Sìpia coraioso e leal, compagno a Benaia

Benaia l’era un bravo soldà che el laorea par el rè Davi e dopo par el rè Salomon. I sasserdoti leviti no i ndea ale guere e gnanca i doperea arme. Anca se Benaia el fusse fiol de un sasserdote, lu l’è deventà un soldà tanto coraioso. Par esémpio, lu el ga copà un leon e el ga lotà contra un soldà tanto grando. Davi el se fidea tanto in Benaia che lo ga scoliesto par esser paron dei soldadi che i lo protegea. — 2 Sam. 23:20-23.

Anca se Absalon e Adonia i ze ndati contra Davi, Benaia el ga seità leal a lu. (2 Sam. 8:18; 15:18; 1 Rè 1:8) Quando Davi l’è vegnesto vècio, Benaia anca l’è restà dela so banda e el ga giutà che Salomon el deventesse rè. (1 Rè 1:32-40) Benaia l’è stà leal a Geovà e a quei che Geovà el gavea scoliesto par esser rè, anca quando i altri no i ga fato cossita.

Anca noantri ghemo bisogno de coraio par ndar contra el nostro poderoso nemigo, Sàtana, e quei che ghe va drio. Ghemo anca de seitar a sforsarse par viver de acordo cola volontà de Geovà. (Efe. 6:11; 1 Pie. 5:8, 9) Anca se ghen’è de quei che i desside abandonar a Geovà, noantri seitemo leai e se fidemo che lu el ndarà benedirne. — 2 Sam. 22:26.