Impara a gaver tanto rispeto par Dio, compagno a Obadia

Obadia el tendea dela casa del rè Acabe. Questo rè l’era rugno e el gavea assà che la adorassion del falso dio Baal la fusse fata in Israel. Stesso cossita, Obadia l’è stà bon de gaver tanto rispeto par Geovà “ancora de gióveno”. (1 Rè 18:1-13) Alora, quando la regina Gesabel la ga mandà copar tuti i profeti de Geovà, Obadia el ga capio che el gavea de giutarli con coraio. L’era tanto pericoloso giutar un profeta. Ma Obadia l’è stà bon de sconder 100 profeti e darghe de magnar intanto che ghen’era una bruta fame. Podemo pensar come l’è stà fadiga far questo sensa che i falsi profeti che i servia el rè e la regina i lo vedesse. — 1 Rè 18:19.

Come che podemo far compagno a Obadia? Anca se lu el gavea rispeto par Acabe, Obadia el gavea ancora de pi rispeto par Dio. Par causa de questo profondo rispeto, lu l’è stà tanto coraioso e el ga fin riscià la so vita par proteger i so fradei. Se ndove semo de star la predicassion la ze proibia, ghemo de far cada volta pi grando el nostro rispeto par Geovà. Cossita, saremo coraiosi par giutar i nostri fradei e sorele che i infronta dificoltà.