El zolo dela semensa del fior de pissacan

La capacità de zolar dela semensa del fior de pissacan la ze de maraveiarse. Quando el vento el sùfia un fior de pissacan, tante pìcole semense le scomìnsia a zolar come se fusse parachede. Anca se le scomìnsia a zolar ben basso, el vento el pol portarle par de pi de un chilòmetro. Come che le ze bone de restar su par ària par tanto tempo? Fà poco tempo che i sientisti i ga visto che queste semense le zola quatro volte meio che un paracheda, sensa sgorlarse tanto.

Pensaghe sora: Cada semensa la ze tacada par meso de un caule a un sciufo de fili, che i ze come cavei. Questo sciufo el ga nome pappus. El pappus l’è come un paracheda, e questo giuta la semensa a restar su par ària.

Intanto che la ària la passa intorno e in meso del sciufo de fili, vien fora un molinel par sora del sciufo. La ària che la va a torno e rento del molinel la tira su el pappus, e cossita el casca pi pin pian.

La maniera che i fili del pappus i ze organisadi lo fà esser come un paracheda che assa la ària passar in meso, ma de una maniera pi firme. L’è interessante che 90% del pappus l’è spàssio vodo.

I sientisti i ze drio proar far pìcoli drone che i dopera la medèsima maniera de zolar che la semensa del fior de pissacan. Questi drone i podaria zolar sensa doperar tanta forsa e esser doperadi de tante maniere come, par esémpio, par veder quanto de poluission ghen’è nela ària.

Cossa che te cati? La bela maniera de zolar dela semensa del fior de pissacan la ze vegnesta dela evolussion? O qualchedun la ga fata?