Come che podemo esser felici anca se semo odiadi?

1. Cossa che Gesù el ga dito, e parché fursi restemo sorpresi?

QUANDO Gesù l’era drio insegnar nel monte, el ga dito: “Valtri saré felici sempre che i altri i ve òdia.” (Luc. 6:22) Fursi quei che i era lì i ze restadi sorpresi con quel che el ga dito parché nissuni ghe piase de esser odià. Ma parché che Gesù el ga dito queste parole? L’è importante saver la risposta parché tante persone ancoi le òdia quei che i va drio a Gesù. In questo stùdio, ndaremo veder parché che semo odiadi e parché che ancora cossita podemo esser felici.

PARCHÉ CHE SEMO ODIADI?

2-3. Parché che le persone le ne òdia, e come che saver questo ne giuta? (Gioani 16:2, 3)

² Semo odiadi parché adoremo a Geovà. Gesù el ga dito sora quei che i ndaria perseghir o fin copar i so seghidori: “Lori no i cognosse al Pare gnanca a mi.” (Ledi Gioani 16:2, 3.a) Chi che ga la colpa de noantri esser odiadi? L’è Sàtana. L’è lu “el dio de questo mondo”. (2 Cor. 4:3, 4) Lu el proa intrigar le persone de imparar la verità sora Geovà e el fà che queste persone le vae contra a quei che belche i lo serve. (Gio. 8:42-44) Come che saver questo càmbia la nostra maniera de veder quei che i ne vien contra? Capir che Sàtana l’è drio imbroiar queste persone ne giuta a no odiarle.

³ Varda el esémpio de Pavelb che l’è de star nte un paese ndove el nostro laoro l’è proibio. Lu el ga seità a adorar a Geovà e par quela l’è stà preso, i ghe ga dato tante bote e lu l’è restà par vinti mesi nte una sela lu lu sol sensa poder veder nissuni. Adesso Pavel el dise: “L’è ciaro par mi che l’è Sàtana e i demoni che i ze drio proar intrigarne de adorar a Geovà. Me par che quasi tuti quei che i laora nele preson no i ga mia òdio par noantri, lori i ze sol drio far el so laoro.” Varda anca el esémpio de un fradel nela Croàssia che el ga sofrio par una bruta perseghission de so pare e so mare che no i adorea a Geovà. Lu el ga dito: “Adesso capisso che l’è Sàtana el me vero nemigo, e nò me pare e me mare.” — Efe. 6:12.

4. Cossa che podemo imparar con Gesù e anca col dissìpolo Stevon? (Varda anca la stampa.)

⁴ Noantri no odiemo mia quei che i ne òdia. Invesse, ghemo de pregar par lori. (Mat. 5:44) L’è pròpio questo che imparemo de Gesù e del dissìpolo Stevon. I soldadi romani i gavea picà su Gesù nel pal de tortura, e in quel momento Gesù el ga pregà: “Pare, perdónali.” (Luc. 23:34) Gesù l’era drio domandar a Geovà che el perdonesse quei soldadi. Lu fursi anca el ga pensà in quela mùcia de gente che la ndea drio ai lìderi religiosi e par quela la volea che el fusse copà. Gesù el gavea capio che queste persone no le savea quel che le era drio far. Compagno a Gesù, anca el dissìpolo Stevon el ga domandà che Geovà el perdonesse quei che i ndaria coparlo. (Ati 7:58-60) E sarà che Geovà el ga rispondesto le orassion de Gesù e de Stevon? Si. Tanti che i volea copar Gesù dopo i se ga ciamadi grami, i ga dimostrà fede in Gesù e i se ga batesà. (Ati 2:36-41) E Saulo de Tarso, che el gavea aprovà la morte de Stevon, pi tardi l’è deventà un cristiano e l’è restà tanto disgustà par tute le robe brute che el gavea fato. — 1 Tim. 1:13.

5. Cossa che te impari col esémpio de César?

⁵ Geovà el risponde anca ale nostre orassion quando preghemo par qualchedun che ne vien contra. Varda el esémpio de César che l’è de star nela Venezuela. So pare no ghe piasea che lu l’era una Testimònia de Geovà e l’era anca violento. César el ga dito: “Me mama la era una bona sposa e una brava mama. Anca se la metea Geovà in primo posto, ela no la ga mai assà de far quel che ghe volea a me pupà. Ela la ga insegnà a mi e ai me fradei de darghe rispeto al nostro pupà. La ne ga insegnà anca a obedirlo sempre che lu el domandesse qualcossa che no fusse contra a Geovà.” Col tempo, el pare de César l’è restà manco cativo. César el ga dito: “Un giorno, dopo de far una orassion sinsiera a Geovà, ghe go domandà a me pupà se lu el volea studiar la Bìblia con mi. Quando el ga dito “si”, go sentio tanta alegria.” Col tempo, so pare de César el se ga batesà. L’è vera che no i ze tuti quei che ne vien contra che i càmbia cossita. Ma tanti i resta manco cativi con noantri quando i vede come ghe parlemo e come se comportemo con lori. Semo tanto contenti quando che lori i fà questi cambiamenti e semo premosi de veder come che Geovà, el misericordioso “Giuis de tuta la tera”, ancora el farà vegner a lu tante persone. — Gén. 18:25.

6. De acordo con Marco 13:13, parché che semo odiadi?

⁶ Semo odiadi parché rispetemo a Gesù. Gesù el ga dito che le persone le odiaria i veri adoradori ‘par causa del so nome’. (Ledi Marco 13:13.c) Cossa che el so “nome” el rapresenta? El rapresenta chi che l’è lu e anca el so dirito de esser Rè del Regno de Dio. Le persone che le ne òdia le se fida in governi umani, invesse de fidarse in quel che Geovà el ga scoliesto par governar el mondo, o sia, Gesù Cristo. Gesù el ga scominsià a governar el Regno de Dio del 1914 in qua, e presto lu el cavarà via tuti i altri governi.

7-8. Parché che tanti servi de Geovà i ze odiadi? (Gioani 15:18-20) (Varda anca la stampa.)

⁷ Semo odiadi parché no volemo esser come le persone del mondo de Sàtana. Gesù el ga spiegà che i so seghidori i saria odiadi parché ‘no i ze come le persone del mondo’. (Ledi Gioani 15:18-20.d) Cossita come i primi dissìpoli, noantri no volemo parlar e gnanca comportarse come quei del mondo. Par quela che tanti i tol in giro e i trata mal tanti fradei e sorele nel laoro e nela scola. (1 Pie. 4:3, 4) Ma restemo contenti che arquanti che i ne vegnea contra i ga cambià la so maniera de pensar e i ga scominsià a rispetarne.

⁸ Varda el esémpio de Ignacio, dela Amèrica Sentral. Quando lu el ndea a scola, ghen’era un maestro che par tanti ani lo tolea in giro parché el ndea drio a quel che Dio el dise. Un poco prima de finir la scola, el maestro de Ignacio el ghe ga domandà come che lu l’era bon de viver de acordo coi prinsipi dela Bìblia anca se tante persone intorno de lu no le fea compagno. Ignacio el ghe ga spiegà che lu el vede le lege de Geovà come una protession. Alora, lu el ga convidà el so maestro par ndar nte una riunion. Che bela sorpresa par Ignacio quando so maestro l’è rivà! Lu l’è restà tanto maraveià col amor dela congregassion e el ga seità ndar ale riunion. Col tempo, anca el maestro el ga bio de infrontar persone che ghe vegnea contra par causa che lu el studiea la Bìblia. Ma lu el ga seità a far pi forte la so amicìssia con Geovà e l’è stà batesà.

9-10. (a) Cossa che ne fà esser difarenti dele persone del mondo de Sàtana? (b) Cossa che podemo imparar del esémpio del apòstolo Paolo?

⁹ Noantri anca semo difarenti dele persone del mondo de Sàtana parché no se metemo nela polìtica e nela guera. (Gio. 18:36) Noantri seghimo el consìlio de Romani 13:1 e obedimo ale lege del governo. Ma, no ndemo rento ala polìtica, e no votemo a nissuni. Parché? Parché noantri semo leai a Geovà e al so Regno. Tante Testimònie de Geovà le ze state prese par causa dela so fede, ma lore le seita a predicar. Lore le fà come el apòstolo Paolo quando l’è restà in preson par tanti ani. (Ati 24:27; 28:16, 30) Lu el ga seità a parlar dele bone notìssie a tuti, anca a guardi, a persone importante dei tribunai, governanti, rè e fursi fin a persone de autorità del imperador romano Nero. — Ati 9:15.

¹⁰ Anca i fradei e le sorele che i ze nele preson nei nostri giorni i seita a predicar a persone come giuisi, autorità del governo e a guardi. Varda el esémpio de un fradel che el ga passà de pi de sei ani nte una preson parché no’l se gavea metesto nela polìtica. Lu el ga dito che el vedea el so tempo lì nò come un castigo, ma come una designassion de Geovà par catar persone che no le gavea gnancora imparà la verità. Noantri restemo felici se Geovà el ne dopera par predicar a queste persone. (Col. 4:3) Adesso, ndemo veder altri motivi che ghemo par esser felici anca se semo odiadi.

PARCHÉ PODEMO ESSER FELICI QUANDO SEMO ODIADI?

11. Come che la nostra fede la pol deventar pi forte quando semo perseghidi? Parla de un esémpio.

¹¹ El òdio dele persone del mondo mostra che le professie dela Bìblia le ze drio realisarse. Nela prima professia dela Bìblia, Geovà el ga dito che Sàtana e quei che i ghe va drio i odiaria a quei che i ama e i serve a Geovà. (Gén. 3:15) Anca Gesù sempre el ga dito che quei che i serve a Geovà i saria odiadi. (Mat. 10:22; Mar. 13:9-12; Luc. 6:22, 23; Gio. 15:20) E fin altri scritori dela Bìblia i ga dito la stessa roba. (2 Tim. 3:12; Tia. 1:2; 1 Pie. 4:12-14; Giuda 3, 17-19) Alora, quando che vien la perseghission, no restemo maraveiadi. Invesse, restemo felici parché questo vol dir che le professie dela Bìblia le ze drio realisarse e ne assa sicuri che semo drio servir al vero Dio. Una sorela che la ze de star nte un paese ndove el nostro laoro l’è proibio la ga dito: “Quando me son dedicà a Geovà, mi savea che prima o dopo mi infrontaria la perseghission. Alora, quando le ze vegneste le dificoltà, no go mai bio paura e gnanca son restà sorpresa.” El so omo l’era un de quei che ghe vegnea contra. Lu la tratea mal e el ga brusà la so Bìblia e le publicassion. Ma la sorela no la ga bio paura. Invesse, la ga fato la so fede ancora pi forte. (Ebr. 10:39) Ela la dise: “Le professie le disea che ghen saria la perseghission, alora mi savea quel che ndaria suceder. Infrontar la perseghission me ga fato pi sicura che questa la ze la vera religion.”

12. Cossa che ga giutà un fradel a infrontar la perseghission?

¹² Anca se savemo che saremo perseghidi, pol esser difìcile perseverar in queste situassion. Un fradel el ga scrito sora el so tempo nela preson: “Dele volte mi me sentia triste e piandea.” Cossa che ga giutà questo fradel a darghene fora con questa situassion? Lu el ga dito: “Mi scominsiea el giorno con una orassion. Fora par el di, quando sucedea una roba bruta, mi preghea nantra volta. E quando restea cativo parché i me tratea mal, mi me sarea su nel bagnero e preghea.” Questo fradel anca el pensea sora fradei che i ga sofrio perseghission nel passà e ancoi. Questo lo ga giutà a soportar la perseghission e a gaver la pace che Gesù el ga prometesto ai so dissìpoli. — Gio. 14:27; 16:33.

13. Cossa che pol giutarne a soportar el òdio?

¹³ El nostro amor a Geovà e un par el altro ne giuta a soportar el òdio. Gesù el ga sempre amà el so Pare de tuto el cuor. E lu anca el amea i so amighi. (Gio. 13:1; 15:13) Quando semo boni de gaver questo tipo de amor par Geovà e par i nostri fradei e sorele, anca noantri saremo boni de soportar el òdio. Ma come cossita? Par capir la risposta ndemo veder el esémpio del apòstolo Paolo.

14. Cossa che ga giutà Paolo a seitar leal a Geovà anca quando el savea che el saria copà?

¹⁴ Poco vanti de esser copà, Paolo el ga scrito al so caro amigo Timòteo: “Dio no’l ne ga dato un spìrito de covardia, ma un spìrito de poder e de amor.” (2 Tim. 1:7) Cossa che Paolo el ga volesto dir? Paolo l’era drio dir che el amor par Geovà pol giutarne a soportar brute provassion. (2 Tim. 1:8) Infati, lu el savea che presto el ndaria esser copà. Alora, l’è sicuro che el forte amor che lu el gavea par Geovà lo ga giutà a infrontar questa situassion con coraio e a seitar leal. — Ati 20:22-24.

15. Come che i fradei e sorele nei nostri giorni i ze drio dimostrar amor un par el altro? (Varda anca la stampa.)

¹⁵ L’è sicuro che amemo i nostri fradei e sorele che i resta firmi intanto che i infronta la perseghission. Tanti ancoi i mostra un grando amor ai so fradei anca se par far questo i rìscia la so pròpia vita, compagno Àquila e Prissila i ga fato quando i ga riscià la so vita par Paolo. (Rom. 16:3, 4) Par esémpio, nela Rùssia, tanti fradei i va ai tribunai par incoraiar quei che i ze stati presi. Varda el esémpio de una sorela. Quando ela la ze stata presa, la ga visto una mùcia de fradei e sorele nel tribunal. Ela la ze restada tanto emossionada, che par un tempo no la ze pi stata bona de parlar. El amor dei so fradei ghe ga dato coraio quando ela la gavea pròpio de bisogno. L’è pròpio vera che el nostro amor par Geovà e un par el altro ne giuta a soportar el òdio.

16. Parché che el apòstolo Piero el ga dito che quei che i ze tratadi mal parché i serve a Dio i ga motivo par esser felici? (1 Piero 4:14)

¹⁶ Savemo che quando soportemo el òdio ghemo la aprovassion de Dio. (Ledi 1 Piero 4:14.e) El apòstolo Piero el ga dito che quei che i soporta esser tratadi mal parché i serve a Dio i ga motivi par esser contenti. Ma come cossita? Quando semo tratadi mal provemo che ‘el spìrito de Dio l’è sora noantri’. Piero el savea ben come che l’era soportar la perseghission e gaver la aprovassion de Dio. Poco dopo del Pentecoste de 33, le autorità le ga mandà che i prendesse Piero e i altri apòstoli parché i era drio predicar. Ma Piero el ga difendesto la so fede con coraio. (Ati 5:24-29) Piero e i altri apòstoli i ga ciapà bote, ma lori no i se ga fermà de predicar. Invesse i era ‘contenti parché i ze stati consideradi degni de sofrir par causa del nome de Gesù’. Anca noantri podemo esser felici quando perseveremo nele provassion. — Ati 5:40-42.

17. Cossa che Gesù el ga dito ai so dissìpoli nela note vanti dela so morte?

¹⁷ Nela note vanti dela so morte, Gesù el ga dito ai so dissìpoli: “Me Pare el amarà a quel che me ama e mi amarò questa persona.” (Gio. 14:21) Semo premosi de quando rivarà el tempo che le persone no le gavarà òdio de noantri, ma le ne amarà parché servimo a Geovà! (2 Tes. 1:6-8) Fin che no riva questo tempo, pensemo nei tanti motivi che ghemo par esser felici anca se i altri i ne òdia. Questo ne dà consolo e forsa.