Vhurifhi Ha Vhuvhili Vhu Yaho Kha Vhakorinta

6 Ri shumisana na Mudzimu,+ ndi ngazwo ri tshi ni humbela uri ni songo ṱanganedza vhuthu vhuhulu ha Mudzimu mahala.*+ 2 Ngauri o ri: “Ndo u pfa nga tshifhinga tsho teaho, nda u thusa nga ḓuvha ḽa u tshidzwa.”+ Ndi tshifhinga tsha u fhaṱutshedzwa na u tshidzwa nga Mudzimu.

3 A ri khukhulisi muthu, uri hu si vhe na ane a sasaladza mushumo une ra u itela Mudzimu.+ 4 Fhedzi ri a ḓithemendela sa vhashumeli vha Mudzimu+ nga nḓila dzoṱhe. Ro konḓelela milingo, maṱungu, zwifhinga zwi konḓaho na u vha na thaidzo.+ 5 Ro rwiwa, ro valelwa dzhele,+ ro tingiwa, ro shuma nga maanḓa, tshiṅwe tshifhinga ri sa eḓeli, ri si na zwiḽiwa.+ 6 Ra ḓifara zwavhuḓi, ri tshi ḓivha zwi re ngoho, ri sa fheli mbilu,+ ri na vhuthu,+ ri tshi tenda u livhiswa nga muya mukhethwa, lufuno lwashu lu si na muhoyo.+ 7 Ri tshi amba ngoho, ri tshi ḓitika nga maanḓa a Mudzimu;+ zwa nga ro fara zwiṱhavhane zwine zwa ri thusa u ita zwo lugaho+ kha tshanḓa tsha u ḽa na tsha monde. 8 Ri tshi huliswa na u nyadziwa, ri tshi sasaladziwa na u khoḓiwa. Ri tshi dzhiiwa sa vhane vha fhura ngeno ri tshi fhulufhedzea, 9 ri tshi dzhiiwa sa vhane vha si ḓivhiwe, ngeno Mudzimu a tshi ri ḓivha, ri tshi dzhiiwa ro tewa nga u fa, ngeno ri tshi tshila,+ ri tshi pfiswa vhuṱungu,* fhedzi ri sa fi.+ 10 Ri tshi dzhiiwa sa vho ṱungufhalaho ngeno ro takala, sa vha shayaho, fhedzi ri tshi pfumisa vhanzhi, ri tshi dzhiiwa sa vha si na tshithu ngeno ri na zwoṱhe.+

11 Inwi Vhakorinta, ro amba na inwi ri sa dzumbi tshithu, ri a ni funa.* 12 A ro ngo litsha u ni sumbedza uri ri a ni funa,+ fhedzi inwi a no ngo ri sumbedza uri ni a ri funa. 13 Ndi ngazwo ndi tshi amba na inwi vhunga vhana vhanga, ni ri funese.+

14 Ni songo hwala dzhogo na vha sa tendiho.+ Naa u luga na vhutshinyi zwi na vhushaka?+ Kani tshedza na swiswi zwi a ṱangana?+ 15 Naa Kristo na Saṱhane*+ vha a anḓana? Kani mutendi* a nga vha na vhushaka na ane a si vhe mutendi?+ 16 Naa midzimu ya zwifanyiso i nga dzheniswa thembeleni ya Mudzimu?+ Ri thembele ya Mudzimu a tshilaho;+ samusi Mudzimu o ri: “Ndi ḓo dzula vhukati havho,+ nda tshimbila vhukati havho, ndi ḓo vha Mudzimu wavho, vhone vha vha vhathu vhanga.”+ 17 “Yehova* o ri: ‘Ibvani vhukati havho, ni ḓifhambanye navho, ni litshe u fara zwithu zwi songo kunaho,+ ndi hone ndi tshi ḓo ni ṱanganedza.’”+ 18 “Yehova* Ramaanḓaoṱhe o dovha a ri: ‘Ndi ḓo vha khotsi aṋu,+ inwi na vha vhananga.’”*+