Bugu Ya U Thoma Ya Dzikhosi

7 Salomo o fhedza+ miṅwaha ya 13 a tshi khou fhaṱa nnḓu* yawe.+

2 A fhaṱa Nnḓu ine ya vhidzwa Ḓaka ḽa Libanoni+ ya vhulapfu ha khubithi* dza 100, vhuphara ha khubithi dza 50, u ya nṱha i khubithi dza 30, yo vha yo fhaṱwa nṱha ha miduba miṋa ya phuphu dza miṱaululo; ho vha hu na matanda a muṱaululo+ kha dziphuphu. 3 Yo vha yo fulelwa nga matanda a muṱaululo e a vha e nṱha ha dziphuphu; o vha e 45, muduba muṅwe na muṅwe u na a 15. 4 Yo vha i na miduba miraru ya mafasiṱere, fasiṱere ḽiṅwe na ḽiṅwe ḽo vha ḽo livhana na ḽiṅwe kha miduba miraru. 5 Miṋango yoṱhe na fureme dza miṋango zwo vha zwi na thungo nṋa, u fana na mafasiṱere e a vha o livhana e miduba miraru.

6 O fhaṱa Holo* ya Phuphu ya vhulapfu ha khubithi dza 50 na vhuphara ha khubithi dza 30, yo vha i na vurannḓa i re na phuphu phanḓa hayo, yeneyo vurannḓa yo vha i na ṱhanga.

7 O dovha a fhaṱa na Holo* ya Khuluṋoni+ he a vha a tshi haṱulela hone, ine ya vhidzwa Holo ya Khaṱhulo,+ vho vha vho i fulela nga miṱaululo u bva fhasi u swika kha ṱhanga.

8 Nnḓu* ye a vha a tshi ḓo dzula khayo, ye ya vha i kha muṅwe muṱa,+ yo vha i nga murahu ha Holo, yo vha yo fhaṱwa u fana na dziṅwe nnḓu. Salomo o dovha a fhaṱela na ṅwana wa Farao we a vha o mu vhinga,+ nnḓu ine ya fana na yeneyo Holo.

9 Zwoṱhe zwo vha zwo fhaṱwa nga matombo o tsheṱiwaho a ḓuraho+ hu tshi tevhedzwa muelo, a tshewa nga saha dza u tshea matombo, nga nnḓa na nga ngomu, u bva kha mutheo u gonya, na nnḓa u swika muṱani muhulwane.+ 10 Mutheo wo vha wo fhaṱwa nga matombo mahulu a ḓuraho; maṅwe o vha e khubithi dza fumi, maṅwe o vha e khubithi dza malo. 11 Nga nṱha ho vha ho fhaṱwa nga matombo a ḓuraho, o tsheṱiwaho hu tshi tevhedzwa muelo, na nga thanda dza muṱaululo. 12 U mona na muṱa muhulwane ho vha hu na miduba miraru ya matombo o tsheṱiwaho na muduba wa matanda a muṱaululo, u fana na muṱa wa nga ngomu+ wa nnḓu ya Yehova na vurannḓa ya yeneyo nnḓu.+

13 Khosi Salomo a ri hu vhidzwe Hiramu+ wa ngei Tiro. 14 O vha e murwa wa tshilikadzi ya lushaka lwa Nafutali, khotsi awe o vha e Mutiro a tshi ita* koporo;+ o vha e na vhutsila vhuhulu, e na nḓivho+ na tshenzhelo ya u ita mishumo yo fhambanaho nga koporo. A ḓa ha Khosi Salomo a ita mishumo yawe yoṱhe.

15 A ita phuphu mbili dza koporo;+ phuphu iṅwe na iṅwe i khubithi dza 18 u ya nṱha, iṅwe na iṅwe ya dzenedzo phuphu mbili yo vha i tshi kalwa u mona nayo nga thambo ya vhulapfu ha khubithi dza 12.+ 16 A ita ṱhoho mbili dzadzo nga koporo uri dzi vhewe nṱha ha dziphuphu. Iṅwe na iṅwe yo vha i khubithi ṱhanu u ya nṱha. 17 Ṱhoho iṅwe na iṅwe i re kha phuphu yo vha i na ngeḓane dzi ngaho mambule,+ dzenedzo ngeḓane dzo vha dzo vhofhekanywa sa thambo; ṱhoho iṅwe na iṅwe yo vha i na dza sumbe. 18 A ita miduba mivhili ya maphomagraneithi u mona na mambule uri a thivhe ṱhoho dze dza vha dzi nṱha ha phuphu; o ita zwi fanaho kha dzenedzo ṱhoho dzoṱhe. 19 Ṱhoho dze dza vha dzi nṱha ha dziphuphu kha vurannḓa dzo vha dzi na tshivhumbeo tshine tsha nga tsha maluvha a mavolenga,* hu khubithi nṋa u ya nṱha. 20 Ṱhoho dzenedzo dzo vha dzi nṱha ha phuphu mbili, khadzo ho vha hu na ngeḓane; ho vha hu na maphomagraneithi a 200 o ita muduba u mona na ṱhoho ya phuphu iṅwe na iṅwe.+

21 A imisa phuphu dza kha vurannḓa ya thembele.*+ Musi a tshi imisa phuphu ya thungo ya tsha u ḽa,* a i ira dzina ḽa Yakini,* musi a tshi imisa ya thungo ya tsha monde* a i ira dzina ḽa Boasi.*+ 22 Ṱhoho dza phuphu dzo vha dzi na tshivhumbeo tsha maluvha a mavolenga.* Mushumo wa dziphuphu wa fhela.

23 A ita sambelo ḽihulu ḽi vhidzwaho Lwanzhe* nga tsimbi yo ṋokiswaho.+ Ḽo vha ḽo ita gumba,* mulomo waḽo u khubithi dza 10, u ya nṱha ḽi khubithi dza 5, u mona naḽo ḽi khubithi dza 30.+ 24 Ḽo khavhiswa nga madzanga+ a zwipulumbu u mona naḽo, kha khubithi nthihi hu na a fumi, eneo madzanga a zwipulumbu o ita miduba mivhili khaḽo, e tshithu tshithihi na sambelo. 25 Ḽo vha ḽo vhewa nṱha ha mboho dza 12,+ tharu dzo lavhelesa devhula, tharu dzo lavhelesa vhukovhela, tharu dzo lavhelesa tshipembe, tharu dzo lavhelesa vhubvaḓuvha; ḽeneḽo sambelo ḽo vha ḽi nṱha hadzo, dzo furalela vhukati. 26 Vhudenya haḽo ho vha hu vhuphara vhu eḓanaho na minwe miṋa;* lumeme lwaḽo lwo itwa u fana na lumeme lwa tshinwelo, u fana na luvha ḽa volenga.* Ḽeneḽo sambelo ḽo vha ḽi tshi shelwa maḓi a mielo ya nkho* dza 2 000.

27 A ita zwigoloi*+ zwa fumi zwa koporo. Tshiṅwe na tshiṅwe tsho vha tsho lapfa khubithi nṋa, tshi na vhuphara ha khubithi nṋa, u ya nṱha tshi khubithi tharu. 28 Zwigoloi zwo vha zwo itwa nga heyi nḓila: Zwo vha zwi na mitibo nga matungo, vhukati ha zwenezwo zwitibo ho vha hu na tsimbi dza u tika. 29 Kha zwitibo zwa nga matungo zwi re vhukati ha tsimbi dza u tika ho vha hu na zwifanyiso zwa ndau,+ mboho na vhakerube,+ ho itwa zwi fanaho kha tsimbi dza u tika. Nga nṱha na nga fhasi ha ndau na mboho hu na khare. 30 Tshigoloi tshiṅwe na tshiṅwe tsho vha tshi na malinga maṋa a koporo na hune ha ṱumiwa hone malinga ho vha hu koporo, tsho vha tshi tshi tikwa nga thungo dzatsho nṋa. Nga fhasi ha sambelo ho vha hu na thikho dze dza vha dzi na maluvha o itaho khare thungo dzoṱhe. 31 U vulea hatsho u bva nga ngomu u ya nṱha ho vha hu khubithi nthihi; tsho vulea tsha vha gumba,* tsho ima tsho vha tshi khubithi nthihi na hafu, he tsha vulea hone tsho vha tsho olwa makolo. Zwitibo zwatsho zwa nga matungo zwo vha zwo ita tshibogisi, zwi si gumba. 32 Malinga maṋa o vha e nga fhasi ha zwitibo, thikho dza malinga dzo vha dzo ṱumiwa kha tshigoloi; linga ḽiṅwe na ḽiṅwe u ya nṱha ḽo vha ḽi khubithi nthihi na hafu. 33 Malinga eneo o vha o itwa u fana na malinga a gariki. Thikho dzao, rimu dzao, zwipoko zwao na tsimbi ya vhukati, zwo vha zwo itwa nga tsimbi yo ṋokiswaho. 34 Ho vha hu na thikho nṋa na thungo nṋa dza tshigoloi tshiṅwe na tshiṅwe; thikho dzatsho dzo vha dzo ṱumiwa na tshenetsho tshigoloi. 35 Nga nṱha ha tshigoloi ho vha hu na tshipiḓa tsha vhulapfu ha hafu ya khubithi u ya nṱha, tshenetsho tshipiḓa tsho ita gumba,* zwipiḓa zwatsho, na zwitibo zwa nga matungo zwo vha zwi tshithu tshithihi. 36 Zwiṅwe hafhu, o vha o ola vhakerube, ndau na mitshevho kha zwipiḓa zwa tshenetsho tshigoloi na kha zwitibo zwa nga matungo u ya nga tshikhala tshine tsha vha hone kha tshiṅwe na tshiṅwe na khare u mona hoṱhe.+ 37 Yeneyo ndi nḓila ye a ita ngayo zwigoloi+ zwa fumi; zwo vha zwo itwa nga nḓila i fanaho,+ zwi zwa muelo u fanaho na tshivhumbeo tshi fanaho.

38 O ita na masambelo+ a fumi a koporo; ḽiṅwe na ḽiṅwe ḽo vha ḽi tshi shelwa maḓi a nkho* dza 40. Sambelo ḽiṅwe na ḽiṅwe ḽo vha ḽi ḽa muelo wa khubithi nṋa. Kha tshiṅwe na tshiṅwe tsha zwenezwi zwigoloi zwa fumi ho vha hu na sambelo ḽithihi. 39 O vha o vhea zwigoloi zwiṱanu thungo ya tsha u ḽa tsha nnḓu, zwiṱanu zwi nga thungo ya tsha monde tsha nnḓu, o vhea sambelo ḽihulu ḽi vhidzwaho Lwanzhe nga thungo ya tsha u ḽa tsha nnḓu tshipembe-vhubvaḓuvha.+

40 Hiramu+ o ita na masambelo, fosholo+ na zwigoḓelo.+

Hiramu a fhedza mushumo woṱhe we a vha a tshi khou u itela Khosi Salomo nḓuni ya Yehova:+ 41 phuphu+ mbili na ṱhoho dzi ngaho tshigoḓelo dzi re nṱha ha dzenedzo phuphu mbili; na ngeḓane+ mbili dzo khavhisaho ṱhoho mbili dzi ngaho tshigoḓelo dzi re nṱha ha phuphu; 42 kha ngeḓane mbili ho vha hu na maphomagraneithi+ a 400, miduba mivhili ya maphomagraneithi kha ngeḓane iṅwe na iṅwe, u itela u khavhisa ṱhoho mbili dzi ngaho tshigoḓelo dzi re nṱha ha phuphu mbili; 43 zwigoloi+ zwa fumi, tshiṅwe na tshiṅwe tsho hwala sambelo.+ 44 Sambelo+ ḽihulu ḽi vhidzwaho Lwanzhe ḽo vhewa nṱha ha mboho dza 12; 45 zwa u kumbela miḽora, fosholo, zwigoḓelo na thundu dzoṱhe, zwe Hiramu a zwi itela Khosi Salomo nga koporo yo pholishiwaho a tshi itela nnḓu ya Yehova. 46 Khosi yo zwi vhumbela tshiṱirikini tsha Mulambo wa Yorodane, vhukati ha Sukothe na Tsarithana.

47 Salomo a si kale thundu dzoṱhe, ngauri dzo vha dzi nnzhi nga maanḓa. Tshileme tsha koporo tsho vha tshi sa ḓivhei.+ 48 Salomo o ita thundu dzoṱhe dza nḓuni ya Yehova: aḽeṱare+ ya musuku; ṱafula+ ya musuku he ha vha hu tshi vhewa vhurotho ha ṱano khayo; 49 zwiṱomambone+ zwa musuku vhukuma, zwiṱanu kha thungo ya tsha u ḽa na zwiṱanu kha thungo ya tsha monde phanḓa ha kamara ya nga ngomu-ngomu; maluvha,+ mbone, zwa u dzima mbone, zwi zwa musuku;+ 50 masambelo, zwa u dzima mulilo,+ zwigoḓelo, zwinwelo+ na zwa u oka mulilo+ zwa musuku vhukuma; na zwa u ṱanganya mavothi na fureme nḓuni ya nga ngomu,+ hune ha vha fhethu Hukhethwa-khethwa na ya mavothi a thembele,+ nga musuku.

51 Khosi Salomo a fhedza mushumo woṱhe we a vha a tshi fanela u u ita nḓuni ya Yehova. Salomo a ḓisa zwithu zwe khotsi awe Davida a zwi ita zwikhethwa,+ a dzhenisa siḽiva, musuku na madzanga mbulungeloni dza nḓuni ya Yehova.+