Evangeli Ya Mateo

12 Nga tshenetsho tshifhinga, Yesu a fhira nga masimuni a goroi nga Savhatha. Vhafunziwa vhawe vha farwa nga nḓala, vha ṱhukhula thoro dza goroi vha ḽa.+ 2 Musi Vhafarisei vha tshi zwi vhona, vha ri: “Vhafunziwa vhau vha khou ita zwithu zwi songo tendelwaho nga Savhatha.”+ 3 Yesu a ri: “Naa a ni athu u vhala zwe Davida na vhanna vhe a vha e navho vha zwi ita musi vho farwa nga nḓala?+ 4 Musi a tshi dzhena nḓuni ya Mudzimu a ḽa vhurotho ho ṋekedzwaho Mudzimu,*+ he ene na vhanna vhe a vha e navho vha vha vha songo tendelwa u vhu ḽa, vhu tshi tea u ḽiwa nga vhotshifhe fhedzi.+ 5 Naa a ni athu u vhala kha Mulayo uri nga Savhatha vhotshifhe vha pfuka mulayo wa Savhatha ngei thembeleni vha si vhonwe mulandu?+ 6 Fhedzi ndi a ni vhudza uri ane a fhira thembele u fhano.+ 7 Naho zwo ralo, arali ni vhe no pfesesa zwine zwenezwi zwa amba zwone musi hu tshi pfi, ‘Ndi ṱoḓa khathutshelo+ hu si tshiṱhavhelo,’+ ndi musi ni songo haṱula vha si na mulandu. 8 Ngauri Murwa muthu ndi Murena wa Savhatha.”+

9 Musi o no ṱuwa henefho fhethu, a ya a dzhena sinagogoni, 10 ha ḓa munna o omaho tshanḓa.+ Vha tshi itela u vhona Yesu mulandu, vha mu vhudzisa vha ri, “Naa u fhodza nga Savhatha zwo tendelwa?”+ 11 A vha vhudzisa a ri: “Arali ni na nngu nthihi, ya wela dindini nga Savhatha, naa ni nga si dzhene na i bvisa?+ 12 Naa muthu a si wa ndeme u fhira nngu? Ngauralo, u ita zwithu zwavhuḓi nga Savhatha a zwo ngo khakhea.” 13 A amba na onoyo munna a ri: “Onyolosa tshanḓa tshau.” A tshi onyolosa tsha fhola tsha nga tshiṅwe tshanḓa. 14 Vhafarisei vha bva, vha langana uri vha mu vhulaye. 15 Musi Yesu a tshi pfa zwenezwo, a ṱuwa. Vhathu vhanzhi vha mu tevhela,+ a vha fhodza vhoṱhe, 16 fhedzi a vha laya uri vha songo vhudza muthu,+ 17 uri hu itee zwe zwa ambiwa nga muporofita Yesaya, we a ri:

18 “Vhonani mushumeli wanga+ we nda mu nanga, ane nda mu funa, ane nda mu takalela!+ Ndi ḓo vhea muya wanga khae,+ uri a sumbedze dzitshaka khaṱhulo yo teaho. 19 Ha nga ṱaṱi khani,+ ha nga zhambi, a hu na ane a ḓo pfa ipfi ḽawe nḓilani. 20 Luṱanga lu re tsini na u vunḓea, ha nga lu vunḓi, luvhone lu re tsini na u dzima, ha nga lu dzimi,+ u swikela a tshi haṱula nga nḓila yo teaho. 21 Tshaka dzi ḓo fhulufhela dzina ḽawe.”+

22 Vha ḓisa munna a re na dimoni, a sa koni u vhona na u amba, a mu fhodza, onoyo munna a thoma u amba na u vhona. 23 Vhathu vhoṱhe vha mangala vha ri: “Naa uyu a si Murwa wa Davida?” 24 Musi Vhafarisei vha tshi pfa zwenezwo vha ri: “Hoyu munna u pandela madimoni nga maanḓa a Belesebubu* muvhusi wa madimoni.”+ 25 Nge Yesu a vha a tshi ḓivha zwine vha khou zwi humbula, a amba navho a ri: “Muvhuso wo fhandekanaho u a wa, na muḓi kana nnḓu yo fhandekanaho i ḓo wa. 26 Nga hu fanaho, arali Saṱhane a tshi pandela Saṱhane, o fhandekana; naa muvhuso wawe u nga ima? 27 Arali ndi tshi pandela madimoni nga maanḓa a Belesebubu, vhana vhaṋu vha a pandela nga maanḓa a nnyi? Ndi ngazwo vhana vhaṋu vha tshi ḓo ni haṱula. 28 Fhedzi arali ndi tshi pandela madimoni nga muya wa Mudzimu, zwi amba uri Muvhuso wa Mudzimu wo swika ni si zwi ṱhogomele.+ 29 Muthu a nga dzhena hani nḓuni ya munna a re na maanḓa a dzhia thundu dzawe? U thoma a mu vhofha, a kona u dzhia thundu dzawe. 30 Ane a si ime na nṋe u lwa na nṋe, ane a si kuvhanganye na nṋe u a balanganya.+

31 “Ndi a ni vhudza uri, vhathu vha ḓo hangweliwa zwivhi zwoṱhe na u semana hoṱhe, fhedzi vha semaho muya mukhethwa a vha nga hangweliwi.+ 32 Sa tsumbo, ane a sema Murwa muthu u ḓo hangweliwa,+ fhedzi ane a sema muya mukhethwa ha nga hangweliwi kha ḽino shango kana kha shango* ḽiswa ḽi ḓaho.+

33 “Arali ni muri wavhuḓi ni ḓo aṋwa mitshelo yavhuḓi; arali ni muri u si wavhuḓi ni ḓo aṋwa mitshelo i si yavhuḓi, ngauri muri u ḓivhiwa nga mitshelo yawo.+ 34 Inwi vhana vha mavuluvulu,+ ni nga amba hani zwithu zwavhuḓi ngeno ni vhavhi? Zwine muthu a zwi amba zwi bva mbiluni.+ 35 Muvhuya u bvisa zwithu zwavhuḓi kha lupfumo lwawe lwavhuḓi, ngeno muvhi a tshi bvisa zwithu zwivhi kha lupfumo lwawe luvhi.+ 36 Ndi a ni vhudza uri nga Ḓuvha ḽa Khaṱhulo vhathu vha ḓo sengiselwa+ zwoṱhe zwi si na mushumo zwe vha zwi amba; 37 ngauri zwine na zwi amba ndi zwone zwine zwa ḓo ita uri hu pfi no luga kana ni vhonwe mulandu.”

38 Vhaṅwe Vhafarisei na vhamaṅwalo vha mu fhindula vha ri: “Mufunzi, ri itele vhuṱolo.”+ 39 Ene a ri: “Murafho muvhi na u sa fhulufhedzei u dzula u tshi ṱoḓa u itelwa vhuṱolo, a hu na vhuṱolo vhune wonoyu murafho wa ḓo vhu vhona nga nnḓa ha vhuṱolo he ha itea kha muporofita Yona.+ 40 Samusi Yona o fhedza maḓuvha mararu na vhusiku hao+ e thumbuni ya khovhe khulu, na Murwa muthu u ḓo fhedza maḓuvha mararu na vhusiku hao e vhiḓani.+ 41 Nga ḓuvha ḽa khaṱhulo, vhathu vha Ninive vha ḓo vuswa na wonoyu murafho, vha u vhona mulandu ngauri vho rembuluwa musi Yona a tshi huwelela.+ Fhedzi a fhiraho Yona u fhano.+ 42 Nga ḓuvha ḽa khaṱhulo, khosi ya mufumakadzi i bvaho tshipembe i ḓo vuswa na wonoyu murafho, ya u vhona mulandu ngauri yo tshimbila i tshi bva magumoni a ḽifhasi i tshi ḓa u thetshelesa vhuṱali ha Salomo.+ Fhedzi a fhiraho Salomo u fhano.+

43 “Musi dimoni ḽi tshi bva kha muthu, ḽi fhira nga sogani ḽi tshi ṱoḓa fhethu ha u awela, fhedzi ḽi si hu wane.+ 44 Ḽa ri, ‘Ndi ḓo humela nḓuni yanga ye nda bva khayo,’ ḽi tshi swika ḽa wana i si na muthu, yo kunakiswa na u khavhiswa. 45 Nga zwenezwo, ḽa ya ḽa kunga maṅwe madimoni a sumbe ane a ḽi fhira nga vhuvhi, musi ḽo no vhuya nao, a dzula henefho nḓuni; zwiimo zwa onoyo muthu zwa ṋaṋa u fhira zwa u thoma.+ Zwi ḓo tou ralo na nga wonoyu murafho muvhi.”

46 Yesu a tshi kha ḓi amba na gogo, ha swika mme awe na vharathu vhawe,+ vha ima nnḓa vha tshi ṱoḓa u amba nae.+ 47 Muṅwe muthu a amba nae a ri: “Mme au na vharathu vhau vho ima nnḓa, vha khou ṱoḓa u amba na iwe.” 48 A amba nae a ri: “Mme anga ndi nnyi, vharathu vhanga ndi vhonnyi?” 49 A sumba vhafunziwa vhawe, a ri: “Mme anga na vharathu vhanga khevha!+ 50 Ngauri ane a ita zwine Khotsi anga a zwi funa, ndi ene murathu wanga, khaladzi anga na mme anga.”+