Evangeli Ya Luka

1 Vhanzhi vho lingedza u kuvhanganya mafhungo nga ha zwithu zwoṱhe zwe zwa itea, zwine na riṋe ra zwi tenda.+ 2 Na vhaṅwe vho zwi vhonaho nga maṱo+ na vho ḓivhadzaho mulaedza wa Mudzimu vho ri vhudza zwenezwi zwithu.+ 3 Muṋe wanga Theofilo, ndo phetha nga uri ndi u ṅwalele enea mafhungo nga u tevhekana hao, ngauri ndo ṱolisisa dzenedzi mbuno nga vhuronwane u bva mathomoni adzo.+ 4 Ndo ita zwenezwi uri u zwi ḓivhe uri zwe wa funzwa* zwone+ ndi ngoho.

5 Misini ya Herode*+ khosi ya Yudea, ho vha hu na muṅwe tshifhe ane a pfi Sakaria, we a vha e wa tshigwada tsha Abia.+ Mufumakadzi wawe o vhe e wa lushaka lwa Aroni, a tshi pfi Elisabetha. 6 Vhoṱhe vho vha vho luga phanḓa ha Mudzimu, vha tshi tshila u tendelana na milayo yoṱhe na zwoṱhe zwe Yehova* a ri zwi itiwe. 7 Fhedzi vha si na ṅwana, ngauri Elisabetha o vha a sa bebi, vho no vha vhalala.

8 Musi a tshi khou shuma sa tshifhe phanḓa ha Mudzimu, nga tshifhinga tshee tsha vha tsho vhetshelwa tshigwada tshawe,+ 9 a dzhena nḓuni khethwa ya Yehova*+ u itela u fhisa zwioro u ya nga maitele a vhotshifhe.+ 10 Gogo ḽoṱhe ḽo vha ḽi tshi khou rabela nnḓa nga tshifhinga tsha u fhisa zwioro. 11 Sakaria a vhona muruṅwa wa Yehova* o ima thungo ya tsha u ḽa tsha aḽeṱare ya zwioro. 12 Zwe Sakaria a zwi vhona zwa mu mangadza, a tshuwa. 13 Muruṅwa a amba nae a ri: “U songo ofha Sakaria, ngauri thabelo yau yo pfiwa, hone mufumakadzi wau Elisabetha u ḓo u bebela murwa, u tea u mu ira dzina ḽa Yohane.+ 14 Iwe u ḓo takala zwihulu, na vhanzhi vha ḓo takalela u bebwa hawe,+ 15 ngauri onoyo ṅwana u ḓo vha muhulwane phanḓa ha Yehova.*+ Fhedzi ho ngo tea u nwa waini na halwa,+ u ḓo ḓadzwa nga muya mukhethwa musi a sa athu u bebwa,*+ 16 a ita uri Vhaisiraele vhanzhi vha rembulutshele kha Yehova* Mudzimu wavho.+ 17 Zwiṅwe hafhu, u ḓo ranga phanḓa Mudzimu e na maanḓa a ngaho a Elia,+ u itela u pfumedzanya vhokhotsi na vhana,+ uri vha sa thetshelesi vha tevhedze vhuṱali ha vho lugaho, uri vhathu vha dzule vho lugela Yehova.”*+

18 Sakaria a amba na muruṅwa a ri: “Ndi ḓo zwi ḓivha hani uri zwine wa khou amba ndi ngoho? Ngauri ndo no kalaha, na mufumakadzi wanga o no kegula.” 19 Muruṅwa a mu fhindula a ri: “Ndi nṋe Gabriele,+ ane a ima tsini na Mudzimu,+ ndo rumiwa uri ndi ḓe ndi ambe na iwe na u u ḓivhadza enea mafhungo maḓifha. 20 Fhedzi a u nga koni u amba u swika zwenezwi zwithu zwi tshi itea, ngauri a wo ngo tenda zwe nda u vhudza, zwine zwa ḓo itea nga tshifhinga tshazwo tsho vhewaho.” 21 Vhathu vho vha vho lindela Sakaria, vho mangala uri u khou lengiswa nga mini nḓuni khethwa. 22 Musi a tshi bvela nnḓa, ho ngo kona u amba navho, vha ṱhogomela uri o vhona bono nḓuni khethwa. O vha a tshi khou amba navho nga zwanḓa, fhedzi a sa koni u amba. 23 Musi maḓuvha awe a mushumo mukhethwa a tshi fhela, a ya hayani.

24 Nga murahu Elisabetha mufumakadzi wawe a vhifha muvhilini, a fhedza miṅwedzi miṱanu a sa bvi nḓuni, a tshi ri: 25 “Zwenezwi ndi zwe Yehova* a nnyitela, o nkhumbula u itela uri vhathu vha si tsha nnyadza.”+

26 Nga ṅwedzi wa vhurathi Elisabetha o vhifha muvhilini, muruṅwa Gabriele+ o rumiwa nga Mudzimu uri a ye muḓini wa Galilea une wa pfi Nazaretha, 27 kha musidzana*+ o fhulufhedziswaho u vhingwa nga Yosefa muḓuhulu wa Davida, onoyo musidzana o vha a tshi pfi Maria.+ 28 Muruṅwa a ḓa a amba nae a ri: “Ri a vusa, iwe a takalelwaho, Yehova* u na iwe.” 29 Musi a tshi pfa zwenezwo a mangala, a lingedza u pfesesa zwine yeneyi ndumeliso ya amba zwone. 30 Ngauralo, muruṅwa a ri: “Maria, u songo ofha, ngauri Mudzimu o u tonda. 31 U ḓo vhifha muvhilini wa beba murwa,+ ane wa ḓo mu ira dzina ḽa Yesu.+ 32 Onoyo murwa u ḓo vha muhulwane,+ a vhidzwa Murwa wa Wa-Ṱaḓulu-ṱaḓulu,+ Yehova* Mudzimu u ḓo mu ṋea khuluṋoni ya Davida khotsi awe,+ 33 a vha Khosi nḓuni ya Yakobo nga hu sa fheli, Muvhuso wawe u nga si vhe na magumo.”+

34 Fhedzi Maria a amba na muruṅwa a ri: “Izwo zwi ḓo itea hani, samusi ndi sa iti zwa vhudzekani?”+ 35 Muruṅwa a ri: “Muya mukhethwa na maanḓa a Wa-Ṱaḓulu-ṱaḓulu a ḓo ḓa kha iwe.+ Ndi ngazwo ane a ḓo bebiwa a tshi ḓo vhidzwa mukhethwa,+ Murwa wa Mudzimu.+ 36 Elisabetha shaka ḽau we a vha a sa bebi, u na miṅwedzi ya rathi o vhifha muvhilini nga ṅwana wa mutukana, naho o no kegula; 37 ngauri a hu na tshine Mudzimu a si tshi kone.”+ 38 Maria a ri: “Tshukhwi! Nṋe mulanda wa Yehova!* Zwe wa amba kha zwi itee.” Muruṅwa a ṱuwa.

39 Maria a takuwa nga u ṱavhanya a ya shangoni ḽi re na dzithavha, muḓini wa Yuda, 40 a swika nḓuni ya Sakaria, a lumelisa Elisabetha. 41 Musi Elisabetha a tshi pfa Maria a tshi mu lumelisa, ṅwana we a vha e mbumbeloni yawe a tamba-tamba, Elisabetha a ḓala muya mukhethwa 42 a fhululedza a ri: “Nga hu fhaṱutshedzwe iwe vhukati ha vhafumakadzi vhoṱhe, hu fhaṱutshedzwe na ṅwana a re mbumbeloni yau! 43 Ndi tou vha nnyi ane a dalelwa nga mme a Murena wanga? 44 Ngauri musi u tshi nndumelisa, ṅwana a re mbumbeloni yanga o tamba-tamba o takala. 45 Nga hu takale iwe o tendaho uri zwe Yehova* a u vhudza zwi ḓo itea.”

46 Maria a ri: “Ndi hulisa Yehova,*+ 47 ndi nga si litshe u takalela Mudzimu Mutshidzi wanga.+ 48 Ngauri o vhona u ḓiṱukufhadza ha mulanda wawe.+ U bva zwino, mirafho yoṱhe i ḓo amba uri ndo fhaṱutshedzwa.+ 49 Ngauri Wa maanḓa o nnyitela mishumo mihulwane, dzina ḽawe ndi ḽikhethwa,+ 50 u khathutshela vha mirafho yoṱhe vhane vha mu ofha.+ 51 O ita mishumo ya maanḓa nga tshanḓa tshawe; o balanganya vhane vha ḓikukumusa.+ 52 O wisa vhavhusi kha khuluṋoni dzavho,+ a hulisa vha vhuimo ha fhasi;+ 53 a fusha vha re na nḓala nga zwithu zwavhuḓi,+ a humisa vho pfumaho vha si na tshithu. 54 O thusa Isiraele mushumeli wawe, ha hangwi u sumbedza khathutshelo nga hu sa fheli,+ 55 sa zwe a vhudza vhomakhulukuku washu, Abrahamu na ṅwana* wawe.”+ 56 Maria o fhedza miṅwedzi i ṱoḓaho u vha miraru e na Elisabetha, a kona u humela hayani.

57 Tshifhinga tsha uri Elisabetha a bebe tsha swika, a beba ṅwana wa mutukana. 58 Musi vhahura na mashaka awe vha tshi pfa nga ha nḓila ye Yehova* a mu khathutshela ngayo, vha takala nae.+ 59 Nga ḓuvha ḽa vhumalo vha ḓa vha fumbisa ṅwana,+ vho vha vha tshi ṱoḓa u mu ira dzina ḽa khotsi awe, Sakaria. 60 Fhedzi mme awe a hana a ri: “U ḓo pfi Yohane.” 61 Vha tshi pfa zwenezwi vha amba na Elisabetha vha ri: “A hu na shaka na ḽithihi ḽau ḽine ḽa vhidzwa nga ḽeneḽi dzina.” 62 Vha amba nga zwanḓa na khotsi a ṅwana, vha mu vhudzisa uri u ṱoḓa ṅwana a tshi pfi nnyi. 63 A humbela tsha u ṅwalela khatsho,* a ṅwala uri: “U pfi Yohane.”+ Vha mangala vhoṱhe. 64 Nga u ṱavhanya Sakaria a dovha a kona u amba,+ a renda Mudzimu. 65 Vhahura vhawe vhoṱhe vha tshuwa, vhathu vha dzulaho kha ḽoṱhe ḽa Yudea vha amba nga ha zwenezwi zwithu zwoṱhe. 66 Vhoṱhe vhe vha zwi pfa, vha thoma u elekanya, vha ḓivhudzisa uri: “Onoyo ṅwana u ḓo vha muthu-ḓe?” Ngauri Yehova* o vha e nae.

67 Sakaria khotsi awe a ḓadzwa nga muya mukhethwa, a porofita a ri: 68 “Nga hu rendwe Yehova* Mudzimu wa Isiraele,+ ngauri o pfela vhathu vhawe vhuṱungu a vha tshidza.+ 69 O ri vusela luṋanga lwa u ri tshidza*+ nḓuni ya Davida mulanda wawe.+ 70 Zwenezwi ndi zwe a zwi amba a tshi shumisa vhaporofita vhakhethwa vha misini ya kale.+ 71 O ri u ḓo ri tshidza kha maswina ashu na kha vhoṱhe vhane vha ri vhenga.+ 72 U ḓo ita zwe a vhudza vhomakhulukuku washu a khathutshela vhathu. A humbula mulanga wawe mukhethwa.+ 73 Zwenezwi ndi zwe a fhulufhedzisa Abrahamu makhulukuku washu.+ 74 Musi Mudzimu o no ri tshidza kha maswina ashu, u ḓo ri tendela ri tshi mu rabela ri sa ofhi, 75 uri ri fhulufhedzee na u vha vho lugaho phanḓa hawe vhutshilo hashu hoṱhe. 76 Fhedzi iwe ṅwananga, u ḓo pfi muporofita wa Wa-Ṱaḓulu-ṱaḓulu, ngauri u ḓo ranga phanḓa Yehova* wa mu lugiselela nḓila,+ 77 uri u ḓivhadze vhathu vhawe uri vha ḓo tshidzwa nga u hangwelwa zwivhi zwavho,+ 78 ngauri Mudzimu washu u a pfela vhuṱungu. Honoho u pfela vhuṱungu hu bvaho ṱaḓulu hu ḓo nga tshedza tsha nga matsheloni, 79 u itela u vhonetshela vho dzulaho swiswini na murunzini wa lufu+ na u ri tshimbidza nḓilani ya mulalo.”

80 Onoyo ṅwana a aluwa a vha na maanḓa a tshi thuswa nga muya wa Mudzimu, a dzula sogani u swika a tshi ya u huwelela kha Vhaisiraele.