapelethi+ vha ya vha ṋamedza Salomo meila ya Khosi Davida,+ vha mu isa Gihoni.+ 39 Tshifhe Tsadoko a dzhia luṋanga lu re na mapfura+ denndeni+ a ḓodza Salomo,+ vha thoma u lidza luṋanga, vhathu vhoṱhe vha thoma u huwelela vha ri: “Khosi Salomo nga a lalame!” 40 Nga murahu ha zwenezwo vhathu vhoṱhe vha mu tevhela vha tshi khou lidza zwiṱiringo vho takala vhukuma, vha tshi ita phosho lwe na ḽifhasi ḽa dzinginyea.+

41 Adonia na vhoṱhe vhe a vha o vha ramba vha zwi pfa musi vho no fhedza u ḽa.+ Musi Yoaba a tshi tou pfa u lila ha luṋanga, a ri: “Naa bonyongo ḽi re muḓini ndi ḽa mini?” 42 Musi a tshi kha ḓi amba, Yonathani+ murwa wa tshifhe Abiathara a swika. Adonia a ri: “Dzhena, ngauri u munna wavhuḓi, wo ḓisa mafhungo avhuḓi.” 43 Fhedzi Yonathani a fhindula Adonia a ri: “Aiwa! Thovhela muṋe washu Davida o vhea Salomo uri a vhe khosi. 44 Khosi yo ri a fhelekedzwe nga tshifhe Tsadoko, muporofita Nathani, Benaya murwa wa Yehoyada, Vhakireti na Vhapelethi, vha mu ṋamedza meila ya khosi.+ 45 Tshifhe Tsadoko na muporofita Nathani vho mu ḓodza ngei Gihoni uri a vhe khosi. Nga murahu ha zwenezwo vha vhuya vho takala, ha vuwa bonyongo muḓini. Ndi yone phosho ye wa i pfa. 46 Zwiṅwe hafhu, Salomo o dzula kha khuluṋoni ya vhuhosi. 47 Vhashumeli vha khosi vho ḓa u fhululedza thovhela muṋe washu Davida vha tshi ri: ‘Ngavhe Mudzimu wau a tshi ita uri dzina ḽa Salomo ḽi vhe ḽavhuḓi u fhira dzina ḽau, ngavhe a tshi ita uri khuluṋoni yawe i vhe khulu u fhira khuluṋoni yau!’ Khosi ya kwatama ya losha i mmbeteni. 48 Khosi ya dovha ya ri: ‘Nga hu rendwe Yehova Mudzimu wa Isiraele, we ṋamusi a ri ṋea ane a ḓo dzula kha khuluṋoni yanga, a ntendela ndi tshi zwi vhona!’”

49 Vhoṱhe vho rambiwaho nga Adonia vha ofha, muṅwe na muṅwe a takuwa a ṱuwa. 50 Adonia na ene o vha a tshi khou ofha Salomo, a takuwa a ya a fara maṋanga a aḽeṱare.+ 51 Salomo a vhudzwa uri: “Adonia u khou ofha iwe Khosi Salomo; o fara maṋanga a aḽeṱare u ri: ‘Khosi Salomo kha thome a mpfulufhedzise uri ha nga vhulayi mushumeli wawe nga banga.’” 52 Salomo a fhindula a ri: “Arali a ḓifara nga nḓila yo teaho, na luvhudzi na luthihi lwa ṱhohoni yawe a lu nga weli fhasi; fhedzi arali ha wanala vhuvhi+ khae u ḓo fa.” 53 Khosi Salomo a ruma muthu uri a vhidze Adonia henefho aḽeṱareni. A ḓa a gwadama phanḓa ha Khosi Salomo, Salomo a amba nae a ri: “Tshimbila u ye nḓuni yau.”