Bugu Ya Vhuvhili Ya Dzikhosi

3 Yehoramu+ murwa wa Ahaba a vha khosi kha ḽa Isiraele e ngei Samaria nga ṅwaha wa vhu 18 hu tshi khou vhusa Khosi Yehoshafati wa Yuda, o vhusa miṅwaha ya 12. 2 O bvela phanḓa a tshi ita zwithu zwi sa takadzi Yehova, fhedzi ho ngo ita vhuvhi vhu fanaho na ha khotsi awe kana mme awe, ngauri o thutha phuphu khethwa dza Baali dze dza itwa nga khotsi awe.+ 3 Naho zwo ralo, o tevhedza zwivhi zwa Yerobeamu murwa wa Nebatha we a ita uri Isiraele ḽi ite tshivhi.+ Ho ngo zwi litsha.

4 Mesa khosi ya Moaba o vha e mufuwi wa nngu, o vha a tshi dzulela u luvha khosi ya Isiraele nga ngwana dza 100 000 na thutha dzi songo vheulwaho dza 100 000. 5 Musi Ahaba a tshi tou fa,+ khosi ya Moaba ya shandukela khosi ya Isiraele.+ 6 Khosi Yehoramu a ṱuwa nga tshenetsho tshifhinga, a kuvhanganya Vhaisiraele vhoṱhe. 7 A dovha a rumela mulaedza ha Khosi Yehoshafati wa Yuda a ri: “Khosi ya Moaba yo ntshandukela. Naa u ḓo ṱuwa na nṋe u lwa na Vhamoaba?” Yehoshafati a fhindula a ri: “Ndi ḓo ṱuwa na iwe.+ Nṋe na iwe ri vhathihi. Vhathu vhashu ndi vhathihi, u katela na bere dzashu.”+ 8 A vhudzisa a ri: “Ri ḓo gonya nga nḓila ifhio?” A fhindula a ri: “Nga ya sogani ḽa Edomo.”

9 Khosi ya Isiraele na khosi ya Yuda na khosi ya Edomo+ vha ṱuwa. Musi vho no tshimbila maḓuvha a sumbe, vha wana hu si na maḓi ane vhathu vha nga a nwa khathihi na zwifuwo zwe zwa vha zwi tshi khou vha tevhela. 10 Khosi ya Isiraele ya ri: “Ndi khombo-ḓe yeneyi! Yehova o vhidza haya mahosi mararu uri a a kumedzele zwanḓani zwa Vhamoaba!” 11 Yehoshafati a ri: “Naa fhano a hu na muporofita wa Yehova ane a nga ri vhudzisela kha Yehova?”+ Muṅwe wa vhashumeli vha khosi ya Isiraele a fhindula a ri: “Hu na Elisha+ murwa wa Shafati, we a vha a tshi shelela Elia maḓi a u ṱamba zwanḓa.”*+ 12 Yehoshafati a ri: “Yehova u amba a tshi shumisa ene.” Ngauralo, khosi ya Isiraele na Yehoshafati na khosi ya Edomo vha ya ha Elisha.

13 Elisha a amba na khosi ya Isiraele a ri: “Ndi na mafhungo-ḓe na iwe?+ Iya ha vhaporofita vha khotsi au na vhaporofita vha mme au.”+ Fhedzi khosi ya Isiraele ya amba nae ya ri: “Aiwa, ndi Yehova we a vhidza enea mahosi mararu uri a a kumedzele zwanḓani zwa Vhamoaba.” 14 Elisha a ri: “Ndi ana nga Yehova wa mavhuthu a tshilaho ane nda shumela ene,* arali hu si nga nṱhani ha u hulisa Khosi Yehoshafati+ wa Yuda, ndo vha ndi sa ḓo u lavhelesa kana u u dzhiela nṱha.+ 15 Fhedzi nḓiseleni mulidzi wa haripa.”*+ Musi mulidzi wa haripa a tshi tou thoma u lidza, maanḓa* a Yehova a ḓa khae.+ 16 A ri, “Yehova o ri: ‘Ibwani migero kha heḽi govha,* 17 ngauri Yehova o ri: “A ni nga vhoni ḓumbu, a ni nga vhoni mvula; fhedzi heḽi govha* ḽi ḓo ḓala maḓi,+ inwi na nwa na zwifuwo zwaṋu na zwiṅwe zwipuka.”’ 18 Fhedzi hezwo ndi zwithu zwi sa dini phanḓa ha Yehova,+ ngauri u ḓo dovha a kumedzela Vhamoaba zwanḓani zwaṋu.+ 19 Ni tea u vutshela muḓi muṅwe na muṅwe wo tsireledzwaho nga mbondo na muḓi+ muṅwe na muṅwe wavhuḓi, ni reme na miri yoṱhe yavhuḓi, ni thivhe zwisima zwoṱhe ni tshinyadze masimu oṱhe avhuḓi henefho shangoni nga matombo.”+

20 Nga matsheloni nga tshifhinga tsha u ṋekedza tshifhiwa tsha thoro,+ ha ḓa maḓi nga u ṱavhanya a tshi elela a tshi bva thungo ya Edomo, shango ḽa ḓala maḓi.

21 Vhamoaba vhoṱhe vha pfa uri mahosi o ḓa u lwa navho, vha kuvhanganya vhanna vhoṱhe vha konaho u fara zwiṱhavhane, vha ḓa vha ima mukanoni. 22 Musi vha tshi vuwa nga matsheloni-tsheloni, ḓuvha ḽo vha ḽi tshi khou penya kha maḓi, kha Vhamoaba vha re seli, eneo maḓi o vha o tswuka sa malofha. 23 Vha ri: “Haya ndi malofha! Vhukuma mahosi o vhulayana nga mabanga. Hee Vhamoaba, kha ri ye u thuba!”+ 24 Musi vha tshi swika madenndeni a Vhaisiraele, Vhaisiraele vha takuwa vha lwa navho, Vhamoaba vha shavha.+ Vhaisiraele vha dzhena kha ḽa Moaba vha vha vhulaya. 25 Vha thutha miḓi, munna muṅwe na muṅwe a posa tombo kha masimu oṱhe avhuḓi henefho shangoni, vha a ḓadza nga matombo; vha thivha zwisima zwoṱhe,+ vha rema miri yoṱhe yavhuḓi.+ Ndi mitsheṱo ya Kiri-harasethe+ fhedzi ye ya sala yo ima, vhanna vha magatho vha i tanga vha lwa nayo.

26 Musi khosi ya Moaba i tshi vhona uri yo kundwa, ya ṱuwa na vhanna vha 700 vho ḓiṱama nga mabanga, ya vha kombetshedza u ya ha khosi ya Edomo;+ fhedzi vha si kone. 27 Ngauralo, ya dzhia murwa wayo wa tanzhe we a vha a tshi ḓo vhusa vhudzuloni hayo ya mu ita tshiṱhavhelo+ henefho mutsheṱoni. Vhaisiraele vha sinyutshelwa zwihulu, vha litsha u lwa nayo, vha vhuyelela shangoni ḽa havho.