Parché ghemo de star atenti nele riunion?

1-2. (a) Come che Geovà el giuta i so servi ancoi? (Salmo 23:1, 2, 5) (b) Cossa che ndaremo veder in questo stùdio?

ANCOI, Geovà el ne dà tuto quel che ne ocore par imparar sora lu. Noantri se sentimo come Davi, che el ga cantà: “Geovà l’è el me Pastor. No me mancarà gnente.” — Ledi Salmo 23:1, 2,a 5.b

² Una maniera che Geovà el ne insegna la ze par meso dele riunion. Magari, quando semo nela riunion, scoltemo robe che ghemo belche imparà. Ma, ghemo de star atenti a quel che scoltemo, anca se fà tanto tempo che servimo a Geovà e che cognossemo la Bìblia. (2 Pie. 1:12) Càtito fadiga star atento ale riunion quando i fradei i ze drio insegnar una roba che belche te sè? Alora, questo stùdio el pol giutarte. Noantri ndaremo veder parché che ghemo de star atenti nele riunion e come quei che i insegna nela congregassion i pol giutarne a far questo. Ndaremo anca veder cossa che podemo far par star pi atenti nele riunion. Ma prima, ndemo veder chi che ne insegna nele riunion.

GEOVÀ EL NE INSEGNA NELE RIUNION

3. Come che Geovà el parla con noantri, e come che i so servi i dopera ben la Bìblia quando i insegna?

³ Geovà el parla con noantri par meso dela so Parola, la Bìblia. (2 Tim. 3:16, 17) Gesù el savea pròpio ben de questo. Par quela, lu el doperea ben la Parola de Dio. Le persone fin le disea: “Come che questo omo el sa tanto dele Scriture, se no’l ga studià nele scole?” (Gio. 7:15) Persone ùmile e che le volea imparar sora Geovà le restea tanto contente quando le scoltea Gesù. I primi dissìpoli de Gesù, come el apòstolo Paolo e Apolo, anca i doperea ben le Scriture quando i insegnea le persone. Lori le giutea a capir ben la Parola de Dio e quel che Geovà el volea che le fesse. (Ati 17:2, 3; 18:24, 28) Come Testimònie de Geovà, tuto quel che insegnemo nei nostri vìdei, artìcoli e discorsi vien dela Bìblia. Le persone che le vien nele nostre riunion par la prima volta le vede che doperemo ben la Parola de Dio. Par esémpio, quei che i fà discorsi e parte nele riunion sempre i lede testi nela Bìblia e i giuta le persone a capirli e a meterli in pràtica. — Luc. 24:32.

4. Cossa che tante volte la parola “scoltar” la vol dir?

⁴ Tante volte, nela Bìblia, la parola “scoltar” la vol dir obedir a qualchedun. Quando Geovà el ne insegna par meso dele riunion, capimo quel che lu el speta che femo e, cossita, semo boni de obedirghe. Semo sicuri che Geovà el resta contento con noantri quando stemo atenti a quel che lu el dise e metemo in pràtica nela nostra vita. — Pro. 27:11.

PARCHÉ CHE GHEMO DE STAR ATENTI NELE RIUNION?

5. Cossa che gavaremo voia de far par causa del nostro amor par Geovà? (Gioani 4:23, 24; 1 Gioani 5:3)

⁵ Ghemo de star atenti nele riunion parché amemo a Geovà. (Mat. 22:37) Quando imparemo sora Geovà, el nostro amor par lu el resta cada volta pi grando. E par causa del nostro amor par lu, gavaremo voia de dar atension a quel che lu el ne insegna nela Bìblia e volaremo obedirghe e adorarlo dela maniera giusta. — Ledi Gioani 4:23, 24;c 1 Gioani 5:3.d

6. Cossa che imparemo nele nostre riunion sora giutar i altri?

⁶ Noantri stemo atenti nele riunion parché amemo le persone. (Mat. 22:39) Par meso dele riunion, Geovà el ne insegna come giutar i nostri fradei e quei che ancora no i lo cognosse. Par esémpio, la revista Amar le persone te giutarà a far dissìpoli ne giuta a mostrar amor a quei che parlemo nela predicassion. Par quela, se te cati fadiga scominsiar una ciàcola cole persone, stà atento a come i fradei e le sorele i fà le so parte nela riunion in meso dela stimana.

7. Parché che l’è tanto importante seitar a obedir a Geovà?

⁷ Noantri stemo atenti ale riunion parché volemo esser felici. Geovà el ga dito ai so servi del passà che, se lori i volesse viver par sempre, i gavaria de obedir a lu. (Deu. 32:44-47) Quando stemo atenti ale riunion, semo incoraiadi a darghene fora cole dificoltà. Imparemo anca a spetar con passiensa fin che vegna el novo mondo. (Rom. 8:25) Alora, vedemo che l’è tanto importante obedir a Geovà adesso e gaver tanto de far par lu in questi ùltimi giorni. — Mat. 24:42-44; Apo. 1:3.

COME GIUTAR I ALTRI A STAR ATENTI NELE RIUNION?

8. Parché quei che i fà discorsi nele riunion i ga de seitar a sforsarse par insegnar meio?

⁸ Tuti quei che i insegna nele riunion, ancora de pi quei che i fà discorsi, i ga de seitar a sforsarse par insegnar meio. Quando un fradel el se parecia ben par far un discorso e el dopera la Bìblia par insegnar, lu el pol giutar quei che ancora no i serve a Geovà a imparar verità importante. Lu anca el pol giutar quei che i serve a Geovà a capir meio le verità dela Bìblia e a capir come meterla in pràtica nela so vita. Quando te ghè una parte nela riunion, ricòrdate che te pol giutar tanto le persone. Pensaghe sora come che te pol meter in pràtica le idee che ndaremo veder adesso nei discorsi e nele parte che te ndarè far. Anca se queste idee le ze par quei che i fà discorsi nele riunion, tuti noantri podemo doperarle par insegnar meio. — 2 Tim. 4:2; Tito 1:9.

9. Parché che l’è importante far un discorso de una maniera fàcile de capir?

⁹ Parla de una maniera fàcile de capir. Quando te fè un discorso, te vol che le persone le capissa ben quel che te sì drio dir. Se no te parli de una maniera fàcile de capir, sarà fadiga che le persone le stae atente. Alora, cossa che pol giutarte? (1) Nel scomìnsio del to discorso, parla dele idee prinsipai. (2) Parla de una idea ala volta. Fursi te pol fermarte un pochetin de parlar vanti de spiegar la pròssima idea. (3) Nel final del discorso, parla nantra volta dele idee pi importante.

10. Parché che l’è importante amar quel che te insegni?

¹⁰ Ama quel che te insegni. Quando a ti te piase un assunto, te gavarè voia de parlar sora questo. (Pro. 2:4, 5; Ati 4:20) Cossa che pol giutarte a amar quel che te insegni? Te pol pensarghe sora le idee e i testi dela Bìblia che ghen’è nel to discorso. Un fradel dei Stati Unidi che el ga intorno de 70 ani el se ricorda de un discorso che el ga scoltà quando l’era gióveno. Lu el ga dito: “Ancora me ricordo che el fradel che el ga fato el discorso el ne ga incoraià a pensarghe sora intanto che ledemo la Bìblia. Lu el ga spiegà de una maniera fàcile de capir come che podemo far cossita, e mi ero bon de veder che l’era una roba importante par lu. Quel discorso ga cambià la me vita parché me ga mostrà come imparar ancora de pi intanto che ledo la Bìblia e a deventar cada volta pi amigo de Geovà.”

11. Parché che l’è importante parlar pròpio quel che i fradei i ga de bisogno? (1 Timòteo 4:13-16)

¹¹ Parla pròpio quel che le persone le ga de bisogno e móstraghe come meter in pràtica quel che te sì drio insegnar. Dopera ben i testi dela Bìblia par incoraiar i fradei e giutarli a capir come meterli in pràtica nela so vita. Par esémpio, el apòstolo Paolo el ga dito a Timòteo pròpio quel che lu el gavea de bisogno de far par seitar a esser amigo de Geovà intanto che el laorea nela congregassion in Èfeso. (Ledi 1 Timòteo 4:13-16.e) Alora, sfòrsate par giutar i fradei pròpio in quel che i ga de bisogno, e giùtali a capir come che i pol far quel che la Bìblia la dise.

12. Parché che l’è importante parlar de maniera natural quando te sì drio far un discorso?

¹² Parla el to discorso in voce alta. Invesse de scriver parola par parola e nel salon lederlo tuto, proa parlar de maniera natural. Cossita, sarà pi fàcile che le persone le stae atente e che le capissa quel che te sì drio dir. La revista Sfòrsate par Leder e Insegnar Meio la dise: “Parla de una maniera natural e sinsiera. Cossita te mostrarè quel che te pensi sora quel che te sì drio parlar e che ti te importi cole persone.” Quando te parli de cuor, le persone le sarà pi atente, le gavarà de pi interesse in quel che te sì drio insegnar e le volarà meter in pràtica nela so vita.

13. Parché che l’è importante domandar consili a un fradel che l’è bravo de far discorsi? (Varda anca la stampa.)

¹³ Domanda consili a un fradel che l’è bravo de far discorsi. Par esémpio, dopo de pareciar el to discorso, te pol mostrarghe al fradel le to anotassion e proar far el discorso par lu. Cossita, lu el pol dir quel che te pol far meio. Dopo, sfòrsate de meter in pràtica le idee che lu el te dà par el to discorso. (Pro. 1:5) L’è bel domandar aiuto ai altri parché, dele volte, pol esser fadiga capir quel che ghemo de cambiar. Se se sforsemo de insegnar cada volta meio, saremo boni de giutar le persone a capir ben le verità dela Bìblia e a saver come meter in pràtica nela so vita.f

COSSA CHE PODEMO FAR PAR STAR PI ATENTI NELE RIUNION?

14. De acordo col Salmo 119:24, 111, 167, cossa che ghemo de pensar sora le orientassion de Geovà?

¹⁴ Noantri saremo pi atenti nele riunion se se ricordemo che le orientassion de Geovà le ze tanto importante. Ghemo bisogno dele so orientassion par darghene fora cole dificoltà intanto che vivemo in questi ‘tempi difìcili de soportar’. (2 Tim. 3:1) Alora, se par che, dele volte, semo drio scoltar sempre la medèsima roba nele riunion, ghemo de sforsarse par pensar compagno a quel che el ga scrito el Salmo 119. — Ledi Salmo 119:24, g 111,h 167.i

15. Cossa che pol giutarne a dar valor a quel che imparemo nele riunion?

¹⁵ Noantri ghemo de ricordarse che quel che imparemo nele riunion vien de Geovà. No ghemo de far come i israeliti quando i era nel deserto. (Éso. 16:15, 31) Nel scomìnsio, lori i era contenti col manà parché ghe piasea magnarlo e li giutea a restar vivi. Ma, col tempo, lori i ze restadi stufi de magnarlo. (Nùm. 21:5) Alora, cossa che imparemo? Pol esser che, nele riunion, scoltemo robe che ghemo belche imparà. Ancora cossita, ghemo de seitar a darghe valor a quel che imparemo. El schiavo fedele e prudente el se sforsa tanto par scòlier i assunti che studiemo nele riunion. Ghemo anca de ricordarse che quel che imparemo pol giutarne a far bone dessision e a gaver vita eterna nel futuro. — Pro. 3:13, 16-18; Gio. 17:3.

16. Cossa che giuta arquanti fradei a star atenti ale riunion? (Varda anca el quadro “Cossa che podemo far par star pi atenti nele riunion?”.)

¹⁶ Noantri ghemo de far robe che ne giuta a star pi atenti. Cossa che giuta arquanti fradei a star atenti ale riunion? Alice, che la serve a Geovà fà de pi de 30 ani, la ga dito: “Quando mi me parecio par le riunion, l’è pi fàcile che mi stae atenta. Se no fao cossita, l’è fadiga far un comentàrio e scomìnsio a pensar sora altre robe nela riunion.” Giusepe, che el serve a Geovà fà 52 ani, el ga dito: “Me piase scoltar assunti che belche cognosso parché sempre imparo qualcossa difarente. Se un fradel no l’è tanto bravo de far discorsi, mi me consentro in quel che lu l’è drio dir parché vien dela Bìblia.”

17. Che altre robe te pol far par star pi atento nele riunion? (Varda anca la stampa.)

¹⁷ Ghen’è ancora altre robe che te pol far par star pi atento nele riunion. Vedemo arquanti esempi. (1) No stà magnar massa vanti dela riunion. Senò, te podarè indormensarte. (2) Riva bonora e proa catar el to posto vanti che scomìnsia la riunion. (3) Meti el to selular de una maniera che no’l sona par no intrigar i altri. (4) Intanto che el fradel l’è drio far el discorso, proa pensar che punti che lu el ndarà parlar. (5) Proa vardar sempre par el fradel che l’è drio far el discorso e nò par quel che l’è drio suceder intorno de ti. (6) Fà anotassion o desegni sémplissi dele idee pi importante. (7) Stà atento ai versìcoli dela Bìblia che el fradel el dopera e proa pensar come che lori i te giuta a capir meio el assunto. (8) Domandate: ‘Come che posso doperar questi versìcoli dela Bìblia par giutar qualchedun nela congregassion o nela predicassion?’ (9) Vanti dele assemblee e dei congressi, varda el programa, el tema del giorno, i tìtoli dei discorsi e i versìcoli dela Bìblia de cada discorso. (10) Vanti che scomìnsie el vìdeo musical, sentate nel to posto e scolta con atension. Cossita, te ndarè pareciar el to cuor par scoltar.

SEITA A STAR ATENTO QUANDO GEOVÀ EL TE INSEGNA

18. Parché che ghemo de seitar a star atenti nele riunion?

¹⁸ Noantri ghemo de seitar a star atenti nele riunion parché Geovà l’è drio insegnarne. (Sal. 23:3; 31:3) Ghemo bisogno del aiuto de Geovà par seitar a far quel che l’è giusto. Alora, ghemo de far quel che l’è scrito in Luca 8:18 de ‘star atenti a come scoltemo’ e ghemo anca de meter in pràtica i consili che ricevemo nele riunion. Parché ghemo de far cossita? Parché quei che i scolta a Geovà i sarà felici adesso e i gavarà vita eterna nel futuro. — Sal. 119:2, 14.