Ekisoda

39 Vha luka zwiambaro zwavhuḓi zwa u shuma nḓuni khethwa nga harane ya muvhala wa lutombo, wuḽu ya phephulu na labi ḽitswuku.+ Vha lukela Aroni zwiambaro zwikhethwa,+ samusi Yehova o laya Mushe.

2 Vha ita efodo*+ nga musuku, harane ya muvhala wa lutombo, wuḽu ya phephulu, labi ḽitswuku na labi ḽavhuḓi ḽa ḽinene ḽo lukwaho. 3 Vha kanḓa musuku vha ita zwizennge zwi sekene, vha zwi tumula zwa vha harane uri zwi shume na harane ya muvhala wa lutombo, wuḽu ya phephulu, labi ḽitswuku na labi ḽavhuḓi ḽa ḽinene, zwa khavhiswa. 4 Vha i itela malabi e a rungelelwa kha mahaḓa ayo mavhili. 5 Bannda* ḽayo ḽo lukwaho ḽo ṱumiwaho na efodo u itela u i vhofha zwavhuḓi,+ ḽa itwa nga zwithu zwe zwa ita efodo: musuku, harane ya muvhala wa lutombo, wuḽu ya phephulu, labi ḽitswuku na labi ḽavhuḓi ḽa ḽinene ḽo lukwaho, sa zwe Yehova a laya Mushe.

6 Vha tingeledza matombo a onikisi nga musuku, vha kora madzina a vharwa vha Isiraele, u fana na musi vha tshi kora luswayo.+ 7 Vha a vhea kha malabi a re kha mahaḓa a efodo uri a vhe matombo a tshihumbudzi kha vharwa vha Isiraele,+ samusi Yehova o laya Mushe. 8 A ita tsha u vhea khanani+ nga nḓila i fanaho na ya mukhavhisi, nga vhutsila vhu fanaho na ha efodo, nga musuku, harane ya muvhala wa lutombo, wuḽu ya phephulu, labi ḽitswuku na labi ḽavhuḓi ḽa ḽinene ḽo lukwaho.+ 9 Musi tshenetsho tsha u vhea khanani tsho petwa, tsho vha tshi tshi lingana thungo dzoṱhe, vhulapfu na vhuphara hatsho zwo vha zwi tshi lingana na tshanḓa tsho vuleaho.* 10 Khatsho vha ita miduba miṋa nga matombo. Wa u thoma wo vha u tombo ḽa rubi, thophasi na emeralidi. 11 Wa vhuvhili wo vha u tombo ḽa thekhoisi, safire na yasipere. 12 Wa vhuraru wo vha u tombo ḽa lishemu, agate na amethisi. 13 Wa vhuṋa wo vha u tombo ḽa khirisoḽaithi, onikisi na dzheidi. O vha o nambatedzwa nga musuku. 14 Eneo matombo o vha a tshi tshimbidzana na madzina a vharwa vha Isiraele vha 12, madzina o koriwa u fana na luswayo, dzina ḽiṅwe na ḽiṅwe ḽi tshi imela luṅwe lwa tshaka dza 12.

15 Tsha u vhea khanani vha tshi itela ngeḓane dzo lukwaho, dzi ngaho thambo dza musuku vhukuma.+ 16 Vha nambatedza matombo mavhili nga musuku, vha ita rinngi mbili nga musuku, vha ṱumetshedza dzenedzo rinngi mbili kha thungo mbili dza tsha u vhea khanani. 17 Nga murahu ha zwenezwo, vha vhofhelela thambo mbili dza musuku kha rinngi mbili dzi re kha thungo dza tsha u vhea khanani. 18 Vha vhofha thambo mbili kha phendelo mbili, vha dzi ṱuma na labi ḽo rungelelwaho kha mahaḓa a efodo. 19 Vha dovha vha ita rinngi mbili dza musuku vha dzi vhofhelela kha thungo mbili nga ngomu ha lumeme lwa tsha u vhea khanani, nga ngomu ha efodo.+ 20 Vha ita rinngi mbili dza musuku vha dzi ṱuma nga phanḓa ha efodo, fhasi ha labi ḽo rungelelwaho kha mahaḓa nga nṱha ha hune bannda* ḽo lukwaho ḽa ṱangana na efodo. 21 Mafheleloni vha vhofhelela thambo dza muvhala wa lutombo kha rinngi dza tsha u vhea khanani na kha rinngi dza efodo, uri tsha u vhea khanani tshi dzule fhethu hatsho kha efodo nṱha ha bannda* ḽo lukwaho, samusi Yehova o laya Mushe.

22 Vha ita na tshiambaro tshi si na zwanḓa tshi ambarwaho nga fhasi ha efodo, tsho lukwaho nga muluki, tsho lukwa nga harane ya muvhala wa lutombo.+ 23 Mukulo wa tshi⁠ambaro tshi si na zwanḓa wo vha u vhukati hatsho, u fana na wa tshiambaro tsha u ḓitsireledza nndwani. Mukulo watsho wo vha u na lupendelo u mona nawo uri tshi si kheruwe. 24 Kha lupendelo lwa tshiambaro tshi si na zwanḓa vha ita maphomagraneithi vho ṱanganyisa harane ya muvhala wa lutombo, wuḽu ya phephulu na labi ḽitswuku. 25 Vha ita dziḓilogo nga musuku vhukuma vha dzi rungelela vhukati ha maphomagraneithi u mona na lupendelo lwa tshiambaro tshi si na zwanḓa, vhukati ha maphomagraneithi; 26 vha tevhekanyisa ḓilogo na phomagraneithi, ḓilogo na phomagraneithi, u mona na lupendelo lwa tshiambaro tshi si na zwanḓa, tshe tsha vha tshi tshi ambarwa hu tshi shumiwa, sa zwe Yehova a laya Mushe.

27 Vha itela Aroni na vharwa vhawe zwiambaro+ nga labi ḽavhuḓi ḽa ḽinene, ḽo lukwaho nga muluki, 28 vha ita na dugu+ nga labi ḽavhuḓi ḽa ḽinene, miṅadzi+ yo itwaho nga labi ḽavhuḓi ḽa ḽinene, zwirukhu+ zwo itwaho nga labi ḽa ḽinene ḽo lukwaho zwavhuḓi, 29 na bannda ḽo lukwaho nga labi ḽavhuḓi ḽa ḽinene, harane ya muvhala wa lutombo, wuḽu ya phephulu na labi ḽitswuku, u ya nga nḓila ine muluki a luka ngayo, sa zwe Yehova a laya Mushe.

30 Mafheleloni vha ita kuzennge ku penyaho nga musuku vhukuma, kune kwa vha luswayo lukhethwa lwa u ḓiṋekedza,* kwo korwa maipfi ane a ri: “Vhukhethwa ndi ha Yehova.”+ U fana na musi muthu a tshi kora luswayo. 31 Vha ku vhofhelela nga thambo yo itwaho nga harane ya muvhala wa lutombo u itela u ku vhea kha dugu, sa zwe Yehova a laya Mushe.

32 Mushumo woṱhe wa dennde ḽikhethwa* ḽa muṱangano wa fhela, Vhaisiraele vho ita zwoṱhe zwe Yehova a laya Mushe.+ Vha ita nga u ralo.

33 Vha ḓisa zwipiḓa zwoṱhe zwa dennde ḽikhethwa+ kha Mushe, vha ḓisa na malabi aḽo,+ zwihovhi+ zwaḽo, fureme dzaḽo dza mabulannga,+ mbalelo+ dzaḽo, phuphu dzaḽo na milenzhe yaḽo;+ 34 mikumba yaḽo ya thutha yo daiwaho nga muvhala mutswuku,+ mikumba yaḽo ya tshiphu, khetheni ḽa u vala;+ 35 mbulungelo ya mulanga* na thanda+ dzayo na mutibo;+ 36 ṱafula, thundu+ dzayo dzoṱhe na vhurotho ha ṱano; 37 tshiṱomambone tsha musuku vhukuma, mbone+ dzatsho, mbone dzo vhewaho nga u tou tevhekana, thundu+ dzatsho dzoṱhe na mapfura a u dugisa mbone;+ 38 aḽeṱare+ ya musuku, mapfura a u ḓodza,+ zwioro zwi nukhelelaho,+ labi*+ ḽa u vala muṋango wa dennde; 39 aḽeṱare ya koporo,+ sefo yayo ya koporo, thanda+ dzayo, thundu+ dzayo dzoṱhe, sambelo na milenzhe yaḽo;+ 40 makhetheni o nembeledzwaho muṱani, phuphu dzao na milenzhe yao,+ labi*+ ḽa u vala muṋango wa muṱa, thambo dza dennde na tsimbi+ dzaḽo dza u ḽi ṱoma na thundu dzoṱhe u itela mushumo wa dennde ḽikhethwa ḽa muṱangano; 41 zwiambaro zwo lukwaho zwavhuḓi zwa u shuma nḓuni khethwa, zwi⁠ambaro zwikhethwa zwa tshifhe+ Aroni na zwiambaro zwa vharwa vhawe uri vha shume sa vhotshifhe.

42 Vhaisiraele vha ita mushumo woṱhe vha tshi tevhedza zwoṱhe zwe Yehova a laya Mushe.+ 43 Musi Mushe a tshi ṱolisisa mushumo wavho woṱhe, a vhona uri vho zwi ita nga nḓila ye Yehova a laya ngayo; Mushe a vha fhaṱutshedza.