Numeri

15 Yehova a bvela phanḓa a tshi amba na Mushe a ri: 2 “Amba na Vhaisiraele u ri: ‘Musi ni tshi swika shangoni ḽine nda khou ni ṋea uri ni dzule khaḽo,+ 3 na ṋekedza Yehova tshifhiwa tsha u fhiswa nga mulilo tshi bvaho kha sambi, hu sa londwi uri ndi tshifhiwa tsha u fhiswa+ kana tshiṱhavhelo tsha muano wo khetheaho kana tshifhiwa tsha u ḓifunela+ kana tshifhiwa tshine tsha ṋekedzwa nga vhuṱambo ha ṅwaha muṅwe na muṅwe,+ uri zwi nukhelele kha Yehova,+ 4 muthu ane a ṋekedza tshifhiwa tshawe u fanela u dovha a ṋekedza Yehova tshifhiwa tsha thoro tsha fuḽauru tsekene,+ tshipiḓa tshithihi kha zwa fumi tsha tshikalo tsha efa,* tsho ṱanganyiswaho na tshipiḓa tshithihi kha zwiṋa tsha hini* tsha mapfura. 5 U dovhe u ṋekedze tshifhiwa tsha waini, tshipiḓa tshithihi kha zwiṋa tsha hini, khathihi na tshifhiwa tsha u fhiswa+ kana tshiṱhavhelo tshiṅwe na tshiṅwe tsha ngwana ya nduna. 6 Arali i thutha, u ṋekedze tshifhiwa tsha thoro tsha zwipiḓa zwivhili kha zwa fumi tsha fuḽauru tsekene yo ṱanganyiswaho na tshipiḓa tshithihi kha zwiraru tsha hini tsha mapfura. 7 U ṋekedze tshifhiwa tsha u nwiwa tsha waini, tshipiḓa tshithihi kha zwiraru tsha hini, zwi nukhelele kha Yehova.

8 “‘Arali u tshi fanela u ṋekedza mboho sa tshifhiwa tsha u fhiswa+ kana u ṋekedza tshiṱhavhelo tsha muano wo khetheaho+ kana tshiṱhavhelo tsha u pfumedzana na Yehova,+ 9 u dovhe u ṋekedze na yeneyo mboho na tshifhiwa tsha thoro+ tsha zwipiḓa zwiraru kha zwa fumi zwa fuḽauru tsekene yo ṱanganyiswaho na hafu ya hini ya mapfura. 10 U dovhe u ṋekedze tshifhiwa tsha waini sa tshifhiwa tshi nwiwaho,+ hafu ya hini, sa tshifhiwa tsho fhiswaho nga mulilo, uri tshi nukhelele kha Yehova. 11 Hezwi ndi zwine zwa fanela u itwa kha mboho iṅwe na iṅwe kana thutha iṅwe na iṅwe kana ngwana iṅwe na iṅwe ya nduna kana mbudzi iṅwe na iṅwe. 12 Hu sa londwi uri ni ṋekedza nngana, hezwi ndi zwine na fanela u zwi ita kha iṅwe na iṅwe yadzo, hu sa londwi uri ndi nngana. 13 Ndi yone nḓila ine muṅwe na muṅwe o bebelwaho Isiraele a fanela u ṋekedza ngayo tshifhiwa tsha u fhiswa, tshine tsha nukhelela kha Yehova.

14 “‘Arali mutsinda ane na khou dzula nae kana we a fhedza tshifhinga tshilapfu ni tshi khou dzula nae, na ene a ṋekedze tshifhiwa tsha u fhiswa tshine tsha nukhelela kha Yehova, a ite zwine na zwi ita.+ 15 Inwi vhane na vha vha tshivhidzo khathihi na mutsinda ane na dzula nae ni ḓo vha na mulayo muthihi. U ḓo vha mulayo wa lini na lini kha mirafho yaṋu yoṱhe. Inwi na mutsinda ni ḓo fana phanḓa ha Yehova.+ 16 Kha inwi khathihi na mutsinda ane na dzula nae hu fanela u vha na mulayo u fanaho na khaṱhulo i fanaho.’”

17 Yehova a bvela phanḓa a tshi amba na Mushe a ri: 18 “Amba na Vhaisiraele u ri: ‘Musi ni tshi swika shangoni ḽiṋe nda khou ni isa khaḽo 19 na musi ni tshi ḽa vhurotho* naho vhu vhufhio ha ḽeneḽo shango,+ ni ṋeele kha Yehova. 20 Ni ṋeele nga zwiranzhe+ zwa thoro dzaṋu no zwi baka sa ḽofo.* Ni zwi ṋeele sa muṋeelo u bvaho fhethu hune ha fhefherwa hone.* 21 Zwiṅwe zwa zwiranzhe zwa thoro ni zwi ṋeele Yehova kha mirafho yaṋu yoṱhe.

22 “‘Arali na ita vhukhakhi na kundelwa u tevhedza ndaela dze Yehova a dzi vhudza Mushe, 23 zwoṱhe zwe Yehova a ni laya a tshi shumisa Mushe u bva nga ḓuvha ḽe Yehova a ni laya u ya phanḓa kha mirafho yaṋu, 24 arali no khakha tshitshavha tshi sa zwi ḓivhi, tshitshavha tshoṱhe tshi tea u ṋekedza mboho sa tshifhiwa tsha u fhiswa uri i nukhelele kha Yehova khathihi na tshifhiwa tsha thoro na tshifhiwa tsha u nwiwa zwi tshi ya nga maitele o ḓoweleaho,+ na tshibudzana tshithihi sa tshifhiwa tsha u pfumelela tshivhi.+ 25 Tshifhe u ḓo ita tshipfumelelo a tshi itela tshitshavha tshoṱhe tsha Isiraele, vha ḓo hangwelwa,+ ngauri vho vha vho tou khakha, vha ḓisa tshifhiwa tshavho tshi fhiselwaho Yehova na tshifhiwa tshavho tsha u pfumelela tshivhi phanḓa ha Yehova u itela vhukhakhi havho. 26 Tshitshavha tshoṱhe tsha Vhaisiraele tshi ḓo hangwelwa khathihi na mutsinda ane a dzula natsho, ngauri vhathu vhoṱhe vho khakha.

27 “‘Arali muthu naho e ufhio a ita tshivhi a songo ḓiimisela, a ḓise mbudzi ya tsadzi i re na ṅwaha muthihi u itela tshifhiwa tsha u pfumelela tshivhi.+ 28 Tshifhe u ḓo ita tshipfumelelo a tshi itela muthu we a khakha nga u ita tshivhi a songo ḓiimisela phanḓa ha Yehova, uri a mu pfumelele, u ḓo hangwelwa.+ 29 Kha mudzulapo o bebelwaho kha Vhaisiraele na mutsinda a re vhukati havho, hu vhe na mulayo u fanaho musi o ita vhukhakhi a songo ḓiimisela.+

30 “‘Fhedzi muthu ane a khakha nga khole,+ hu sa londwi uri ndi mudzulapo o bebelwaho henefho kana ndi mutsinda, u vha a tshi khou sema Yehova, u tea u vhulawa. 31 Ngauri o nyadza ipfi ḽa Yehova a pfuka mulayo wawe, onoyo muthu u fanela u vhulawa.+ U tea u ḓifhindulela kha vhukhakhi hawe.’”+

32 Musi Vhaisiraele vhe sogani, vha wana muṅwe munna a tshi khou reḓa khuni nga Savhatha.+ 33 Vhe vha mu wana a tshi khou reḓa khuni vha mu ḓisa ha Mushe na Aroni na kha tshitshavha tshoṱhe. 34 Vha mu valela,+ nga⁠uri vho vha vha sa ḓivhi zwine a fanela u itwa zwone.

35 Yehova a amba na Mushe a ri: “Onoyo munna u fanela u vhulawa,+ tshitshavha tshoṱhe tshi fanela u mu kanḓa nga matombo nnḓa ha madennde.”+ 36 Tshitshavha tshoṱhe tsha mu bvisela nnḓa ha madennde, tsha mu kanḓa nga matombo u swika a tshi fa, sa zwe Yehova a laya Mushe.

37 Yehova a bvela phanḓa a tshi amba na Mushe a ri: 38 “Amba na Vhaisiraele u vha vhudze uri vha fanela u rungelela mashaphu magumoni a zwiambaro zwavho, vha fanela u rungelela na lupendelo lwa muvhala wa lutombo nṱha ha mashaphu a tshiambaro, zwenezwo vha zwi ite kha mirafho yavho yoṱhe.+ 39 ‘Ni rungelele enea mashaphu uri ni kone u a vhona, ni humbule ndaela dzoṱhe dza Yehova ni dzi tevhedze.+ Ni songo tevhela mbilu dzaṋu na maṱo aṋu, zwine zwa ḓo ita uri ni si fhulufhedzee kha nṋe.*+ 40 Zwenezwo zwi ḓo ni thusa uri ni humbule na u tevhedza ndaela dzanga dzoṱhe na u vha vhakhethwa kha Mudzimu waṋu.+ 41 Ndi nṋe Yehova Mudzimu waṋu we a ni bvisa shangoni ḽa Egipita uri ndi vhe Mudzimu waṋu.+ Ndi nṋe Yehova Mudzimu waṋu.’”+