Evangeli Ya Yohane

6 Nga murahu ha zwenezwo, Yesu a wela seli ha Lwanzhe lwa Galilea kana Tiberia.+ 2 A tevhelwa nga vhathu vhanzhi+ nge vha vhona vhuṱolo he a vha a tshi khou vhu ita, a tshi khou fhodza vhalwadze.+ 3 Yesu na vhafunziwa vhawe vha ya thavhani, vha dzula henefho. 4 Vhuṱambo ha Vhayuda ha Paseka+ ho vha vhu tsini. 5 Musi Yesu a tshi vhona hu tshi khou ḓa vhathu vhanzhi, a amba na Filipo a ri: “Ri ḓo renga ngafhi vhurotho vhune avha vhathu vha ḓo ḽa?”+ 6 Fhedzi o amba zwenezwi u itela u mu linga, ngauri o vha a tshi ḓivha zwine a ḓo zwi ita. 7 Filipo a ri: “Naho ha nga rengwa vhurotho ha dinari* dza 200 vhu nga si vha lingane naho vha ṋewa kupiḓa.” 8 Muṅwe wa vhafunziwa vhawe, Andrea murathu wa Simoni Petro, a ri: 9 “Hu na mutukana a re na ḽofo ṱhanu dza baḽi na khovhe mbili ṱhukhu. Naa vhathu vhanzhi nga u rali vha nga fushwa nga zwenezwi?”+

10 Yesu a ri: “Vhudzani vhathu vha dzule fhasi.” Ho vha hu na hatsi vhunzhi, vhanna vha ṱoḓaho u vha 5 000 vha dzula henefho.+ 11 Yesu a dzhia vhurotho, a livhuwa, a ṋea vhathu vho dzulaho henefho; a ita zwi fanaho nga khovhe ṱhukhu, vhathu vhoṱhe vha ḽa vha fura. 12 Musi vhathu vho no fura, a amba na vhafunziwa vhawe a ri: “Kuvhanganyani matshakatshaka oṱhe o salaho, uri hu sa vhe na tshine tsha tambisea.” 13 Vha a kuvhanganya oṱhe, vha ḓadza mimanngi ya 12 nga matshakatshaka e a siiwa nga vho ḽaho ḽofo ṱhanu dza baḽi.

14 Musi vhathu vha tshi vhona vhuṱolo he a vhu ita, vha ri: “Ngangoho hoyu ndi ene Muporofita we ha pfi u ḓo ḓa shangoni.”+ 15 Yesu a ya thavhani e eṱhe,+ ngauri o vha a tshi zwi ḓivha uri vha khou ṱoḓa u mu fara uri vha mu vhee uri a vhe khosi.+

16 Musi ḽi tshi vho kovhela, vhafunziwa vhawe vha tsela lwanzheni,+ 17 vha ṋamela tshikepe, vha wela seli vha livha Kapernaume. Ḽo vha ḽo no swifhala, fhedzi Yesu o vha a sa athu u vhuya.+ 18 Lwanzhe lwa thoma u halifha ngauri ho vha hu na ḓumbu ḽihulu.+ 19 Musi vho no tshimbidza tshikepe khilomithara dzi ṱoḓaho u vha ṱhanu kana dza rathi, vha vhona Yesu a tshi khou tshimbila nṱha ha maḓi lwanzheni a tshi khou sendela tsini na tshikepe, vha ofha. 20 Fhedzi a amba navho a ri: “Ni songo ofha, ndi nṋe!”+ 21 Vho vha vha tshi khou ṱoḓa u mu ṋamedza tshikepe, fhedzi tsha vha tshi tshi vho swika khunzi-khunzini he vha vha vha tshi khou ya hone.+

22 Nga ḓuvha ḽi tevhelaho, vhathu vho imaho seli ha lwanzhe vha vhona uri tshikepe tshiṱuku tshe tsha vha tshi hone a tshi tsheeho, na uri Yesu o vha a songo ṋamela tshenetsho tshikepe na vhafunziwa vhawe, na uri vhafunziwa vhawe vho ṱuwa vhe vhoṱhe. 23 Zwikepe zwi bvaho Tiberia zwa swika tsini na fhethu he vha ḽa vhurotho, musi Murena o no livhuwa. 24 Musi vhathu vha tshi vhona uri Yesu na vhafunziwa vhawe vho vha vhe siho henefho, vha ṋamela zwikepe vha ya Kapernaume u ṱoḓa Yesu.

25 Musi vha tshi mu wana seli ha lwanzhe vha amba nae vha ri: “Rabi,+ wo swika lini fhano?” 26 Yesu a ri: “Ngoho ndi a ni vhudza ndi ri, a ni khou nṱoḓa ngauri no vhona vhuṱolo, fhedzi ni khou nṱoḓa nga nṱhani ha uri no ḽa vhurotho na fura.+ 27 Ni songo shumela zwiḽiwa zwine zwa sina, shumelani zwiḽiwa zwi sa sini zwine zwa ḓo ni ṋea vhutshilo vhu sa fheli,+ zwine Murwa muthu a ḓo ni ṋea zwone; ngauri ndi ene we Khotsi ane a vha Mudzimu a mu vhea luswayo lwa u mu takalela.”+

28 Vhone vha ri: “Ri fanela u ita mini uri ri shume mishumo ya Mudzimu?” 29 Yesu a ri: “Hoyu ndi wone mushumo wa Mudzimu wa uri ni tende we a mu ruma.”+ 30 Vha amba nae vha ri: “Ndi vhuṱolo vhufhio vhune wa nga vhu ita,+ uri ri kone u vhu vhona ri u tende? U ḓo ita mini? 31 Vhomakhulukuku washu vho ḽa mana ngei sogani,+ samusi zwo ṅwaliwa ha pfi: ‘O vha ṋea vhurotho vhu bvaho ṱaḓulu uri vha ḽe.’”+ 32 Yesu a amba navho a ri: “Ngoho ndi a ni vhudza ndi ri, Mushe ho ngo ni ṋea vhurotho vhu bvaho ṱaḓulu, fhedzi ndi Khotsi anga ane a ni ṋea vhurotho ha vhukuma vhu bvaho ṱaḓulu. 33 Ngauri we a bva ṱaḓulu ndi ene vhurotho ha Mudzimu, ndi ene a ṋeaho shango vhutshilo.” 34 Vhone vha ri: “Murena, u dzule u tshi ri ṋea honoho vhurotho.”

35 Yesu a ri: “Ndi nṋe vhurotho ha vhutshilo. Ane a ḓa kha nṋe ha nga pfi nḓala, na ane a ntenda ha nga pfi ḓora.+ 36 Fhedzi ndo ni vhudza nda ri, no mmbona, fhedzi a ni tendi.+ 37 Vhoṱhe vhane Khotsi a nṋea vhone vha ḓo ḓa kha nṋe, na ane a ḓa kha nṋe ndi nga si vhuye nda mu pandela;+ 38 ngauri ndo ḓa ndi tshi bva ṱaḓulu+ uri ndi si ite zwine nda zwi funa, fhedzi ndi ite zwi funwaho nga o nthumaho.+ 39 Zwi funwaho nga o nthumaho ndi uri ndi si xelelwe na nga muthihi wa vhe a nṋea vhone, u funa ndi tshi vha vusa+ nga ḓuvha ḽa vhufhelo. 40 Ngauri ndi zwine Khotsi anga a zwi funa, uri ane a ṱanganedza na u tenda Murwa a wane vhutshilo vhu sa fheli,+ nṋe ndi ḓo mu vusa+ nga ḓuvha ḽa vhufhelo.”

41 Vhayuda vha thoma u gungula nge a ri: “Ndi nṋe vhurotho vhu bvaho ṱaḓulu.”+ 42 Vha ri: “Naa uyu a si Yesu murwa wa Yosefa, ane khotsi awe na mme awe ra vha ḓivha?+ Ndi ngani zwino a tshi ri, ‘Ndi bva ṱaḓulu’?” 43 Yesu a ri: “Litshani u gungula. 44 A hu na ane a nga ḓa kha nṋe arali a songo kokodzwa+ nga Khotsi we a nthuma, nṋe ndi ḓo mu vusa nga ḓuvha ḽa vhufhelo.+ 45 Vhaporofita vho ṅwala vha ri: ‘Vhoṱhe vha ḓo funzwa nga Yehova.’*+ Vhane vha thetshelesa Khotsi vha guda khae, vha ḓa kha nṋe. 46 A hu na we a vhona Khotsi,+ a bvaho ha Mudzimu ndi ene o vhonaho Khotsi.+ 47 Ngoho ndi a ni vhudza ndi ri, ane a tenda u ḓo wana vhutshilo vhu sa fheli.+

48 “Ndi nṋe vhurotho ha vhutshilo.+ 49 Vhomakhulukuku waṋu vho ḽa mana ngei sogani, fhedzi vha fa.+ 50 Hovhu ndi vhurotho vhu bvaho ṱaḓulu, ane a vhu ḽa a nga si fe. 51 Ndi nṋe vhurotho vhu tshilaho vhu bvaho ṱaḓulu. Ane a ḽa honovhu vhurotho u ḓo tshila tshoṱhe; zwi re zwone ndi uri, ṋama yanga ndi yone vhurotho vhune nda ḓo vhu ṋea shango uri ḽi tshile.”+

52 Vhayuda vha thoma u hanedzana vha ri: “Uyu muthu a nga ri ṋea hani ṋama yawe uri ri i ḽe?” 53 Yesu a ri: “Ngoho ndi a ni vhudza ndi ri, arali na sa ḽa ṋama ya Murwa muthu na u nwa malofha awe, ni nga si wane vhutshilo.*+ 54 Ane a ḽa ṋama yanga na u nwa malofha anga u ḓo wana vhutshilo vhu sa fheli, nṋe ndi ḓo mu vusa+ nga ḓuvha ḽa vhufhelo; 55 ngauri ṋama yanga ndi zwiḽiwa zwa vhukuma na malofha anga ndi tshinwiwa tsha vhukuma. 56 Ane a ḽa ṋama yanga na u nwa malofha anga u ḓo vha na vhuthihi na nṋe, na nṋe ndi ḓo vha na vhuthihi nae.+ 57 Vhunga Khotsi a tshilaho o nthuma, na nṋe ndi tshi tshila nga Khotsi, na ane a ḽa ṋama yanga u ḓo tshila nga nṋe.+ 58 Hovhu ndi vhurotho vhu bvaho ṱaḓulu. A si vhurotho ho ḽiwaho nga vhomakhulukuku waṋu, vha fhedza vha fa. Ane a ḽa hovhu vhurotho u ḓo tshila tshoṱhe.”+ 59 O amba zwenezwi a tshi khou funza sinagogoni* ngei Kapernaume.

60 Musi vhafunziwa vhawe vhanzhi vha tshi pfa zwenezwi, vha ri: “Mafhungo aya a a tshuwisa; ndi nnyi ane a nga a thetshelesa?” 61 Yesu o vha tshi ḓivha uri vhafunziwa vhawe vha khou gungula nga nṱhani ha zwenezwo, a ri: “Naa zwenezwi zwi a ni khukhulisa? 62 Ni ḓo ri mini arali na vhona Murwa muthu a tshi gonya he a vha e hone u thomani?+ 63 Muya mukhethwa ndi wone u ṋeaho vhutshilo;+ ṋama yone a i na mushumo. Zwe nda ni vhudza zwone zwi bva kha muya mukhethwa, zwi ṋea vhutshilo.+ 64 Fhedzi hu na vhaṅwe vhaṋu vha sa tendi.” Ngauri u bva mathomoni Yesu o vha a tshi ḓivha vha sa tendiho na ane a ḓo mu fheṱa.+ 65 A dovha a ri: “Ndi ngazwo ndo ni vhudza nda ri, a hu na ane a nga ḓa kha nṋe nga nnḓa ha musi o tendelwa nga Khotsi.”+

66 Nga nṱhani ha zwenezwo, vhafunziwa vhawe vhanzhi vha humela kha mishumo yavho ya kale,+ vha si tsha tshimbila nae. 67 Ngauralo, Yesu a amba na vhaapostola vha 12 a ri: “Kani na inwi ni khou ṱoḓa u ṱuwa?” 68 Simoni Petro a mu fhindula a ri: “Murena, ri ḓo ṱuwa ra ya kha nnyi?+ Ndi iwe ane wa amba zwi isaho vhutshiloni vhu sa fheli.+ 69 Ro tenda, ri a ḓivha uri ndi iwe Mukhethwa wa Mudzimu.”+ 70 Yesu a ri: “Naa a si nṋe we nda nanga inwi vhaapostola vha 12?+ Fhedzi muṅwe waṋu ndi mupomoki.”*+ 71 O vha a tshi khou amba nga ha Yudasi murwa wa Simoni Iskariote, ngauri onoyo o vha a tshi ḓo mu fheṱa, naho o vha e muṅwe wa vhaapostola vha 12.+