Ekisoda

21 “Mahaṱulele ane wa fanela u vha vhudza one ndi haya:+

2 “Arali wa renga wa Muhevheru+ uri a vhe phuli yau, u ḓo u shumela sa phuli yau lwa miṅwaha ya rathi, fhedzi nga ṅwaha wa vhusumbe u ḓo vhofhololwa a songo lifha tshithu.+ 3 Arali o ḓa e eṱhe, u ḓo ṱuwa e eṱhe. Arali o ḓa na mufumakadzi, u tea u ṱuwa na mufumakadzi wawe. 4 Arali muṋe wawe a mu ṋea mufumakadzi, onoyo mufumakadzi a mu bebela vharwa kana vhananyana, onoyo mufumakadzi na vhana vhawe vha ḓo vha vha muṋe wawe, yeneyo phuli i ḓo ṱuwa i yoṱhe.+ 5 Fhedzi arali yeneyo phuli ya amba yo khwaṱhisa ya ri: ‘Ndi funa muṋe wanga, mufumakadzi wanga na vharwa vhanga; a thi ṱoḓi u vhofhololwa,’+ 6 muṋe wayo u tea u i ḓisa phanḓa ha Mudzimu wa ngoho. Nga zwenezwo, u ḓo i isa tsini na muṋango kana fureme; muṋe wayo u ḓo i phula nḓevhe nga ṋeleṱe, ya mu shumela vhutshilo hayo hoṱhe.

7 “Arali munna a rengisa ṅwananyana wawe uri a vhe phuli, ha nga vhofhololwi nga nḓila i fanaho na ya phuli ya munna. 8 Arali muṋe wawe a sa mu takaleli, a si mu ite uri a vhe mufumakadzi wawe wa vhuimo ha fhasi,* fhedzi a ita uri a rengwe nga muṅwe muthu,* a nga si ḓo tendelwa u mu rengisela vhatsinda, ngauri o mu fheṱa. 9 Arali a mu nanga uri a vhe mufumakadzi wa murwa wawe, a mu ṋee ndugelo dzine a dzi ṋea ṅwananyana wawe. 10 Arali a vhinga muṅwe mufumakadzi, ho ngo tea u fhungudza zwiḽiwa zwawe na zwiambaro zwawe, u fanela u mu ṋea zwo mu teaho.*+ 11 Arali a sa mu ṋea zwenezwi zwithu zwiraru, a mu litshe a ṱuwe, a songo bvisa tshelede.

12 “Ane a rwa muthu a fa, onoyo u tea u vhulawa.+ 13 Fhedzi arali a songo vhulaya nga khole, Mudzimu wa ngoho o tendela uri zwi itee, ndi ḓo mu wanela fhethu hune a nga shavhela hone.+ 14 Arali muthu a sinyutshela muṅwe muthu a mu vhulaya nga khole,+ onoyo u tea u fa, naho a ṱoḓa u khuda kha aḽeṱare yanga ni tea u mu vhulaya.+ 15 Ane a rwa khotsi awe kana mme awe u tea u vhulawa.+

16 “Ane a tswa muthu+ a mu rengisa,+ kana a wanwa o mu fara, u tea u vhulawa.+

17 “Ane a sema khotsi awe kana mme awe nga a vhulawe.+

18 “Hezwi ndi zwine zwa fanela u itwa arali vhanna vha lwa, muṅwe a rwa muṅwe nga tombo kana nga vili,* fhedzi a si fe, a eḓela mmbeteni wawe ngauri o huvhadzwa: 19 Arali a tshi kona u vuwa, a bvela nnḓa a tshimbila-tshimbila a tshi khou gogoḓela lubaḓa lwawe, we a mu rwa ho ngo tea u pfiswa vhuṱungu. U ḓo tou mu lifhela fhedzi tshinyalelo ya tshifhinga tshee muthu o huvhalaho a tshi fhedza e siho mushumoni u swika a tshi fhola tshoṱhe.

20 “Arali muthu a rwa phuli yawe ya munna kana ya mufumakadzi nga thanda, yeneyo phuli ya fa, onoyo muthu u tea u lifhedzwa.+ 21 Naho zwo ralo, arali a tshila ḓuvha ḽithihi kana mavhili, ho ngo tea u lifhedzwa, ngauri ndi muthu we a rengwa nga tshelede ya muṋe wawe.

22 “Arali vhanna vha tshi khou lwa nga tshavho vha huvhadza mufumakadzi o vhifhaho muvhilini, a beba tshifhinga tshi sa athu u swika,+ fhedzi khombo yeneyo i si vhulaye* muthu, u tea u lifha tshinyalelo ine ya ḓo ṱoḓwa nga munna wa onoyo mufumakadzi; u tea u badela tshelede ine ya ḓo ṱoḓwa nga vhahaṱuli.+ 23 Fhedzi arali a fa, u tea u lifha vhutshilo nga vhutshilo,+ 24 ḽiṱo nga ḽiṱo, ḽiṋo nga ḽiṋo, tshanḓa nga tshanḓa, mulenzhe nga mulenzhe,+ 25 u fhisa nga u fhiswa, mbonzhe nga mbonzhe, u rwa nga u rwiwa.

26 “Arali muthu a rwa ḽiṱo ḽa phuli yawe ya munna kana ya mufumakadzi ḽi si tsha vhona, a mu vhofholole u itela u lifha ḽiṱo ḽawe.+ 27 Arali a rwa ḽiṋo ḽa phuli yawe ya munna kana ya mufumakadzi ḽa kulea, a mu vhofholole u itela u lifha ḽiṋo ḽawe.

28 “Arali mboho ya runga munna kana mufumakadzi a fa, yeneyo mboho i tea u kanḓwa nga matombo,+ ṋama yayo i songo ḽiwa; fhedzi muṋe wa mboho ho ngo tea u pfiswa vhuṱungu. 29 Fhedzi arali yeneyo mboho i tshi dzulela u runga ngeno muṋe wayo a tshi zwi ḓivha, fhedzi a si i ṱhogomele, ya vhulaya munna kana mufumakadzi, yeneyo mboho i tea u kanḓwa nga matombo na muṋe wayo u tea u vhulawa. 30 Arali a vhudzwa uri a bvise tshirengululi, u tea u bvisa tshelede yoṱhe ine a ḓo vhudzwa yone u itela u rengulula vhutshilo hawe. 31 Hu sa londwi uri yo runga murwa wawe kana ṅwananyana wawe, muṋe wa mboho u tea u lifha hu tshi tevhedzwa mulayo. 32 Arali mboho ya runga phuli ya munna kana ya mufumakadzi, u ḓo lifhela muṋe wa yeneyo phuli shekele* dza 30, yeneyo mboho i ḓo kanḓwa nga matombo.

33 “Arali muthu a sia mulindi a songo u thivha kana a bwa mulindi a si u fukedze, mboho kana donngi ya wela nga ngomu, 34 muṋe wa wonoyo mulindi u tea u lifha.+ U tea u ṋea muṋe wa tshifuwo tshelede, tshifuwo tsho faho tshi ḓo vha tshawe. 35 Arali mboho ya muṅwe ya huvhadza ya muṅwe ya fa, vha tea u rengisa mboho ine ya khou tshila, vha kovhekane tshelede yayo; vha fanela u kovhekana na tshifuwo tsho faho. 36 Kana arali zwi tshi ḓivhea uri yeneyo mboho i dzulela u runga fhedzi muṋe wayo a si i ṱhogomele, u tea u lifha mboho nga mboho, yo faho i ḓo vha yawe.