Hesekiele

18 Yehova a dovha a amba na nṋe a ri: 2 “Uyu murero une wa ambiwa shangoni ḽa Isiraele vha tshi ri, ‘Vhokhotsi vho ḽa nḓirivhe dza magaga, fhedzi dza haṱa milomoni ya vhana,’+ u amba mini?

3 “‘Ndi ana nga vhutshilo hanga,’ u ralo Yehova Murena Muvhusahoṱhe, ‘a ni tsha ḓo bvela phanḓa ni tshi amba zwenezwi ngei Isiraele. 4 Vhutshilo ha vhathu vhoṱhe ndi hanga. Vhutshilo ha khotsi na ha murwa ndi hanga. Muthu* ane a ita tshivhi u ḓo fa.

5 “‘Kha ri ri muthu ndi muvhuya u ita zwo lugaho na zwivhuya. 6 Ha ḽi zwiṱhavhelo zwo ṋekedzwaho midzimu ya zwifanyiso ngei dzithavhani;+ ha fhulufheli midzimu ya zwifanyiso i nengisaho* ya vha nnḓu ya Isiraele; ha tshikafhadzi mufumakadzi wa muhura wawe+ kana u ita zwa vhudzekani na mufumakadzi a re maḓuvhani;+ 7 u fara zwavhuḓi vhathu vhoṱhe,+ u a humisela murahu zwe mukolodi a mu farisa zwone;+ ha fhuri muthu,+ fhedzi u ṋea zwiḽiwa zwawe a re na nḓala,+ a ambadza a songo ambaraho;+ 8 ha ṱoḓi nzwalelo kana u bindulisa,+ fhedzi u iledza u haṱula nga nḓila i songo teaho;+ u haṱula vhathu nga nḓila yo teaho;+ 9 u tevhedza maitele anga na khaṱhulo dzanga uri a kone u fhulufhedzea. Muthu o raloho o luga, u ḓo bvela phanḓa a tshi khou tshila,’+ u ralo Yehova Murena Muvhusahoṱhe.

10 “‘Fhedzi kha ri ri o beba ṅwana ane a vha mufhuri+ kana muvhulayi*+ kana a tshi ita zwiṅwe zwa zwenezwi zwithu 11 (naho khotsi a songo ita zwenezwo zwithu), a tshi ḽa zwiṱhavhelo zwo ṋekedzwaho midzimu ya zwifanyiso ngei dzithavhani, a tshi tshikafhadza mufumakadzi wa muhura wawe, 12 a tshi shengedza mushai,+ a tshi dzhia zwithu nga vhufhura, a sa humisi zwe a fariswa, a tshi fhulufhela midzimu ya zwifanyiso i nengisaho,+ a tshi ita mishumo i nengisaho,+ 13 a tshi bindulisa na u ṱoḓa nzwalelo,+ onoyo murwa u ḓo fa. U ḓo vhulawa nga nṱhani ha zwenezwi zwithu zwoṱhe zwi nengisaho zwe a zwi ita. Malofha awe a ḓo vhilwa khae.

14 “‘Fhedzi kha ri ri khotsi u na murwa ane a vhona zwivhi zwoṱhe zwine khotsi awe a zwi ita, fhedzi naho a tshi zwi vhona, ha iti zwithu zwo raloho. 15 Ha ḽi zwiṱhavhelo zwo ṋekedzwaho midzimu ya zwifanyiso ngei dzithavhani; ha fhulufheli midzimu ya zwifanyiso i nengisaho ya vha nnḓu ya Isiraele; ha tshikafhadzi mufumakadzi wa muhura wawe; 16 u fara zwavhuḓi vhathu vhoṱhe, u a humisela murahu zwe mukolodi a mu farisa zwone; ha fhuri muthu, fhedzi u ṋea zwiḽiwa zwawe a re na nḓala, a ambadza a songo ambaraho; 17 ha tsikeledzi mushai; ha bindulisi kana u ṱoḓa nzwalelo; u tevhedza khaṱhulo dzanga, a tshimbila nga maitele anga. Onoyo muthu ha nga feli vhukhakhi ha khotsi awe. U ḓo bvela phanḓa a tshi khou tshila. 18 Fhedzi nga nṱhani ha uri khotsi awe o ita zwa vhufhura, a fhura wahawe, a tshinya vhukati ha vhathu vhahawe, u ḓo fela vhukhakhi hawe.

19 “‘Fhedzi ni ḓo vhudzisa na ri: “Ndi ngani murwa a sa vhonwi mulandu kha vhukhakhi ha khotsi awe?” Samusi murwa o ita zwo lugaho na zwivhuya, o tevhedza maitele anga oṱhe, u ḓo bvela phanḓa a tshi tshila.+ 20 Muthu* ane a ita zwivhi ndi ene ane a ḓo fa.+ Murwa a nga si vhonwe mulandu nga nṱhani ha vhukhakhi ha khotsi awe na khotsi a nga si vhonwe mulandu nga nṱhani ha vhukhakhi ha murwa wawe. Muvhuya u ḓo haṱulwa u ya nga zwivhuya zwawe na muvhi u ḓo haṱulwa u ya nga zwivhi zwawe.+

21 “‘Arali muvhi a litsha zwivhi zwawe zwoṱhe zwe a zwi ita, a tevhedza maitele anga na u ita zwo lugaho na zwivhuya, u ḓo tshila. Ha nga fi.+ 22 Ha nga vhonwi mulandu kha vhukhakhi hoṱhe he a vhu ita.+ U ḓo bvela phanḓa a tshi tshila nga nṱhani ha u ita zwivhuya.’+

23 “‘Naa ndi a takalela lufu lwa muvhi?’+ u ralo Yehova Murena Muvhusahoṱhe. ‘Naa a thi ṱoḓi a tshi ṱutshela nḓila dzawe uri a tshile?’+

24 “‘Musi muvhuya a tshi litsha zwivhuya zwawe, a ita zwo khakheaho,* a ita zwoṱhe zwi nengisaho zwine muvhi a zwi ita, naa u ḓo tshila? Zwivhuya zwoṱhe zwe a zwi ita a zwi tsha ḓo humbulwa.+ U ḓo fa nga nṱhani ha u sa fhulufhedzea hawe na nga nṱhani ha tshivhi tshe a tshi ita.+

25 “‘Fhedzi ni ḓo amba uri: “Nḓila dza Yehova a dzo ngo luga.”+ Thetshelesani inwi vha nnḓu ya Isiraele! Naa ndi nḓila dzanga dzi songo lugaho?+ Naa a si nḓila dzaṋu dzi songo lugaho?+

26 “‘Musi muvhuya a tshi litsha zwivhuya zwawe a ita zwo khakheaho, u ḓo fa nga nṱhani ha vhukhakhi hawe.

27 “‘Musi muvhi a tshi litsha vhuvhi hawe a ita zwo lugaho na zwivhuya, u ḓo tshidza vhutshilo hawe.+ 28 Musi a tshi ṱhogomela zwe a ita, a litsha vhukhakhi hawe hoṱhe, u ḓo tshila. Ha nga fi.

29 “‘Fhedzi vha nnḓu ya Isiraele vha ḓo ri: “Nḓila dza Yehova a dzo ngo luga.” Inwi vha nnḓu ya Isiraele,+ naa ndi nḓila dzanga dzi songo lugaho? Naa a si nḓila dzaṋu dzi songo lugaho?’

30 “‘Nga zwenezwo, ndi ḓo haṱula muṅwe na muṅwe waṋu u ya nga nḓila dzawe,+ inwi vha nnḓu ya Isiraele,’ u ralo Yehova Murena Muvhusahoṱhe. ‘Litshani vhukhakhi haṋu hoṱhe, uri vhu sa vhe tshikhukhulisi tshine tsha ḓo ita uri ni vhe na mulandu. 31 Litshani vhukhakhi hoṱhe he na vhu ita+ ni shandule mbilu dzaṋu na nḓila ine na humbula ngayo,+ ngauri ndi ngani ni tshi fanela u fa+ inwi vha nnḓu ya Isiraele?’

32 “‘A thi takali musi muthu a tshi fa,’+ u ralo Yehova Murena Muvhusahoṱhe. ‘Rembuluwani uri ni tshile.’”+