Musomeke ni ophimelela masu a Muluku. Hiihaale ntoko mwiri onkhalaaya woolipa wakhala ni mikakaari soowiixera, hiyo tho pooti okhalano nroromelo noolipa wakhala weera mikakaari sahu ti masu a Muluku. Emaara mwiri onunnuwaaya, mikakaari saya sinniixera sikelaka vathi. Naasomaka ni ophimelela, ninnalipiha nroromelo nahu ni ninnaroromela weera iphiro sa Muluku ti sooreera. (Akol. 2:6, 7) Mphimelele moota miruku sa Yehova, waakosoopa wawe atthu ni moota aaweettihaawe atthu awe, waakhavihenraaya arumeyi akhalayi. Mwa ntakihero, Ezekiyeli aawehexexa moota nlaika nimoha naarinkaaya etemplu. Yoowooniheriwa ela yaamulipiha Ezekiyeli, nave yoowoonihera ela enrowa onikhavihera emaara nnaakiheraahu malamulo a Yehova weera okokhorela wawe okhale woottela. (Ez. 40:1-4; 43:10-12) Hiyo ninnattottela mureerelo vaavo nniivahaahu etempu weera nixuttere ni ophimelela itthu soowiixera siri mBiblyani. — Nsal. 112:7. w23.07 epaax. 18 eparag. 15-16

MBiblyani aakhalamo matakihero ooreera amiravo ekhanlaaya ootthara. Matakihero awo taamiravo yaamusivela Yehova ni yaawenre okwanihera soothanleliwa saya weera ekosoope muloko wa Yehova. Nave nyuwo pooti ophwanya matakihero awo veemusini vanyu naari mmulokoni. (Aheb. 13:7) Nave-tho nookhala ntakihero na Yesu yoowo aari oomalela. (1 Ped. 2:21) Vaavo munsomaanyu moomaaleleya matakihero ala, mphimeleleke mikhalelo sooreera asilopwana ala yoonihenraaya. (Aheb. 12:1, 2) Avinyaka moone moota mukhanlaanyu ootthara matakihero ala. Mutthu orinono miruku onnuupuwelela nnene ahinaaye opaka etthu. Onnatthuneya wiilipihera weera munnuwihere mukhalelo owo. Munookhala mutthu a miruku muxutteraka miruku sa mBiblyani ni woona moota sinrowaaya wookhaviherani. Vaavo munvarihelaanyu miruku sa mBiblyani mwaapakaka soothanla munoorowa omuhakalaliha Yehova. (Nsal. 119:9) Opwaha mwa yeeyo munoorowa okhala mukristu oolipa moomunepani. — Mir. 2:11, 12; Aheb. 5:14. w23.12 epaax. 24-25 eparag. 4-5

Asitiithi pooti waakhavihera anamwane aya waakhula moopixa murima vaavo enkohiwaaya woohima sa ele enroromelaaya. (Yak. 3:13) Asitiithi akina ennaaxuttiha anamwane aya emaara yeeyo empakaaya okokhorela wa veemusini. Awo ennasoma nyaha sikina sinrowa okhumelelaka oxikola, nave tho ennaaxuttiha anamwane aya moota woowaakhula ni woowuuluma moopixa murima ni ottittimiha moonelo wa atthu akina. Waaxuttiha amiravo pooti waakhavihera wiiwanyeeiha nnene wa atthu akina ele enroromelaaya ni okhala oolikaneene weera yoonihere mathowa heeni enweeriha ororomela itthu Biblya onhimaawe. Eliivuru “Os Jovens Perguntam” sookhalano nyaha sinaakhavihera amiravo. Nyaha iyo, epakelinwe amiravo weera saakhavihereke okhala oolipa ni weera saakhavihere waakhula makoho empakeliwaaya ni akhwaaya. Emaara yeeyo imusi sinsomaaya nyaha iya vamoha, ootheene aya pooti oxuttera moota woowaakihera nroromelo naya moopixa murima, waakhula weiwo onrowa oweeriha atthu otthuna oxuttera woohima sa ele enroromelaaya. w23.09 epaax. 17 eparag. 10; epaax. 18 eparag. 15-16