Domande dei letori

Quando che le nassion le ndarà dir che “vivemo in pace e sensa paura”?

Come ghemo visto nel artìcolo “Domande dei letori”a de pochi mesi indrio, suito Geovà el ndarà meter el so pensamento nel cuor de tuti i governi, o sia, dei “diese corni”. El so pensamento l’è de dar poder e pi autorità ala “bèstia color de scarlate”, che la ze la Organisassion dele Nassion Unide, la ONU. Nela Bìblia, questa bèstia la ze anca ciamada de “la imàgine dela bèstia cativa”. (Apo. 13:14, 15; 17:3, 16, 17) Dopo de questo, i “diese corni” e la bèstia che la ga ricevesto de pi poder i ndarà finir fora con tute le religion false. Ma sarà che le nassion le ndarà dir che “vivemo in pace e sensa paura”b prima o dopo dela destrussion dele religion false? — 1 Tes. 5:3.

Noantri no savemo dir giusto quando che sarà fata la proclamassion che “vivemo in pace e sensa paura”. Se noantri savéssino, no ne ocoreria restar atenti. Ma Gesù el ga dito tante volte ai so dissìpoli che i gavaria de ‘seitar atenti’. (Mat. 24:42; 25:13; 26:41) Alora, ndemo capir meio quel che Geovà el ga dito par meso dela carta che el apòstolo Paolo ga scrito ai fradei tessalonissensi.

Paolo el ga scrito: “Quando i dirà: ‘Vivemo in pace e sensa paura!’, de colpo vegnarà sora lori una destrussion.” (1 Tes. 5:2, 3) Fin adesso, le nostre publicassion le spieghea cossita le parole de Paolo: La proclamassion che “vivemo in pace e sensa paura” la sarà fata pena prima dela granda tribolassion, che la va scominsiar cola destrussion de tute le religion false. Le nostre publicassion anca le dise che quando i fà questa proclamassion, savaremo che suito scomìnsia la granda tribolassion.

Ma, dopo de studiar de pi, ne par che ghen’è nantra maniera de capir questo assunto. Fursi la proclamassion che “vivemo in pace e sensa paura” la sarà fata dopo dela religion falsa esser finida fora. Parché che podemo dirlo? Ndemo parlar un pochetin de pi sora questo assunto.

Come che la religion falsa la mostra che la ze in meso ale guere? La Bìblia la dise che in Babilònia la Granda, che la ze la granda prostituta, “ghen’è el sangue de tuti quei che i ze stati copadi nela tera”. (Apo. 17:1, 5; 18:24) La stòria la mostra che la religion falsa sempre la ze stà in meso ale guere e che la ga copà tanta gente. Invesse de giutar le persone a viver in pace e sensa paura, ela la fà guera. Alora, podemo domandarse: Sarà che la proclamassion che “vivemo in pace e sensa paura” la sarà fata sol dopo de finir fora cole religion false? Pol esser de si, ma no semo pròpio sicuri.

Cossa che ndarà suceder dopo de proclamar che “vivemo in pace e sensa paura”? Paolo el ga dito: “De colpo vegnarà sora lori una destrussion.” (1 Tes. 5:3) Le parole de Paolo le mostra che pena dopo che sarà fata la proclamassion che “vivemo in pace e sensa paura”, quei che i ga fato questa proclamassion i sarà finidi fora. Alora, ghen sarà poco tempo intrà la proclamassion e la destrussion de quei che i fà questa proclamassion. La so destrussion la vegnarà de colpo e suito. Par quela, pol esser che le nassion le farà la proclamassion dopo che le ga finio fora cole religion false, e pena dopo lore stesse le sarà finide fora.

Ma cossa che i servi de Dio i va far quando tute queste robe sucede? Paolo el ga dito: “Valtri, fradei, no sì mia nel scuro. Cossita, questo giorno no’l saria una sorpresa par valtri come saria par un ladron.” (1 Tes. 5:4) Proa pensar: se la proclamassion che “vivemo in pace e sensa paura” la sarà fata dopo dela religion falsa esser finida fora, par i servi de Dio sarà ciaro che suito queste nassion le sarà finide fora. Invesse, le nassion che le ga pena fato la proclamassion le sarà tranquile, parché no le speta mia de esser destrute. Par lore questo giorno vegnarà pròpio come un ladron.

Alora, cossa che noantri spetemo? Ghemo visto che suito i governi e la ONU i ndarà finir fora cola religion falsa. Quando questo sucede, ndarà scominsiar la granda tribolassion. Noantri anca savemo che in qualche momento le nassion le ndarà proclamar che “vivemo in pace e sensa paura”. Ma quando questo ndarà suceder? Ghemo visto che questo podaria suceder in due maniere: Prima, pol esser che questa proclamassion la sìpia fata vanti dela destrussion de tute le religion false. Seconda, questa proclamassion la sarà fata dopo che i governi i finisse fora con tute le religion false. Alora, ne tocarà spetar par veder come che la professia la ndarà realisarse. Tante volte, noantri capimo del tuto le professie sol quando le ze drio realisarse o fin dopo. — Varda anca Gioani 12:16.

Ma la roba pi importante no la ze quando la sarà fata la proclamassion che “vivemo in pace e sensa paura”, ma si se noantri seitaremo leai a Geovà. Alora, “ghemo de restar desmissiadi e atenti”, par esser pareciadi par quel che ndarà suceder. — 1 Tes. 5:6.