Bugu Ya U Thoma Ya Dzikhosi

10 Khosi ya mufumakadzi ya Sheba yo pfa hu tshi ambiwa nga ha Salomo na nga ha dzina ḽa Yehova.+ Ngauralo, ya ḓa uri i mu linge nga u mu vhudzisa mbudziso* dzi konḓaho.+ 2 Yo swika Yerusalema i na vhaḓinḓa vhanzhi-vhanzhi,*+ vhe na gamela dzo hwalaho mapfura a baḽisamu+ na musuku munzhi na matombo manzhi a mutengo muhulu. Ya amba na Salomo nga zwoṱhe zwi re mbiluni yayo. 3 Salomo a fhindula mbudziso dzayo dzoṱhe. A hu na tshe tsha konḓela khosi u i ṱalutshedza.*

4 Musi khosi ya mufumakadzi ya Sheba i tshi vhona vhuṱali hoṱhe ha Salomo,+ nnḓu ye a i fhaṱa,+ 5 zwiḽiwa zwa ṱafulani yawe,+ nḓila ine vhashumeli vhawe vha dzula ngayo ṱafulani, mushumo une wa itwa nga vhane vha ḓisa zwiḽiwa ṱafulani na zwiambaro zwavho, vhafari vha zwinwelo na zwiṱhavhelo zwawe zwa u fhiswa zwe a vha a tshi zwi ṋekedza tshifhinga tshoṱhe nḓuni ya Yehova, ya mangala vhukuma. 6 Ya amba na khosi ya ri: “Mafhungo e nda a pfa ndi shangoni ḽa hashu nga ha zwe wa zwi khunyeledza na nga ha vhuṱali hau o vha e a ngoho. 7 Fhedzi a tho ngo tenda eneo mafhungo u swika ndi tshi ḓa, nda tou zwi vhona nga maṱo anga. Fhedzi ndo vha ndi songo vhudzwa mafhungo oṱhe. Vhuṱali hau na lupfumo lwau zwi fhira zwithu zwoṱhe zwe nda zwi pfa. 8 Hu takala vhathu vhau na vhashumeli vhau vhane vha ima phanḓa hau tshifhinga tshoṱhe vha tshi khou thetshelesa vhuṱali hau!+ 9 Nga hu rendwe Yehova Mudzimu wau,+ we a u vhea kha khuluṋoni ya Isiraele nge a vha a tshi u takalela. Nga nṱhani ha uri Yehova o funa Isiraele nga lufuno lwa lini na lini, o u vhea uri u vhe khosi uri u haṱule nga u luga.”

10 Ya ṋea khosi talente* dza 120 dza musuku, mapfura manzhi a baḽisamu+ na matombo a mutengo muhulu.+ A ho ngo tsha dovha ha ḓiswa mapfura manzhi nga u rali a baḽisamu u fana na e a ḓiselwa Khosi Salomo nga khosi ya mufumakadzi ya Sheba.

11 Zwikepe zwa Hiramu zwine zwa hwala musuku u bvaho Ofiri+ zwo dovha zwa ḓisa na matanda manzhi a miri ya aḽigamu+ na matombo a mutengo muhulu.+ 12 Khosi ya ita phuphu dza nnḓu ya Yehova na nnḓu* ya khosi nga matanda a miri ya aḽigamu, ya itela vhaimbi haripa na zwilidzo zwi re na ṱhale.+ Matanda o raloho a miri ya aḽigamu ho ngo tsha dovha a ḓiswa kana u vhonwa u swika na ṋamusi.

13 Khosi Salomo a ṋea khosi ya mufumakadzi ya Sheba zwoṱhe zwine ya zwi tama na zwine ya zwi humbela, u engedza kha zwe a i ṋea nga mafunda. Nga murahu ha zwenezwo, ya humela shangoni ḽa hayo na vhashumeli vhayo.+

14 Tshileme tsha musuku we wa vha u tshi ḓiselwa Salomo nga ṅwaha tsho vha tshi talente dza 666 dza musuku,+ 15 hu sa vhalwi une wa ḓiswa nga vhavhambadzi na mbuyelo ye ya vha i tshi bva kha vharengisi na kha mahosi oṱhe a Vhaarabu na vhavhusi vha shango.

16 Khosi Salomo o ita zwiṱangu zwihulwane zwa 200 zwo ḓodziwaho musuku+ (tshiṱangu tshiṅwe na tshiṅwe tsho vha tsho ḓodziwa musuku wa shekele* dza 600)+ 17 na zwiṱangu zwiṱuku* zwa 300 zwo ḓodziwaho musuku (tshiṱangu tshiṅwe na tshiṅwe tsho vha tsho ḓodziwa nga mina* tharu dza musuku). Khosi ya zwi vhea Nḓuni ine ya vhidzwa Ḓaka ḽa Libanoni.+

18 Khosi ya ita na khuluṋoni khulu+ nga ṋanga dza nḓou, ya i ḓodza musuku wo kunakiswaho.+ 19 Ho vha hu na zwiṱepisi zwa rathi zwa u ya kha khuluṋoni, nṱha ha khuluṋoni hu na tshithu tshi ngaho ṱhanga tsho itaho gumba,* khuluṋoni yo vha i na ha u tika zwanḓa thungo dzoṱhe, hu na zwifanyiso zwa ndau+ mbili henefho nga matungo a zwa u tika zwanḓa. 20 Ho vha hu na zwifanyiso zwa 12 zwa ndau zwo ima kha zwiṱepisi zwa rathi, matungo oṱhe a zwiṱepisi zwa rathi hu na ndau nthihi-nthihi. A hu na muṅwe muvhuso we wa ita zwithu zwi ngaho zwenezwi.

21 Zwinwelo zwoṱhe zwa Khosi Salomo zwo vha zwi zwa musuku, thundu dzoṱhe dza Nḓuni ine ya vhidzwa Ḓaka ḽa Libanoni+ dzo vha dzi dza musuku vhukuma. Ho vha hu si na tshithu na tshithihi tshe tsha itwa nga siḽiva, ngauri siḽiva yo vha i tshi dzhiiwa i si ya ndeme misini ya Salomo.+ 22 Ngauri khosi yo vha i na zwikepe zwa Tharasisi+ lwanzheni khathihi na zwa Hiramu. Zwikepe zwa Tharasisi zwo vha zwi tshi ḓa luthihi nga murahu ha miṅwaha miraru, zwo hwala musuku na siḽiva, ṋanga dza nḓou,+ ṱhoho na phikhokho.

23 Khosi Salomo o vha a tshi fhira mahosi oṱhe a re kha ḽifhasi nga lupfumo+ na nga vhuṱali.+ 24 Vhathu vha ḽifhasi ḽoṱhe vho ḓa vha tshi ṱoḓa u vhona Salomo na u pfa vhuṱali hawe he Mudzimu a vhu vhea mbiluni yawe.+ 25 Muṅwe na muṅwe o vha a tshi ḓisa tshifhiwa, madzanga a siḽiva, madzanga a musuku, zwiambaro, mapfumo, mapfura a baḽisamu, bere na meila, zwi tshi ḓiswa ṅwaha muṅwe na muṅwe.

26 Salomo a bvela phanḓa a tshi kuvhanganya gariki nnzhi na bere;* o vha e na gariki dza 1 400 na bere*+ dza 12 000, a dzi vhea miḓini ya gariki, dziṅwe a dzi vhea tsini na khosi ngei Yerusalema.+

27 Khosi ya ita uri hu vhe na siḽiva ngei Yerusalema ya ḓala sa matombo, miṱaululo ya ḓala sa miri ya mihuyu ya ngei Shefela.+

28 Bere dza Salomo dzo vha dzi tshi bva Egipita, vha rengelaho khosi thundu vho vha vha tshi renga dzenedzo bere nga masambi* nga mutengo u fanaho.+ 29 Mutengo wa gariki ine ya bva Egipita wo vha u shekele dza siḽiva dza 600, bere i tshi rengwa nga dza 150; vha tshi dzi rumela na kha mahosi oṱhe a Vhahethe+ na a Siria.