Cossa la Bìblia la insegna sora la libertà de scòlier? Dio el ga el controlo sora tuta la nostra vita?
La risposta dela Bìblia
Dio el ne ga dato la libertà de scòlier, o sia, la capacità de far le nostre dessision. Alora, no l’è Dio gnanca el destino che i controla la nostra vita. Varda cossa la Bìblia la insegna.
Dio el ga fato el omo ala so imàgine. (Génesi 1:26) Semo difarente dele bèstie, che le fà le robe sensa pensarghe sora. Noantri semo boni de mostrar qualità come amor e giustìssia, compagno el nostro Creador. E cossita come lu, noantri gavemo la libertà de scòlier.
El nostro futuro el pol cambiar de acordo con quel che femo. La Bìblia la ne dise par ‘scòlier la vita e scoltar la voce de Dio’, o sia, scòlier obedir ai so comandamenti. (Deuteronómio 30:19, 20) Questo no gavaria mia senso, e fin saria crudel, se no gavessino la libertà de scòlier. Invesse de dir che semo obrigadi a far qualcossa, Dio el ne domanda con bontà: “Come che saria bon se ti te fussi atento ai me comandamenti! Alora la to pace la deventaria come un rio, e la to giustìssia come le onde del mar.” — Isaia 48:18.
El destino no’l pol mia controlar se quel che femo va ben o nò. Ghe ocore sforso par gaver boni resultadi in quel che femo. La Bìblia la dise: “Tuto quel che la to man la cata de far, fà con tuta la to forsa”. (Eclesiasti 9:10) Anca la dise: “L’è sicuro che i progeti de quei che pensa ben vanti i gavarà boni resultadi.” — Proverbi 21:5.
La libertà de scòlier la ze un presente de tanto valor che Dio el ne ga dato, parché cossita podemo dessider se ndaremo amarlo ‘con tuto el nostro cuor’. — Mateo 22:37.
Ma Dio no’l ga el controlo sora tuto?
L’è vera che la Bìblia la insegna che Dio el ga tuto el poder, e che nissuni i pol dirghe cossa che lu el ga de far. (Giò 37:23; Isaia 40:26) Ma lu no’l dopera el so poder par controlar tuto. Par esémpio, la Bìblia la dise che Dio el ga dimostrà autocontrolo con una nassion nemiga del so pòpolo, che l’è stà la antiga Babilònia. (Isaia 42:14) Dela medèsima maniera, lu el ga passiensa con quei che i dopera mal la so libertà de scòlier e i fà de mal ai altri. Ma Dio no’l ndarà acetar queste persone par sempre. — Salmo 37:10, 11.