Manutension de Saloni del Regno

Nicole, una sorela gióvena dela Colómbia, la ga dito: “Mi amo el me Salon del Regno! L’è ndove mi posso restar coi me fradei e sorele.” Anca ti te te senti cossita?

In tuto el mondo, ghen’è intorno de 63.000 Saloni del Regno dele Testimònie de Geovà. Questi i ze bei posti par noantri riunirse par adorar a Dio. Ma i ze ancora de pi che questo. Un pioniero regolar de nome David, nela Colómbia, el ga dito: “El nostro Salon del Regno el fà el messàgio che noantri predichemo restar pi bel ancora. Tanti de quei che i ne visita i resta maraveiadi de veder come che noantri tendemo ben dei nostri Saloni del Regno.” Par far cossita, noantri ghemo de laorar tanto par netarli e mantegnerli a posto. Come che semo boni de far questo laoro?

Come che la manutension la ze organisada?

La responsabilità de tender del Salon del Regno la ze dela congregassion che lo dopera. Par quela, fradei e sorele sempre i neta el so Salon. Lori anca i laora par rangiar pìcole robe e par sempre assarlo ben postà.

El Departamento Local de Progeto e Costrussion (LDC) el scòlie fradei par laorar come trenadori de manutension. Cada trenador de manutension el tende de 6 a 10 Saloni. El visita la congregassion e el insegna ai fradei e sorele come che lori i pol tender del so Salon. De tre in tre ani, lu el varda con tanta atension cada Salon del Regno par veder se el cata fora qualche problema de manutension o de seguransa che toca risolver.

I fradei e sorele i ze contenti de imparar col trenador de manutension. Indhumathi, una sorela nela Ìndia, la ga dito: “El trenamento l’è stà maraveioso. L’è stà tanto bon imparar come podemo assar el nostro Salon sempre bel.” Evans, un fradel nel Quénia, el ga dito: “Ghemo imparà come che podemo sparagnar soldi quando tendemo dei problemi pìcoli vanti che i devente problemi grandi.”

Come paghemo le spese

Doperar e mantegner a posto un Salon del Regno pol costar sentene o fin miliari de reai par ano. El valor el pol cambiar de acordo col posto ndove l’è el Salon, quanto tempo fà che l’è stà fato su e quante congregassion che lo dopera. Come che paghemo queste spese?

I soldi par pagar la manutension dei Saloni del Regno i vien dei donativi. Alexander, un fradel nel Casachistan, el ga dito: “Una parte dei soldi la ze doperada par pagar conte, come internet, àqua e luce. Nantra parte la ze doperada par pagar altre robe, come papel par sugar le man, luve e materiai par netar.” Tuti i soldi che i vansa i ze mandadi come donativi par la òpera mondial par giutar a pagar i progeti de manutension pi grandi che i ze fati in tuto el mondo.

Progeti de manutension pi grandi

Pol esser che un laoro de manutension par un Salon del Regno el coste de pi de quel che i fradei i guasta in due o tre mesi par tenderlo. Quando l’è cossita, i ansiani i va parlar col trenador de manutension del LDC. Se el LDC l’è de acordo col progeto, quasi sempre se dopera i soldi dei donativi dela òpera mondial par pagar le spese. Nel ano de servìssio de 2023, i ze stati fati 8.793 de questi progeti, e i ga costà de pi de 382 milioni de reai. Varda due esempi.

Nela Angola, un Salon del Regno de 15 ani el gavea arquanti problemi. Tochea cambiar tuto el sistema elètrico, i muri i gavea sfese e i visini i gavea dito che la àqua dela piova la era drio ndar rento le so case. El LDC el ga organisà un progeto par risolver questi problemi. El ga costà de pi de 46 mila reai. I visini i ga ringrassià i fradei e i ze stati maraveiadi de veder come el laoro l’è stà fato.

Nte un Salon del Regno nela Polònia, la àqua dela piova la era drio ndar rento par el querto e el carpete l’era tanto mal ciapà che tochea butarlo via. El LDC el ga aprovà un progeto par rangiar el querto e par farghe un tratamento che no assa pi la àqua ndarghe rento. Anca, el ga aprovà che i fradei i metesse un carpete novo nel Salon. El prèssio del progeto l’è stà de pi de 48 mila reai. Cossita, questo Salon del Regno no gavarà bisogno de una granda manutension par arquanti ani.

El laoro de manutension el ghe dà glòria a Geovà

La manutension la fà de pi che sol sparagnar soldi dei donativi. Anca, la ghe dà glòria a Geovà. Shaun, un fradel in Tonga, el ga dito: “Par causa del nostro laoro de manutension, podemo adorar a Geovà nte un Salon del Regno neto, organisà e sensa problemi. Questo fà le persone pensar robe bone sora Geovà. Ghemo orgòlio de convidarle al nostro Salon del Regno.”

Cossa che ti te pol far par giutar?

Tuti podemo giutar a netar e mantegner a posto i nostri Saloni del Regno. Marino, un trenador de manutension nela Austràlia, el ga dito: “Tuti noantri podemo partissipar nel privilègio de tender dei nostri Saloni del Regno. Quando femo cossita, semo drio giutar anca a sparagnar i soldi dei donativi par doperarli ndove ghen’è de pi bisogno.”

Joel, un fradel nela Ìndia, el ghe piase tender del so Salon del Regno. El ga dito: “Laorar coi me fradei me giuta a pensar come sarà la vita nel novo mondo.” Nicole, che ghemo parlà prima, la ga contà: “Fà poco tempo che go giutà a sugar el piso con strassi intanto che i fradei i era drio risolver un problema che fea vegner fora àqua del bagnero. Anca se no son stà mi che go risolvesto el problema, mi go giutà par no suceder un assidente.”

Se te piaseria meterte a disposission par giutar a tender del to Salon del Regno, parla coi ansiani dela to congregassion. Anca, i to donativi i ze doperadi par tender del to Salon del Regno e de altri Saloni in tuto el mondo. Te pol far questi donativi nele casse de donativi che ghen’è nel to Salon, o par meso del site donate.jw.org. Noantri ringrassiemo tanto la to generosità.