Cossa vol dir perdonar?
La risposta dela Bìblia
Noantri perdonemo qualchedun quando dessidimo no restar disgustadi par un sbàlio che el ga fato. Nela Bìblia, la parola greca par “perdon” vol dir “assar de banda o assar ndar via”. L’è come se qualchedun el dessidesse no cobrar un dèbito. Gesù el ga doperà questa ilustrassion quando el ga insegnà come pregar: “Perdónane i nostri pecati, parché anca noantri perdonemo tuti quei che i ga dèbiti con noantri.” (Luca 11:4) Anca nela ilustrassion del schiavo che no’l ga volesto perdonar, Gesù el ga dito che el perdon l’è come no cobrar mia un dèbito. — Mateo 18:23-35.
Perdonemo quando no semo pi disgustadi coi altri. Anca, no spetemo gnente indrio par el mal che i ne ga fato. La Bìblia la insegna che el vero perdon el vien de un amor che no’l va in serca dei so interessi. Questo amor “no’l ghe bada el dano”. — 1 Corinti 13:4, 5.
Cossa el perdon no’l vol mia dir?
No vardar i sbali dei altri. In verità, la Bìblia la dise che no l’è mia giusto dir che no ghen’è gnente de sbalià in far el mal. — Isaia 5:20.
Far finta che gnente ga sucedesto. Dio el ga perdonà i bruti sbali de Davi. Ancora cossita, le consequense le ze vegneste fora. Dio fin el ga fato che i sbali de Davi i fusse scriti nela Bìblia. Cossita, se ricordemo de lori fin ancoi. — 2 Samuel 12:9-13.
Assar i altri imbroiarne. Par esémpio, imagina che te ghè dato soldi in préstio par un amigo, ma lu el ga butà via tuti i soldi e no l’è pi bon de darteli indrio. Lu el se ciama gramo e el te domanda scusa. Ti te pol fin perdonarlo. Cossita, no te restarè pi disgustà, e te ndarè desmentegarte del assunto. Ma fursi no te vè pi darghe soldi in prèstio a questo amigo. — Salmo 37:21; Proverbi 14:15; 22:3; Gàlati 6:7.
Perdonar sempre, no vol dir la situassion. Dio no’l perdona quei che i fà bruti pecati aposta e quei che i seita a far robe sbaliade, che no i vol cambiar e che no i vol domandar scusa ale persone a chi i ga fato de mal. (Proverbi 28:13; Ati 26:20; Ebrei 10:26) Persone che no le se ciama grame le deventa nemighe de Dio. Lu no’l dise mia che ghemo de perdonar quei che lu no’l perdona. — Salmo 139:21, 22.
Cossa che ti te pol far se qualchedun te ga fato una roba tanto bruta e no’l vol mia domandarte scusa, gnanca ciamarse gramo? La Bìblia la ne dà el consìlio: “Férmate de restar cativo e de inrabiarte.” (Salmo 37:8) Stesso che no te perdoni quela persona, ti te pol assar la ràbia de banda. Fìdate che Dio el ndarà giulgar quela persona. (Ebrei 10:30, 31) Ne consola tanto saver che Dio suito el ndarà cavar via tuti i bruti sentimenti che ghemo rento del nostro cuor. — Isaia 65:17; Apocalisse 21:4.
“Perdonar” tuti i pìcoli sbali. Invesse de pensar se ghemo o nò de perdonar un pìcolo sbàlio, ghemo de ricognosser che, dele volte, no ghemo mia motivi par ofenderse. La Bìblia la dise: “No stà mia ofénderte suito, parché l’è el cuor dei stùpidi che el se ofende.” — Eclesiasti 7:9, nota dela Bìblia de Stùdio in portoghese.
Come che podemo perdonar?
Ricòrdate de quel che el perdon el vol dir. Perdonar no vol mia dir far finta che nissuni i ga fato sbali o che gnente ga sucedesto. Ma vol dir che semo dessididi a no restar pi disgustadi coi altri.
Pensa come sarà bon perdonar. Fermarse de restar inrabiadi o disgustadi coi altri ne giuta a mantegner la calma, a gaver una salute meio e a esser pi felici. (Proverbi 14:30; Mateo 5:9) Ma el motivo pi importante l’è che sol podemo guadagnar el perdon de Dio se perdonemo i altri. — Mateo 6:14, 15.
Ghemo de meterse nel posto dei altri. Tuti femo sbali parché semo imperfeti, e restemo contenti quando i altri i ne perdona. (Tiago 3:2) Alora, anca noantri ghemo de perdonar i altri.
Sìpia echilibrà. Quando qualchedun el ga fato un pìcolo sbàlio contra noantri, podemo meter in pràtica el consìlio dela Bìblia: “Seité soportarve un al altro”. — Colossensi 3:13.
Fà presto in perdonar. Ghemo de sforsarse par perdonar pi presto che semo boni, vanti che restemo massa inrabiadi. — Efesi 4:26, 27.