Genesi

25 Abrahamu a dovha a vhinga muṅwe mufumakadzi we a vha a tshi pfi Ketura. 2 Nga murahu a mu bebela Zimurani, Yokoshani, Medani, Midiani,+ Ishibaka na Shuha.+

3 Yokoshani a beba Sheba na Dedani.

Vharwa vha Dedani vho vha vhe Ashurimi, Letushi na Leumi.*

4 Vharwa vha Midiani vho vha vhe Efa, Efere, Hanoxe, Abida na Elidaa.

Vhenevho vhoṱhe vho vha vhe vharwa vha Ketura.

5 Nga murahu Abrahamu a ṋea Isaka zwoṱhe zwe a vha e nazwo,+ 6 fhedzi vhaṅwe vharwa vhe a bebelwa nga vhafumakadzi vhawe vha vhuimo ha fhasi* a vha ṋea zwifhiwa. Musi a tshi kha ḓi tshila, a vha isa thungo ya vhubvaḓuvha, kule na murwa wawe Isaka,+ shangoni ḽa Vhubvaḓuvha. 7 Abrahamu o tshila miṅwaha ya 175. 8 Abrahamu a fa o no lalama, o no vha wa maḓuvha, o fushea, a vhulungwa na vhathu vha hawe. 9 Vharwa vhawe Isaka na Ishimaele vha mu vhulunga bakoni ḽa Makapela, tsimuni ya Efuroni murwa wa Tsohara wa Muhethe, tsini na Mamure,+ 10 tsimu ye Abrahamu a i renga kha vharwa vha Hethe. Abrahamu a vhulungwa henefho he Sara mufumakadzi wawe a vhulungwa hone.+ 11 Musi Abrahamu o no fa, Mudzimu a bvela phanḓa a tshi fhaṱutshedza Isaka murwa wa Abrahamu,+ Isaka o vha a tshi dzula tsini na Beera-lahai-roi.+

12 Haya ndi mafhungo a Ishimaele+ murwa wa Abrahamu, we a bebelwa ene nga Hagara+ wa Muegipita, mushumeli wa Sara wa mufumakadzi.

13 Madzina a vharwa vha Ishimaele, u ya nga mutevhe wa madzina avho na miṱa yavho ndi haya: Tanzhe ḽa Ishimaele ndi Nebayothe,+ Kedara,+ Adibele, Mibisama,+ 14 Mishima, Duma, Masa, 15 Hadada, Thema, Yeturi, Nafishi na Kedima. 16 Vhenevho ndi vharwa vha Ishimaele, eneo ndi madzina avho a tshi ya nga miḓi yavho na madennde* avho, vharangaphanḓa vha 12 u ya nga tshaka dzavho.+ 17 Ishimaele o tshila miṅwaha ya 137, a vhulungwa na vhathu vha hawe. 18 Vha dzula Havila+ tsini na Shuru,+ hune ha vha tsini na Egipita, u vhuya u swika Asuri. A dzula tsini na mashaka awe oṱhe.*+

19 Haya ndi mafhungo a Isaka murwa wa Abrahamu.+

Abrahamu o beba Isaka. 20 Isaka o vha e na miṅwaha ya 40 musi a tshi vhinga mufumakadzi wawe Rebeka, ṅwananyana wa Bethuele+ wa Muaramu wa Phadani-aramu, khaladzi a Labani wa Muaramu. 21 Isaka o vha a tshi dzulela u humbelela mufumakadzi wawe kha Yehova ngauri o vha a sa bebi; ngauralo Yehova a fhindula khumbelo yawe, Rebeka mufumakadzi wawe a vhifha muvhilini. 22 A pfa vhana vha tshi khou lwa muvhilini wawe,+ lwe a vhuya a ri: “Arali zwo tou rali, ndi khou tshilela mini?” Nga nṱhani ha zwenezwo, a vhudzisa Yehova nga ha eneo mafhungo. 23 Yehova a amba nae a ri: “Hu na tshaka mbili mbumbeloni yau,+ u ḓo beba tshaka mbili dzo fhambanaho;+ luṅwe lushaka lu ḓo vha na maanḓa u fhira luṅwe,+ mukomana u ḓo shumela murathu.”+

24 Musi tshifhinga tshi tshi swika tsha uri a bebe, a beba mafhaṱa.* 25 Wa u thoma u bvelela o vha o tswukuluwa, a tshi tou nga tshiambaro tsho itwaho nga mamvele;+ vha mu ira dzina ḽa Esau.*+ 26 Nga murahu ha zwenezwo, murathu wa Esau a bvelela o fara tshirethe tshawe;+ a mu ira dzina ḽa Yakobo.*+ Isaka o vha e na miṅwaha ya 60 musi Rebeka a tshi mu bebela vhana.

27 Musi vhenevho vhatukana vha tshi khou ḓi aluwa, Esau a vha muzwimi makone,+ munna wa u tshila ḓakani, fhedzi Yakobo o vha e munna wa u luga, a tshi dzula madenndeni.+ 28 Isaka o vha a tshi funa Esau ngauri o vha a tshi zwi ḓivha uri u ḓo mu ṋea ṋama, ngeno Rebeka a tshi funa Yakobo.+ 29 Nga tshiṅwe tshifhinga musi Yakobo a tshi khou bika tshitshuu, Esau a vhuya e na nḓala a tshi bva ḓakani. 30 Esau a amba na Yakobo a ri: “Ndi khou humbela uri u ṱavhanye u mphe itsho tshitshuu tshitswuku tshine wa vha natsho* ngauri ndi na nḓala!” Ndi ngazwo dzina ḽawe ḽo vha ḽi tshi pfi Edomo.*+ 31 Yakobo a ri: “Thoma u nthengisele ndugelo yau ya u vha tanzhe!”+ 32 Esau a fhindula a ri: “Ndi khou fa! Vhutanzhe hanga vhu ḓo nthusa ngani?” 33 Yakobo a dovha a ri: “Nnyanele u thoma!” A ana a rengisela Yakobo ndugelo yawe ya u vha tanzhe.+ 34 Yakobo a ṋea Esau vhurotho na tshitshuu tsha nḓodzi, a ḽa, a nwa. A takuwa a ṱuwa. Ngauralo, Esau a nyadza ndugelo yawe ya u vha tanzhe.