Silempwale ni Matheyo

26 Yesu amalihakaru ohima itthu iya, aaweerela ha atthareli awe: 2 “Nyuwosa moosuwela weera yavira mahiku meeli, onkela opakiwa Mpaasika, ni Mwaana a Mutthu onimwinnyereriwa weera iiviwe vamwirini.”

3 Etempu ene yeele, asitokweene aanamakeya ni asitokweene aayuda yaathukumana vaate va mutokweene aanamakeya yoowo iitthaniwa Kaifa, 4 ni yaampaka palano weera mwa miruku envare Yesu ni omwiiva. 5 Awosa yan­neerelana: “Nihipake eyo etempu ya efeesta weera ohikhale onyakuleleya variyari va atthu.”

6 Yesu areene oBetania, owan­nyawe Simoni namakokho, 7 aahoowa muthiyana mmoha akun­xeene ekarafa* ya makhura oowinkhela ni oorika, anapatxera omuyeehera Yesu vamuru, vaavo aatxaawe. 8 Atthareli yoonakaru etthu ele, yaaxupeya ni yaaheera: “Ennanariheliwani makhura ala? 9 Makhura ala yaamutumihiwa ni musurukhu muntxipale ni musurukhu ene yoowo waavaha alipa oohaawa.” 10 Yesu asuwelakaru eyo, aaweerela: “Mwaha wa heeni mummuxupa anyu muthiyana ola? Ola ookipakela etthu yootepa oreera. 11 Muneereke okhalaka ni atthu oohaawa mahiku ootheene mene ni miyo khamun­rowa okhalaka mahiku ootheene. 12 Vaavo muthiyana ola oyeehen­raawe makhura oowinkhela erutthu aka, opanke eyo arehereraka ovithiwa waka. 13 Kinnooleelani ekhaikhai weera: Mapuro ootheene ineeraaya ilaleiwe mitthenka sooreera itthu sootheene okipaken­laawe muthiyana ola, sineereke wuulummwa uupuweliwaka.”

14 Mmoha aatthareli ale 12, yoowo iitthaniwa Yuda Iskarioti, aarowa wa asitokweene aanamakeya 15 aaweerela: “Koovahererani vale Yesu, munrowa okivaha eheeni?” Yaahiiwanana onvaha musurukhu 30 wa eparatha. 16 Ovinyera mahiku ene yaale, Yuda Iskarioti aapatxera waasaasera moota wonvariha Yesu.

17 Nihiku noopatxera na Efees­ta ya Ipaawu soohikhala Eferamenta, atthareli yaamwaattamela Yesu enamukoha: “Muntthuna weera narehere woowiini yootxa ya Mpaasika?” 18 Owaakhula enre: “Murowe osidade, munomphwanya mulopwana mmoha mmweerele weera: ‘Muhusiha enre: “Yohaattamela etempu aka; kinkela omutxa Mpaasika vamoha ni atthareli aka owannya.”’” 19 Atthareli yaapaka moovarihana ni ele Yesu aalamunlaawe ni yaareherera yootxa ya Mpaasika.

20 Wiilakaru, Yesu ni atthareli awe 12, yaakilaathi ehaamenleene emeesa. 21 Etxaaka hiihaale, Yesu aaweerela: “Kinnooleelani ekhaikhai weera: Mmoha a nyuwo, onookivariha.” 22 Atthareli, yaariipiwa murima vantxipale ni mutthu ti mutthu a yaawo, annamukoha Yesu eeraka: “Apwiya neereke ti miyo?” 23 Owaakhula enre: “Ole onrera vamoha ni miyo mutixelani ti yoowo onkela okivariha. 24 Ekhaikhai weera, Mwaana a Mutthu onoopwaha ntoko hiihaale silempwalaaya woohima sa yoowo, menento ole onanvariha Mwaana a Mutthu! Phataari mutthu owo aahaayarinwe. 25 Yuda yoowo eera anvarihe moohipisa, aamukoha eeraka: “Keereke ti miyo Rabi?” Yesu aamwaakhula: “Ti nyuwo mun­hima.”

26 Nto atxaaka hiihaale, Yesu aakuxa epaawu, avekelakaru aakawanya anaavaha atthareli awe eeraka: “Mukuxe, mukhuureke. Ela enthoonyera erutthu aka.” 27 Nto, aakuxa ekoopho ya eviinyu, aavekela, avinyaka aahaavaha atthareli awe eeraka: “Nwureke ootheene nyuwo, 28 woona weera ela, enthoonyera ephome aka ya nivarihano yeeyo enkela oyeehiwa weera iliviwe soottheka sa atthu antxipale. 29 Kinnooleelani weera: “Nkiwa kiwura soowiima sa mwiri wa ewuuva mpaka nihiku nenno kinkelaaka owura eviinyu enyowani ni nyuwo Moomweneni mwa Atiithi aka.” 30 Yiipakaru itxipo,* yaavinya erowaka omwaako wa Oliveira.

31 Nto Yesu, aaweerela: “Ohiyu ola, ootheene nyuwo munookihiya woona weera, yoolempwa: ‘Kinrowa onvulaliha mukukhuli ni iputtiputthi sinoomwaramwareya.’ 32 Mene, kavinyererihiwa vale, kinoohoola kirowaka oGalileya.” 33 Pedru aamwaakhula eeraka: “Nnaamweera atthu ootheene ala yoohiyakani, miyo nkiwa koohiyani!” 34 Yesu aamwaakhula: “Kin­nooleelani ekhaikhai Pedru weera: Ohiyu ene yoola, muthupi ohinaaye wiipa nyuwo munoorowa okikhootta ikwaha tthaaru.” 35 Pedru aamweerela: “Yakhala etthu, kikhwe ni nyuwo mene wookhoottani, hooye.” Atthareli akina tho yaahima etthu emoharu.

36 Yesu vamoha ni atthareli awe, yaaphiya nipuro nimoha niitthaniwa oJethesemani ni aaweerela atthareli awe: “Mukilaathi va, miyo kinkela vale kavekele.” 37 Aamukunxaawe Pedru ni anamwane eeli a Zebedeyo, aapatxera othanana ni oriipiwa murima. 38 Nto, aaweerela: “Wookiriipa murima vantxipale ohalela okhwa, muhale vaava mukhale oowehaweha vamoha ni miyo.” 39 Eettaka vakhaaniini akelaka ohoolo, aahuuramela vathi, anavekela eeraka: “Tiithi, vawereya, muhiye ekoopho ela eviraka. Mene, yeereye moovarihana ni moota nyuwo muntthuna anyu, khaiyene ntoko miyo kintthunaaka.”

40 Atthikelakaru nipuro yaaraaya atthareli awe, aaphwannye ekonaka ni aamweerela Pedru: “Nyuwosa khamuwenre oweherera vamoha ni miyo nnakhala ewoora emoha mano? 41 Mukhale oowehaweha ni nvirelele ovekela weera muhimorele mooweereriwani. Murima wa mutthu pooti otthuna opaka etthu menento, erutthu ya mutthu, ti yootteettheya.” 42 Ni aavinya anarowa ovekela ekwaha yanaaveeli, eeraka: “Tiithi wakhala weera khonwereya osusiha ekoopho ela kihiwunre, yeereye yootthuna anyu.” 43 Atthikelaka ekwaha yanaaveeli wa atthareli awe, aaphwannye eriki okona mwaha wooweera saahaavola ikhove. 44 Tivanto, aahaahiya tho ekwaha yanaararu arowaka ovekela, ahimaka etthu emoha-moharu. 45 Atthikelaka wa atthareli awe, aaweerela: “Mwa ewoora ntoko ela nyuwosa munimweera okona, mwiitthuuwaka! Nkawehani! yoohaattamela ewoora Mwaana a Mutthu onkelaawe win­nyereriwa mmatatani mwa anamattheka. 46 Nvinye, nrowe ole oneera okivarihe oophiya.” 47 Ariki wuuluma hiihaale, aaphiya Yuda mmoha aatthareli ale 12 vamoha nuuwo muloko mutokotoko wa atthu ekun­xeene ikatana saya ni ikopo. Atthu awo, yaarummwale ni asitokweene aanamakeya ni asitokweene aayuda.

48 Yoole eera anvarihe aahaavaha ethoonyero eeraka: “Yoowo kineeraka kinvahe epeexu ti yoowo; munvare.” 49 Amwaattamelaka Yesu, aaheera: “Salama Rabi!” Avinyaka anvaha epeexu. 50 Mene Yesu, aamukoha Yuda eeraka: “Nthamwene, nwen­le opaka eheeni nno? Nto atthu yaari ni Yuda, yaanvara Yesu enamutthuka. 51 Mmoha aari ni Yesu, moowaakuveya aahulula ekatana aathikila naaru na kaporo anamakeya mutokweene. 52 Yesu, aamweerela: “Mutthikihere ekatana nipuro naya, mwaha wooweera ootheene ale enkela ovarela muteko ekatana enkela okhwa ni ekatana. 53 Munuupuwela weera miyo nkaakela waavekela Apapaka weera erumihe malaika.* 54 Kaavekela vale Atiithi aka eyo, sinkela okwanela moota heeni soolepa sineera: Itthu seereyeke moota ene yoola?” 55 Yesu aaheerela muloko wa atthu waari vale ewoora ene yeele: “Nwiiye okitthuka ntoko namwiiya, ni ekatana ni mikopo? Mahiku ootheene kaakilaathi mutemplu kixuttihaka; menento nyuwo khamwaakivara. 56 Sootheene sinneereya weera ikwanele soolepa sa maprofeta.” Nto atthareli ootheene, yaamuhiya enatthawa.

57 Atthu yanvanre Yesu, yaamuroiha owannyawe mutokweene aanamakeya Kaifa, weiwo yaathukumannaayawo asitokweene aanamakeya ni asitokweene aayuda. 58 Mene Pedru, annamutthara eettaka ottaiwene mpaka ophiya vaate va namakeya mutokweene. Avolowakaru, aakilaathi vamoha ni anamuteko weera oone etthu yaakela weereya.

59 Asitokweene aanamakeya ni esinetriyu yootheene yannawaasaasera anamoona weera emoothere Yesu weera ewere omwiiva. 60 Mene khayamphwannye naari namoona mmoha mano, nnaamweera yaawa anamoona antxipale oowootha. Vahoolo vaya, yaahoowa anamoona eeli 61 awosa, yaaheera: “Mulopwana ola, aaheera: ‘Miyo pooti opwexa etemplu ela ni oteka mpuwa mwa mahiku mararu.’” 62 Nto mwaha wa yeeyo, mutokweene aanamakeya aaheemela anamweerela: “Mookhalano masu oohima? Munhima eheeni woohima sa onamoona wa asilopwana ala eeli?” 63 Nto Yesu, aavirelela omaala. Vano, mutokweene aanamakeya aamweerela: “Kinnoolipeliha mwa nsina na Muluku mukumi weera munleele, nyuwo mwa Kristu Mwaana a Muluku!” 64 Yesu owaakhula enre: “Ti nyuwo munhima. Nto kinooleelani weera, ovinyera viinaano va mpaka muhoolo munoomoona Mwaana a Mutthu akilantheene moono woolopwana wa Muluku oowera awaaka mmahutteni wiirimu.” 65 Mutokweene aanamakeya aapera ikuwo sawe eeraka: “Ola onveeha Muluku, mwaha wa heeni nnaahaawelaahu anamoona? Keera moomwiiwa va anveehaka Muluku. 66 Moonelo anyu toovi? Awosa yaamwaakhula yeeraka: “Owo onnaphwanela wiiviwa.” 67 Yaamusenyera owiitho ni yam­mana. Ni akina yammana owiitho, 68 yeeraka: “Nyuwo Akristu, mwaareene profeta nkahimani taani oomanneni?”

69 Pedru aakilanthi vaate, nto namuteko mmoha muthiyana aamwaattamela anamweerela:” Nyuwo tho mwaari ni Yesu muGalileya!” 70 Mene owo, aakhootta ohoolo wa atthu ootheene eeraka: “Nkisuwenle etthu munhimaanyu.” 71 Emaara owo aakhumen­laawe vamulako wa vaate, mwali mmoha aamusuwenle aaweerela atthu yaari vaavale: “Mulopwana ola aari ni Yesu muNazareti.” 72 Mwa ekwaha yanaaveeli, Pedru aalipela akhoottaka eeraka: “Nkimusuwenle mulopwana ola!” 73 Noovira etempu vakhaaniini, atthu yaari iwe yaamwaattamela Pedru enamweerela: “Moohihovela, nyuwo tho mmoha a mulopwana ole mwaha wooweera nuulumo nanyu ninnoonihera eyo.” 74 Nto Pedru, aapatxera wiisuulumela alipelaka eeraka: “Miyo nkimusuwen­le mulopwana ola!” Ni moohipisa muthupi waahiipa. 75 Ni Pedru aahuupuwela ele Yesu aamulenlaawe eeraka: “Muthupi ohinaaye wiipa nyuwo munoorowa okikhootta ikwaha tthaaru.” Avinyaka vaavo, Pedru aakhumela vaate aninla ariipinweene murima vantxipale.