Ekisoda

8 Yehova a amba na Mushe a ri: “Iya kha Farao u mu vhudze uri: ‘Yehova u ri: “Litsha vhathu vhanga vha ṱuwe uri vha ntshumele.+ 2 Arali wa ḓi dzulela u hana vha tshi ṱuwa, ndi ḓo ḓisa zwiḓula+ shangoni ḽau ḽoṱhe. 3 Mulambo wa Nili u ḓo ḓala zwiḓula, zwi ḓo thamuwa zwa dzhena nḓuni yau, kamarani yau, mmbeteni wau, nḓuni dza vhashumeli vhau, kha vhathu vhau, zwivhasoni zwau na hune wa sukela hone fuḽauru.+ 4 Zwiḓula zwi ḓo thamutshela iwe, vhathu vhau na vhashumeli vhau vhoṱhe.”’”

5 Nga murahu Yehova a amba na Mushe a ri: “U ambe na Aroni uri: ‘Imisela thonga yau nṱha ha milambo, migeroni ya Nili na mativhani, ita uri zwiḓula zwi thamutshele shangoni ḽa Egipita.’” 6 Aroni a imisela tshanḓa tshawe nṱha ha maḓi a Egipita, ha vha na zwiḓula zwa ḓala shangoni ḽa Egipita. 7 Naho zwo ralo, vhotshifhe vha itaho manditi vha ita zwi fanaho nga manditi avho, vha ita uri zwiḓula zwi ḓale shangoni ḽa Egipita.+ 8 Nga murahu ha tshifhinga, Farao a vhidza Mushe na Aroni a ri: “Humbelani Yehova uri a ṱuwise zwiḓula kha nṋe na kha vhathu vhanga,+ samusi ndi tshi khou ṱoḓa u litsha vhathu vha tshi ṱuwa uri vha kone u itela Yehova zwiṱhavhelo.” 9 Mushe a amba na Farao a ri: “Nga ṱhonifho hu ḓo vha iwe ane wa ḓo mmbudza tshifhinga tshine nda fanela u humbela uri zwiḓula zwi ṱuwiswe ha iwe, kha vhashumeli vhau, vhathu vhau na nḓuni dzau. Zwi ḓo sala Mulamboni wa Nili fhedzi.” 10 Farao a fhindula a ri: “Matshelo.” Mushe a ri: “Zwi ḓo vha nga nḓila ye wa amba, uri u ḓivhe uri a hu na muṅwe ane a nga Yehova Mudzimu washu.+ 11 Zwiḓula zwi ḓo ṱutshela iwe, nnḓu dzau, vhashumeli vhau na vhathu vhau. Zwi ḓo sala Mulamboni wa Nili+ fhedzi.”

12 Nga zwenezwo, Mushe na Aroni vha ṱuwa phanḓa ha Farao, Mushe a ya a humbela Yehova uri a ṱuwise zwiḓula zwe a zwi ḓisa ha Farao.+ 13 Yehova a ita zwe Mushe a mu humbela zwone, zwiḓula zwa thoma u fela dzinḓuni, miṱani na masimuni. 14 Vha thoma u zwi kuvhanganya zwa ita thulwi nnzhi, shango ḽa thoma u nukha. 15 Musi Farao a tshi vhona uri vhuimo ho no vha khwine, a rindidza+ mbilu yawe, a hana u vha thetshelesa, samusi Yehova o vha o amba.

16 Yehova a amba na Mushe a ri: “Amba na Aroni u ri: ‘Imisa thonga yau u rwe buse ḽa ḽifhasi, ḽi ḓo vha vhunyunyu shangoni ḽoṱhe ḽa Egipita.’” 17 Vha ita zwenezwo. Aroni a imisa thonga nga tshanḓa tshawe a rwa buse ḽa ḽifhasi, vhunyunyu ha luma vhathu na zwifuwo. Buse ḽoṱhe ḽa ḽifhasi ḽa vha vhunyunyu shangoni ḽoṱhe ḽa Egipita.+ 18 Vhotshifhe vha itaho manditi vha lingedza u ita zwi fanaho uri hu vhe na vhunyunyu nga manditi avho,+ fhedzi vha kundwa. Vhunyunyu ha luma vhathu na zwifuwo. 19 Ngauralo, vhotshifhe vha itaho manditi vha amba na Farao vha ri: “Ndi ma⁠anḓa a Mudzimu!”*+ Fhedzi Farao a ḓi bvela phanḓa a tshi rindidza mbilu yawe, a si vha thetshelese, sa zwe Yehova a amba.

20 Yehova a amba na Mushe a ri: “U vuwe nga matsheloni-tsheloni u ye u ime phanḓa ha Farao. Farao u ḓo ya mulamboni! U fanela u amba nae u ri: ‘Yehova o ri: “Litsha vhathu vhanga vha ṱuwe uri vha ntshumele. 21 Fhedzi arali wa sa litsha vhathu vhanga vha tshi ṱuwa, ndi ḓo u ḓisela mmbo,* iwe khathihi na vhashumeli vhau, vhathu vhau na nḓuni dzau; nnḓu dza Egipita dzi ḓo ḓala mmbo, dza ḓala na hoṱhe hune vha dzula hone. 22 Nga ḽeneḽo ḓuvha a thi nga iti zwi fanaho na zwenezwi shangoni ḽa Gosheni hune ha dzula vhathu vhanga. A hu nga ḓo vha na mmbo henefho;+ nga zwenezwo ni ḓo ḓivha uri nṋe Yehova ndi hone shangoni ḽino.+ 23 Ndi ḓo fhandekanya vhathu vhanga na vhathu vhau. Vhuṱolo honovhu vhu ḓo vhonala matshelo.”’”

24 Yehova a ita nga u ralo, mmbo dza ḓala nḓuni ya Farao na nḓuni dza vhashumeli vhawe na kha shango ḽoṱhe ḽa Egipita.+ Shango ḽo vha ḽo tshinyadzwa nga mmbo.+ 25 Mafheleloni Farao a vhidza Mushe na Aroni a ri: “Tshimbilani ni itele Mudzimu waṋu zwiṱhavhelo fhano.” 26 Fhedzi Mushe a ri: “A zwo ngo tea uri ri ite nga u ralo, ngauri zwiṱhavhelo zwine ra ḓo zwi ṋekedza Yehova Mudzimu washu zwi ḓo nengisa Vhaegipita.+ Arali ra ṋekedza zwiṱhavhelo zwine zwa ḓo nengisa Vhaegipita vha tshi zwi vhona, naa a vha nga ḓo ri kanḓa nga matombo? 27 Ri ḓo fara lwendo lwa maḓuvha mararu ra ya sogani, henengei ri ḓo ṋekedza Yehova Mudzimu washu zwiṱhavhelo samusi o ri vhudza uri ri ite nga u ralo.”+

28 Farao a ri: “Ndi ḓo ni litsha na ṱuwa uri ni ye u ṋekedza Yehova Mudzimu waṋu zwiṱhavhelo ngei sogani. Fhedzi a no ngo fanela u ya kule-kule. Na nṋe ni nkhumbelele+ kha Mudzimu waṋu.” 29 Mushe a ri: “Zwino ndi khou ṱuwa, ndi ḓo u humbelela kha Yehova, mmbo dzi ḓo ṱuwa matshelo kha Farao, vhashumeli vhawe na kha vhathu vhawe. U nga ri Farao a nga litsha u tamba nga riṋe nga u sa tendela vhathu vha tshi ṱuwa u itela u ṋekedza Yehova zwiṱhavhelo.”+ 30 Nga murahu ha zwenezwo, Mushe a ṱuwa phanḓa ha Farao a ya a humbela kha Yehova.+ 31 Yehova a ita zwe Mushe a amba, mmbo dza ṱutshela Farao, vhashumeli vhawe na vhathu vhawe. Hu si sale na nthihi. 32 Naho zwo ralo, Farao a dovha a rindidza mbilu yawe a si tendele vhathu vha tshi ṱuwa.