Vhurifhi Ha U Thoma Vhu Yaho Kha Vhakorinta

7 Ndi tshi fhindula zwe na nṅwalela ndi ri, ndi zwavhuḓi munna a sa iti zwa vhudzekani; 2 fhedzi ngauri vhathu vhanzhi vha ḓifara luvhi nga zwa vhudzekani,* munna nga a vhe na mufumakadzi wawe,+ na mufumakadzi a vhe na munna wawe.+ 3 Munna a ṋee mufumakadzi wawe zwo mu teaho,* na mufumakadzi a ite zwi fanaho kha munna wawe.+ 4 Mufumakadzi ha langi muvhili wawe, u langiwa nga munna wawe; na munna ha langi muvhili wawe, u langiwa nga mufumakadzi wawe. 5 Ni songo dzimana nga nnḓa ha musi no tendelana u litsha lwa tshifhinganyana, uri ni vhe na tshifhinga tsha u rabela. Fhedzi ni dovhe ni ṋeane zwo teaho, uri Saṱhane a si dzule a tshi ni linga na kundelwa u ḓifara. 6 Ndi tshi ni tendela u ita nga u ralo, a si u ni vhetshela mulayo. 7 Fhedzi ndi tama vhathu vhoṱhe vha tshi nga nṋe. Naho zwo ralo, muṅwe na muṅwe u na tshifhiwa+ tshawe tshi bvaho kha Mudzimu, vhaṅwe vha a kona u dzula vha siho mbinganoni, vhaṅwe a vha koni.

8 Ndi vhudza vha siho mbinganoni na tshilikadzi uri ndi khwine vha tshi dzula vho ralo sa nṋe.+ 9 Arali vha sa koni u ḓifara, vha litsheni vha vhinge kana vha vhingwe, ngauri ndi khwine u vhinga nṱhani ha u emula.+

10 Ndi khou eletshedza vha re mbinganoni uri mufumakadzi a songo fhandekana na munna wawe, fhedzi a ambaho a si nṋe ndi Murena.+ 11 Arali a fhandekana nae, kha dzule a songo vhingwa kana a vhuyelelane na munna wawe; na munna a songo ṱutshela mufumakadzi wawe.+

12 Fhedzi kha vhaṅwe ndi ri (a ambaho ndi nṋe, a si Murena):+ Arali wahashu e na mufumakadzi ane a si vhe mutendi, o tenda u dzula nae, a songo mu ṱutshela; 13 arali mufumakadzi e na munna ane a si vhe mutendi, o tenda u dzula nae, a songo mu ṱutshela. 14 Munna ane a si vhe mutendi u vha mukhethwa nga nṱhani ha mufumakadzi wawe, na mufumakadzi ane a si vhe mutendi u vha mukhethwa nga nṱhani ha munna wawe; arali zwi vhe zwi songo ralo, vhana vhaṋu vho vha vha tshi ḓo vha vhe na tshika, fhedzi zwino vho kuna. 15 Arali ane a si vhe mutendi a khetha u fhandekana na mufarisi wawe, kha ṱuwe; munna wa mutendi kana mufumakadzi wa mutendi ha tsha kombetshedzea u dzula na onoyo ane a si vhe mutendi, fhedzi Mudzimu o ni ṋea mulalo.+ 16 Iwe mufumakadzi, u zwi ḓivha hani arali u tshi ḓo tshidza munna wau?+ Kana iwe munna, u zwi ḓivha hani arali u tshi ḓo tshidza mufumakadzi wau?

17 Samusi Yehova* o ṋea muṅwe na muṅwe mukovhe wawe, ni tshimbile u ya nga he Mudzimu a ni vhidza ngaho.+ Zwenezwi ndi khou zwi vhudza zwivhidzo zwoṱhe. 18 Naa hu na we a vhidzwa o fumba?+ Nga a dzule o ralo. Naa hu na we a vhidzwa a songo fumba? A songo fumba.+ 19 U fumba na u sa fumba a zwi ambi tshithu,+ tsha ndeme ndi u tevhedza milayo ya Mudzimu.+ 20 Muṅwe na muṅwe kha dzule e kha vhuimo he a vhidzwa e khaho.+ 21 Naa wo vhidzwa u mulanda? Zwenezwo zwi songo u dina;+ fhedzi arali u tshi nga kona u vhofholowa, ita nga u ralo. 22 O vhidzwaho nga Murena e mulanda o vhofhololwa,+ ndi wa Murena; na we a vhidzwa o vhofhololwa ndi mulanda wa Kristo. 23 No rengwa nga mutengo muhulu; litshani u vha vhalanda vha vhathu.+ 24 Vhahashu, muṅwe na muṅwe kha dzule e kha vhuimo he a vhidzwa e khaho nga Mudzimu.

25 Kha vha sa athu u dzhena mbinganoni ndi ri, a thi na mulayo u bvaho kha Murena, fhedzi ni nga fhulufhela zwine nda zwi amba+ ngauri Murena o nkhathutshela. 26 Ngauri ri khou tshila tshifhingani tshi konḓaho, ndi khwine ni tshi dzula no ralo. 27 Naa u na mufumakadzi? U songo mu ṱutshela.+ Naa a wo ngo vhinga? U songo ṱoḓa mufumakadzi. 28 Naho wa vhinga, u ḓo vha u songo ita tshivhi. Ane a vhinga kana u vhingwa, ho ngo ita tshivhi. Fhedzi vhane vha vhinga kana u vhingwa vha ḓo pfa vhuṱungu ṋamani. Ndi khou lingedza u ni tsireledza.

29 Zwiṅwe hafhu, ndi a ni vhudza vhahashu ndi ri, tshifhinga tsho salaho ndi tshiṱuku.+ U bva zwino vha re na vhafumakadzi vha nge a vha na, 30 vha lilaho vha nge vha sa lili, vho takalaho vha nge vha songo takalaho, vhane vha renga vha nge vha si na tshithu, 31 na vha shumisaho zwi re shangoni vha nge vha sa zwi shumisiho nga vhuḓalo; ngauri vhuimo ha shango vhu khou shanduka. 32 A thi ṱoḓi ni tshi vhilaela. Munna a songo vhingaho u vhilaedziswa nga zwithu zwa Murena, uri a takalelwe nga Murena. 33 Munna o vhingaho u vhilaedziswa nga zwithu zwa shango,+ uri a takalelwe nga mufumakadzi wawe, 34 u a thithisea. Zwiṅwe hafhu, mufumakadzi a songo vhingwaho kana musidzana,* u vhilaedziswa nga zwithu zwa Murena,+ uri a vhe mukhethwa muvhilini na muhumbuloni. Naho zwo ralo, mufumakadzi o vhingwaho u vhilaedziswa nga zwithu zwa shango, uri a takalelwe nga munna wawe. 35 A thi khou ni dzivhisa, ndi khou ni vhudza zwenezwi uri ni vhuyelwe. Ndi ṱoḓa ni tshi ita zwo teaho, ni tshi shumela Murena nga mbilu yoṱhe ni sa thithiswi.

36 Arali a songo vhingaho a tshi pfa uri ha koni u langa lutamo lwa zwa vhudzekani, o no pfuka miṅwaha ya vhuswa, hezwi ndi zwine a fanela u zwi ita: Kha ite zwine a funa; u vha a sa khou ita tshivhi. Mu litsheni a vhinge kana a vhingwe.+ 37 Arali muthu o ḓiimisela mbiluni yawe, a tshi pfa zwi sa ṱoḓei uri a vhinge, a tshi kona u ḓilanga, o ḓiimisela mbiluni yawe uri a nga si vhinge kana u vhingwa, u ḓo vhuyelwa.+ 38 Ane a vhinga u a vhuyelwa, fhedzi ane a si vhinge u vhuyelwa zwihulu.+

39 Mufumakadzi u vha o vhofhea musi munna wawe a tshi kha ḓi tshila.+ Arali munna wawe a fa, o vhofhololwa uri a vhingwe nga ane a mu funa, fhedzi a vhingwe Murenani.+ 40 Fhedzi nṋe ndi ri, u a takala nga maanḓa arali a dzula a songo vhingwa; ndi a tenda uri ndi na muya wa Mudzimu.