Evangeli Ya Yohane

10 “Ngoho ndi a ni vhudza ndi ri, ane a dzhena tshitumbani tsha nngu a songo dzhena nga muṋango, ndi mbava.+ 2 Fhedzi ane a dzhena nga muṋango ndi ene mulisa wa nngu.+ 3 Mulindi wa muṋango u a vulela onoyo mulisa,+ na nngu dzi pfa ipfi ḽawe.+ U vhidza nngu dzawe nga madzina a bva nadzo o dzi ranga phanḓa. 4 Musi o no bva nadzo dzoṱhe, u a dzi ranga phanḓa, dza mu tevhela, ngauri dzi ḓivha ipfi ḽawe. 5 A dzi nga tevheli mutsinda, dzi ḓo mu shavha ngauri a dzi ḓivhi ipfi ḽawe.” 6 Yesu o vha vhudza tshenetshi tshifanyiso, fhedzi vho vha vha sa pfesesi zwine a khou vha vhudza zwone.

7 Yesu a dovha a ri: “Ngoho ndi a ni vhudza ndi ri, ndi nṋe muṋango wa nngu.+ 8 Vhoṱhe vhe vha ḓiita nṋe ndi dzimbava na mavemu; fhedzi nngu a dzo ngo vha thetshelesa. 9 Ndi nṋe muṋango; a dzhenaho nga nṋe u ḓo tshidzwa, u ḓo dzhena a tshi bva, a wana pfulo.+ 10 Mbava i ḓela u tswa, u vhulaya na u tshinyadza.+ Fhedzi nṋe ndo ḓa uri vhathu vha wane vhutshilo vhu sa fheli. 11 Nṋe ndi mulisa wavhuḓi;+ mulisa wavhuḓi u fela* nngu dzawe.*+ 12 Muthu o tholiwaho ane a si vhe mulisa na ane nngu dzi si vhe dzawe, u a shavha a sia nngu musi a tshi vhona ṱarelwa* ḽi tshi ḓa. Ṱarelwa* ḽa dzi vhulaya na u dzi balanganya. 13 U a shavha ngauri o tou tholiwa, ha na ndavha na nngu. 14 Nṋe ndi mulisa wavhuḓi, ndi a ḓivha nngu dzanga na dzone dzi a nḓivha,+ 15 samusi Khotsi a tshi nḓivha na nṋe ndi a mu ḓivha;+ ndi fela nngu dzanga.*+

16 “Ndi na dziṅwe nngu dzine dzi si vhe dza hetshi tshitumba;+ na dzone ndi fanela u dzi ḓisa, dzi ḓo pfa ipfi ḽanga, dza vha sambi ḽithihi, dza vha na mulisa muthihi.+ 17 Ndi ngazwo Khotsi a tshi mpfuna,+ ngauri ndi kumedzela vhutshilo hanga,+ uri ndi dovhe ndi vhu wane. 18 A hu na ane a nga ndzhiela vhutshilo, fhedzi ndi vhu kumedzela nga u tou ḓifunela. Ndi na maanḓa a u vhu kumedzela, na maanḓa a u dovha nda vhu wana.+ Ndi wone mulayo we nda ṋewa nga Khotsi anga.”

19 Zwe a zwi amba zwo dovha zwa vusa phambano vhukati ha Vhayuda.+ 20 Vhanzhi vho vha vha tshi ri: “Ndi ngani ni tshi mu thetshelesa? U na dimoni, u khou penga.” 21 Ngeno vhaṅwe vha tshi ri: “Hezwi zwithu zwi nga si ambiwe nga muthu a re na dimoni. Naa dimoni ḽi nga bonyolosa maṱo a vhathu vha sa vhoni?”

22 Nga tshenetsho tshifhinga ho vha hu na Vhuṱambo ha u Ṋekedza Thembele ngei Yerusalema. Ho vha hu vhuria. 23 Yesu o vha a tshi khou tshimbila thembeleni phasedzhini ya Salomo.+ 24 Vhayuda vha mu tanga vha amba nae vha ri: “Ndi ngani u sa ri vhudzi uri u nnyi? Arali u Kristo, ri vhudze zwi pfale.” 25 Yesu a ri: “Ndo ni vhudza, fhedzi ni si tende. Mishumo ine nda i ita dzinani ḽa Khotsi anga, ndi yone ine ya ṱanziela nga ha nṋe.+ 26 Fhedzi inwi a ni tendi, ngauri a ni nngu dzanga.+ 27 Nngu dzanga dzi pfa ipfi ḽanga, na nṋe ndi a dzi ḓivha, dzi a ntevhela.+ 28 Ndi dzi ṋea vhutshilo vhu sa fheli,+ dzi nga si fheliswe, a hu na ane a nga dzi dzhia tshanḓani tshanga.+ 29 Zwe Khotsi anga a nṋea zwone ndi zwa ndeme u fhira zwithu zwoṱhe, a hu na ane a nga zwi dzhia tshanḓani tsha Khotsi anga.+ 30 Nṋe na Khotsi ri vhathihi.”*+

31 Vhayuda vha dovha vha doba matombo uri vha mu kanḓe. 32 Yesu a ri: “Ndo ni sumbedza mishumo minzhi yavhuḓi i bvaho kha Khotsi. Ni ṱoḓa u nkanḓela ifhio?” 33 Vhayuda vha ri: “A ri khou u kanḓela mishumo yavhuḓi, ri khou u kanḓela u semana+ na uri u ḓiita mudzimu ngeno u muthu.” 34 Yesu a ri: “Naa a zwo ngo ṅwaliwa kha Mulayo waṋu musi Mudzimu a tshi ri, ‘Ndo ri: “Ni midzimu”’?+ 35 Arali a tshi vhidza ‘midzimu’+ avho vhe a vha kaidza nga ipfi ḽawe, vhathu vha sa koni u shandula zwine luṅwalo lwa amba zwone, 36 naa ni vhudza nṋe we Khotsi a mu ita mukhethwa na u mu rumela shangoni na ri, ‘U sema Mudzimu,’ nge nda ri ndi Murwa wa Mudzimu?+ 37 Arali ndi sa khou ita mishumo ya Khotsi anga, ni songo ntenda. 38 Arali ndi tshi khou ita yeneyo mishumo, naho ni sa ntendi, tendani mishumo+ ine nda khou i ita uri ni ḓivhe, ni dzule ni tshi tenda uri Khotsi u na vhuthihi na nṋe, na nṋe ndi na vhuthihi na Khotsi.”+ 39 Vha dovha vha lingedza u mu fara, fhedzi a ponyoka.

40 A dovha a wela seli ha Mulambo wa Yorodane a ya fhethu he Yohane a vha a tshi lovhedza hone u thomani,+ a dzula henefho. 41 Vhathu vhanzhi vha ḓa khae, vha amba nga tshavho vha ri: “Naho Yohane a songo ita vhuṱolo, fhedzi zwithu zwoṱhe zwe Yohane a ri vhudza zwone nga ha hoyu munna ndi ngoho.”+ 42 Vhathu vhanzhi vha mu tenda henefho.