Genesi

15 Nga murahu ha zwenezwo, Yehova a amba na Abramu kha bono a ri: “U songo ofha,+ Abramu. Nṋe ndi tshiṱangu tshau.+ U ḓo lambedzwa zwihulu.”+ 2 Abramu a ri: “Yehova Murena Muvhusahoṱhe, u ḓo nṋea mini, samusi ndi si na vhana, ane a ḓo wana ifa ḽa zwa muṱani wanga hu Eliesere,+ munna wa Damaseko?” 3 Abramu a dovha a ri: “A wo ngo nṋea vhana,*+ zwino muraḓo* wa muṱa wanga ndi ene ane a ḓo vha muḽaifa.” 4 Yehova a mu fhindula a ri: “Hoyu munna a nga si vhe muḽaifa, fhedzi ṅwana* wau ndi ene ane a ḓo vha muḽaifa.”+

5 A mu bvisela nnḓa a amba nae a ri: “Ndi khou humbela uri u lavhelese ṱaḓulu u vhale dziṋaledzi, arali u tshi kona u ita nga u ralo.” A bvela phanḓa a tshi amba nae a ri: “Vhana* vhau vha ḓo tou ralo.”+ 6 A vha na lutendo kha Yehova;+ Abramu a dzhiiwa sa o lugaho.+ 7 A dovha a ri: “Ndi nṋe Yehova, we a u bvisa shangoni ḽa Uri ḽa Vhakaladea uri ndi u ṋee heḽi shango ḽi vhe ḽau.”+ 8 A tshi pfa zwenezwo a ri: “Yehova Murena Muvhusahoṱhe, ndi ḓo zwi ḓivha hani uri heḽi shango ḽi ḓo vha ḽanga?” 9 A amba na Abramu a ri: “Nḓisele kholomo i sa athu u dzwala* ya miṅwaha miraru, mbudzi ya tsadzi ya miṅwaha miraru, thutha ya miṅwaha miraru, ḽiivha na fhondo ḽa ḽiivha.” 10 A dzhia zwenezwi zwoṱhe a zwi fhandula nga vhukati a vhea zwenezwo zwipiḓa zwo livhana, fhedzi zwiṋoni ho ngo zwi fhandula nga vhukati. 11 Ngauralo, zwiṋoni* zwa thoma u ḓela mitumbu yeneyo, fhedzi Abramu a zwi thatha.

12 Musi ḓuvha ḽi tshi vho kovhela, Abramu a farwa nga khofhe khulu, ha vha na swiswi ḽihulu ḽi ofhisaho. 13 Mudzimu a amba na Abramu a ri: “U ḓivhe uri vhana* vhau vha ḓo dzula shangoni ḽi si ḽavho, vha ḓo itwa dziphuli, vha tambudzwa lwa miṅwaha ya 400.+ 14 Fhedzi ndi ḓo haṱula lushaka lune vha ḓo lu shumela,+ nga murahu ha zwenezwo vha ḓo ṱuwa na thundu nnzhi.+ 15 Iwe u ḓo fa nga mulalo wo no kalaha;+ u ḓo vhulungwa na vhomakhulukuku wau. 16 Fhedzi ndi vha murafho wa vhuṋa vhane vha ḓo vhuya fhano,+ ngauri tshifhinga tsha uri Vhaamori vha fheliswe a tshi athu u swika.”+

17 Musi ḽo no kovhela ho no vha na swiswi ḽihulu, ha vhonala ṋanḓo i dubaho vhutsi na khavhu ya mulilo i tshi khou fhira nga vhukati ha zwenezwo zwipiḓa. 18 Nga ḽeneḽo ḓuvha Yehova a vhofha mulanga na Abramu+ a ri: “Vhana* vhau ndi ḓo vha ṋea heḽi shango,+ u bva mulamboni wa Egipita u swika mulamboni muhulu wa Yufuratha:+ 19 shangoni ḽa Vhakeni, Vhakenisi,+ Vhakadamoni, 20 Vhahethe,+ Vhapheresi,+ Vharefaimi,+ 21 Vhaamori, Vhakanana, Vhagirigasi na Vhayebusi.”+