NGANEA 110

Timotheo—Muthusi Wa Paulo

MUṰHANNGA ane na mu vhona afha u na muapostola Paulo ndi Timotheo. Timotheo o vha a tshi dzula na muṱa wa hawe Lisitara. Mme awe o vha a tshi pfi Oinike makhulu wawe a tshi pfi Loisa.

Lwo vha lu lwa vhuraru Paulo a tshi dalela Lisitara. Hu ṱoḓaho u vha ṅwaha nga phanḓa, Paulo na Baranaba vho vha vho thoma u ḓa afha nga lwendo lwa u ṱanziela. Zwino Paulo o vha o vhuelela na Silasi.

Tshifanyisoni Paulo o vha a tshi khou vhudzisa Timotheo: ‘U nga funa u tshimbila na Silasi na nṋe? Ri nga shumisa thuso yau kha u ṱanziela kha vhathu vha kule.’

Timotheo a fhindula: ‘Ee, ndi a funa u ṱuwa.’ Nga murahu Timotheo a sia muṱa wa hawe a ṱuwa na Paulo na Silasi. Fhedzi kha ri thome u wana zwe zwa vha zwi tshi khou itea kha Paulo. Ho vha ho no vha miṅwaha i ṱoḓaho u vha 17 tshee Yesu a bvelela khae nḓilani ya u ya Damaseko.

Humbulani, Paulo o vha o ḓa Damaseko u vhaisa vhafunziwa vha Yesu, fhedzi zwino o vha o no vha mufunziwa! Nga murahu maswina a ita maano a u vhulaha Paulo ngauri o vha a sa funi pfunzo yawe nga ha Yesu. Fhedzi vhafunziwa vha mu ponyokisa nga u mu tsitsa nga tshirundu nga nnḓa ha luvhondo lwa muḓi.

Nga murahu Paulo a ya Antiokia a ṱanziela. Ndi henefho he vhatevheli vha Yesu vha thoma u vhidzwa Vhakriste. Paulo na Baranaba vha kona u rumiwa mashangoni a kule vha tshi bva Antiokia. Muṅwe muḓi we vha dalela ndi Lisitara, haya ha Timotheo.

Hu ṱoḓaho u vha ṅwaha nga murahu, Paulo o vha o vhuelela Lisitara nga lwendo lwa vhuvhili. Sedzani mapa ri gude huṅwe ha fhethu he Timotheo, Paulo na Silasi vha ya hone vha tshi bva Lisitara.

Ha u thoma, vho ya tsini Ikonio, vha kona u ya muḓini wa vhuvhili u no pfi Antiokia. Nga murahu vha gonyela Tiroasi, vha kona u ya Filipi, Thesalonike na Berea. Ni a hu vhona Athene kha mapa? Paulo o ṱanziela henefho. Nga murahu vha fhedza ṅwaha na hafu vha tshi ṱanziela Korinthe. Mafheleloni vha imanyana Efeso. Zwenezwo vha vhuya Kesarea nga gungwa, vha gonyela Antiokia, he Paulo a dzula hone.

Ngauralo Timotheo o tshimbila mimaela ya maḓana na maḓana a tshi thusa Paulo u ṱanziela “mafhungo maḓifha” na u thoma zwivhidzo zwinzhi zwa Vhukriste. Musi ni tshi vha muhulwane, naa ni ḓo vha muḓinḓa a fulufhedzeaho wa Yehova u nga Timotheo?

Mishumo 9:19-30; 11:19-26; dzindima 13 u ya kha 17; 18:1-22.

[Mapa]

(U itela uri ni vhone nḓila ye mafhungo a dzudzanywa ngayo nga vhuḓalo, sedzani khandiso)

Roma

Melite

Thesalonike

Berea

Korinthe

Filipi

Athene

Kereta

Tiroasi

Efeso

Mileto

Kolosa

Antiokia

Ikonio

Lisitara

Antiokia

Kipiro

Damaseko

Kesarea

Yope

Yerusalema

LWANZHE LUHULU (MEDITERRANEAN)