Vhurifhi Ha U Thoma Vhu Yaho Kha Vhakorinta

11 Edzisani nṋe, samusi ndi tshi edzisa Kristo.+

2 Vhahashu, ndi a ni khoḓa ngauri no nkhumbula kha zwithu zwoṱhe, ni tevhedza zwe nda ni funza. 3 Fhedzi ḓivhani uri ṱhoho ya munna ndi Kristo;+ ṱhoho ya mufumakadzi ndi munna;+ na uri ṱhoho ya Kristo ndi Mudzimu.+ 4 Munna ane a rabela kana u porofita o fukedza ṱhoho u shonisa ṱhoho yawe; 5 na mufumakadzi ane a rabela kana u porofita+ a songo fukedza ṱhoho u shonisa ṱhoho yawe, ngauri zwi fana na musi o vheulwa ṱhoho. 6 Arali mufumakadzi a sa fukedzi ṱhoho yawe, kha gere mavhudzi awe; fhedzi arali zwi tshi shonisa mufumakadzi u gera mavhudzi awe kana u vheula, kha fukedze ṱhoho yawe.

7 Munna ho ngo fanela u fukedza ṱhoho yawe, samusi e tshifanyiso tsha Mudzimu,+ a tshi mu rendisa; fhedzi mufumakadzi u rendisa munna. 8 Ngauri munna ho ngo bva kha mufumakadzi, fhedzi mufumakadzi o bva kha munna.+ 9 Zwiṅwe hafhu, munna ho ngo sikelwa mufumakadzi, fhedzi mufumakadzi o sikelwa munna.+ 10 Ndi ngazwo mufumakadzi a tshi fanela u vha na luswayo lwa u ḓiṱukufhadza kha ṱhoho yawe a tshi itela vharuṅwa.+

11 Naho zwo ralo, mufumakadzi u ḓitika nga munna Murenani, na munna u ḓitika nga mufumakadzi. 12 Samusi mufumakadzi o bva kha munna,+ na munna o vha hone nga mufumakadzi; fhedzi zwithu zwoṱhe zwi bva kha Mudzimu.+ 13 Haṱulani inwi vhaṋe: Naa zwo fanela uri mufumakadzi a rabele Mudzimu a songo fukedza ṱhoho? 14 Naa a zwo ngo ḓowelea uri musi munna e na mavhudzi malapfu u a nyadzea, 15 na uri arali mufumakadzi e na mavhudzi malapfu zwi ita uri a huliswe? Ngauri mufumakadzi o ṋewa mavhudzi nṱhani ha u ṋewa tshithu tsha u fukedza ṱhoho. 16 Naho zwo ralo, arali hu na ane a ṱoḓa u hanedza zwenezwi, ni mu vhudze uri riṋe na zwivhidzo zwa Mudzimu a ri na miṅwe mikhuvha.

17 A thi ni khoḓi ngauri musi ni tshi kuvhangana ni a vhaisana nṱhani ha u thusana, naho ndi tshi khou ni vhudza zwenezwi. 18 Ndi pfa hu tshi pfi hu na dziphambano musi ni tshi kuvhangana tshivhidzoni; zwi nga kha ḓi vha zwi zwone. 19 Hu ḓo vha na zwigwada vhukati haṋu,+ uri vhane vha takalelwa nga Mudzimu vha vhonale.

20 Musi ni tshi kuvhangana fhethu huthihi uri ni ḽe Tshilalelo tsha Murena,+ a ni zwi iti nga nḓila yo teaho. 21 Ngauri musi ni tshi ḽa Tshilalelo tsha Murena, vhaṅwe vha thoma vha ḽa zwiḽiwa zwavho, zwa ita uri vhaṅwe vha kambiwe ngeno vhaṅwe vhe na nḓala. 22 Naa a ni na nnḓu dzine na nga ḽa na u nwela khadzo? Kana ni tou nyadza tshivhidzo tsha Mudzimu na ita uri vhane vha si vhe na tshithu vha shone? Ndi ri mini kha inwi? Ndi ni khoḓe? A thi ni khoḓi kha zwenezwi.

23 Ndi ni funza zwe Murena a mpfunza zwone, uri Murena Yesu nga vhusiku+ he a fheṱiwa ngaho o dzhia vhurotho, 24 a livhuwa, a vhu ṅwata a ri: “Vhu imela muvhili wanga+ une wa ḓo ṋekedzwa u itela inwi. Dzulani ni tshi ita zwenezwi u itela u nkhumbula.”+ 25 Musi vho no ḽa tshilalelo, a dzhia tshinwelo+ a ita zwi fanaho, a ri: “Hetshi tshinwelo tshi imela mulanga muswa+ une wa ḓo vha hone nga nṱhani ha malofha anga.+ Ni dzule ni tshi ita zwenezwi, musi ni tshi tshi nwa, uri ni nkhumbule.”+ 26 Ngauri tshifhinga tshoṱhe ni tshi ita zwenezwi, ni vha ni tshi khou ḓivhadza lufu lwa Murena, u swika a tshi ḓa.

27 Nga nṱhani ha zwenezwo, ane a ḽa vhurotho kana u nwa tshinwelo tsha Murena a sa fanelei u ḓo vha na mulandu wa u nyadza muvhili na malofha zwa Murena. 28 Muthu nga a thome a ḓiṱolisise a vhone arali a tshi fanelea,+ a kone u ḽa vhurotho na u nwa tshinwelo. 29 Ane a ḽa na u nwa a sa ḓivhi uri zwenezwi zwi imela muvhili wa Murena washu, u vha a tshi khou ḓihaṱula. 30 Ndi ngazwo vhanzhi vhukati haṋu vha si na nungo, vha tshi lwala na u fa.*+ 31 Arali ra ḓiṱolisisa ra vhona zwine ra vha zwone, ri nga si haṱulwe. 32 Naho zwo ralo, musi ri tshi haṱulwa, ri vha ri tshi khou kaidzwa nga Yehova,*+ uri ri sa vhonwe mulandu na shango.+ 33 Vhahashu, musi ni tshi kuvhangana u itela u ḽa Tshilalelo tsha Murena, ni lindelane. 34 Ane a vha na nḓala, nga a ḽe hayani, uri musi ni tshi kuvhangana, ni si haṱulwe.+ Mafhungo o salaho ndi ḓo a dzudzanya musi ndi tshi ḓa.