Silempwale ni Luka

9 Nto Yesu, aawiitthana atthareli awe 12 ni aahaavaha owera woowoomola minepa soonanara, ni olamiha iretta. 2 Ni aahaarumiha weera yalaleye Omwene wa Muluku ni olamiha iretta, 3 ni aaweerela: “Muhikuxe etthu mweettaka mukwaha: naari muttootto, naari murupa wa yootxa, naari yootxa,* naari musurukhu;* naari soowara* ikina. 4 Mene, empa eri yootheene munkelaanyu ovolowa, mukhale vaate vawo mpaka okhuma. 5 Nipuro nri poothe muhinkelaanyu waakheliwa, mwaakhumaka vale esidade eyo, mutatheke ntthupi mmanaanini mwanyu weera nwoonihere weera aaleeliwa.” 6 Vano, awo yaavinya, eneetteetta mittetthe ni mittetthe, elaleyaka mitthenka sooreera ni yaalamihaka atthu mapuro ootheene.

7 Ni Herodi,* aahiiwa itthu sootheene iya seereya suulummwaka ni aavalavela vantxipale, mwaha wooweera atthu akina yaahima weera Yohani oroovinyererihiwa mookhwaani, 8 atthu akina ohima yeera Eliya ookhumelela, ni atthu akina yaahima weera owo mmoha a maprofeta akhalayi oroovinyererihiwa. 9 Mene, Herodi aaheera: “Miyo koomuhita Yohani. Vano, ola taani onvara miteko iya kiniiwaaka?” Nto mwaha wa yeeyo, annaasaasa omoona.

10 Arummwa etthikakaru, yaamuleela Yesu itthu sootheene yaapankaaya. Avinyaka, Yesu aahaakuxa anarowa esidade yiitthaniwa Betisaida, weera yakhale meekhaayaru paahi. 11 Muloko mutokotoko waatthu osuwelakaru eyo, waahaatthara ni owo aawaakhela mooreera murima, ni aapatxera waaxuttiha woohima sa Omwene wa Muluku, ni waalamiha ale yaavoreiwa. 12 Oxekuwaka, arummwa 12 yaamwaattamela Yesu enamweerela: “Mwaamware atthu ala weera erowe mmawaani moowaattamela weera yaphwanye nipuro nookona ni yootxa, mwaha wooweera nipuro nna nraahu noorakamelana ni mittetthe simakinwe.” 13 Mene Yesu, owaakhula enre: “Mwaavahe nyeenyu yootxa weera etxe.” Omwaakhula yenre: “Hiyo khanaanoono yootxa va, sihikhanle ipaawu sinku ni ihopa iya piili, ohikhanle weera nnoorowa othuma yootxa enkela ophiyera otxa atthu ootheene ala.” 14 Mweekhaikhai, nipuro nne yaakhalavo alopwana 5.000. Mene Yesu aaweerela atthareli awe: “Mwaarume atthu weera ekilaathi ikhurupu saatthu 50.” 15 Awo yaapaka eyo, ni yaahaaruma atthu ootheene weera ekilaathi. 16 Akuxaka ipaawu iye sinku ni ihopa iye piili, aaweha wiirimu ni aavekela.* Avinyaka, aakawanya anapatxera waavaha atthareli awe, weera atthareli awe awo, evaheke muloko mutokotoko waatthu. 17 Vano, atthu ootheene yaatxa mpaka ovona, ni awosa yaattottela ipaawu saahanle mpaka osariha mittanka 12.

18 Muhoolo mwaya, emaara owo aaraawe meekhaawe avekelaka, atthareli awe yaamwaattamela ni Yesu aahaakoha: “Atthu enhima weera miyo taani?” 19 Omwaakhula yenre: “Yohani Mpatisa; mene atthu akina ohima eneera nyuwo Eliya; ni akina ohima eneera mmoha a maprofeta oroovinyerera.” 20 Vano owo aahaakoha: “Ankha nto nyuwosa muneera miyo taani?” Pedru aahaakhula: “Nyuwo Kristu a Muluku.” 21 Avinyaka, Yesu aahaaleela atthareli awe moowaalipihera weera ehimuleele mutthu weera owo aari Kristu, 22 mene aaweerela: “Mwaana a Mutthu onoohooxiwa itthu sintxipale, okhoottiwa ni asitokweene aayuda, asitokweene aanamakeya ni alipa oolepa, ni owo onimwiiviwa mene onoovinyererihiwa nihiku nanaararu.”

23 Vano, Yesu aaweerela atthu ootheene: “Ole ontthuna okhala mutthareli aka, aikhootte mwaneene awe, akuxe mwiri awe wa nihaaxero ni akitthareke mahiku ootheene. 24 Mene, ole oneerera ovuluxa ekumi awe onooyeleela; mene ole oneera oyeleele ekumi awe mwaha wa miyo toneera avuluxe. 25 Yooreera eheeni, ophwanya elapo yootheene ya vathi eeraka mutthu oyeleele ekumi awe yootheene? Naari wiikumihera maxupo yeera etoloxe ekumi awe? 26 Akhala mutthu yoowo onuulihiwa muru mwaha wa miyo ni mwaha wa masu aka, Mwaana a Mutthu-tho onimuuliwa muru nuuwo aawaaka moovuwani mwawe ni moovuwani mwa Atiithi ni mwa malaika ootteela. 27 Mene kinnooleelani ekhaikhai weera: “Akina ari va khenkela okhwa ehinaaye woona Omwene wa Muluku.”

28 Evinreene mahiku 8 Yesu uulummeene masu ala, aamukuxa Pedru, Yohani ni Yakobe, aawela vamwaako weera avekele. 29 Ni ariki ovekela hiihaale, owiitho wawe waatxentxeya ni ikuwo sawe saakhala sootteela.* 30 Viinaanoru, yaamukhumelela alopwana eeli enapatxera otthekula nuuwo: aari Mose ni Eliya. 31 Asilopwana awo eeli yaakhumelenle ni ovuwa, nto yaapatxera wuuluma moota Yesu aarowaawe ovenya valaponi, yeeyo aahanlaawe vakhaaniini weera akwanihere oYerusalemu. 32 Pedru ni ale aaraaweno yeera ekonaka, nto evinyakaru yaahoona ovuwa wawe ni ovuwa wa asilopwana ale eeli yeemenle nuuwo. 33 Emaara asilopwana ale yaapwahaaya, Pedru aamweerela Yesu: “Muhusiha, ti wooreera weera nikhale wenno, hiyo pooti opaka itenta tthaaru: emoha yawinyu, ya Mose ni ekina ya Eliya.” Mene owo khaasuwela etthu aahimaawe. 34 Mene ariki wuuluma hiihaale, naakhumelela nihutte ni naapatxera waakhuneela. Naakhuneelakaru, awosa yaahoova. 35 Vano, nsu nikhumaka munihutteni naaheera: “Ola Mwanaka, yoowo kimuthanliyaaka. Mmwiiweleleke.” 36 Emaara niiwanyeñyaaya nsu nne, Yesu aahala meekhaawe. Mene awosa yaamaala ni khayaamulenle mutthu mahiku ene yaale etthu awosa yonnaaya.

37 Nihiku naattharelana, ekhuruwakaru vamwaako, muloko mutokotoko waatthu waarowa okumana nuuwo. 38 Vano, mutthu mmoha aari variyari va muloko mutokotoko waatthu aakhuwela eeraka: “Muhusiha, kinnootxonttelani weera munwehe mwanaka, mwaha wooweera owo ori mmoharu. 39 Munepa woonanara mmoha onnanvara, ni mootutuxera owo onnakhuwela omuthukumelihaka ni onnakhuma nipheru mmwaano; nto wamukumihera maxupo mantxipale ni onvoreya, ommuhiyaaya. 40 Kohaavekela atthareli anyu weera yoomole munepa owo woonanara, menento, khewenre woomola.” 41 Yesu omwaakhula enre: “Nyuwo atthu oohikhalano nroromelo ni oowuuma murima, mpaka liini kineeraaka kikhale ni nyuwo, kinkela woovilelani mpaka liini? Mukiwiihere va mwaninyu owo.” 42 Emaara mwaana ole aamwaattamelaawe Yesu, munepa ole woonanara wanvonyera vathi ni waamuthukumeliha vantxipale. Mene Yesu aahuulumela munepa ole woonanara ni aamulamiha mwaana ole, avinyaka anawinnyerera apapawe. 43 Atthu ootheene yaatikhiniheya ni owera otokotoko wa Muluku. Emaara atthu yaatikhiniheyaaya ni itthu sootheene Yesu aapakaawe, owo aaweerela atthareli awe: 44 “Mwiiwelele nnene masu ala ni muupuweleleke: Mwaana a Mutthu onrowa ovahereriwa mmatatani mwa atthu.” 45 Mene awo khayiiwexenxe masu ala aahimaawe. Yaahiipithihiwa weera ehiiwexexe, nave yannoova omukoha yootaphulelaaya.

46 Nto, waakhumelela ovaanyihana woohima sa taani aari mutokweene a yaawo. 47 Yesu asuwelaka etthu yuupuwelaaya vamurimani vaya, aamukuxa mwaana ni aamweemexa vakhiviru vawe 48 ni aaheera: “Ole ommwaakhela mwaana mwa nsina naka, onnakaakhela miyo, ni ale enkaakhela miyo, ennawaakhela-tho Ale ekirumme. Ole ori ooyeva variyari vanyu, tori mutokweene.”

49 Yohani aamweerela Yesu: “Muhusiha, noomoona mutthu oomolaka minepa soonanara mwa nsina nanyu ni hiyo noheerera omukhoottihera, mwaha wooweera owo khanoottharani nyuwo apwiya vamoha ni hiyo.” 50 Vano Yesu aaheera: “Muheerere omukhoottihera, mwaha mooweera ole ohinoovirikanyihani, ori ni nyuwo.”

51 Yaattamelaka* etempu yoorowa wiirimu, Yesu khaahiñye etthu eri poothe emootxeelihaka orowa oYerusalemu. 52 Ni Yesu, aahaarumiha anamitthenka ohoolo wawe, yaapwaha ni yaaphiya muttetthe wa asamariya, weera emurehererele Yesu nipuro noophiyera. 53 Mene asamariya yaakhootta omwaakhela, mwaha wooweera owo aalakenle orowa oYerusalemu. 54 Vano, mutthareli Yakobe ni Yohani yoonakaru eyo, yaaheera: “Apwiya, muntthuna weera nirume okhuruwa mooro wiirimu weera waanyaanye atthu ootheene ala?” 55 Yesu aarukunuwa aaweha ni anaaximwela. 56 Nto, yaarowa muttetthe mukina.

57 Yeeraka weetta hiihaale mmuseweni, mutthu mmoha aaheera: “Miyo kinimoottharani nipuro nri poothe munrowaanyu.” 58 Mene Yesu waakhula enre: “Akhwatte aakhalano muttupha, apalame aakhalano ipuru, mene Mwaana a Mutthu khaano empa.” 59 Vano, Yesu aamweerela mutthu mukina: “Mukhale mutthareli aka.” Owo waakhula enre: “Apwiya, mukaakhulele weera kaavithe toko apapaka.” 60 Mene Yesu omwaakhula enre: “Mwaahiye alipa ookhwa evithanaka yaaworu, mene nyuwo murowe mwalaleye Omwene wa Muluku.”‏ 61 Mene mutthu mukina aamweerela: “Pwiiya, miyo kinimoottharani, mene mukaakhulele weera kaalaxere amusi aka.” 62 Nto Yesu aamwaakhula: “Mutthu oneera avara ehipa, anaweha itthu ohiñyaawe ottuli, khamphwanela Omwene wa Muluku.”