AIUTO PAR LA FAMEIA
Come parlar coi vostri fioi sora le bebide alcòliche?
“Nela prima volta che ghemo parlà cola nostra fiola sora bebide alcòliche, la gavea sei ani. Ela la savea de pi sora questo de quel che speteino.” — Alexander.
Cossa che gavé de saver
L’è tanto importante parlar coi vostri fioi sora le bebide alcòliche. No sté spetar che i vostri fioi i vegna pi grandi. Khamit, dela Rùssia, el ga dito: “Mi gavaria de gaver parlà col nostro fiol sora le bebide alcòliche quando lu l’era ancora cieo. Quando me fiol el gavea sol 13 ani, go savesto che lu l’era belche drio bever àlcol. Me ciamo gramo de no spiegarghe sora questo assunto prima.”
Parché che ve ocore parlar coi vostri fioi sora le bebide alcòliche?
I fioi i pol scominsiar a ndarghe drio ai so coleghi e a quel che la television la dise sora el àlcol.
Organisassion che fà peschise sora le malatie nei Stati Unidi le ga dito che 11% de quei che i beve bebide alcòliche in quel paese ancora no i gavaria la età par bever de acordo cola lege.
Par quela, le autorità le dise che i genitori i ga de spiegar ai so fioi sora quel che le bebide alcòliche le pol far. Ma come che podé far questo?
Cossa che podé far
Proé pensar nele domande che i vostri fioi fursi i podaria far. Quei che i ze ciei i ze scuriosoni, e quei pi grandi i ze ancora de pi. Par quela, l’è bon pensarghe sora le domande che i podaria far. Par esémpio:
Se i vostri fioi i vol saver el gusto dele bebide alcòliche, podé spiegar che el vin l’è un poco garbo e la bira la ze amara.
Se i vostri fioi i vol proar le bebide alcòliche, podé dir che le ze massa forte par i toseti. Podé anca spiegarghe cossa che sucede quando qualchedun le beve. Par esémpio, bever àlcol pol far la persona restar pi calma. Ma se la beve massa, la pol restar storna e dir e far robe che la ndarà ciamarse grama. — Proverbi 23:29-35.
Proa saver de pi. La Bìblia la dise: “El omo che el ga sabedoria el ga imparà quel che l’è giusto e el fà bone dessision.” (Proverbi 13:16) Proé saver quel che sucede quando una persona la beve bebide alcòliche e sora le lege del vostro paese sora el àlcol. Cossita, saré boni de giutar i vostri fioi.
Parlé sora le bebide alcòliche coi vostri fioi. Mark, un pare dela Inglatera, el ga dito: “Pol esser che ghe fae fadiga ai toseti capir ben sora el àlcol. Mi go domandà al me fiol de oto ani se el pensea che l’era giusto o sbalià bever bebide alcòliche. Mi go proà parlar con lu de maniera tranquila. Cossita, lu el me ga dito pròpio quel che el pensea.”
Se te parli sempre sora le bebide alcòliche, i vostri fioi i ndarà capir ben questo assunto. De acordo cola età dei fioi, podé anca parlar sora sesso e sora quel che i ga de star atenti intanto che i guida el auto.
Deghe un bon esémpio. I fioi i ze come sponghe parché i ciapa tuto quel che l’è intorno de lori. Studiosi i dise che i fioi i va tanto drio ai so genitori. Alora, se i vostri fioi i vede che bevé bebide alcòliche par restar pi calmi, lori i ndarà imparar che sol i sarà boni de darghene fora coi problemi se i beve. Par quela, sforseve de esser un bon esémpio. Valtri gavé de far bone dessision sora el àlcol.
I fioi i va drio al esémpio dei genitori