Ekisoda

12 Yehova a amba na Mushe na Aroni shangoni ḽa Egipita a ri: 2 “Wonoyu ṅwedzi u ḓo vha wa u thoma kha miṅwedzi yaṋu. U ḓo vha wone ṅwedzi wa u thoma wa ṅwaha waṋu.+ 3 Ambani na Vhaisiraele vhoṱhe ni ri: ‘Nga ḓuvha ḽa vhufumi ḽa wonoyu ṅwedzi, muṅwe na muṅwe wavho u fanela u bvisa nngu+ a tshi itela muṱa wawe, muṱa muthihi u vhe na nngu nthihi. 4 Fhedzi arali muṱa u muṱuku lune u nga si kone u fhedza nngu, wonoyo muṱa na vhahura vhawo vha tsini vha fanela u kovhekana zwi tshi ya nga tshivhalo tsha vhathu. Musi ni tshi kovhekana, ni sedze uri muthu muthihi a nga ḽa ṋama nngafhani ya nngu. 5 Nngu yaṋu i fanela u vha i sa lwali,+ i ya nduna i na ṅwaha muthihi. Ni nga nanga kha ngwana dza nduna kana kha zwibudzana. 6 Ni i ṱhogomele u swika nga ḓuvha ḽa vhu 14 ḽa wonoyu ṅwedzi,+ tshivhidzo tshoṱhe tsha tshitshavha tsha Isiraele tshi tea u i ṱhavha nga madekwana.*+ 7 Vha tea u dzhia maṅwe malofha vha a hashe nga matungo a dzifureme na nga nṱha hadzo nḓuni dzine vha ḓo i ḽela khadzo.+

8 “‘Vha tea u ḽa ṋama nga honoho vhusiku.+ Vha fanela u i gotsha muliloni, vha i ḽe na vhurotho vhu si na mbiliso+ na miroho i vhavhaho.+ 9 Ni songo i ḽa i mbisi kana yo tou vholomiswa, fhedzi ni i gotshe muliloni, i na ṱhoho yayo na khwanḓa dzayo na zwa nga ngomu hayo. 10 A no ngo tea u sia iṅwe ḽa vhuya ḽa tsha, fhedzi arali ya sala u swika nga matsheloni ni fanela u i fhisa.+ 11 Ni fanela u i ḽa nga heyi nḓila, ni fanela u ḓivhofha khundu nga bannda, no ambara thovho* milenzheni yaṋu, no fara lubaḓa; ni fanela u i ḽa nga u ṱavhanya. Ndi Paseka ya Yehova. 12 Nga honoho vhusiku ndi ḓo buḓekanya shango ḽa Egipita nda vhulaya tanzhe ḽiṅwe na ḽiṅwe shangoni ḽa Egipita, u bva kha ḽa muthu u swika kha ḽa tshifuwo;+ ndi ḓo haṱula midzimu yoṱhe ya Egipita.+ Ndi nṋe Yehova. 13 Malofha a ḓo vha luswayo kha nnḓu dzine na vha khadzo; ndi ḓo vhona malofha, ndi ḓo ni pfuka, ṱhamu a i nga ni ḓeli ya ni fhelisa musi ndi tshi rwa shango ḽa Egipita.+

14 “‘Ḽeneḽo ḓuvha ḽi ḓo vha tshihumbudzi kha inwi, ni tea u ḽi pembelela sa vhuṱambo ha Yehova kha mirafho yaṋu. Ni fanela u ḽi pembelela sa mulayo wa lini na lini. 15 Ni ḽe vhurotho vhu si na mbiliso maḓuvha a sumbe.+ Nga ḓuvha ḽa u thoma ni bvise suko ḽi re na mbiliso nḓuni dzaṋu, ngauri muthu ane a ḽa zwi re na mbiliso u bva nga ḓuvha ḽa u thoma u swika nga ḽa vhusumbe, onoyo u tea u vhulawa vhukati ha Vhaisiraele. 16 Nga ḓuvha ḽa u thoma hu vhe na muṱangano mukhethwa, nga ḓuvha ḽa vhusumbe hu vhe na muṅwe muṱangano mukhethwa. Hu songo shumiwa nga eneo maḓuvha.+ Muthu muṅwe na muṅwe a nga ḓilugiselela zwiḽiwa zwine a tea u zwi ḽa.

17 “‘Ni tea u tevhedza honovhu Vhuṱambo ha Vhurotho vhu si na Mbiliso,+ ngauri nga ḽeneḽo ḓuvha ndi ḓo bvisa magogo* aṋu shangoni ḽa Egipita. Ni tea u tevhedza ḽeneḽi ḓuvha kha mirafho yaṋu yoṱhe sa mulayo wa lini na lini. 18 Nga ṅwedzi wa u thoma, nga ḓuvha ḽa vhu 14 ḽa ṅwedzi, nga madekwana+ ni tea u ḽa vhurotho vhu si na mbiliso u swika nga madekwana a ḓuvha ḽa vhu 21 ḽa ṅwedzi. 19 A ho ngo fanela u vha na suko ḽi re na mbiliso nḓuni dzaṋu maḓuvha a sumbe, ngauri arali muthu a ḽa zwi re na mbiliso, hu sa londwi uri ndi mutsinda kana ndi mudzulapo wa ḽeneḽo shango,+ onoyo muthu u tea u vhulawa tshitshavhani tsha Isiraele.+ 20 A no ngo fanela u ḽa naho tshi tshini tshi re na mbiliso. Mahayani aṋu oṱhe ni tea u ḽa vhurotho vhu si na mbiliso.’”

21 Nga u ṱavhanya Mushe a vhidza vhahulwane vhoṱhe vha Isiraele+ a amba navho a ri: “Ṱuwani ni ye u nanga zwifuwo* zwiṱuku u itela miṱa yaṋu, ni zwi ṱhavhe u itela u zwi ṋekedza nga Paseka. 22 Ni tea u mbwandamedza matavhi a muhisopo kha malofha a re kha sambelo, ni hashe malofha nga nṱha ha fureme na nga matungo ayo; a ho ngo fanela u vha na muthu na muthihi ane a tea u bva nga muṋango wa nnḓu yawe u swika ḽi tshi tsha. 23 Musi Yehova a tshi buḓekanya u itela u rwa Vhaegipita, a tshi vhona malofha nga nṱha ha dzifureme na nga matungo adzo, Yehova u ḓo pfuka wonoyo muṋango, a nga si tendele ṱhamu i vhulayaho* i tshi dzhena nḓuni dzaṋu.+

24 “Inwi na vhana vhaṋu ni tea u humbula tshenetshi tshi⁠itea sa mulayo wa lini na lini.+ 25 Musi ni tshi swika shangoni ḽine Yehova a ḓo ni ṋea ḽone, vhunga o amba, ni tea u humbula tshenetshi tshi⁠itea.+ 26 Musi vhana vhaṋu vha tshi ni vhudzisa vha tshi ri: ‘Itshi tshiitea tshi amba mini kha inwi?’+ 27 Ni fanela u vha fhindula na ri: ‘Ndi tshiṱhavhelo tsha Paseka ya Yehova, we a pfuka nḓuni dza Vhaisiraele ngei Egipita musi a tshi rwa Vhaegipita, fhedzi a litsha nnḓu dzashu.’”

Ngauralo, vhathu vha khotha vha luvha. 28 Nga zwenezwo, Vhaisiraele vha ya vha ita nga nḓila ye Yehova a laedza ngayo Mushe na Aroni.+ Vha ita nga u ralo.

29 Vhukati ha vhusiku, Yehova a vhulaya matanzhe oṱhe shangoni ḽa Egipita,+ u bva kha tanzhe ḽa Farao we a vha o dzula kha khuluṋoni yawe, u swika kha tanzhe ḽa mufariwa ḽe ḽa vha ḽi dzhele, na matanzhe oṱhe a zwifuwo.+ 30 Nga zwenezwo, Farao a vuwa nga honoho vhusiku khathihi na vhashumeli vhawe vhoṱhe na vhaṅwe Vhaegipita vhoṱhe, ho vha hu na tshililo tshihulu kha Vhaegipita, nga⁠uri ho vha hu si na nnḓu ye ya vha i si na muthu o faho.+ 31 Nga u ṱavhanya Farao a vhidza Mushe na Aroni+ nga honoho vhusiku a amba navho a ri: “Vuwani, ni ṱuwe vhukati ha vhathu vhanga, inwi khathihi na vhaṅwe Vhaisiraele. Ṱuwani ni ye u shumela Yehova vhunga no amba.+ 32 Ni ṱuwe na nngu dzaṋu na kholomo dzaṋu vhunga no amba.+ Fhedzi ni humbele Mudzimu uri a mphaṱhutshedze.”

33 Vhaegipita vha thoma u kombetshedza vhathu uri vha ṱuwe nga u ṱavhanya+ kha ḽeneḽo shango, ngauri vho vha vha tshi ri: “Arali na sa ṱuwa ri ḓo fa roṱhe!”+ 34 Vhathu vho vha vho hwala suko ḽa fuḽauru ḽe ḽa vha ḽi sa athu u shelwa mbiliso, ḽi nga ngomu hune ḽa sukelwa hone,* vha ḽi putela nga zwiambaro zwavho vha ḽi hwala kha mahaḓa. 35 Vhaisiraele vha ita zwe Mushe a vha vhudza zwone, vha humbela Vhaegipita madzanga a siḽiva na a musuku na zwiambaro.+ 36 Yehova a ita uri Vhaisiraele vha takalelwe nga Vhaegipita, lwe vha vha ṋea zwe vha zwi humbela, vha dzhia lupfumo lwa Vhaegipita.+

37 Vhaisiraele vha ṱuwa Ramasese+ vha ya Sukothe,+ ho vha hu vhanna vha ṱoḓaho u vha 600 000 vha tshi khou tshimbila nga milenzhe, hu sa vhalwi vhana.+ 38 Na vhaṅwe vhatsinda*+ vha ṱuwa navho, u katela na nngu, kholomo, zwo vha zwi zwifuwo zwinzhi vhukuma. 39 Vha thoma u baka ḽofo dza vhurotho vhu si na mbiliso nga suko ḽa fuḽauru ḽe vha bva naḽo Egipita. Ḽo vha ḽi si na mbiliso ngauri vho pandelwa Egipita nga u ṱavhanya lwe vha si kone u ḓilugiselela mbuvha.+

40 Vhaisiraele vho dzula Egipita+ miṅwaha ya 430.+ 41 Musi miṅwaha ya 430 i tshi fhela, nga ḽeneḽo ḓuvha, magogo* oṱhe a Yehova a bva shangoni ḽa Egipita. 42 Ndi vhusiku vhune vha ḓo pembelela Yehova nge a vha bvisa shangoni ḽa Egipita. Honovhu vhusiku ndi vhune ha fanela u humbulwa Yehova ngaho, nga vhathu vhoṱhe vha Isiraele kha mirafho yavho yoṱhe.+

43 Yehova a amba na Mushe na Aroni a ri: “Mulayo wa Paseka ndi hoyu: I songo ḽiwa nga mutsinda.+ 44 Fhedzi arali muthu e na phuli ya munna we a mu renga nga tshelede, u fanela u mu fumbisa.+ Nga murahu ha zwenezwo, a nga i ḽa. 45 Mutsinda na mushumi o tou tholwaho a vho ngo tea u i ḽa. 46 I fanela u ḽiwa muḓini wonoyo. A no ngo fanela u bva nḓuni na yeneyo ṋama, a no ngo tea u vunḓa rambo ḽayo.+ 47 Tshitshavha tshoṱhe tsha Isiraele tshi fanela u i pembelela. 48 Arali mutsinda ane a dzula na inwi a tshi ṱoḓa u pembelela Paseka ya Yehova, munna muṅwe na muṅwe wa muṱani wawe u tea u fumbiswa. Ndi hone a tshi nga i pembelela; u ḓo nga mudzulapo wa ḽeneḽo shango. Fhedzi munna a songo fumbaho ho ngo tea u i ḽa.+ 49 Mulayo wonoyo u ḓo shuma kha mudzulapo na kha mutsinda ane a dzula na inwi.”+

50 Vhaisiraele vhoṱhe vha ita zwoṱhe zwe Yehova a laedza Mushe na Aroni. Vha ita nga u ralo. 51 Nga ḽeneḽo ḓuvha, Yehova o bvisa Vhaisiraele shangoni ḽa Egipita nga magogo* avho.