MITTHENKA SOOREERA SILEMPWALE NI YOHANI

1 Woopatxerani aari Nsu, ni Nsu naari ni Muluku, nave Nsu naari muluku.* 2 Woopatxerani, owo aari ni Muluku. 3 Muluku anvarihela muteko owo weera apattuxe itthu sootheene, khiyaavo etthu epattuxinwe ohikhanle mwa yoowo 4 moorweela mwa yoowo, yookhala ekumi, ni ekumi yaari muthuko waatthu. 5 Muthuko onnaara vapiphini mene epiphi khewinne waara.

6 Aakhumelela mulopwana mmoha aarummwale ni Muluku; ni nsina nawe naari Yohani. 7 Mulopwana owo aawiiye ohelela onamoona, ni yootthuna weera ahelele onamoona muthuko weera atthu amikhalelo sootheene ekhaleno nroromelo moorweela mwa yoowo. 8 Owo khaiyene aari muthuko, mene aawiiye ohelela onamoona wa muthuko owo.

9 Muthuko weekhaikhai waahanle owa mulaponi, weera waamwaleele atthu amukhalelo wootheene. 10 Owo aari mulaponi, ni elapo epattuxinwe moorweela mwa yoowo, mene elapo khemusuwenle. 11 Owo aahaaweela atthu awe, mene awo khayaamwaakhulenle. 12 Menento, ootheene ale yaamwaakhelenle, aahaavaha owera wookhala anamwane a Muluku, mwaha wooweera yannaroromela nsina nawe. 13 Ni anamwane awo kheyarinwe ni atthu, naari ni yootthuna ya atthu, mene eyarinwe ni yootthuna ya Muluku.

14 Vananto, Nsu naakhala mutthu nnakhala vamoha ni hiyo, ni hiyo nohoona ovuwa wa mwaana mmoha ene a Atiithi; owo aasareya mahala ni ekhaikhai. 15 (Yohani aamuhelela onamoona eeraka: “Ola ti yoole kaahimmaaka keeraka: ‘Ole onwa ottuli waka ookipwaha miyo, mwaha wooweera owo aakhala miyo kihinaaye.’”) 16 Mwaha wooweera owo aasareya mahala ni hiyo ninnavirelela waakhela mahala awo. 17 Mwaha wooweera Nlamulo naavahinwe moorweela mwa Mose; mene mahala ni ekhaikhai yaawiiye moorweela mwa Yesu Kristu. 18 Khaavo mutthu otonko omoona Muluku; mene mwaana mmoha ene a Muluku okilanthi moono wa Atiithi, ti yoowo onilenle hiyo.

19 Ola onamoona aahelenlaawe Yohani vaavo ayuda yaarummaaya anamakeya ni alevi, ekhumaka oYerusalemu weera yamukohe ha Yohani: “Nyuwo taani?” 20 Owo khawaamuxumpe waakhulela eeraka: “Miyo khaiyene Kristu.” 21 Nto awosa yaamukoha: “Vanonto nyuwo taani? Mwa Eliya?” Owo aahaakhula eeraka: “ Hooye, nkihiyono.” “Mwa profeta?” Owo aahaakhula: “Hooye!” 22 Vanonto, awo yaamukoha: “Nyuwo taani? Munleele weera hiyo naaleele* ale enrumme. Nyuwo, munhima weera nyuwo taani?” 23 Owo aawaakhula eeraka: “Miyo Nsu na mutthu ninkhuwela onikareni:* ‘Mookolole ephiro ya Yehova’, moovarihana ni ele ohimmaawe profeta Yesaya.” 24 Atthu ale yaarummwale omukoha, yaarummwale ni afarisi. 25 Awosa yaamukoha: “Vanonto mwaha wa heeni mumpatisaanyu muhikhanleene Kristu, naari Eliya, naari Profeta?” 26 Yohani aawaakhula: “Miyo kimpatisa ni maahi. Mene variyari vanyu, ookhala muhimusuwenlaanyu, 27 mene ole onwa ottuli waka, nkiphwanenle otaphula mikoyi sa isantaaliya sawe.” 28 Itthu iya seereya oBetania, ekhopela ekina ya mooloko Yordani, weiwo Yohani aapatisaawe.

29 Nihiku naattharelana, Yohani aamoona Yesu awaaka okumana nuuwo ni aaheera: “Munwehe Mwaaputtiputthi a Muluku, onkumiha yoottheka mulaponi! 30 Ola ti yoole kaahimmaaka keeraka: ‘Ottuli waka onnawa mutthu ookipwaha, mwaha wooweera aakhala miyo kihinaaye.’ 31 Naari miyo muneenaaka nkaamusuwenle, mene waari mwaha ene yoowo kiwiiyaaka waapatisa atthu ni maahi: weera owo asuweliwe wIsraeli.” 32 Yohani-tho aahelela onamoona eeraka: “Kohoona munepa wootteela okhuruwaka wiirimu ntoko epompa* ni omweemelelaka owo. 33 Naari yoomi nkaamusuwenle, mene Ole okiruminhe opatisa ni maahi, ookeerela: ‘Yoowo muneeraanyu mmoone munepa wootteela omukhuruwelaka ni omweemelelaka, ti yoowo ompatisa ni munepa wootteela.’ 34 Ni miyo kohoona eyo ni koohelela onamoona weera ola Mwaana a Muluku.”

35 Nihiku naattharelana, Yohani aari nipuro nene nenne ni atthareli awe eeli, 36 ni amoonaka Yesu eettaka, aaheera: “Nkanweheeni Mwaaputtiputthi a Muluku!” 37 Atthareli eeli ale emwiiwakaru uulumaka masu ala, awosa yaamutthara Yesu. 38 Yesu aarukunuwela ottuli ni awoonakaru weera awo yammutthara, aahaakoha: “Munaasaasa eheeni?” Awo yaamwaakhula: “Rabi (masu ala entaphulela “muhusiha”), mulukamenle* woowiini?” 39 Owo aawaakhula: “Nwe, ni munimoona kilukamenlaakawo.*” Vano, awo yaarowa ni yaahoona nipuro owo aalukamenlaawevo, ni yaakhala vamoha ni yoowo nihiku nene nenne. Yaari ewoora ya 16. 40 Andreya munnawe Simoni Pedru aari mmoha aatthareli ale eeli yiiwale masu a Yohani ni yaamutthanre Yesu. 41 Owo aapatxenre omphwanya toko Simoni munnawe ni aamweerela: “Nomphwanya Mesiya” (ni masu makina entaphulela Kristu), 42 ni aamukuxera wa Yesu. Yesu amoonakaru aamweerela: “Nyuwo Simoni, mwaana a Yohani. Munrowa wiitthaniwaka Kefa” (ni masu makina entaphulela Pedru).

43 Nihiku naattharelana, Yesu aatthuna orowa oGalileya. Vano, owo amphwanya Filipe ni aamweerela: “Mukhale mutthareli aka.” 44 Filipe aari oBetisaida esidade emoha-moharu aakhummaawewo Andreya ni Pedru. 45 Filipe aamphwanya Nataniyeli ni aamweerela: “Nomphwanya Yesu mwaana a Yosefe a oNazareti. Yoowo Mose aalempaawe mu Nlamuloni ni Maprofeta-tho yaalempaaya woohima sa yoowo.” 46 Mene, Nataniyeli aamukoha eeraka: “Neereke pooti okhuma etthu yoowooneya* oNazareti?” Filipe aamwaakhula: “Nkawani ni mmoone.” 47 Yesu aamoona Nataniyeli amwaattamelaka ni aaheera woohima sa yoowo: “Onnawa mwIsraeli eekhaikhai yoowo ohinootha.” 48 Nataniyeli aamukoha: “Mukisuwenle moota heeni?” Yesu aamwaakhula: “Filipe ahinaayeene owiitthanani mukilantheene vathi va mwiri wa efiiku, miyo kaawoonani.” 49 Nataniyeli aamweerela: “Apwiya, nyuwo Rabi, Mwaana a Muluku Mwene ana a Israeli.” 50 Yesu aamwaakhula: “Nyuwo munaakhulela mwaha wooweera kirooweerelani weera koowoonani mureene vathi va mwiri wa efiiku? Munimoona itthu itokweene opwaha iya.” 51 Vano, owo aamweerela: “Kinnooleelani ekhaikhai weera: Nyuwo munimoona erimu ehuleñyeene ni malaika a Muluku ewelaka ni emukhuruwelaka Mwaana a Mutthu.”

2 Nihiku nanaararu, yaapakiwa efeesta ya ekasamentu oKana wa oGalileya, ameyawe Yesu-tho yaari ofeestani iwo. 2 Yesu-tho ni atthareli awe yaawompwa ofeestani iwo wa ekasamentu.

3 Vaavo eviinyu yaahalelaaya omala, ameyawe Yesu yaamweerela: “Eviinyu yohaamalela.” 4 Vano Yesu aawaakhula: “Muthiyana, eheeni enaattamme miyo ni nyuwo vaavo? Ewoora aka nlelo khephiñye.” 5 Ameyawe yaaweerela arumeyi: “Mpakeke etthu owo oneeraawe oorumeeni.” 6 Saakhala vale mino 6 sa maluku seiyo saaheliwa maahi weera atthu yiitteelihekeno moovarihana ni nlamulo na ayuda; yoole ori muno, saavolowa miphimo* miili naari miraru sa maahi. 7 Yesu aaweerela: “Musarihe maahi imino.” Nto awosa yaasariha. 8 Vano, Yesu aaweerela: “Murike vakhaaniini ni mwamwinnye muhooleli a efeesta.” Ni awosa yaapaka eyo. 9 Muhooleli a efeesta alawihakaru maahi yaatatuxinwe eviinyu, ahisuwelaka woowiini yaakhummaayawo eviinyu (nnaamweera arumeyi ale yaarinke maahi yaasuwenle), muhooleli a efeesta aamwiitthana mulipa oothela 10 ni aamweerela: “Atthu ootheene empatxera toko okumiha eviinyu yoosiva, atthu yahapaliwa vale tenkumihaaya eviinyu yoohisiva. Menento nyuwo moovitha eviinyu yoosiva mpakana viinaano va.” 11 Yesu aapanke eyo oKana wa oGalileya apatxeraka miiriira sawe, ni aahoonihera ovuwa wawe, ni atthareli awe yaamuroromela.

12 Avinyakaru vaavo, Yesu, ameyawe, asinnawe ni atthareli awe, yaarowa oKafarnawu, mene khayaakhanle iwo mahiku mantxipale.

13 Vano eera aattamelaka Mpaasika aayuda, ni Yesu aarowa oYerusalemu. 14 Owo aavolowa mutemplu ni aahaaphwanya atthu yaatumiha imompe, iputtiputthi, ipompa,* ni anamatxenxiha musurukhu ekilantheene mmapuroni mwaya. 15 Vano, Yesu aapaka murepettho wa mukoyi anawoomola atthu ootheene mutemplu vamoha ni iputtiputthi, imompe, ni aamwaramwara musurukhu waatthu yaatxentxiha ni aakunttula imeesa saya. 16 Ni aaweerela atthu ale yaatumiha ipompa*: “Mukumihe itthu iya mu! Muhiye okhaliha empa ya Atiithi aka empa yoomweetta nakoso!” 17 Atthareli awe yaahuupuwela ele elempwale: “Osivela waka empa anyu, onrowa okhalaka ntoko mooro onvarela vamurimani vaka.”

18 Nto mwaha wa yeeyo, ayuda yaamukoha: “Ethoonyero heeni muneeraanyu munoonihere weera mookhalano owera woopaka itthu iya?” 19 Yesu aawaakhula: “Mpwexe etemplu ela, ni miyo kinoopaka mpuwa mwa mahiku mararu.” 20 Vanonto, ayuda yaamwaakhula emukohaka yeeraka: “Soovira iyaakha 46, etemplu ela epakiwaka, vano nyuwo muneera munoopaka mpuwa mwa mahiku mararu?” 21 Mene etemplu Yesu aahimaawe, yaari erutthu awe. 22 Yesu avinyererihiwakaru mookhwaani, atthareli awe yaahuupuwela weera owo annahima masu ala, ni awosa yaaroromela ele Yaalempwale ni ele Yesu aahimmaawe.

23 Menento emaara aaraawe oYerusalemu oFeestani ya Mpaasika, atthu antxipale yaamuroromela mwaha wooweha miiriira aapakaawe. 24 Mene Yesu khaaroromela awo moomalela, mwaha wooweera aahaasuwela ootheene 25 ni mwaha wooweera owo khaahaawela nikhavihero na mutthu mukina weera ahelele onamoona woohima sa atthu awo, woona weera owo aasuwela eheeni yaari vamurimani va atthu.

3 Variyari va afarisi, aakhala mulopwana mmoha iitthaniwa Nikodemu, yoowo aari muhooleli aayuda. 2 Owo aarowa okumana ni Yesu ohiyu ni aamweerela: “Rabi,* noosuwela weera nwiiye wa Muluku ntoko muhusiha mwaha wooweera khaavo onwera opaka miiriira ntoko iya apwiya mumpakaanyu Muluku ahikhanle ni yoowo.” 3 Yesu aamwaakhula eeraka: “Kinnooleelani ekhaikhai weera: Mutthu aahiyariwa veeli, khanrowa woona Omwene wa Muluku.” 4 Nikodemu aamukoha eeraka: “Moota heeni mutthu onrowaawe oyariwa uuluvanleene? Neereke mutthu pooti otthikela mmirimani mwa ameyawe weera ayariwe veeli?” 5 Yesu aamwaakhula eeraka: “Kinnooleelani ekhaikhai weera: Mutthu aahiyariwa ni maahi ni munepa wootteela, khonwereya ovolowa Moomweneni wa Muluku. 6 Ole oyarinwe ni mutthu, mwaana a mutthu, ni ole oyarinwe ni munepa wootteela mwaana a Muluku. 7 Muhitikhiniheye mwaha wa miyo oweerelani: Nyuwosa muntthuneya oyariwa veeli. 8 Epheyo ennoopela nipuro nri poothe ni enniiwanyeya oruma waya, mene khensuwanyeya woowiini enkhumaayawo naari enkelaayawo. Ti etthu emoha-moharu eneereya ni ole oñyariwa ni munepa wootteela.”

9 Nto Nikodemu aamukoha: “Itthu iya sinwereya moota heeni?” 10 Vano Yesu aamwaakhula eeraka: “Nyuwo muhusiha a wIsraeli, vano, nnaamweera vareene hiiho, nyuwo khamusuwenle itthu sene seiya? 11 Kinnooleelani ekhaikhai weera: Nnuuluma itthu nisuwenlaahu ni ninhelela onamoona itthu nonnaahu. Mene nyuwosa khamunaakhulela onamoona hiyo ninvahaahu. 12 Va, miyo koolenleni itthu sa elapo ya vathi mene nnaamweera vareene hiiho, khamwaakhulenle. Vanonto munkela waakhulela moota heeni miyo kooleelani itthu sa wiirimu? 13 Opwaha mwa yeeyo, khaavo mutthu otonko* owela wiirimu ohikhanle yoole okhumme wiirimu, Mwaana a Mutthu. 14 Ni ntoko hiihaale Mose aathomeñyaawe enowa onikareni, hiiho-tho, Mwaana a Mutthu onoothomeiwa 15 weera atthu ootheene yaale eneera emuroromele, ekhaleno ekumi yoohimala.

16 Aani, Muluku ootthuna vantxipale elapo ya vathi, mpaka ophiyera onvaha Mwanawe mmoha, weera ootheene ale eneera emuroromele ehinyaanyiwe, nto ekhaleno ekumi yoohimala. 17 Tthiri Muluku khamurumihenle Mwanawe elapo ya vathi weera athorihe elapo, mene omuruminhe weera elapo evuluxiwe moorweela mwa yoowo. 18 Ole onoonihera nroromelo wa yoowo khathorihiwa. Ole ohimmuroromela oothorihiwa mwaha wooweera khoonihenre ororomela nsina na Mwaana mmoha ene a Muluku. 19 Vano, mathipelo a ethorihelo taala: muthuko wohoowa mulaponi, mene atthu esivelinwe ni epiphi ohiya muthuko, mwaha wooweera soopaka saya ti soonanara. 20 Nto ole ompaka itthu soonanara onniitta muthuko, ni khanaattamela muthuko owo, weera soopaka sawe soonanara, sihooniheriwe ni muthuko owo. 21 Mene ole ompaka itthu sooreera,* onnaattamela muthuko, weera soopaka sawe sooreera, sooneyeke weera simpakiwa moovarihana ni yootthuna ya Muluku.”

22 Noomala, Yesu vamoha ni atthareli awe, yaarowa muttetthe wa oYudeya; iwe, owo aaviriha etempu vakhaaniini areene weiwo ni atthareli awe ni annapatisa. 23 Mene Yohani eera-tho aapatisaka atthu wEnoni waattamela oSalimi, mwaha wooweera yaakhalawo maahi mantxipale ni atthu yannarowa ni owo annaapatisa. 24 Etempu ene yeeyo, Yohani eera ahinaaye otthukiwa.*

25 Vano, atthareli a Yohani yaavaanyihana ni ayuda woohima sa otteelihiwa.* 26 Ni awosa yaarowa omuleela Yohani yeeraka: “Rabi, mulopwana ole aari ni nyuwo ekhopela ekina ya mooloko Yordani, yoole mmuhelenlaanyu onamoona, onaapatisa atthu ni atthu ootheene ennarowa wa yoowo.” 27 Yohani waakhula enre: “Kheyaavo etthu mutthu onaakhelaawe ohivahinwe wiirimu. 28 Nyuwosa anamoona wa ele miyo kaahimmaaka weera: ‘Miyo, khaiyene Kristu, mene kirumihinwe ohoolo wawe.’ 29 Muthiyana ottomerinwe, ta mulopwana ottomenre, mene nthamwene a mulopwana ottomenre akhala vakhiviru ni aniiwa wuuluma waya, onnahakalala vantxipale mwaha woowiiwa nsu na mulopwana ottomenre. Tivanto ohakalala waka wookwanela. 30 Mene miteko sawe owo* sintthuneya weera sivireleleke waatxeerereya, mene miteko saka sivireleleke ovukuwa.”

31 Ole onkhuma osulu ohaapwaha atthu ootheene. Ni ole ori a elapo ya vathi ta elapo ya vathi, ni onuuluma itthu sa elapo ya vathi. Ole onkhuma wiirimu, mutokweene waapwaha atthu ootheene. 32 Owo onhelela onamoona itthu onnaawe ni iiwalaawe, mene khaavo onaakhulela onamoona awe. 33 Ole onaakhulela onamoona awe, onnaroromela weera Muluku ta ekhaikhai. 34 Tthiri ole orummwale ni Muluku, onuuluma itthu sa Muluku, mwaha wooweera Muluku khanvaha munepa awe wootteela moophima.* 35 Tiithi onnamusivela Mwaana, tivanto omwinnyerenraawe itthu sootheene mmatatani mwawe. 36 Ole onoonihera nroromelo wa Mwaana, onookhalano ekumi yoohimala; mene ole oneera ahimwiiwelele Mwaana khanrowa okhalano ekumi, mene isara sa Muluku sinoovirelela okhala wa yoowo.

4 Emaara Apwiya yaasuwenlaaya weera afarisi yaahiiwa itthu Yesu aapakaawe ni weera annaapatisa atthu antxipale ompwaha Yohani 2 (nnaamweera yahaapatisiwa ni Yesu, mene yaapatisiwa ni atthareli awe), 3 owo aakhuma oYudeya ni aarowa veeli oGalileya. 4 Mene owo, aatthuneya ovira oSamariya. 5 Nto aaphiya esidade ya oSamariya yeeyo eniitthaniwa Sikari waattamela ematta yeeyo Yakobe anvahaawe mwanawe Yosefe. 6 Mweekhaikhai, tiweiwo yaaraayawo epoosu ya Yakobe. Yesu akhulumunweene mwaha wa ekwaha enttaawe, aakilaathi vapoosu, ni yaari ewoora ya 12.

7 Aahoowa muthiyana mmoha a oSamariya orika maahi. Nto Yesu anvekela eeraka: “Mukivahe maahi oowura.” 8 (Atthareli awe yeera eronweene osidade othuma yootxa.) 9 Vano, muthiyana ole aamweerela: “Moota heeni nyuwo munkivekelaanyu maahi oowura noonaka weera nyuwo muyuuda, ni miyo kireene musamariya? (Mwaha wooweera ayuda ni asamariya, khayiiwanana.) 10 Yesu aamwaakhula eeraka: “Nyuwo mwaasuwenle yoovaha* ya Muluku ni taani onweerelani mukivahe maahi oowura, nyuwo mwaamunvekela ni owo aamoovahani maahi a ekumi.” 11 Muthiyana ole aamukoha eeraka: “Apwiya, epoosu ela, yohiixa ni nyuwo khamwaanoono epalte* weera murikeno maahi. Vanonto munaakumihe woowiini maahi awo a ekumi? 12 Neereke nyuwo mutokweene ompwaha muhavinre ahu Yakobe yoowo onivanhe epoosu ela owunraawe owo, anamwane awe vamoha ni mihuwo sawe? 13 Yesu amwaakhulaka, aaheera: “Ootheene ole onkela owura maahi ala onootthikela ovoliwa ntthona. 14 Ole onkela owura maahi kinkelaaka onvaha, khankela tho ovoliwa ntthona veeli, mene maahi kinrowaaka onvaha enkela okhala mwa yoowo ntoko ephattuwelo ya maahi envaha ekumi yoohimala.” 15 Muthiyana ole aamweerela: “Apwiya, mukivahe maahi awo weera kihivoliwe-tho ntthona ni weera kihitthikele-tho vaava orika maahi.”

16 Yesu aamweerela: “Murowe, mwawiitthane aiyinyu, avinyaka mutthikele wenno.” 17 Muthiyana ole aamwaakhula eeraka: “Nkithelinwe.”* Yesu aamweerela: “Munhima ekhaikhai. ‘Nyuwo khamuthelinwe.’* 18 Moohima ekhaikhai, mwaha wooweera mwaatheliwa ni alopwana sinku, ni mulopwana muraanyuno vano, khaiyene iyanyu.” 19 Muthiyana ole aamweerela: “Apwiya, kinoona weera nyuwo profeta. 20 Makholo ahu yaamukokhorela Muluku va mwaako ola, mene nyuwosa ayuda ohima muneera, atthu entthuneya omukokhorela Muluku oYerusalemu.” 21 Yesu aamweerela: “Mukiroromele miyo, muthiyana: enoophiya ewoora muhinkelaanyu omukokhorela Muluku mwaako ola naari oYerusalemu. 22 Nyuwo munkokhorela etthu muhisuwenlaanyu; menento hiyo ninkokhorela etthu nisuwenlaahu, mwaha wooweera ovuluwa onkhuma waayuda. 23 Nto enoophiya ewoora, ni ewoora eyo yoophiya, vaavo ale emmukokhorela Muluku mooreerela, enrowaaya omukokhorelaka Muluku mweekhaikhai ni munepa. Woona weera Tiithi onnawaasa atthu ene yaala weera emukokhoreleke. 24 Muluku munepa, ni ale emmukokhorela entthuneya weera emukokhoreleke yeettihiwaka ni munepa ni ekhaikhai. 25 Muthiyana ole aamweerela: “Miyo koosuwela weera onnawa Mesiya, yoowo oniitthaniwa Kristu. Menento owo awa onrowa onileela itthu sootheene.” 26 Yesu aamweerela: “Miyo, kinuuluma ni nyuwo ti Mesiya ene yoowo.”*

27 Etempu ene yeele, atthareli awe yaaphiya ni yaatikhiniheya mwaha wooweera yamphwannye uulumaka ni muthiyana. Mene khaavo aamukonhe: “Eheeni muntthunaanyu ni muthiyana ola?” Naari “mwaha wa heeni munuulumaanyu nuula?” 28 Vano muthiyana ole aahiya muno awe wa maahi anarowa osidade ni aaweerela atthu: 29 “Nkawani mmoone mulopwana mmoha okilenle itthu sootheene kipankaaka. Neereke owo khaiyene Kristu?” 30 Awo yaakhuma osidade enarowa okumana nuuwo.

31 Etempu ene yeele, atthareli awe yeera emunyesereraka Yesu yeeraka: “Rabi,* mutxe.” 32 Yesu aaweerela: “Kookhalano etthu yootxa nyuwosa muhisuwenlaanyu.” 33 Vano, atthareli awe yanneerelana yaaworu: “Neereke ookhala onwiihenre yootxa weera atxe?” 34 Yesu aaweerela: “Yootxaaka opaka yootthuna ya ole okirumme ni omaliha muteko awe. 35 Nyuwo khamunhima weera sihanle minyeeri mixexe weera ephiye etempu yoohepha? Mwiiwe ela kinooleelaakani: Nwehe imatta, iyo siri soolikaneene weera iso saya sihemphwe. Vano, 36 mulipa oohepha onnaliviwa ni onnathukumanya soowiima, nto soowiima sene, taale enrowa waakhela ekumi yoohimala, weera mulipa oohepha ni mulipa oowaala ehakalale vamoha. 37 Woohima sa mwaha ene yoola, ekhaikhai ti yooweera: Mmoha mulipa oowaala ni mukina mulipa oohepha. 38 Kohoorumihani weera muhephe ele muhanlaanyu,* akina aavara moowiilipihera ni nyuwo moottottela mureerelo muteko aya owo.”

39 Asamariya antxipale a esidade ele, yaamuroromela Yesu mwaha wa onamoona wa muthiyana yoowo aalenle weera: “Owo ookileela itthu sootheene kipankaaka.” 40 Nto emaara asamariya yaaronwaaya okumana ni Yesu, yanvekela weera akhale naawosa, ni aakhala weiwo mahiku meeli. 41 Vano, atthu antxipale yaamuroromela mwaha wa ele aahimmaawe, 42 ni yaamweerela muthiyana ole: “Vano hiyo khaiyene ninroromela mwaha wa masu anyu paahi, mene noomwiiwa mwaneene ahu ni noosuwela weera owo nvuluxa a elapo.”

43 Evirakaru mahiku meeli ale, owo aakhuma anarowa oGalileya. 44 Yesu mwaneene anneera,* profeta khanttittimihiwa muttetthe awe. 45 Vanonto, aphiyakaru oGalileya, atthu a oGalileya yaamwaakhela nnene mwaha wooweera yaahoona itthu sootheene aapankaawe oYerusalemu ofeestani, woona weera awo tho yaari ofeestani iwo.

46 Vano, Yesu aarowa-tho oKana wa oGalileya, weiwo aatatunxaawewo maahi okhala eviinyu. Muttetthe ene yoowo aakhala namuteko mmoha a mwene yoowo aarino mwanawe mwaamulopwana aavoreiwa oKafarnawu. 47 Mulopwana ole iiwakaru weera Yesu aavinya oYudeya ni aarowa oGalileya, aarowa okumana nuuwo ni anvekela weera arowe vamoha nuuwo amulamihe mwanawe aahanle vakhaniini okhwa. 48 Mene Yesu aamweerela: “Khamuwa mwaakhulela muhonne ethoonyero ni miiriira.” 49 Vano namuteko ole a mwene, aamweerela: “Apwiya, nwe mwanaka ahinaaye okhwa.” 50 Yesu aamweerela: “Murooke; mwaninyu oolama.”* Ni mulopwana ole, aaroromela masu Yesu aamulenlaawe ni aarowa. 51 Eettaka arooka owaani, akaporo awe yaarowa okumana nuuwo weera yamuleele weera mwaninyu oolama.* 52 Nto, owo aahaakoha ewoora heeni mwanawe aalammaawe. Awosa yaahakhula: “Efeepere emuhiñye* osilo ewoora ya 13.” 53 Tiithi ole aahoonelela weera mwanawe aalamme ewoora ene yeele Yesu aamweerenlaawe: “Mwaninyu oolama.”* Nto owo vamoha ni atthu ootheene a vaate vawe yaamuroromela Yesu. 54 Ela yaari ekwaha yanaaveeli Yesu aapankaawe miiriira emaara aakhumaawe oYudeya arowaka oGalileya.

5 Sivirakaru itthu iya, yaakhala efeesta ya ayuda, ni Yesu aarowa oYerusalemu. 2 Vano, oYerusalemu waattamela Vamulako va Iputtiputthi, naakhala ntthiya nenno va eheberi nniitthaniwa Betezata naarino mapithela 5. 3 Nipuro nene nenne, yaakhalavo atthu antxipale yaavoreiwa, oohoona, ootuthunya ni oorakala. 4* —— 5 Nipuro nene nenne aakhalavo mulopwana mmoha aavirinhe iyaakha 38 avoreiwaka. 6 Amoonaka mulopwana ole iisaatalenleene vale, ni asuwelaka weera aaviriha etempu yintxipale avoreiwaka, Yesu aamweerela: “Munnatthuna olama?” 7 Muretta ole waakhula enre: “Apwiya, nkaanono mutthu ookikhavihera weera kivolowe muntthiyani maahi yaatekumaka; mene etempu kineereraaka ovolowamo, mukina onnawa ovolowamo miyo kihinaaye.” 8 Yesu aamweerela: “Nvinye! Mukuxe mwinli anyu ni mweetteke.” 9 Ni moowaakuveya mulopwana ole aalama. Aakuxa mwinli awe ni aapatxera weetta.

Nihiku nne, naari nihiku na esaabadu. 10 Nto mwaha wa yeeyo, ayuda yaapatxera omweerela mulopwana ole aalamihinwe: “Olelo esaabadu; khonaakhuleliwa nyuwo oteexa mwinli anyu.” 11 Mene owo aawaakhula: “Mulopwana okilaminhe okeerenle ha: ‘Mukuxe mwinli anyu ni mweetteke.’” 12 Nto awo yaamukoha: “Mulopwana heeni oweerenleni: ‘Mukuxe mwinli anyu ni mweetteke’?” 13 Menento, mulopwana ole aalamihinwe khaamusuwenle taani aamulaminhe, mwaha wooweera Yesu aalakaseya variyari va muloko mutokotoko waatthu waari vale.

14 Avinyaka vaavo, Yesu amphwanya mutemplu ni aamweerela: “Nkoonani, moolama. Muhittheke-tho veeli weera ehiweereeleni etthu opwaha yeele yaaweerenleni.” 15 Nto mulopwana ole aapwaha ni aaweerela ayuda weera aari Yesu aamulaminhe. 16 Tivawonto, ayuda yaamuttharattharaaya Yesu mwaha wooweera aapaka itthu iya nihiku na esaabadu. 17 Mene Yesu aawaakhula: “Atiithi aka envara muteko mpaka vano, ni miyo tho kinvara muteko.” 18 Nto mwaha wa yeeyo, ayuda yannatthuna vantxipale omwiiva, khaiyene paahi mwaha wootupha nlamulo na esaabadu, mene mwaha wooweera annamwiitthana Muluku okhala Apapawe, ni anniilikanxa ni Muluku.

19 Nto mwaha wa yeeyo, Yesu aaweerela: “Kinnooleelani ekhaikhai weera: Mwaana khanwera opaka etthu meekhaawe ahiwoonelaka toko apapawe etthu empakaaya, mwaha wooweera itthu soothesene Apapawe empakaaya, mwaana onnapaka-tho etthu emoha-moharu. 20 Mweekhaikhai, Tiithi onnamusivela Mwaana, ni onnamoonihera itthu soothesene Owo ompakaawe, ni onoomoonihera itthu itokweene opwaha iya, weera nyuwo mukhale ootikhiniheya. 21 Hiihaale ntoko Atiithi enaavinyererihaaya alipa ookhwa, Mwaana-tho onnaavinyereriha ale onaatthunaawe. 22 Nto Tiithi khammuthoriha mutthu, menento omuroromenle Mwanawe weera avare muteko woothoriha, 23 weera atthu ootheene emuttittimiheke Mwaana, ntoko hiihaale enaattittimihaaya Atiithi. Ole ohimmuttittimiha Mwaana, khanaattittimiha Atiithi yaawo emurumme. 24 Kinnooleelani ekhaikhai weera: Ootheene ole oniiwa masu aka ni anamuroromela ole okirumme, onoophwanya ekumi yoohimala, ni owo khankela othorihiwa, mene owo oovira mookhwaani anaphwanya ekumi yoohimala.

25 “Kinnooleelani ekhaikhai weera: Enoophiya ewoora, ni vano yoophiya, vaavo alipa ookhwa eneeraaya yiiwe nsu na Mwaana a Muluku, ni ale enrowa wiiwa enookhala akumi. 26 Mweekhaikhai, Tiithi ookhalano owera* woovaha ekumi ni onvaha owera iwo-tho woovaha ekumi Mwanawe. 27 Ni onvaha owera woothoriha, mwaha wooweera owo Mwaana a Mutthu. 28 Muhitikhiniheye ni etthu ela, woona weera enoophiya ewoora atthu ootheene eri mmahiye* enrowaaya wiiwa nsu nawe 29 ni eneekhume: ale epanke itthu sooreera, erowaka woovinyererihiwani wa ekumi, vaaheera ale epanke itthu soonanara, erowaka woovinyererihiwani wa othorihiwa. 30 Miyo nkinwera opaka naari etthu emoha mano muneenaakaru. Kinthoriha paahi ntoko kiiwalaaka, ni ethorihelo aka, ti yeekhaikhai,* mwaha wooweera nkinaasaasa opaka yootthunaaka, mene opaka yootthuna ya ole okirumme.

31 “Wakhala weera miyo kinimwiikhalela onamoona meekhaaka, onamoona aka owo khaiyene ti weekhaikhai. 32 Ookhala mutthu mukina onkikhalela onamoona, ni miyo koosuwela weera onamoona owo onkikhalelaawe, ti weekhaikhai. 33 Nyuwo mwaahaarumiha atthu wa Yohani, ni owo aahelela onamoona weekhaikhai. 34 Menento, nkinaakhulela onamoona wa mutthu, mene kinooleelani itthu iya weera nvuluxiwe. 35 Mulopwana owo, aari muthuko waavarela ni waara, nyuwo mwaahakalala mwa etempu vakhaaniini ni waara wawe. 36 Mene miyo kookhalano namoona mmoha mutokweene ompwaha Yohani, mwaha wooweera miteko Atiithi ekithanlenlaaya opaka, ni miteko kimpakaaka, sinnahelela onamoona weera Atiithi ekirumme. 37 Ni Atiithi ekiruminhe, ennahelela onamoona wa miyo. Nyuwosa khamwintale wiiwa nsu naya, naari khamutonko owoona moota eraaya, 38 ni masu awe khenkhala mwa nyuwosa, mwaha wooweera khammuroromenle ole awo emuruminhaaya.

39 “Nyuwosa munnatholathola Soolempwa muupuwelaka weera munoophwanya ekumi yoohimala moorweela mwa soolempwa iyo, mene soolempwa sene seiyo sinnakihelela onamoona miyo. 40 Menento nyuwo, khamuntthuna owa wa miyo weera mukhaleno ekumi yoohimala. 41 Nkinaakhulela ovuwa waatthu 42 ni miyo koosuwela weera khamwaanoono nsivelo na Muluku vamurimani vanyu. 43 Miyo kiwiiye mwa nsina na Atiithi aka, mene nyuwosa khamukaakhelenle. Waari weera mukina owiiye mwa nsina nawe, nyuwosa mwammwaakhelela. 44 Vanonto munkela ororomela moota heeni, noonaka weera munaasaasa ovuwa wa mukina ni mukhwaawe, ni khamunaasaasa ovuwa onkhuma wa Muluku mmoharu? 45 Muhuupuwele weera kinimoohimani ohoolo wa Atiithi; menento ookhala mutthu onoohimani moorweela mwa soolepa sawe: Mose, yoowo munamuroromelaanyu. 46 Mweekhaikhai, waakhanle weera munnamuroromela Mose, mwaamukiroromela miyo-tho, mwaha wooweera owo oolepa woohima sa miyo. 47 Vano, mwaahiroromelaka soolepa sawe, munkela ororomela moota heeni ele kinhimaaka?”

6 Noomala itthu iya, Yesu aarowa* ekhopela ekina ya ephareya ya oGalileya, naari ya oTiberiyade. 2 Ni muloko mutokotoko waatthu wannamutthara, mwaha wooweera wannoona miiriira owo aapakaawe, aalamihaka aretta. 3 Vano, Yesu aawela vamwaako ni aakilaathi vaavo vamoha ni atthareli awe. 4 Annaattamela Mpaasika, efeesta ya ayuda. 5 Emaara Yesu aawelinhaawe maitho, aahoona muloko mutokotoko waatthu omwaattamelaka, ni aamukoha Filipe: “Ninkela othuma woowiini yootxa weera atthu ala etxe?” 6 Menento Yesu aamukoha hiiha, weera amweerere, mwaha wooweera aasuwela etthu aakelaawe opaka. 7 Filipe aamwaakhula: “Ipaawu sa itenaariyu 200, khasinkwana etthu, naari otxa vakhaaniini mutthu ti mutthu aatthu ala.” 8 Mmoha aatthareli awe, Andreya, yoowo aari munnawe Simoni Pedru, aamweerela: 9 “Ookhala mmiravo mmoha va orinono ipaawu 5 sa esevada ni ihopa piili. Vano, iyo sinkela okwana eheeni ni muloko ola mutokotoko waatthu?”

10 Yesu aaheera: “Nweerele atthu ekilaathi.” Nipuro nne, yaakhalavo malaxi; atthu awo yaakilaathi, ni muloko ole waatthu yaakhalavo alopwana ooweeraka 5.000. 11 Yesu aakuxa ipaawu, ni avekelakaru aahaakawela atthu ale yaakilanthi vale; ni aapaka etthu emoha-moharu ni ihopa, nto atthu, yaahootxa mpaka yaatthunaaya. 12 Nto, etxaakaru mpaka ovona, Yesu aaweerela atthareli awe: “Muttottele inyenyeeri sootheene sihanle weera sihinanare.” 13 Vanonto, yaattottela ni yaasariha mittanka 12 sa inyenyeeri sa ipaawu saahiiwale ni atthu ale yaatxa.

14 Atthu yoonakaru mwiiriira ole owo aapankaawe, yaapatxera weera: “Mweekhaikhai, ola Profeta yoole eera awe mulaponi.” 15 Vano, Yesu asuwelakaru weera atthu yaawa weera envare omwene, aakhuma nipuro nne anarowa omwaako meekhaawe.

16 Wiilakaru, atthareli awe yaarowa ophareya, 17 yanwela paarku enapatxera olapuwa ephareya erowaka oKafarnawu. Yeera epatxenreene epiphi, ni Yesu eera ahinaaye orowa okumana naawo. 18 Ni ephareya yaapatxera okhalano muteku-teku, mwaha wooweera yannoopa epheyo etokotoko.* 19 Menento yeettakaru ikilometru* 5 naari 6, yaamoona Yesu amwaattamelaka paarku eettaka vasulu va maahi, ni awo yaahoova. 20 Vano, owo aaweerela: “Muhoove; ti miyo!” 21 Ni awo yannatthuna omwaakhela mpaarkuni, mene paarku aaphiya okhopela nipuro aakelaawewo moowaakuveya.

22 Nihiku naattharelana, muloko waatthu waahanle ekhopela ekina ya ephareya waahoonelela weera ekhopela ele khaariwo paarku. Mene aahanle paarku mmoha mukhaanini, nto Yesu khanwenle paarku vamoha ni atthareli awe, mwaha wooweera atthareli awe yaapwahasa meekhaaya. 23 Vano, apaarku yaakhuma oTiberiyade, yaaphiya nipuro nne atthu yaatxiiyaayavo ipaawu, noomala Apwiya ovekela. 24 Emaara muloko mutokotoko wa atthu wonnaaya weera Yesu vamoha ni atthareli awe khayaakhanle nipuro nne, yaahaawela apaarku aya enarowa oKafarnawu, emwaasaka Yesu.

25 Emphwanyakaru Yesu ekhopela ekina ya ephareya, yaamukoha: “Rabi,* mphiñye liini nno?” 26 Yesu aawaakhula eeraka: “Kinnooleelani ekhaikhai weera: Nyuwosa khaiyene munkaasa mwaha wa miiriira monnaanyu, mene mwaha wooweera murootxa ipaawu ni munavona. 27 Muhivareke muteko mwaha wa yootxa enuntta, mene mwaha wa yootxa enkhala ni envaha ekumi yoohimala, yeeyo Mwaana a Mutthu onkelaawe woovahani; mweekhaikhai mwaneene Muluku, Tiithi, oomuhela ethoonyero enoonihera weera onnamwaakhulela.”

28 Nto, yaamukoha: “Nintthuneya weera nipakeke eheeni weera nivareke miteko sa Muluku?” 29 Yesu aaweerela: “Muteko mukhanlaanyu onvarela Muluku tuula: mmuroromeleke ole omuruminhaawe.” 30 Nto yaamweerela: “Ethoonyero heeni munkelaanyu opaka weera hiyo noone ni weera noororomeleni nyuwo? Muteko heeni munkelaanyu opaka? 31 Amuhavinraahu yaahootxa mana onikareni ntoko hiihaale elempwalaaya weera: ‘Owo aahaavaha epaawu yaakhuma wiirimu weera ekhuure.’” 32 Vano, Yesu aaweerela: “Kinnooleelani ekhaikhai weera: Mose khoovanheni epaawu enkhuma wiirimu, mene Atiithi aka yoovanheni* epaawu ya ekhaikhai enkhuma wiirimu. 33 Nto epaawu Muluku onivanhaawe, ti yoole okhurunwe* wiirimu ni onaavaha ekumi atthu.” 34 Vanonto awo, yaamuleela: “Apwiya, munivaheke etempu yootheene* epaawu eyo.”

35 Yesu aaweerela: “Miyo epaawu ya ekumi. Ole onwa wa miyo khavoliwa-tho etala, ni ole onkiroromela miyo, khavoliwa-tho ntthona. 36 Ntoko miyo koolenlaakani, nyuwo mookoona, mene nnaamweera vareene hiiho khamukiroromenle. 37 Ootheene ale Atiithi enkivahaaya enaawe wa miyo, ni miyo nkiwa kaathanya* ale anwa wa miyo, 38 miyo nkikhurunwe* wiirimu weera kipakeke yootthuna aka, mene weera kipakeke yootthuna ya ole okirumme. 39 Yootthuna ya ole okirumme tiila: weera miyo kihimuyeleele naari mmoha aatthu ootheene ale okivanhaawe, mene kaavinyererihe nihiku noomalihera. 40 Yootthuna ya Atiithi aka tiila: ole ommwaakhulela Mwaana ni ommuroromela yoowo, akhaleno ekumi yoohimala ni miyo kinonvinyereriha nihiku noomalihera.”

41 Vano, ayuda yaapatxera omuuluma owo mwaha wooweera aaheera: “Miyo epaawu ekhurunwe* wiirimu.” 42 Ni yaapatxera weera: “Ola khaiyene Yesu, mwaana a Yosefe? Khanaasuwenle apapawe ni ameyawe? Vanonto moota heeni oneeraawe: ‘Miyo, kikhumme wiirimu’?” 43 Yesu owaakhula enre: “Muhiye waapa nyeenyurusa. 44 Khaavo onwera owa wa miyo Atiithi yaawo ekirumme ehimwiitthanne, ni miyo kinrowa onvinyereriha nihiku noomalihera. 45 Elempwale ni Maprofeta tiila: ‘Ootheene awo, enooxuttihiwa ni Yehova.’ Ni ootheene ole onwiiwa Atiithi ni anaxuttera onnawa wa miyo. 46 Kaavo mutthu otonko omoona Tiithi, otonko omoona paahi ti yoole okhumme wa Muluku. Yoowo paahi tomonne Tiithi. 47 Kinnooleelani ekhaikhai weera: Ole onroromela, onoophwanya ekumi yoohimala.

48 “Miyo epaawu ya ekumi. 49 Amuhavinre anyu yaahootxa mana onikareni, mene yaahookhwa. 50 Ela epaawu enkhuma wiirimu, weera ootheene ole oneera akhuure, ahikhwe. 51 Miyo ka epaawu ekumi ekhumme wiirimu. Ni wakhala weera mutthu onookhuura epaawu ela, onookhala mukumi wa mahiku ootheene; mweekhaikhai epaawu kinvahaaka erutthu aka, weera atthu mulaponi ekhaleno ekumi.”

52 Vano, ayuda yaapatxera onyakulihana yaaworu yeeraka: “Moota heeni mulopwana ola oneeraawe anivahe erutthu awe weera nikhuure?” 53 Nto Yesu aaweerela: “Kinnooleelani ekhaikhai: Mwaahikhuuraru erutthu ya Mwaana a Mutthu, ni mwaahiwuraru ephome awe, khamunkela ophwanya ekumi. 54 Ole onkhuura erutthu aka ni onwura ephome aka, onookhalano ekumi yoohimala, ni miyo kinoorowa onvinyereriha nihiku noomalihera, 55 mwaha wooweera erutthu aka yootxa ya ekhaikhai, ni ephome aka yoowura ya ekhaikhai. 56 Ole onkhuura erutthu aka ni onwura ephome aka, onookhala oowiiraana ni miyo, ni miyo kinookhala oowiiraana nuuwo. 57 Ntoko hiihaale Atiithi akumi ekirummaaya, miyo-tho kinnakhala mukumi mwaha wa Atiithi, ni ole onkhura erutthu aka anaakhale ni ekumi mwaha wa miyo. 58 Ela epaawu ekhumme wiirimu. Ela khenlikana ni epaawu yeele yaakhunraaya makholo anyu, mene nnaamweera vareene hiiho, ahookhwa. Ole onkhuura epaawu ela onookhalano ekumi wa mahiku ootheene.” 59 Owo aahima itthu iya emaara aaxuttihaawe musinakooka* oKafarnawu.

60 Emaara atthareli awe yiiwalaaya masu ala, yaaheera: “Masu ala tooxupa wiiwexexa. Taani anaawere wiiwa?” 61 Mene, Yesu asuwelaka weera atthareli awe yannanyakulihana woohima sa masu ale, Yesu aaheera: “Masu aka, erimookwattulani? 62 Vanonto, eheeni yaakela weereya waakhanle weera moomoona Mwaana a Mutthu awelaka nipuro aaraawe? 63 Munepa wootteela tonvaha ekumi; nto erutthu khiyaano muteko. Masu koolenlaakani enkhuma wa munepa wootteela ni ennavaha ekumi. 64 Mene aakhala a nyuwo ehinaakhulela.” Woona weera Yesu aasuwela woopatxeraniru weera aakhala yeera ehiroromele, ni taani eera anvarihe. 65 Ni Yesu aahaatxeerera eeraka: “Tivanto kinooleelaakani weera: Khaavo onwera owa wa miyo ahaakhulelinwe ni Atiithi aka.”

66 Nto mwaha wa yeeyo, atthareli awe antxipale yaapwaha enarowa ovara itthu* yaahiñyaaya ottuli, ni awo khayeetta ni yoowo. 67 Menento, Yesu aaweerela-tho arummwa awe 12: “Neereke nyuwo-tho muntthuna opwaha?” 68 Simoni Pedru aamwaakhula: “Apwiya, ninkela omutthara taani? Nyuwo mookhalano masu a ekumi yoohimala. 69 Hiyo ninnaroromela ni noosuwela weera nyuwo ootteela a Muluku.” 70 Yesu aawaakhula: “Keera ti miyo koothanliyeni nyuwosa 12? Menento, mmoha a nyuwo namoothera.”* 71 Mweekhaikhai, owo aamuhima Yuda, mwaana a Simoni Iskarioti, mwaha wooweera mulopwana owo amunvariha, nnaamweera aari mmoha aarummwa 12.

7 Avinyaka vaavo, Yesu aavirelela weetta mukwaha awe arowaka oGalileya mwaha wooweera khaatthuna ovira oYudeya, woona weera ayuda yaatthuna omwiiva. 2 Nto, yeera yaattamelaka efeesta ya itenta* ya ayuda, 3 ni asinnawe yaamweerela: “Mukhume va ni murowe oYudeya, weera atthareli anyu yoone miteko mumpakaanyu. 4 Tthiri khaavo ompaka itthu wiiphiini atthunaka osuweliwa. Vanonto, mwaapakaka itthu iya, mwiisoonihereke tthiri waatthuni.” 5 Mweekhaikhai, asinnawe khayaamuroromela. 6 Vanonto, Yesu aaweerelasa: “Ewoora aka khenaaye ophiya, mene wa nyuwo ewoora yootheene ti yooreerela. 7 Mene atthu khiyaano mathowa eneera eweerihe woothanyani, mene miyo ennakithanya, mwaha wooweera kinnahelela onamoona weera miteko saya ti soonanara. 8 Murooke ofeestani iwo; miyo nkinrowawo iwo mwaha wooweera nlelo etempu aka khenaaye okwanela.” 9 Mene, amalihakaru waaleela itthu iya, owo aavirelela okhala oGalileya.

10 Mene, asinnawe epwahakaru ofeestani, owo-tho aarowa moowiipithiheya, woohooniwa. 11 Nto mwaha wa yeeyo, ayuda yaapatxera omwaasaasa ofeestani yeeraka: “Ori woowiini mulopwana ole?” 12 Ni variyari va muloko, antxipale yannaapa mwaha wa yoowo. Akina yeera: “Owo mulopwana ooreera murima. Akina yeera: Hooye. Owo onnaawoka atthu.” 13 Menento, khaavo uuluma woohima sa Yesu variyari wa atthu, mwaha woowoova ayuda.

14 Vaavo efeesta yeettelaaya variyari, Yesu aarowa otemplu anapatxera oxuttiha. 15 Ayuda yaatikhiniheya vantxipale, ni yanneera: “Moota heeni mulopwana ola osuwenlaawe vantxipale Soolepa, ahintale orowa oskola?”* 16 Vano, Yesu aawaakhula: “Itthu miyo kinxuttihaaka khasinweela wa miyo, mene wa ale ekirumme. 17 Mutthu atthuna opaka yootthuna ya Muluku, onoosuwela waari weera itthu kinxuttihaaka sinweela wa Muluku naari wa miyo. 18 Ole onuuluma miruku sawe onaasaasa ovuwa wawe; ole onaasaasa ovuwa wa ale emuruminhe teekhaikhai ni khawaavoovo ohixariya wa yoowo. 19 Menento, Mose aahoovahani Nlamulo, mene khaavo a nyuwo oniiwelela Nlamulo. Vanonto, mwaha wa heeni muntthunaanyu okiiva?” 20 Nto muloko waatthu waamwaakhula: “Nyuwo mookhalano munepa woonanara. Taani ontthuna owiivani va?” 21 Nto Yesu aawaakhula: “Miyo kipanke mwiiriira mmoha paahi, nto ootheene nyuwo muri ootikhiniheya. 22 Mose ohoovahani nlamulo noowiinela, (mene khaiyene weera nlamulo nno naapatxenre wa Mose, mene wa amuhavinre anyu), nyuwo munnawiinela anamwane anyu asilopwana nihiku na esaabadu. 23 Wakhala weera mwaana mwaamulopwana onniineliwa nihiku na esaabadu weera nihitumphwe Nlamulo na Mose, mwaha wa heeninto nyuwo munyoonyinwaanyu ni miyo mwaha woomulamiha mutthu moomalela nihiku na esaabadu? 24 Muhiye othoriha nwehaka paahi mikhalelo soowooneya, mene muthoriheke mwa exariya.”

25 Nto, atthu akina yaakhala oYerusalemu, yaapatxera ohima yeeraka: “Ola khaiyene mulopwana yoole ontthuna wiiviwa? 26 Vanonto, mulopwana ene ori vaava uulumaka ohoolo wa atthu ootheene ni khemmweerela etthu. Neereke nto ahooleli ahu enroromela weera owo Kristu? 27 Mene hiyo noosuwela woowiini okhummaawewo mulopwana ola; nto awa vale Kristu, khaavo oneera asuwele woowiini onkhumaawewo.” 28 Emaara aaxuttihaawe mutemplu, Yesu aahima ha ni masu oowiiwanyeya: “Nyuwosa mookisuwela, ni moosuwela woowiini kinkhumaakawo. Miyo nkiwiiye kihirummwale, mene Ole okirumme teekhaikhai ni nyuwo khammusuwenle. 29 Miyo koomusuwela, mwaha wooweera kithanlinwe ni yoowo, ni ti yoowo okiruminhe.” 30 Tivawonto, yaaheerera onvara, mene khaavo aawenre mwaha wooweera ewoora awe yeera ehaakunve ophiya. 31 Mwa yeeyo, atthu antxipale yaapatxera omuroromela yoowo, ni yanneera: “Neereke Kristu awa vale, onoopaka miiriira sintxipale opwaha miiriira ompakaawe mulopwana ola?”

32 Afarisi yaahiiwa muloko mutokotoko waatthu wuulumaka itthu iya vathi-vathi woohima sa yoowo, ni asitokweene aanamakeya ni afarisi, yaahaarumiha makwaarta* weera yanvare.* 33 Vano, Yesu aaweerela: “Kinookhala ni nyuwo etempu vakhaaniini, kihinaaye orowa wa Ole okiruminhe. 34 Nyuwosa muni mukaase, mene khamunkela okiphwanya, ni, nipuro kinkelaakawo, nyuwo khamunkelawo.” 35 Nto ayuda yanneerelana yaaworu: “Mulopwana ola ontthuna okela woowiini, weiwo nneeraahu nihimphwanye? Neereke ontthuna orowa wa ayuda ethaamenle elapo ya akereku, ni waaxuttiha akereku? 36 Owo ontthuna ohima eheeni ni masu eneera: ‘Mene khamunkela okiphwanya, ni, nipuro kinkelaakawo nyuwo khamunkelawo’?”

37 Nihiku noomalihera noottittimiheyaxa na efeesta, Yesu aaheemela ni aahuuluma ni nsu noowiiwanyeya eeraka: “Mutthu avoliwa ntthona, awe wa miyo ni awure. 38 Ntoko hiihaale enhimaaya Yoolepa, ole onkiroromela miyo ‘vamurimani vawe enookhuma maahi envaha ekumi’.” 39 Nto ni masu ala, Yesu aahima munepa wootteela, yeeraaya yaakhele atthu ale yeera emuroromele. Woona weera, yaari ehinaayeene waakhela munepa owo, mwaha wooweera eera ahinaayeene ovuwihiwa. 40 Atthu akina yaari variyari wa muloko waatthu wiiwale masu ala, yaapatxera weera: “Mweekhaikhai, ola Profeta.” 41 Akina yeera: “Ola Kristu.” Mene akina yeera: “Neereke Kristu, anaakhume oGalileya?” 42 Soolepa sinhima weera Kristu anaakhume nloko na Davidi ni oBetelehemu, muttetthe yoowo Davidi aakhalaawewo. 43 Nto mwaha wa yeeyo, waakhumelela okawanyeya variyari wa muloko mwaha wa Yesu. 44 Akina a yaawo, yaatthuna onvara Yesu, mene khaavo aawenre onvara.*

45 Mwa yeeyo, makhwaarta yaatthikela wa asitokweene aanamakeya ni wa afarisi, awosa yaahaakoha: “Heeni muhinwiihalaanyu Yesu?” 46 Mene makwaarta ale yaahaakhula yeeraka: “Khaavo mulopwana otonko wuuluma ntoko owo!” 47 Vano, afarisi yaahaakoha: “Neereke nyuwosa-tho muroowokiwa? 48 Neereke ookhala mmoha a muhooleli ahu, naari mmoha aafarisi ommuroromela owo? 49 Mene muloko ola waatthu woohisuwela Nlamulo, atthu oowuulumeliwa.”* 50 Vano Nikodemu yoowo khalayi aaronwe okumana ni Yesu, aari mmoha a yaawo, aaweerela: 51 “Neereke Nlamulo nahu ninnamuthoriha mutthu nihinaaye toko wiiwa ni osuwela etthu ompakaawe?” 52 Yaamwaakhula yeeraka: “Neereke nyuwo-tho tooGalileya? Muthola-thole ni munimoona weera khaavo profeta aneera akhume oGalileya.”*

8  12 Vano, Yesu aatthikela-tho wuuluma ni atthu ni aaheera: “Miyo waara wa elapo. Ole onkitthara miyo khankela weetta mweepiphini, mene onookhalano waara wa ekumi.” 13 Vanonto, afarisi yaamweerela: “Nyuwo muniikhalela onamoona mwaneene anyu, tivawonto onamoona anyu khaiyene ti weekhaikhai.” 14 Yesu aawaakhula: “Nnaamweera miyo kiikhalelaka onamoona mwaneene aka, onamoona aka ti weekhaikhai, mwaha wooweera miyo koosuwela woowiini kikhummaaka ni koosuwela woowiini kinkelaakawo, mene nyuwo khamusuwenle woowiini kikhummaakawo naari kinkelaakawo. 15 Nyuwo munnathoriha moovarihana ni moonelo wa atthu, miyo nkimuthoriha mutthu. 16 Mene, nnaamweera miyo kaathoriha,* othoriha waka waakela okhala weekhaikhai mwaha wooweera nkikhanle meekhaaka, Atiithi ekirumme ari ni miyo. 17 Nave-tho, mu Nlamuloni mwanyu woolempwa weera: ‘Onamoona waatthu eeli ti weekhaikhai.’ 18 Miyo kinniihelela onamoona mwaneene aka, nave-tho onamoona okina, enkihelela ti Atiithi aka ekiruminhe.” 19 Vano, awosa yaamukoha: “Vanonto, Atiithi anyu awo ari woowiini?” Yesu aawaakhula: “Nyuwosa khamukisuwenle miyo naari Atiithi aka. Mwaakisuwenle, mwaamwaasuwela-tho Atiithi aka.” 20 Owo aahima masu ala axuttihaka mutemplu, waattamela nipuro saaraayavo ikoofiri waaheliwaayamo musurukhu. Mene khaavo anvanre woona weera ewoora awe yeera ehinaaye ophiya.

21 Yesu aaweerela-tho: “Miyo kinoorowa ni nyuwosa munoorowa okaasaasa, mene munookhwa nlelo mureeneno soottheka sanyu. Nipuro kinrowaaka, nyuwosa khamunwera orowa.” 22 Nto ayuda yaapatxera weera: “Neereke owo onrowa wiisiiva? Mwaha wa heeni oneeraawe: ‘Nipuro kinrowaaka nyuwosa khamunwera orowa.’” 23 Ni owo-tho aahima: “Nyuwosa ta elapo ela ya vathi; mene miyo toosulu. Nyuwo elapo anyu ti yeela ya vathi vaava; mene miyo khaiyene a elapo yeela. 24 Tivanto koolenlaakani weera: Nyuwo munookhwa nlelo mureeneno soottheka sanyu. Nto wakhala weera khamunkiroromela weera ti yoomi, munookhwa nlelo ni soottheka sanyu.” 25 Vanonto awo yaamukoha: “Nyuwo taani?” Yesu aawaakhula aweerelaka: “Mwaha wa heeni kinuulumaaka nlelo niinyeenyu? 26 Kookhalano itthu sintxipale woohima sa nyuwo ni woothorihani. Ole okirumme teekhaikhai, ni ele kiiwalaaka wa yoowo kinnaaleela atthu a elapo ela ya vathi.” 27 Mene awosa khayiiwexenxe weera uuluma sa Tiithi. 28 Vano Yesu aaweerela: “Akhomeliwa vale Mwaana a Mutthu vamwirini, nyuwo munoosuwela weera ti yoowo aalaiherinwe. Nkimpaka itthu kihirummwale, ni kinhima yeele Atiithi aka ekixuttinhaaya. 29 Ale ekirumme khekihiñye; eri ni miyo, mwaha wooweera ikwaha sootheene kinnapaka ele enaasivela.” 30 Ahimakaru itthu iya, atthu antxipale yaamuroromela.

31 Nto, Yesu aaweerela ayuda ale yaamuroromenle: “Mwavirelela wiiwelela masu aka, mweekhaikhai munookhala atthareli aka, 32 ni munoosuwela ekhaikhai, ni ekhaikhai eyo enimootaphulani.” 33 Yaamwaakhula yeeraka: “Hiyo osuulu wa Abrahamu, ni khannakhale akaporo a mutthu, vanonto, moota heeni munhimaanyu weera nnootaphuliwa?” 34 Yesu aawaakhula aweerelaka: “Kinnooleelani ekhaikhai weera: Ootheene yoole ompaka yoottheka, kaporo a yoottheka. 35 Opwaha mwa yeeyo, kaporo khankhala vaate va apwiyawe mahiku ootheene; menento mwaana onkhala mahiku ootheene. 36 Tivawonto, Mwaana ootaphulani, munookhala ootaphuwa. 37 Koosuwela weera nyuwosa nloko na Abrahamu. Mene munnaasaasa okiiva mwaha wooweera khamunaakhulela masu aka. 38 Miyo kinuuluma etthu konnaaka emaara kaaraaka ni Atiithi aka, mene nyuwo mumpaka itthu ntoko mwiiwalaanyu ni atiithi anyu.” 39 Omwaakhula yenre: “Hiyo atiithi ahu Abrahamu.” Yesu aaweerela: “Mwaari anamwane Abrahamu, nyuwo mwaaheereke ovara miteko Abrahamu aavaraawe. 40 Ekhaikhai ti yoowera nyuwo munnaasaasera okiiva, miyo, mutthu onooleelani ekhaikhai iiwalaawe wa Muluku, Abrahamu kheera hiiho. 41 Nyuwosa munvara muteko* wa tiithi anyu.” Awosa yaahaakhula: “Hiyo khaniyarinwe mooraruwani,* nrino Tiithi ahu mmoha Muluku.”

42 Yesu aaweerela: “Waari weera Muluku Tiithi anyu, mwaaheereke okisivela, okhala weera miyo kiri va kirummwale ni Muluku. Miyo nkiwiiye kihirummwale, mene owo orookiruma. 43 Mwaha wa heeni muhiniiwexexaanyu itthu kinhimaaka? Mwaha wa heeni muhiniiwaanyu masu aka? 44 Nyuwo anamwane atiithi anyu, Diabo, ni muntthuna okwanihera sootthuna sa tiithi anyu owo. Etempu owo aamoothenraawe Muluku, owo aakhala namwiiva ni khaavirelenle weettela ekhaikhai, mwaha wooweera khaanoono ekhaikhai, oothaka onuuluma sawawe, woona weera onuuluma soowootha ni opatxerinhe wootha. 45 Nto woona weera miyo kinooleelani ekhaikhai, khamunkiroromela. 46 Taani a nyuwo oneera akoothere ahimaka weera koopaka yoottheka? Koonaka weera miyo kinuuluma ekhaikhai, vanonto, heeni muhinkaakhulelaanyu miyo? 47 Ole ori a Muluku, onniiwa masu a Muluku, nyuwo khamuniiwa mwaha wooweera khamukhanle a Muluku.”

48 Ayuda emwaakhulaka, yaamweerela: “Nahima vale weera nyuwo musamariya, ni mookhalano munepa woonanara, nneere owootherani?” 49 Yesu aahaakhula: “Miyo nkaanoono munepa woonanara, kinaattittimiha Atiithi aka, mene nyuwo khamunkittittimiha. 50 Miyo nkinaasa wiivuwiha mwaneene aka, mene Muluku onaasa weera kinvuwihe ni owo onthoriha. 51 Miyo kinnooleelani ekhaikhai weera: “Ole oneettela masu aka, khawa akhwa.” 52 Ayuda yaamweerela: “Vanonto noosuwela weera nyuwo mookhalano munepa woonanara, Abrahamu ohookhwa, maprofeta-tho ahookhwa, vano nyuwo ohima muneera: ‘Ole oneettela masu aka, khawa akhwa.’ 53 Neereke nyuwo mutokweene ompwaha tiithi ahu Abrahamu okhwiiye? Maprofeta-tho ahookhwa. Vano nyuwo munuupuwela weera nyuwo taani?” 54 Yesu aawaakhula: “Wakhala weera miyo kinniivuwiha mwaneene aka, ovuwa waka waakela okhala weethiru. Mene Tiithi aka yoowo nyuwo muneeraanyu Muluku anyu, tonkivuwiha. 55 Mwa yeeyo, nyuwosa khammusuwenle, mene miyo koomusuwela, ni kahima weera nkimusuwenle kaakela okhala namootha ntoko nyenyusa, menento miyo koomusuwela ni kinniiwelela masu awe. 56 Tiithi anyu Abrahamu, annaweherera ni otteeliwa murima nihiku kaakelaaka owa, owo aahoona mmuupuweloni ni aahakalala murima.” 57 Vano, ayuda yaamweerela: “Nyuwo khamunaaye naari mano okwaniha iyaakha 50, mene nnaamweera vareene hiiho, ohima muneera moomoona Abrahamu?” 58 Yesu aaweerela: “Kinnooleelani ekhaikhai weera: Abrahamu ahinaaye okhala, miyo kaakhala.” 59 Mwaha wa yeeyo, yaattotta maluku weera envonye, mene Yesu aahiipitha ni aakhuma mutemplu.

9 Emaara aaviraawe, aamoona mulopwana mmoha oohoona evinyero eyareliwo awe. 2 Vano, atthareli awe yaamukoha: “Rabi,* weera mulopwana ola ayariwe ahoonaka, taani otthenke, mulopwana yoola naari asipapawe?” 3 Yesu aawaakhula: “Mulopwana ola khatthenke, naari asipapa awe, mene yeereñye eyo weera sooniheriwe miteko sa Muluku. 4 Nintthuneya opaka miteko sa Ole okirumme vahinaaye wiila; mwaha wooweera oneera wiilaka, ni khaavo oneera awereke ovara muteko. 5 Vaava kiraaka elapo ya vathi, miyo muthuko wa elapo.” 6 Ahimakaru masu ala, Yesu aasenyera vathi, aneetheya etthaya ni isenye sawe ni anattikitthela matope ene mmaithoni mwa mulopwana ole; 7 ni aamweerela: “Murowe ni mwasuusule ontthiyani wa oSilowe” (entaphulela “oorumihiwa”). Owo, aarowa osuusula ni aatthika oonaka.

8 Vano, mavisiinyu* awe ni atthu yaamoona avekelaka eximola yannakoha: “Ola khaiyene mulopwana yoole aakilaathi vale avekelaka eximola?” 9 Atthu akina yanneera: “Ti yoowo.” Mene akina ohima yeera: “Khaiyene, owo onimweera olikanano paahi.” Ni mwaneene owo anneera: “Ti yoomi.” 10 Vanonto, awo yaamukoha: “Maitho anyu, ehulinwe moota heeni?” 11 Owo aahaakhula: “Mulopwana oniitthaniwa Yesu, eetheñye etthaya anakittikitthela mmaithoni mwaka ni anakeerela: ‘Murowe oSilowe, ni mwasuusule.’ Vano miyo kaarowa kinasuusula ni kinapatxera woona.” 12 Nto mwaha wa yeeyo, awosa yaamukoha: “Ori woowiini mulopwana owo?” Owo aahaakhula eeraka: “Nkisuwenle oraiyewo.”

13 Vanonto awosa yaamukuxa mulopwana ole ahoona khalayi enamuroiha wa afarisi. 14 Nihiku Yesu eetheñyaawe etthaya ni analamiha maitho a mulopwana ole, naari nihiku na esaabadu. 15 Vano, afarisi-tho yaapatxera omukoha mulopwana ole moota yaahulinwaaya maitho awe. Owo owaakhula enre: “Owo aattikitthenle etthaya mmaithoni mwaka, ni miyo kaarowa osuusula ni vano kinnawera woona.” 16 Nto, afarisi akina yaaheera: “Mulopwana owo khaiyene ta Muluku, woona weera khanttittimiha esaabadu.” Akina yaaheera: “Moota heeni mutthu ori namattheka oneeraawe apakeke miiriira ntoko iya?” Nto waakhala okawanyeya variyari vaya. 17 Ni yaamukoha-tho mulopwana ole aalamihinwe: “Munhima eheeni woohima sa yoowo, noonaka weera maitho anyu owo ohunlaawe?” Mulopwana ole aahaakhula: “Owo profeta.”

18 Vanonto, ayuda khayaakhulela weera mulopwana ole khoona, ni weera oroolamihiwa, nto mwaha wa yeeyo, yaawiitthana asipapawe mulopwana ole ahaawera woona. 19 Ni yaahaakoha: “Ola mwaninyu yoowo munhimaanyu weera oyarinwe ahoonaka? Vanonto moota heeni onweraawe woona?” 20 Asitiithi awe yaahaakhula: “Hiyo noosuwela weera ola mwanihu, ni weera aayarinwe ahoonaka. 21 Mene khanisuwenle moota owo onweraawe woona vano, naari khanisuwenle taani omuhunle maitho. Mmukoheke mwaneene. Owo ohunnuwa onoowera waakhula mwaneene awe.” 22 Asitiithi ale yaakhunle hiihaale mwaha wooweera yannaawoova ayuda, woona weera ayuda yaapaka nivarihano nooweera yoole ori mutthu aneera aakhulele weera, Yesu Kristu, aamoomoliwa musinakooka. 23 Tivawonto asipapawe yaakhunlaaya weera: “Mmukoheke mwaneene. Owo ohunnuwa.”

24 Vanonto, mwa ekwaha yanaaveeli yaamwitthana mulopwana ole khalayi ahoona enamweerela: “Munvuwiheke Muluku paahi!* Hiyo noosuwela weera mulopwana owo namattheka.” 25 Owo aaweerela: “Mulopwana owo aareene namattheka, miyo nkisuwenle. Etthu kisuwenlaaka ti yooweera khalayi miyo nkoona, mene vano, kinnawera woona.” 26 Vano, awo yaamukoha: “Mulopwana owo oopankeni eheeni? Ohunle moota heeni maitho anyu?” 27 Mulopwana owo aawaakhula eeraka: “Miyo kohooleelani, mene nyuwo khamutthunne okiiwa, mwaha wa heeni munkikohaanyu-tho veeli?* Neereke nyuwosa-tho muntthuna okhala mutthareli awe?” 28 Nto mwaha wa yeeyo, yaamweerela moomuramusa: “Nyuwo muri mutthareli a mulopwana owo, mene hiyo atthareli a Mose. 29 Hiyo noosuwela weera Muluku aahuuluma ni Mose, menento woohima sa mulopwana owo, hiyo khanisuwenle naari okhummaawewo.” 30 Mulopwana ole aawaakhulasa: “Moohihovela eyo ti yootikhiniha! Nyuwosa khamusuwenle woowiini onkhumaawewo, menento owo oohula maitho aka. 31 Noosuwela weera Muluku, khanwiiwa anamattheka, mene, wakhala weera mutthu onnamoova Muluku ni onnapaka yootthunaawe, Muluku onnamwiiwa mutthu owo. 32 Ovinya khalayi, khaavo otonko wiiwa weera ookhala mutthu otonko ohula maitho a mutthu oyarinwe ahoonaka. 33 Waari weera mulopwana owo khaarummwale ni Muluku, khaakela oweraka opaka naari mwiiriira mmoha mano.” 34 Awosa yaamwaakhula: “Nyuwo muyarinwe ootthekeene, ni nnaamweera vareene hiiho nyuwo muntthuna onixuttiha hiyo?” Nto mwaha wa yeeyo yaamoomola.

35 Yesu aahiiwa weera afarisi yaamoomola mulopwana ole aamulaminhaawe, ni amphwanyakaru aamukoha: “Nyuwo munnamuroromela Mwaana a Mutthu?” 36 Mulopwana ole aahaakhula: “Apwiya, Taani yoowo? Mukileele weera miyo kimuroromele.” 37 Yesu aamweerela: “Nyuwo moomoona, ni kinnooleelani ekhaikhai weera ti yoowo munuulumaanyuno.” 38 Mulopwana ole aaheera: “Apwiya, miyo kinnamuroromela!” Ni owo aakokhora* ohoolo wawe. 39 Vano, Yesu aaheera: “Kiwiiye valaponi weera kithorihe, weera atthu oohoona yooneke ni weera atthu enoona ekhale oohoona.” 40 Afarisi akina yaari ni yoowo yaahiiwa itthu iya, ni yaamweerela: “Neereke hiyo-tho atthu oohoona?” 41 Yesu aaweerela: “Waari weera nyuwo atthu oohoona, khamwaarowa okhalano nthowa na yoottheka. Mene woona weera ohima muneera: ‘Hiyo ninnoona’, munnavirelela okhala anamattheka.”

10 “Kinnooleelani ekhaikhai weera: Mutthu ohinvolowa vamulako wa nikhola na iputtiputthi, mene anavolowa nipuro nikina, namwiiya. 2 Mutthu onvira vamulako, ori mukukhuli a iputtiputthi. 3 Owo onnahulela mulako ni iputtiputthi iyo, sinniiwa nsu nawe. Owo onniitthana iputtiputthi iyo ni nsina naya ni onnakumihera vaate. 4 Akumiha vale iputtiputthi sawe sootheene, owo onnahoolela ni iyo sinnamutthara mwaha wooweera soosuwela nsu nawe. 5 Iyo khasinkhalakhala simuttharaka mutthu sihimusuwenlaaya, mene sinoomutthawa, mwaha wooweera khasisuwenle nsu na mutthu nihimusuwenlaaya.” 6 Yesu aapaka niphwanaphwaniho nna, mene awosa khayiiwexenxe etthu aaleelaawe.

7 Tivawonto Yesu aalenlaawe eeraka: “Kinnooleelani ekhaikhai weera: Miyo kiri mulako wa iputtiputthi. 8 Ootheene yaawiiye yiihimaka weera ti miyo,* anamootha; ni iputtiputthi khasiwiiwelenle awosa. 9 Miyo mulako. Ole oneera avolowe wa miyo, onoovuluwa, onoovolowa ni onookhuma ni onoophwanya yootxa. 10 Namwiiya onweelaka wiiya, wiiva ni onanariha. Miyo kaawenle weera atthu ekhaleno ekumi yoomalela. 11 Miyo mukukhuli ooreera murima; mukukhuli ooreera murima onnavaha ekumi awe weera avuluxe iputtiputthi. 12 Namuteko ohikhanle mukukhuli ni mwaneene iputtiputthi, vaavo onoonaawe mwiitxi owaaka, onnahiya iputtiputthi anatthawa, ni mwiitxi onnavara iputtiputthi ni onnamwara-mwara; 13 owo onnatthawa mwaha wooweera namuteko ni khampwattha iputtiputthi. 14 Miyo mukukhuli ooreera murima. Koosuwela iputtiputthi saka ni iputtiputthi saka sookisuwela miyo, 15 ntoko hiihaale Atiithi ekisuwenlaaya miyo ni miyo-tho kohaasuwela awo; ni kinnavaha ekumi aka weera kivuluxe iputtiputthi.

16 “Ni kookhalano iputtiputthi ikina sihikhanle sa nikhola nna; ni iyo tho, kintthuneya owiiha ni sinrowa wiiwelela nsu naka, ni inookhala nikhola nimoha ni mukukhuli mmoha. 17 Tivawonto Atiithi aka enkisivelaaya, mwaha wooweera kooveleela ekumi aka weera kaakhele wanaaveeli. 18 Khaavo onkaakha, ni miyo kinvaha ni otthuna waka. Kookhalano owera* woovaha ni waakhela wanaaveeli. Nlamulo nna kaakhenle wa Atiithi aka.”

19 Waakhumelela-tho okawanyeya variyari va ayuda, mwaha wa masu ene yaala. 20 Antxipale a yaawo yeera: “Owo ookhalano munepa woonanara ni onkhwa anepa. Mwaha wa heeni mummwiiwelelaanyu?” 21 Akina yeera: “Ala khaiyene masu a mutthu orinono munepa woonanara. Neereke mutthu orino munepa woonanara pooti ohula* maitho a mutthu oohoona?”

22 Yaaheereya Efeesta Yoovahereriwa empa ya Muluku oYerusalemu. Yaari eyiita, 23 ni Yesu eera eetteettaka mutemplu,* nipuro na Nipithela na Salomoni. 24 Vano ayuda yaamurukurera enamukoha: “Mpaka liini muneeraanyu munihiye nihovelaka? Mwaareene Kristu, muhinleelaka heeni?” 25 Yesu aawaakhula: “Miyo kohooleelani, mene nnaamweera vareene hiiho khamunroromela. Itthu miyo kimpakaaka mwa nsina na Atiithi aka, sinnakihelela onamoona. 26 Mene nyuwosa khamunkiroromela mwaha wooweera khamuhiyono iputtiputthi saka. 27 Iputtiputthi saka sinniiwa nsu naka; miyo koosuwela ni iyo sinnakitthara. 28 Miyo kinnavaha iyo ekumi yoohimala, ni iyo khasiwa sinyaanyiwa, ni khaavo oneera akaakhe mmatatani mwaka. 29 Etthu ekivanhaaya Atiithi aka ti yootthuneya, opwaha itthu sootheene iya ni khaavo onwera owaakha Atiithi aka mmatatani mwaya. 30 Miyo ni Atiithi nri oowiiraana.”*

31 Mwa ekwaha ekina-tho, ayuda yaattotta maluku weera envonye Yesu. 32 Nto, Yesu aaweerela: “Koowooniherani itthu* sintxipale sooreera sinkhuma wa Atiithi aka. Mwa miteko* sene seiya, toovi muntthunaanyu okivonyerano maluku?” 33 Ayuda yaamwaakhula emweerelaka: “Hiyo khaninkela woovonyani maluku mwaha wa miteko sooreera, mene mwaha wonveeha Muluku; nnaamweera nyuwo mureene mutthu; nyuwo munniipaka muluku.” 34 Yesu aawaakhula eeraka: “Munlamuloni mwanyu, khelempwale weera: ‘Miyo kaaheera: “Nyuwosa amiluku”’? 35 Muluku enre: Nyuwosa ‘amiluku’ seiye nsu nthorinhaaya ni atthu khenwera otxenxa ele Soolepa sinhimaaya, 36 mene miyo ti yoole Muluku omutteelinhaawe, ni omuruminhaawe elapo ya vathi. Mene nyuwo ohima muneera: ‘Munnanveeha Muluku,’ mwaha wooweera miyo koohima weera ka ‘Mwaana a Muluku’? 37 Miyo kaahivaraka miteko sa Atiithi aka, muhikiroromeleke. 38 Vanonto miyo kaavaraka, nnaamweera muhikiroromelaka miyo, muroromeleke miteko, weera musuwele ni muroromele weera Atiithi eri vamoha ni miyo, ni miyo kiri vamoha ni Atiithi.” 39 Nto, yaaheerera tho onvara, mene owo aahaatthawa.

40 Owo aakhuma-tho anarowa ekhopela ekina ya mooloko Yordani, nipuro nenno Yohani aapatisaawevo atthu woopatxerani, ni aakhala weiwo. 41 Atthu antxipale yannarowa okumana nuuwo, ni yanneera: “Yohani, khapanke naari mwiiriira mmoha, mene itthu sootheene Yohani ohimmmaawe woohima sa mulopwana ola, ti seekhaikhai.” 42 Ni atthu antxipale yaamuroromela.

11 Vano, mulopwana mmoha iitthaniwa Lazaro anvoreiwa; owo aakhala oBetania, muttetthe yoowo aakhalaawe Maria ni munnawe Marta. 2 Maria ene ti yoola aayeehenre makhura oowinkhela Apwiya, ni anapuputtha manaani aya ni maihi awe; Lazaro ola aavoreiwa aari murokorawe. 3 Mwaha wa yeeyo, asirokorawe yaaruma oleeliwa Yesu: “Apwiya, ole mummusivelaanyu onoovoreiwa.” 4 Mene Yesu iiwakaru eyo, aaheera: “Okhwipi wa eretta eyo khonkela okhala okhwa, mene ovuwihiwa wa Muluku, weera Mwaana a Muluku avuwihiwe moorweela mwa eretta eyo.”

5 Yesu annamusivela Marta, Maria ni Lazaro. 6 Vanonto, Yesu iiwakaru weera Lazaro anvoreiwa, aavirelela okhala nipuro nne aaraawe mpuwa mwa mahiku meeli. 7 Avinyaka, Yesu aaweerela atthareli awe: “Nrowe ntthikele-tho oYudeya.” 8 Atthareli awe yaamweerela: “Rabi, nsuri-nsuri va ayuda yaatthuna woovonyani maluku, vano tho nyuwo muntthuna otthikela weiwo?” 9 Yesu aawaakhula: “Keera othana orinono iwoora 12? Vanonto mutthu eettaka othana khonkwattula etthu, mwaha wooweera onnoona muthuko ommwalela elapo ela. 10 Mene, mutthu weettaka ohiyu, onnakwattuwa, mwaha wooweera khawaavo muthuko wa yoowo.”

11 Amalihakaru ohima itthu iya, Yesu aahaatxeerera eeraka: “Nthamwene ahu Lazaro onookona, mene miyo kinrowa weiwo kanvinxe.” 12 Nto atthareli awe yaamweerela: “Apwiya, waari weera owo onookona, onookhala nnene.” 13 Menento, Yesu aahima okhwa wa Lazaro; vano, atthareli awe yuupuwela weera aahima okona wa ikhove. 14 Vanonto, Yesu aawiiwanyeiha eeraka: “Lazaro ohookhwa, 15 ni, mwaha wa nyuwo, miyo kinnahakalala mwaha wooweera nkaakhanle wuuwu weera nyuwosa muroromele. Vanonto nrowe nipuro owo oraawe.” 16 Nto, Tome, yoowo iitthaniwa maphapo, aaweerela atthareli akina: “Nrowe, nnaamukhwaaka vamoha ni yaala.”

17 Yesu aphiyakaru, aasuwela weera yaavira mahiku maxexe Lazaro avithinweene mmahiye. 18 Betania aarimwaattamelana ni Yerusalemu, waarakamelanne ikiloometru* 3, 19 ni ayuda antxipale yaarowa ommaaliha Marta ni Maria mwaha wookhweliwa murokoraya. 20 Marta iiwakaru weera Yesu annawa, aamutxitxeera,* mene Maria, aahanle owaani. 21 Marta aamweerela Yesu: “Apwiya, mwaari vaava, murokoraka khaakela okhwa. 22 Menento miyo koosuwela weera, viinaano vaava itthu sootheene muneeraanyu munvekele Muluku, Owo* onimoovahani.” 23 Yesu aamweerela: “Murokorinyu onoovinyerera.” 24 Marta waakhula enre: “Miyo koosuwela weera onoovinyererihiwa, woovinyererihiwani waatthu ookhwa nihiku noomalihera.” 25 Yesu aamweerela: “Miyo kiri evinyerero ni ekumi. Ole onkiroromela miyo nnaamweera akhwaaka onkela otthikela okhala mukumi; 26 ni ootheene ale eri akumi ni enkiroromela miyo, khenkela okhwa. Neereke nyuwo munnaroromela eyo?” 27 Owo aamwaakhula: “Aani, Apwiya, miyo kinnaroromela weera nyuwo mwa Kristu Mwaana a Muluku, yoowo aalaiherinwe weera anwa elapo ya vathi.” 28 Marta amalihakaru ohima itthu iya, aarowa omwiitthana weephiini Maria, munnawe, ni anamweerela: “Muhusiha ori va, onoowiitthanani.” 29 Iiwakaru eyo, Maria aavinya moowaakuveya, anarowa okumana ni Yesu.

30 Mene Yesu nlelo eera ahinaaye ovolowa mmuttettheni, aari nipuro nene nenne aaphwanyinwaawe ni Marta. 31 Vaavo ayuda yaari owannyawe Maria emmaalihaka, yonnaaya weera owo oovinya moowaakuveya, yaamutthara, yuupuwela weera aarowa winla omahiye. 32 Maria aphiyakaru nipuro aaraiyevo Yesu, aamoona ni aakokhora mmanaanini mwawe anamweerela: “Apwiya, mwaari vaava, murokoraka khaakela okhwa.” 33 Amoonaka Maria vamoha ni ayuda yaamuhoola yinlaka, Yesu aaxupeya ni waamuriipa murima vantxipale. 34 Vano Yesu aakoha: “Munvinthe woowi?” Awo yaamwaakhula yeeraka: “Apwiya, nwe moone.” 35 Ni Yesu aapatxera winla. 36 Nto mwaha wa yeeyo, ayuda yaaheera: “Nkoonani moota aamusivelaawe!” 37 Mene akina a yaawo yanneera: “Mulopwana ola ohunle maitho amutthu oohoona, khaakela opakavo etthu weera Lazaro ahikhwe?”

38 Yesu waamuriipa-tho murima ni aarowa omahiye. Mweekhaikhai, mahiye awo naari nikhuku naattiyelinwe ni nluku. 39 Yesu aaheera: “Nvinxe nluku.” Marta murokorawe Lazaro aamweerela: “Apwiya, pooti weera murutthu awe onnunkha, mwaha wooweera aavira mahiku maxexe akhwiiyeene.”* 40 Yesu aamwaakhula: “Miyo nkoolenleni weera mwaroromela munimoona ovuwa wa Muluku?” 41 Vano, naavinxiwa nluku. Ni Yesu aaweha wiirimu aneera: “Tiithi, miyo kinnooxukurelani mwaha wooweera mookiiwa. 42 Mweekhaikhai, miyo koosuwela weera ikhwaha sootheene munnakiiwa, mene kinuuluma hiiho mwaha wa muloko mutokotoko waatthu okirukurenre, weera osuwele weera nyuwo mukirumme.” 43 Ahimakaru itthu iya, aakhuwela moowiiwanyeya eeraka: “Lazaro, mukhumele vaate!” 44 Mulopwana ole aakhwiiye, aakhumela vaate atthukinweene manaani ni matata ni ikuwo, ni avitikelelinweene ekuwo owiitho. Yesu aaheera: “Mmutaphule ni mmuhiye arooke.”

45 Tivawonto, ayuda antxipale yaaronwe omuxekura Maria ni yonne itthu iye Yesu aapankaawe, yaamuroromela, 46 mene akina a yaawo yaarowa waaleela afarisi etthu Yesu aapankaawe. 47 Nto, asitokweene aanamakeya ni afarisi yaathukumanya Esineedriyu, ni yaaheerela: “Eheeni ninkelaahu opaka, noonaka weera mulopwana owo onnapaka miiriira sintxipale? 48 Namuhiya avirelelaka, atthu ootheene eneereke omuroromela ni aroma enimoowa onaakha etemplu ahu ni nloko nahu.” 49 Nto mmoha a yaawo iitthaniwa Kaifa, aari mutokweene aanamakeya a eyaakha ene yeele, aaweerelasa: “Nyuwosa khamusuwenle etthu, 50 naari khamunoona weera ti wooreera wa nyuwo weera mutthu mmoha aakhwele atthu ootheene, ohikhanle onyaanyiwa nloko nootheene.” 51 Menento, Kaifa khaiyene uuluma ariki mwiipakela, mene woona weera aari namakeya mutokweene a eyaakha ele, aamweera oprofetisari weera Yesu aakela okhwela maloko ootheene, 52 khohiyono paahi wa malokoru, mene weera aathukumanye ekhurupu emoha anamwane a Muluku yaawo yaamwaramwareñye. 53 Nto ovinya nihiku nene nenne mpaka muhoolo, yampaka palano weera emwiive.

54 Nto mwaha wa yeeyo, Yesu kheetta ooniwaka ni ayuda. Mene aakhuma nipuro nne anarowa muttetthe waattamela onikareni esidade yeeyo yiitthaniwa Efraim, ni aakhala weiwo ni atthareli awe. 55 Eera aattamelaka Mpaasika aayuda, ni atthu antxipale ammawaani yannarowa oYerusalemu ahinaaye Mpaasika, weera yiitteelihe ettharaka nlamulo. 56 Ayuda yeera emwaasaasaka Yesu, ni mutemplu yannakohana mukina ni mukhwaawe: “Munoonela hayi? Neereke owo khanwa ofeestani nno wa Mpaasika?” 57 Mene asitokweene aanamakeya ni afarisi, yaavaha nlamulo weera akhala mutthu eera amoone Yesu oraawevo, aaleele weera awo envare.*

12 Ehalelaka mahiku 6 weera aphiyere Mpaasika, Yesu aaphiya oBetania, weiwo aaraiyewo Lazaro, yoowo Yesu anvinyererinhaawe mookhwaani. 2 Yaamwaapeela yootxa, Marta aavara muteko, ni Lazaro aari mmoha aatthu yaatxa* vamoha ni Yesu. 3 Maria aakuxa emeya* ya eliitru ya makhura oowinkhela yaapakiwa ni nardo, ni yaari oorikaxa, aakuxa makhura awo anahela manaani a Yesu, ni aapuputta ni maihi awe. Nto empa yootheene yaasareya winkhela wa makhura ale. 4 Vano, Yuda Iskarioti mmoha atthareli awe, yoowo aakela onvariha, aaheera: 5 “Mwaha wa heeni makhura ala oowinkhela ehitumihinwaaya ni itenaariyu 300, ni musurukhu ene yoowo ovahiwa alipa oohaawa?” 6 Mweekhaikhai, Yuda khaiyene aahima masu ala mwaha wooweera annaapwattha atthu oohaawa, mene mwaha wooweera aari latarawu,* ni ti yoowo aakosoopa ekaaxa yaaheliwa musuruku ni anniiya musurukhu waaheliwa mmo. 7 Vano, Yesu aaheera: “ mmuhiye apake eyo, woona weera onreherera nihiku na ovithiwa waka. 8 Mwaha wooweera nyuwo muneereke okhala ni atthu oohaawa mahiku ootheene, mene ni miyo khamunrowa okhalaka mahiku ootheene.”

9 Menento muloko mutokotoko wa ayuda waasuwela weera Yesu aari oBetania, ni yaarowa iwo, khaiyene paahi mwaha wa Yesu, mene-tho weera yamoone Lazaro, yoowo Yesu anvinyererinhaaye mookhwaani. 10 Asitokweene aanamakeya yaalaihana* weera emwiive-tho Lazaro, 11 mwaha wooweera waari mwaha wa yoowo ayuda antxipale yaamuroromelaaya Yesu, woona weera yannarowa iwo omoona Lazaro.

12 Nihiku naattharelana, muloko mutokotoko waatthu waaronwe ofeestani, waasuwela weera Yesu annarowa oYerusalemu. 13 Vano, atthu awo yaakuxa makukhu amavare ni yaarowa okumana ni yoowo, ni yaapatxera okhuwela yeeraka: “Txontte Muluku, ninnoovekelani, munvuluxe! Ooreeriwa ti yoole onwa mwa nsina na Yehova! Ooreeriwa Mwene a wIsraeli!” 14 Yesu amphwanya puuru mwaaxaana ni anwela, ntoko hiiho elempwalaaya: 15 “Muhoove, mwaana mwaamuthiya oSiyoni. Mwiiwe!*mwene anyu onnawa, anwenleene mwaaxaana apuuru.” 16 Woopatxerani, atthareli awe khayiiwexenxe etthu ele, mene, Yesu avuwihiwakaru, awosa yaahuupuwelela weera itthu iya saalempwa woohima sa yoowo ni weera sammweereela itthu iya.

17 Atthu yaamonne Yesu amwiitthanaka Lazaro mmahiye weera akhumele vaate ni anvinyererihaka mookhwaani, yannahelela onamoona. 18 Ni waari mwaha wa yeeyo, muloko mutokotoko waaronwaaya okumana nuuwo. Mwaha wooweera waahiiwa weera owo, aapaka mwiiriira owo. 19 Menento, afarisi yaaheerelana yaaworu: “Nkawehani, va nihiwenraahu opaka etthu. Moonekento, atthu ootheene ennamutthara owo!”

20 Yaakhala akereku akina wa atthu ale yaawiiye omukokhorela Muluku nihiku na efeesta. 21 Awo yaamwaattamela Filipe yoowo aari oBetisaida wa oGalileya, ni yanvekela yeeraka: “Apwiya, nintthuna weera nimoone Yesu.” 22 Filipe aarowa omuleela eyo Andreya. Vano, Andreya vamoha ni Filipe yaarowa wuuluma ni Yesu.

23 Mene Yesu aawaakhula eeraka: “Yoophiya ewoora weera Mwaana a Mutthu avuwihiwe. 24 Kinnooleelani ekhaikhai weera: Enuku ya tiriku yamorela vathi ehinakhwa, ennavirelela okhala enuku emoha; mene, yakhwa vale, eyo enniimiha soowiima sintxipale. 25 Ole onsiveliwa ni ekumi awe onooyeleela,* nto ole ohinsivela ekumi awe mwa elapo ela, onoosukera* weera aphwanye ekumi yoohimala. 26 Ole ontthuna okhala murumeyi aka, akitthare; ni, weiwo kinkelaaka okhalawo, murumeyi aka anaakhale weiwo-tho. Mutthu ontthuna okhala murumeyi aka, Atiithi enrowa omuttittimiha. 27 Vano murima wookiriipa, kinrowa ohima eheeni? Tiithi, mukivuluxe ewoora ela. Nto miyo kiwiiye mwaha wa ewoora ela. 28 Tiithi, nvuwihe nsina nanyu.” Vano, naahiiwanyeya nsu naakhuma wiirimu neeraka: “Miyo koovuwiha ni kinootthikela ovuwiha-tho.”

29 Muloko mutokotoko waatthu waari vale, waahiiwa eyo ni waapatxera weera yompe etari. Mene akina yeera: “Nlaika nuulumme nuuwo.” 30 Yesu aahaakhula: “Nsu nna khaniiwanyeñye mwaha wa miyo, mene mwaha wa nyuwosa. 31 Vano, yoophiya etempu yoothorihiwa elapo ela; ni namalamulela a elapo ela onimoomoliwa. 32 Kakhomeliwa vale va mwirini wa nihaaxero, kinimwiipururela wa miyo atthu a mikhalelo sootheene.” 33 Mweekhaikhai, Yesu aahima masu ala atthunaka ohima okhwa moohaawa aakelaawe oviriha. 34 Vano, muloko mutokotoko waatthu waamwaakhula weeraka: “Nohiiwa mu Nlamuloni weera Kristu anaakhale wa mahiku ootheene. Vanonto, moota heeni nyuwo munhimaanyu weera Mwaana a Mutthu onookhomeliwa vamwirini? Mwaana a Mutthu ene taani?” 35 Vano, Yesu aawaakhula eeraka: “Muthuko onaavirelele okhala ni nyuwo mwa etempu vakhaaniini. Mweetteke nlelo muthuko oreenevo weera epiphi ehoophwanyeni; ole oneetta veepiphini khansuwela woowiini onkelaiyewo. 36 Nlelo okhanleene muthuko, muroromeleke muthuko owo, weera mukhale anamwane amuthuko.”

Yesu ahimakaru itthu iya, aapwaha anarowa wiipitha. 37 Nnaamweera owo aapanke miiriira sintxipele vamaithoni vaya, awo khayaamuroromela, 38 eyo yeereñye weera ekwanele masu a profeta Yesaya, eneera: “Yehova, taani ororomenle ele ninlaleyaahu?* Ni taani othoonyerinwe moono wa Yehova?” 39 Yesaya-tho aahima nthowa naya neera niweeriheke ohiroromela: 40 “Owo oheeriha maitho aya ohoona ni ohummiha murima aya, weera ehooneke ni maitho, naari ehiiwexexeke ni murima aya, ni ehittharuwe, ni weera miyo kaavuluxe.” 41 Yesaya aahimme itthu iya woohima sa Kristu mwaha wooweera aahoona otokweene* awe. 42 Nto, mpaka ahooleli antxipale aayuda yannamuroromela Yesu, mene, mwaha woowoova afarisi, awo khayoonihera vaatthuni, weera ehoomoliwe musinakooka, 43 woona weera wannaasivelaxa ovuwihiwa ni atthu ohiya onvuwiha Muluku.

44 Menento, Yesu aahuuluma ni masu oowiiwanyeya eeraka: “Ole onkiroromela miyo khaiyene paahi onkiroromela miyo, mene-tho onnamuroromela ole okiruminhe; 45 ni ole onkoona, onnawoona-tho Ale ekirumme. 46 Miyo kiwiiye ntoko muthuko wa elapo ya vathi, weera ootheene ale eneera ekiroromeleke miyo ehivirelele okhala mweepiphini. 47 Mene, wakhala weera mutthu onniiwa masu aka ohineettela, miyo nkimmuthoriha; woona weera nkiwenle othoriha elapo ya vathi, mene ovuluxa elapo. 48 Mutthu onkikhootta ni ohinaakhulela ele kinhimaaka, yookhala etthu eneera yamuthorihe. Masu kinlaleyaaka eneera yamuthorihe nihiku noomalihera. 49 Mweekhaikhai, nkuulumme kikumihaka mmuruni mwaka, mene Attithi yaawo ekiruminhe, ti yaawo ekivanhe nlamulo woohima sa etthu yoohima ni yoowuuluma. 50 Ni miyo koosuwela weera malamulo awe entaphulela ekumi yoohimala. Menento, itthu sootheene miyo kinuulumaaka, kinuuluma hiihaawo ntoko Atiithi ekilenlaaya.”

13 Ehinaaye ophiya ewoora ya Efeesta ya Mpaasika, Yesu aasuwela weera yoophiya ewoora yoohiya elapo ela ni orowa wa Atiithi awe. Nto, woona weera annaasivela atthu awe yaari mulaponi, owo aahaasivela mpaka okhwipi. 2 Awosa yeera etxaaka yootxa ya Mpaasika,* ni Diabo era ahenleene mmurimani mwa Yuda Iskarioti mwaana a Simoni miruku sonvariha Yesu. 3 Yesu aasuwela weera Atiithi awe, yaamwinnyerera itthu sootheene mmatatani mwawe ni weera aakhumme wa Muluku ni aatthikela wa Muluku; 4 Vano, Yesu aavinya vameesa aakilanthaawevo ni aarula maleya awe a vasulu.* Nto, aakuxa etowaaliya anatthukela muyuununi. 5 Avinyaka, aahela maahi mpasiyani ni aapatxera orapiha manaani atthareli awe ni uumihaka ni etowaaliya iitthukenlaiye muyuununi. 6 Vano, aaphiya va Simoni Pedru. Ni Simoni Pedru aamukoha: “Apwiya, muntthuna orapiha manaani aka?” 7 Yesu aamwaakhula: “Etthu kimpakaaka khamuniiwexexa viinaano va, menento munrowa wiiwexexa muhoolo.” 8 Pedru aamweerela: “Nyuwo khamuwa murapiha manaani aka.” Yesu aamwaakhula: “Kaahirapiha vale manaani anyu, khamukhanle moono aka.” 9 Simoni Pedru aamwaakhula: “Apwiya, ohiya paahi okirapiha manaaniru, mukirapihe-tho mmatatani ni mmuruni.” 10 Yesu aamweerela: “Mutthu orampe ori ootteeleene ni khontthuneya orapiha nipuro nikina ohikhanle mmanaanini paahi. Ni nyuwosa mootteela, menento khaiyene ootheene.” 11 Aahimme eyo mwaha wooweera aasuwela taani eera anvarihe. Tivawonto aahimmaawe weera: “Menento khaiyene ootheene nyuwo muri ootteela.”

12 Amalihakaru orapiha manaani aatthareli awe ni owara maleya awe a vasulu,* aatthikela-tho okilaathi vameesa ni anaweerela: “Moowera wiiwexexa etthu koopakenlaakani*? 13 Nyuwosa munnakiitthana ‘Muhusiha’ ni ‘Apwiya’, munnapaka nnene, woona weera miyo Muhusiha ni Apwiya. 14 Vanonto, waareene weera miyo Apwiya anyu ni Muhusiha anyu, koorapiha manaani anyu, nyuwo tho murapiheke* manaani a mukina ni mukhwaawe. 15 Woona weera miyo kohoovahani ntakihero, hiiha ntoko miyo koopakenlaakani, nyuwosa tho mpakeke. 16 Kinnooleelani ekhaikhai weera: Kaporo khaiyene mutokweene ompwaha pwiya awe, naari ole orummwale khaiyene mutokweene ompwaha ole omurumme. 17 Vano, mwaasuwenleene itthu iya, munkela okhala oohakalala wakhala weera munnavarela muteko. 18 Nkinoohimani ootheene nyuwo; mwaha wooweera kohaasuwela ale kaathanliyaaka. Menento eyo yeereñye weera ekwanele Yoolepa eneera: ‘Ole aatxa ni miyo, ookirukunuwela.’ 19 Kinnooleelani eyo viinaano va, ehinaaye weereya, weera yeereya vale, musuwele weera yoolepa eyo, yaakihima yoomi. 20 Kinnooleelani ekhaikhai weera: Ole ommwaakhela akhalaru mutthu miyo kimurummaaka, onnakaakhela-tho miyo, ni ole onkaakhela, onnawaakhela-tho Ale ekirumme.”

21 Yesu amalihakaru ohima itthu iya, aariipiwa murima vantxipale, ni aaheera: “Kinnooleelani ekhaikhai weera: Mmoha a nyuwo, onookivariha.” 22 Vano, atthareli awe yaapatxera owehana mukina ni mukhwaawe, ehisuwelaka taani a yaawo owo aamuhimaawe. 23 Nto, mmoha aatthareli awe, yoowo Yesu aamusivelaawexa, taakilanthi vameesa aattamanneene ni Yesu. 24 Vano, Simoni Pedru anvaha esinaale ni muru mutthareli owo eeraka: “Taani owo ommuhimaawe.” 25 Menento owo aamuhaamela Yesu vakakasani ni anamukoha: “Apwiya, taani owo?” 26 Yesu aahaakhula eeraka: “Yoowo kineeraaka kinvahe epetaasu* ya epaawu kinkelaaka onaaniha mutixelani.” Vano, anaanihakaru epaawu anvaha Yuda, mwaana a Simoni Iskarioti. 27 Nto, Yuda akuxakaru epetaasu ya epaawu, Satana aavolowa mwa yoowo. Vano, Yesu aamweerela: “Mpake moowaakuveya etthu muntthunaanyu opaka.” 28 Mene khaavo aakilanthi vameesa iiwexenxe mwaha wa eheeni owo aamweerenlaawe hiiho. 29 Woona weera Yuda taakosoopa ekaaxa ya musurukhu, akina yuupuwela weera aamweerela weera: “Athume itthu yaahaawelaaya va feestani”. Naari aatthuneya weera aavahe atthu oohaawa itthu. 30 Vano, aakhelakaru epetaasu ya epaawu, aakhuma moowaakuveya. Waari ohiyu.

31 Yuda akhumakaru, Yesu aaheera: “Vano Mwaana a Mutthu onoovuwihiwa, ni Muluku onoovuwihiwa moorweela mwa mwaana. 32 Muluku mwaneene ononvuwiha ni onrowa onvuwiha viinaano va.* 33 Anamwane aka oosiveleya, kiri ni nyuwo mwa etempu vakhaaniini. Nyuwosa munoorowa okaasaasa, mene, ntoko kaalenlaakano ayuda, vano-tho kinnooleelani nyuwo: ‘Nipuro kinrowaaka, nyuwo khamunkela orowa.’ 34 Kinnoovahani nlamulo nnyowani weera: Musivelaneke mukina ni mukhwaawe; hiiha ntoko miyo koosivenlaakani, nyuwosa-tho musivelaneke mukina ni mukhwaawe. 35 Moorweela mwa yeeyo, atthu ootheene enoosuwela weera mwa atthareli aka: wakhala weera munnasivelana mukina ni mukhwaawe.”

36 Simoni Pedru aamweerela: “Apwiya, munkela woowiini?” Yesu aamwaakhula: “Viinaano va, nipuro kinkelaaka nyuwo khamunkitthara, mene munookitthara muhoolo mwaya.” 37 Pedru aamukoha: “Apwiya, mwaha wa heeni kihinkelaaka woottharani viinaano va? Miyo kiri oolikaneene okhwa mwaha wa nyuwo.” 38 Yesu aamwakhula amukohaka: “Nyuwo muri oolikaneene okhwa mwaha wa miyo? Kinnooleelani ekhaikhai weera: muthupi khoniipa nyuwo muhinaaye okikhootta ikwaha tthaaru.”

14 “Yesu aaheera-tho, muhixupeye. Mmuroromeleke Muluku; ni mukiroromeleke miyo. 2 Wa Atiithi aka aakhalawo mapuro mantxipale ookhala. Ni wahaari hiiho, saano koolenleni, kinoorowa weera kooreherereleni nipuro. 3 Nave-tho, kapwaha vale ni woorehererelani nipuro, kinootthika veeli ni kinimookuxanisa. Weera nipuro nenno kinrowaaka okhala, nyuwo-tho, mwakhale vaavo. 4 Ni nyuwosa moosuwela ephiro miyo kinkelaaka.”

5 Tome aamweerela:“Apwiya, khanisuwenle nipuro munkelaanyu. Ninkela osuwela moota heeni ephiro ene?”

6 Yesu aamwaakhula: “Miyo kiri ephiro, ekhaikhai ni ekumi. Khaavo onwa wa Tiithi ohikhanle moorweela mwa miyo. 7 Nyuwosa mwaakisuwenle, mwaamwaasuwela-tho Atiithi aka. Okhuma viinaano va mpaka muhoolo, nyuwosa moohaasuwela ni munnawoona.”

8 Filipe aamweerela : “Apwiya, munoonihere Atiithi, ni eyo enoonikwana.”

9 Yesu aamwaakhula eeraka: “Yoovira etempu yintxipale kireene ni nyuwosa, ni nlelo khamukisuwenle Filipe? Ole onkoona miyo onnawoona-tho Atiithi. Vanonto, moota heeni nyuwo muneeraanyu: ‘Munoonihere Atiithi’? 10 Neereke khamunroromela weera miyo kiri vamoha ni Atiithi aka ni weera Atiithi aka eri vamoha ni miyo? Ele kinhimaaka khenkhuma mmuruni mwaka, mene Atiithi aka eri vamoha ni miyo, tempaka miteko saya. 11 Vanonto mukiroromeleke vaavo kinhimaaka weera miyo kiri vamoha ni Atiithi ni Atiithi eri vamoha ni miyo; mwaahiroromelaka, muroromeleke mwaha wa miteko miyo kinvaraaka. 12 Kinnooleelani ekhaikhai weera: Ole onkiroromela, onoovara-tho miteko miyo kinvaraaka. Ni owo onoopaka miteko sintxipale opwaha iya, mwaha wooweera miyo kinrowa wa Atiithi. 13 Nave-tho, etthu yootheene muneeraanyu nvekeleke mwa nsina naka, miyo kinoopaka, weera Atiithi evuwihiwe moorweela mwa miteko Mwaana ompakaawe. 14 Itthu sootheene munrowa anyu ovekela mwa nsina naka, miyo kinoopaka.

15 “Wakhala weera nyuwo munnakisivela, muneereke wiiwelela malamulo aka. 16 Ni miyo kinanvekele Tiithi, ni owo onimoovahani namakhavihera mukina weera akhale ni nyuwo mahiku ootheene: 17 namakhavihera owo, munepa wootteela, onsuweliha ekhaikhai. Yoowo elapo ehinweraaya waakhela, mwaha wooweera khonwera woona ni khoosuwenle. Nyuwosa moosuwela mwaha wooweera ori ni nyuwo ni onkhala ni nyuwo. 18 Miyo nkinoohiyani meekhaanyu. Miyo kinimootthikelani. 19 Voohipisa va elapo khenkoona-tho, mene nyuwo munrowa okoona, mwaha wooweera miyo kinnakhala, ni nyuwo-tho munrowa okhala. 20 Nihiku nene nenno nyuwosa munaasuwele weera miyo kiri vamoha ni Atiithi aka ni nyuwosa muri vamoha ni miyo ni weera miyo kiri vamoha ni nyuwo. 21 Ole onaakhulela malamulo aka ni oneettela, yoowo tonkisivela. Opwaha mwa yeeyo, ole onkisivela, Tiithi aka-tho enoomusivela, ni miyo kinoomusivela owo ni kinimwiisooneiha wa yoowo.”

22 Yuda mukina omuhiya Yuda Iskarioti, aamukoha eeraka: “Apwiya, eheeni yeereñye weera mwiisooneihereke wa hiyo ohiya wiisoonihera wa atthu amulaponi?”

23 Yesu aamwaakhula eeraka: “Mutthu onkisivela onimwiiwelela masu aka ni Atiithi aka enoomusivela mutthu owo ni miyo vamoha ni Atiithi aka nnoorowa ni nnookhala vamoha ni mutthu owo. 24 Ole ohinkisivela khaneettela* masu aka. Masu muniiwaanyu khaiyene awaka, ta Atiithi aka ekirumme.

25 Miyo kinnooleelani itthu iya ni nlelo kireene ni nyuwo. 26 Menento, namakhavihera: munepa wootteela, Atiithi aka enkelaaya woovahani, onoorowa wooxuttihani itthu sootheene ni owuupuxerani itthu sootheene miyo koolenlaakani. 27 Kinoohiyerani murettele; ni kinnoovahani murettele aka. Murettele kinoovahaakani khonlikana ni elapo onoovahaayani. Muhixupeye naari muhoove. 28 Mohiiwa ele koolenlaakani weera: ‘Kinoopwaha ni kinimootthikelani.’ Mwaakisivela, mwaamuhakalala mwaha wooweera kimpwaha wa Atiithi aka woona weera Atiithi aka atokweene okipwaha miyo. 29 Koolenleni itthu iya sihinaaye weereya, weera muroromele etempu sinkelaaya weereya. 30 Nkiwa-tho kuuluma vantxipale ni nyuwo mwaha wooweera namalamulela a elapo ela onnawa, ni owo khaano ikuru wookipwaha miyo. 31 Ni weera elapo esuwele weera miyo kinnaasivela Atiithi aka, miyo kimpaka hiiho ntoko awo ekirummaaya. Nvinye, nrowe nikhume nipuro nna.

15 “Miyo mwiri weekhaikhai wa ewuuva, ni Atiithi aka eri namalima. 2 Owo onnakakattha itamphi sootheene wa miyo sihiniimiha soowiima, ni onnareherera itamphi sootheene siniimiha weera sivireleleke wiimiha soowiima sintxipale. 3 Nyuwosa muri ootteela, mwaha wa masu koolalenraakani. 4 Mukhale vamoha ni miyo, ni miyo kinookhala vamoha ni nyuwo. Hiihaale ntoko itamphi sihiniimihaaya soowiima sihikhanleene vamwiri wa ewuuva, nyuwosa-tho khamunwera wiimiha soowiima mwaahikhala vamoha ni miyo. 5 Miyo mwiri wa ewuuva; nyuwosa itamphi. Mutthu onvirelela okhala vamoha ni miyo, ni miyo vamoha nuuwo, owo onimwiimiha soowiima sintxipale, woona weera nyuwosa mwakhala ottayi ni miyo khamunwera opaka etthu. 6 Wakhala weera mutthu khanvirelela okhala vamoha ni miyo, onnavonyeriwa vaate ntoko itamphi, ni onnuuma, itamphi iyo sinnathukumanyiwa sinavonyeriwa vamooroni ni ohisiwa. 7 Wakhala weera nyuwosa munoovirelela okhala vamoha ni miyo, ni masu aka ovirelela okhala vamurimani vanyu, nvekeleke etthu* eri yootheene munoovahiwa. 8 Eyo ennaavuwiha Atiithi aka: nvirelele wiimiha soowiima sintxipale ni moonihere weera mwa atthareli aka. 9 Hiihaale ntoko Atiithi enkisivelaaya, miyo-tho kinnoosivelani; nvirelele okhala munsiveloni mwaka. 10 Wakhala weera munniiwelela* malamulo aka munoovirelela okhala munsiveloni mwaka, hiihaale ntoko miyo kiniiwelelaaka malamulo Atiithi aka ni kinavirelela okhala munsiveloni mwaya.

11 “Koolenleni itthu iya weera muhakalaleke ntoko miyo, ni weera ohakalala wanyu okhale woomalela. 12 Nlamulo kinoovahaakani tinna: Musivelaneke mukina ni mukhwaawe, ntoko miyo kinoosivelaakani. 13 Khaavo onsivelaxa ompwaha ole onleva ekumi awe mwaha wa asinthamwene awe. 14 Nyuwosa munookhala asinthamwene aka wakhala weera munoopaka ele kinoorumaakani. 15 Vano nkiwiitthanani akaporo, mwaha wooweera kaporo khansuwela etthu apwiyawe empakaaya. Mene miyo kinnawiitthanani asinthamwene aka, mwaha wooweera kohooleelani itthu sootheene kiiwalaaka wa Atiithi aka. 16 Nyuwosa khamukithanliye miyo, mene miyo kohoothanlani, ni kohoorumani orowa ni ovirelela wiimiha soowiima, soowiima sihinthuwa, weera, etthu eri poothe muneeraanyu nvekele wa Atiithi aka mwa nsina naka, enimoovahani.*

17 Kinooleelani itthu iya, weera musivelaneke mukina ni mukhwaawe. 18 Wakhala weera elapo ennawiittani, musuwele* weera epatxenre okiitta miyo ehinaaye owiittani nyuwo. 19 Waari weera munneerela eparte elapo, elapo yaaheereke woosivelani mwaha wooweera munneerela eparte eyo. Vano, woona weera khamuneerela eparte elapo, mene miyo kohoothanlani mulaponi, tivawonto elapo enwiittaayani. 20 Muupuweleleke ele miyo koolenlaakani weera: Kaporo khaiyene mutokweene ompwaha pwiyawe. Waari weera aakittharatthara miyo, awo-tho enimoottharattharani nyuwo; ni waari weera awo ahiiwelela masu aka, awosa-tho enimwiiwelela masu anyu. 21 Mene enimoopakelani itthu sootheene iya mwaha wa nsina naka, mwaha wooweera khemusuwenle Ole okirumme. 22 Waakhanle weera miyo nkiwiiye ni waalaleera,* awo khayaakela okhalano nthowa mwaha wa yoottheka. Vano awo khayaanoono etthu yoowootherera mwaha wa yoottheka aya. 23 Ole onkiitta, onnawiitta-tho Atiithi aka. 24 Waari weera miyo nkipanke miiriira variyari vaya seiyo mutthu mukina ohitonko awe opaka, khayaakela okhalano nthowa mwaha wa yoottheka; mene, vano, awo aakoona ni aakiitta miyo ni aawiitta Atiithi. 25 Mene eyo yeereñye weera ekwanele masu elempwale mu Nlamuloni mwaya: ‘Aakiitta woohikhala nthowa.’ 26 Kinimoorumihelani namakhavihera yoowo onkhuma wa Atiithi a wiirimu eyo tiiyo, munepa wootteela, yoowo onoonihera ekhaikhai ni onkhuma wa Atiithi. Namakhavihera owo awa vale, onookihelela onamoona; 27 ni nyuwo munookihelela onamoona, mwaha wooweera mwaari ni miyo ovenyera* woopatxerani.

16 “Miyo kohooleelani itthu iya weera muhitthikele ottuli. 2 Atthu enookela owoomolani musinakooka. Enoophiya ewoora atthu eneeraaya ewiivekeni yuupuwelaka weera enanvarela muteko wootteela Muluku. 3 Mene awo enoopaka itthu iya mwaha wooweera khayaasuwenle Atiithi naari miyo. 4 Miyo kohooleelani itthu iya weera sapatxera weereya vale, muupuwelele weera miyo kaahooleelani.

“Kaamuhooleelaniru itthu iya woopatxerani mwaha wooweera kaari ni nyuwo. 5 Mene vano, kinrowa wa Ole okiruminhe; mene nnaamweera vareene hiiho, khaavo a nyuwo onkikoha: ‘Woowiini kinkelaakawo.’ 6 Ohiya eyo, mirima sanyu sisareñye oriipiwa murima, mwaha wooweera kohooleelani itthu iya. 7 Menento, kinnooleelani ekhaikhai weera: “Kimpwaha weera nyuwo muttottele mureerelo. Woona weera kaahipwaha vale, namakhavihera khanrowa owa wookhaviherani; mene, kapwaha vale, miyo kinoomurumiha. 8 Vano, waphiya vale, onimoonihera nnene yoottheka ya elapo ela, ni onimoonihera weera kinnapaka itthu sa exariya. Ni onimoonihera elapo, atthu Muluku onaathorihaawe: 9 yoopatxera, onkela woonihera nnene yoottheka ya elapo, woona weera elapo khayoonihenre weera ennakiroromela, 10 avinyaka onimoonihera elapo weera miyo kinnapaka itthu sa exariya, mwaha wooweera kinkela wa Atiithi avinyaka vaavo khamunkela-tho okoona; 11 avinyaka onimoonihera nnene elapo, atthu Muluku onaathorihaawe, mwaha wooweera namalamulela a elapo ela oothorihiwa.

12 “Nlelo kookhalano itthu sintxipale weera kooleeleni, mene vano khamunwera wiiwexexa. 13 Vanonto, munepa wootteela wawa vale, eyo tiiyo munepa onsuweliha ekhaikhai, onimoohoolelani weera mwiiwexexe nnene ekhaikhai, mwaha wooweera khooxuttihakani itthu sinkhuma mmuruni mwawe. Mene onkela wooleelakani itthu iiwalaawe wa Muluku, ni wooleelani itthu sinkela weereya. 14 Owo onookivuwiha miyo mwaha wooweera onkela wooleelakani itthu iiwalaawe ni miyo. 15 Itthu sootheene siri sa Atiithi aka, nave-tho ti sawaka. Tivanto kinooleelaakani weera munepa owo onrowa waakhela ni wooleelani ele wiiwalaaya wa miyo. 16 Moohipisa va munoohiya okoona; ni moohipisa-tho va munookoona.”

17 Nto mwaha wa yeeyo, atthareli akina yaapatxera wuuluma yaaworu yeeraka: “Mwaha wa heeni owo onhimaawe weera: ‘Moohipisa va munoohiya okoona; ni moohipisa-tho va munookoona’ ni ahimaka weera ‘mwaha wooweera kinkela wa Atiithi’?” 18 Awo yanneera: “Hiyo khanisuwenle etthu ontthunaawe ohima ni masu oweera: ‘moohipisa va.’” 19 Yesu aasuwela weera awo yaatthuna omukoha, tivanto aakonhaawe weera: “Munkohana eyo mukina ni mukhwaawe mwaha wooweera kirimooleelani weera: ‘Moohipisa va munoohiya okoona; ni moohipisa tho va munookoona’? 20 Kinnooleelani ekhaikhai weera: Nyuwosa munrowa winla ni wiikhupanyera, mene atthu a elapo ela, enrowa ohakalala; mene oriipiwa wanyu murima onrowa okhumihera ohakalala. 21 Muthiyana aayaraka vale onnoona ovoreya mwaha wooweera yoophiya ewoora awe, mene, ayariwa vale mwaana owo onnattiwala ovoreya iwo, mwaha wonwiiha mwaana valaponi. 22 Vamoha-moharu, vano, nyuwo muri ooriipiwa murima, mene kinootthikela owoonani, ni munootteeliwa murima ni khaavo onkela owaakhani* ohakalala wanyu. 23 Nihiku nene nenno, khamunkela okikoha etthu. Kinnooleelani ekhaikhai weera: mwaavekela Atiithi aka etthu eri poothe mwa nsina naka, awo enimoovahani. 24 Mpaka viinaano va, nyuwo khanvekenle naari etthu emoha mano mwa nsina naka, nvekeleke muni mwaakhele weera ohakalala wanyu okhale woomalela.

25 “Kooleelani itthu iya kivarelaka muteko maphwanaphwaniho.* Mene enoophiya ewoora kineeraaka kihivareleke muteko maphwanaphwaniho, mene kinkela wooleelakani mooluluwanya woohima sa Atiithi. 26 Nihiku nene nenno munimwaavekela Atiithi aka mwa nsina naka. Nkintthuna ohima weera miyo kinereke woovekelelani. 27 Atiithi ennoosivelani mwaha wooweera nyuwosa munnakisivela ni munnaroromela weera kirummwale ni Muluku. 28 Kirummwale ni Tiithi ni koovolowa mulaponi. Vano, kinoohiya elapo ni kinrowa wa Tiithi.”

29 Atthareli awe yaamweerela: “Vanonto, aani, munnuuluma mooluluwanya muhivarihelaka muteko maphwanaphwaniho. 30 Vano, hiyo noosuwela weera nyuwo moosuwela itthu sootheene ni khamuntthuneya okohiwa etthu. Tivawo ninroromelaahu weera nyuwo mukhumme wa Muluku.” 31 Yesu aahaakoha: “Vano munnaroromela? 32 Mwiiwe: Ennaattamela ewoora, ni vano yoophiya ewoora eyo, ootheene nyuwo munkelaanyu omwaramwareya kata mutthu akelaka owannyawe ni munrowa okihiya meekhaaka. Mene miyo nkikhanle meekhaaka mwaha wooweera Atiithi aka eri ni miyo. 33 Koolenleni itthu iya weera moorweela mwa miyo, mukhaleno murettele. Mulaponi munookumanano maxupo, mene mulipe murima, miyo koowina elapo.”

17 Yesu uulumakaru itthu iya, aaweha wiirimu anavekela eeraka: “Tiithi, yoophiya ewoora. Munvuwihe mwaninyu, weera mwaninyu oovuwiheni, 2 hiihaale ntoko munvanhaanyu owera woowaalamulela atthu ootheene, weera aavahe ekumi yoohimala ootheene ale munvanhaanyu. 3 Weera awo ephwanye ekumi yoohimala: entthuneya woosuwelani nyuwo Muluku mmoharu eekhaikhai, ni omusuwela Yesu Kristu, yoowo mmuruminhaanyu. 4 Miyo kohoovuwihani elapo ya vathi, ni koomaliha muteko mwaakivanhaanyu weera kivare. 5 Vano, Tiithi, mukivuwihe vakhiviru vanyu ni ovuwa kaaraakano ni nyuwo elapo ehinaaye opattuxiwa.

6 “Miyo kohaasuweliha nsina nanyu atthu mukivanhaanyu elapo ela ya vathi. Awo yaari awinyu ni nyuwo mookivaha miyo, ni awo enimwiiwelela* nsu nanyu. 7 Vano, awo aasuwela weera itthu sootheene mukivanhaanyu sinkhuma wa nyuwo, 8 mwaha wooweera miyo kohaaleela masu mukilenlaanyu,* ni ennaakhulela weera miyo kikhumme wa nyuwo, ni ennaroromela weera nyuwo mukirumme. 9 Kinnaavekelela awo; nkinaavekelela atthu amulaponi, mwaha wooweera ale mukivanhaanyu tawinyu; 10 Itthu saka sootheene ti sawinyu, ni sawinyu ti sawaka, ni miyo koovuwihiwa variyari vaya.

11 “Miyo kinookhuma mulaponi, mene awo enhala muumu, ni kinwa wa nyuwo. Tiithi ootteela, mwaawehaweheke mwaha wa nsina nanyu, nsina mukivanhaanyu, weera ekhale amoha* ntoko hiyo nraahu amoha.* 12 Emaara kaaraaka naawo, miyo kannaawehaweha mwaha wa nsina nanyu, nsina mukivanhaanyu; ni kannaakosoopa, ni khaavo a yaawo oriheñye ohikhanle paahi mwaana onrowa onyaanyiwa, weera ekwanele Yoolepa. 13 Mene miyo, vano, kinwa wa nyuwo ni kinnahima itthu iya ni nlelo kireene mulaponi, weera awo ehakalale moomalela ntoko miyo. 14 Miyo kohaaleela masu anyu, mene elapo ennawiitta mwaha wooweera awo kheneerela eparte elapo, hiiho ntoko miyo kihineerelaaka eparte elapo.

15 “Miyo nkinoovekelani weera mwaakumihe mulaponi, hooye, mene kinoovekelani weera mwaawehaweheke, mwaha wa Satana. 16 Awosa kheneerela eparte elapo, ntoko hiiho miyo kihineerelaaka eparte elapo. 17 Nvarele muteko masu anyu weera mwaakhalihe ootteela; mwaha wooweera masu anyu teekhaikhai. 18 Ntoko hiihaale mukiruminhaanyu elapo ya vathi, miyo-tho kinnaarumiha mweelaponi. 19 Miyo kinniitteeliha weera awo ettottele mureerelo, ni weera awosa-tho etteelihiwe moorweela mwa ekhaikhai.

20 “Nkinaavekelela yaalaru paahi, mene ale-tho eneera eroromeleke moorweela mwa masu awo eneeraaya exuttiheke, 21 weera ootheene aya ekhale mmoha, ntoko hiiho nyuwo, Tiithi, muraanyu vamoha ni miyo ni miyo kiraaka vamoha ni nyuwo, weera awosa-tho ekhale vamoha ni hiyo, weera atthu amulaponi eroromele weera nyuwo mukirumme. 22 Kohaavaha ovuwa nyuwo mukivanhaanyu, weera awosa ekhale amoha, hiiho ntoko hiyo nraahu amoha. 23 Miyo vamoha naawo, ni nyuwo vamoha ni miyo, weera yiiraane moomalela, ni weera elapo esuwele weera nyuwo mukirumme, ni-tho weera munnaasivela atthu awo ntoko hiiho munkisivelaanyu. 24 Tiithi, kintthuna weera ale mukivanhaanyu ekhale vamoha nipuro kinkelaaka okhalavo, weera yoone ovuwa mukivanhaanyu, mwaha wooweera mookisivela okhuma ehinaaye opattuxiwa elapo. 25 Tiithi axariya, mweekhaikhai elapo khayoosuwenleni, mene miyo kohoosuwelani, ni atthu awo aasuwela weera nyuwo mukiruminhe. 26 Miyo kohaasuweliha nsina nanyu, ni kinimwaasuweliha, weera nsivelo munkisivelaanyuno miyo nikhale naawo, ni miyo vamoha naawosa.”

18 Yesu amalihakaru ohima itthu iya, aakhuma ni atthareli awe anarowa ekhopela ekina ya nxepa na oKedroni; iwo yaakhala ejardim, yeeyo Yesu vamoha ni atthareli awe yaakenlaayawo. 2 Yuda, yoowo eera anvarihe, aasuwela-tho nipuro nne, mwaha wooweera Yesu aathukumana ikwaha sintxipale ni atthareli awe. 3 Vano, Yuda aahaawiiha anakhotto ni makwaarta* yaarummwale ni ahooleli aanamakeya ni aafarisi, aaphiya akunxeene mithuko, onyaari* ni ikaruma sa ekhotto. 4 Vano, Yesu, asuwelaka itthu sootheene saakela omweereela, aaheetta epaasu emoha* akelaka ohoolo ni aahaakoha: “Mummwaasa taani?” 5 Yaamwaakhula: “Yesu, muNazareti.” Ni aaweerela: “Ti miyo.” Nave-tho, Yuda, ole aakela onvariha aari ni yaawo.

6 Menento, Yesu awaakhulakaru weera: “Ti miyo”, awosa yaatthikela ottuli ni yaamorela vathi. 7 Vano, Yesu aahaakoha veeli: “Mummwaasa taani?” Yaamwaakhula: “Yesu, muNazareti.” 8 Yesu aawaakhula: “Keera koowaakhulani weera ti miyo. Vanonto, waari weera munkaasa miyo, mwaahiye asilopwana ala erooke.” 9 Eyo yeereñye weera ekwanele ele owo aahimmaawe eeraka: “Nkimuyelenle naari mmoha aatthu ale okivanhaawe.”

10 Vano, Simoni Pedru aathulula ekatana aakunxaawe ni aathikila naaru noolopwana na kaporo anamakeya mutokweene. Nsina na kaporo owo naari Malko. 11 Mene Yesu aamweerela Pedru: “Mutthikihere ekatana muyuununi. Neereke nkintthuneya owura ekoopho* Atiithi ekivanhaaya?”

12 Nto, anakhotto, muhooleli aanakhotto ni makwaarta aayuda yanvara Yesu ni yaamutthuka. 13 Woopatxerani awosa yaamuroihale wa Ana, mwaha wookhala mukamwene a Kaifa, yoowo aari namakeya mutokweene a eyaakha ele. 14 Mweekhaikhai, Kaifa ti yoowo aalenle ayuda weera, ti wooreera wa yaawo weera mutthu mmoha aakhwele atthu ootheene.

15 Simoni Pedru, vamoha ni mutthareli mukina, yannamutthara Yesu. Mutthareli owo aasuweliwa nnamakeya mutokweene ni aavolowa ni Yesu vaate va mutokweene aanamakeya, 16 nto, Pedru aahanle vaate, vamulako. Menento, mutthareli ole aari oosuweliwa ni mutokweene aanamakeya, aakhuma, anarowa wuuluma ni muthiyana aaweherera mulako ni anvoloiha Pedru. 17 Muthiyana ole aaweherera mulako, aamukoha Pedru: “Nyuwo khaiyene mmoha aatthareli a mulopwana ole?” Pedru aahaakhula: “Hooye, nkihiyono.” 18 Akaporo ni makwaarta yeera erukurenreene mooro yaapattinhaaya, yooraka. Mwaha wooweera wannariira. Pedru tho aari vamoha ni yaawo ooraka.

19 Nto, mutokweene aanamakeya aamukoha Yesu woohima sa atthareli awe ni woohima sa sooxuttiha sawe. 20 Yesu aamwaakhula: “Miyo kannalaleera vanlakani. Ikwaha sootheene miyo kaaxuttiha musinakooka ni mutemplu, mapuro yaawo ayuda ootheene enthukumanaaya, ni nkaahima etthu moowiipithiheya. 21 Mwaha wa heeni munkikohaanyu? Mwaakoheke atthu yiiwale etthu kaaleelaaka. Awo aasuwela nnene sene etthu kihimmaaka.” 22 Yesu ahimakaru itthu iya, kwaarta mmoha eemenle vakhiviru vawe ammana owiitho ni aamweerela: “Ti hiiho mummwaakhulaanyu mutokweene aanamakeya?” 23 Yesu aamwaakhula: “Waareene weera kihimme etthu yoonanara, mukileele etthu yoonanara kihimmaaka; mene, kaahimmeene etthu yeekhaikhai,* mwaha wa heeni nto munkimanaanyu?” 24 Vano, Ana aamurumiha Yesu wa namakeya mutokweene Kaifa atthukinweene.

25 Simoni Pedru, aari vaavale ooraka. Vano, aakohiwa: “Nyuwo khaiyene mmoha aatthareli a mulopwana ole?” Owo aakhootta, eeraka: “Hooye, nkihiyene.” 26 Kaporo mmoha anamakeya mutokweene, yoowo aari mmusi a mulopwana Pedru aamuthikinlaawe naaru, aamukoha Pedru eeraka: “Miyo nkiwonneni ni mulopwana ole ojardim?” 27 Menento, Pedru aamukhootta-tho, ni moohipisa, muthupi waahiipa.

28 Vano, yaamukuxera Yesu owannyawe Kaifa kovernatore. Waari oxeexelo. Mene ayuda, khayaavolonwe owannyawe kovernatore weera ehivale mwiikho weera owootxeelihe omutxa Mpaasika. 29 Vanonto, Pilatu aarowa okumana naawo, ni aahaakoha: “Etthu heeni otthenkaawe mulopwana ola?” 30 Yaamwaakhula yeeraka: “Mulopwana ola ahaapanke itthu soonanara, hiyo khanaakela woowiiherani.” 31 Vano Pilatu aaweerelasa: “Mmukuxeke nyeenyu ni mwamuthorihe moovarihana ni Nlamulo nanyu.” Ayuda yaamweerela: “Khannaakhuleliwa omwiiva mutthu.” 32 Eyo yeereñye weera ekwanele masu Yesu aahimmaawe, ahimaka moota okhwa moohaawa eeraawe avirihe.

33 Vano, Pilatu aavolowa mpaani anamwiitthana Yesu ni aamukoha: “Nyuwo Mwene aayuda.” 34 Yesu aamwaakhula amukohaka: “Munkikoha mwaha wooweera muntthuna osuwela, naari mwiiwale ni atthu akina yuulumaka woohima sa miyo?” 35 Pilatu aamukoha eeraka: “Munkoonelaanyu va, miyo muyuda? Khaiyene ti nloko nanyu ni asitokweene anyu aanamakeya ekivaherenre nyuwo wa miyo. Mpanke eheeni?” 36 Yesu aahaakhula: “Omwene aka khoneerela eparte elapo ela. Waari weera Omwene aka oneerela eparte elapo ela, atthu aka saano yaawanne ekhotto weera kihiveleeliwe wa ayuda. Mene, Omwene aka khaiyene wa elapo ene yeela.” 37 Vano, Pilatu aamukoha: “Vanonto, nyuwo ti mwene?” Yesu aahaakhula: “Ti nyuwo munhima, weera miyo mwene.” Ti yeeyo kiyarelinwaaka ni ti yeeyo, kiwenlaaka mulaponi: weera kihelele onamoona wa ekhaikhai. Ni ootheene ale eri moono wa ekhaikhai enniiwa nsu naka. 38 Vano, Pilatu aamukoha Yesu eeraka: “Ekhaikhai ti heeni?”

Ahimakaru itthu iya, aarowa tho wuuluma ni ayuda ni aaweerela: “Miyo nkimphwannyeno nthowa mulopwana ola. 39 Nyuwo mookhalano yookhovelela weera miyo kimutaphuleke mutthu etempu ya Mpaasika. Vanonto, muntthuna weera kimutaphule mwene aayuda?” 40 Awosa yaakhuwela yeeraka: “Hiyo khanintthuna weera mmutaphule mulopwana owo; mmutaphule Baraba!” Baraba, aari namwiiya.

19 Vano, Pilatu aamukuxa Yesu anaruma weera awaxuliwe. 2 Anakhotto yaatthava ekhara ya miiwa enanwariha mmuru, ni yanwariha ekuwo yooxeera. 3 Awosa yannamwaattamela Yesu emweerelaka: “Mwiivuluxe, Mwene aayuda!”, Nave-tho yannammana owiitho. 4 Pilatu aakhuma-tho ni aaweerela atthu: “Mwiiwe! Kinoomukumihera vaate, weera musuwele weera nkimphwannyeno nthowa.” 5 Vano, Yesu aakhumela vaate, awanreene ekhara ya miiwa ni ekuwo yooxeera. Pilatu aaweerela: “Mulopwana ene tuula!” 6 Menento, vaavo asitokweene aanamakeya ni makwaarta* yaamonnaaya Yesu, yaakhuwela: “Akhomeliwe vamwirini! Akhomeliwe vamwirini!” Pilatu aaweerelasa: “Mmukuxeke nyeenyusa weera mwamwiive,* woona weera nkimphwannyeno nthowa.” 7 Nto ayuda yaamwaakhula: “Hiyo nookhalano Nlamulo, ni ti moovarihana ni Nlamulo nno owo ophwanenlaawe okhwa, mwaha wooweera ohiihima okhala Mwaana a Muluku.”

8 Pilatu iiwakaru itthu yaahimaaya, aatepa woova vantxipale; 9 aavolowa-tho mpaani ni aamukoha Yesu: “Nyuwo ta woowiini?” Mene Yesu khaamwaakhunle etthu. 10 Tivawonto Pilatu aamweerenlaawe: “Murookhootta wuuluma ni miyo? Khamusuwenle weera miyo kookhalano owera woowootaphulani, ni owera woowiivani?” 11 Yesu aamwaakhula amweerelaka: “Nyuwo mwahaakhulelinwe wiirimu, khamwaakela okhalano owera wookeeriha etthu. Tivawonto mutthu okivaherenre wa nyuwo oraaweno yoottheka etokweene.”

12 Nto mwaha wa yeeyo, Pilatu annaasaasa moota woomutaphula, menento ayuda yannakhuwela yeeraka: “Mwamutaphula vale mulopwana ola, nyuwo khaiyene nthamwene a Sesare. Ootheene ole oniihima okhala mwene, onnanvirikanyiha Sesare.” 13 Vano, iiwakaru masu ala, Pilatu aamukumihera Yesu vaate, ni aakilaathi nipuro nuulummwa milattu, nipuro nenno Noowaataleleya Maluku, va eheeberi nneeriwa Gabata. 14 Yaari ewoora ya 12, nihiku aarehereriwaawe Mpaasika.* Owo aaweerela ayuda: “Mwene anyu ola!” 15 Menento, awo yaakhuwela yeeraka: “Mmwiive! Mmwiive! Akhomeliwe vamwirini!” Pilatu aahaakohasa eeraka: “Kimwiiveke mwene anyu?” Asitokweene aanamakeya yaahaakhula yeeraka: “Hiyo khanaano* mwene, ahikhanle Sesare.” 16 Nto mwaha wa yeeyo, Pilatu aawinnyerera weera yamukhomele vamwirini.

Vano, awo yaamukuxa Yesu. 17 Ateexaka mwaneene awe mwiri wa nihaaxero,* aarowa Nipuro niitthaniwa Ekarakasa, ni eheeberi nniitthaniwa Golgota. 18 Iwo, awosa yaamukhomela Yesu variyari va alopwana eeli, mukina moono woolopwana mukina moono woothiyana. 19 Pilatu-tho aalepa yoolepa ni aahela vamwirini wa* Yesu. Yoolepa eyo yeera: “Yesu, Munazareti, Mwene aayuda.” 20 Yoolepa ele yaahooniwa* ni ayuda antxipale mwaha wooweera nipuro Yesu aakhomelinwaawe naari noowaattamela osidade. Yoolempwa eyo yaalempwale nnuulumo na eheeberi, elati ni ekereku. 21 Mene asitokweene aanamakeya ni aayuda yaamweerela Pilatu weera ahilepe: “Weera: ‘Mwene aayuda’, mene alepe weera owo enre: ‘Miyo Mwene aayuda.’” 22 Pilatu aahaakhula: “Etthu kilempaaka, koolepa.”

23 Vano, emukhomelakaru Yesu vamwirini, anakhotto yaakuxa maleya* awe ekawanya ipaarte ixexe, yoole ori nakhotto aakunxe epaarte emoha. Mene maleya awe a mpuwa khayaattotthinwe, yaarimweera otthaviwa ovinya osulu mpaka vathi. 24 Tivawonto, yaahuuluma* mukina ni mukhwaawe yeeraka: “Nihipere, neere waasaasera eparakha weera noone taani oneera ohaleno.” Eyo yeereñye weera ekwanele Yoolepa eneera: “Awo aakawana yaaworu maleya, ni ahaasaasera eparakha soowara saka.” Ni yaari ti yeeyo enexa anakhotto ale yaapankaaya.

25 Waattamela vamwirini* Yesu aakhomelinwaawevo, yaakhalavo ameyawe, munnaya-tho Maria mwaara a Kolopa, ni Maria Madalena. 26 Vano, emaara aawonnaawe ameyawe ni mutthareli awe aamusivelaawe vantxipale, weera yeemenle vakhiviru vawe, Yesu aaweerela ameyawe: “Muthiyana, mwaninyu owo!” 27 Woottharelana Yesu aamweerela mutthareli awe: “Ameyanyu awo!” Okhuma vaavale okela ohoolo, mutthareli ole aahaakuxa anaaroiha owannyawe.

28 Vahoolo vaya, Yesu onnaawe weera sootheene saaheereya, ni weera ekwanele Yoolepa Yesu aaheera: “Nookivola ntthona.” 29 Vaavale waakhala mwaapu woosareya eviinyu yoowaawa. Akina a yaawo yaakuxa exponxa* enaruweya nviinyuni ni enatthukelela vamutathini* enaroiha mmwaano mwa Yesu. 30 Aakhelakaru eviinyu, Yesu aaheera: “Itthu sootheene sookwaniheriwa!” ni uuramelaka vathi, aahookhwa.

31 Woona weera naari nihiku Naarehereriwaaya esaabadu, ehitthunaka ohiya irutthu iye vamwirini* nihiku na esaabadu (woona weera esaabadu ele yaakela okhala esaabadu yootepa otthuneya), ayuda yanvekela Pilatu weera arume wintakiwa metto sa asilopwana ale ni ovenxiwa mirutthu saya. 32 Vanonto, anakhotto yaarowa ni yahintaka metto sa mulopwana oopatxera, ni mulopwana mukina aakhomelinwe vamwirini moono mukina wa Yesu. 33 Mene, ephiyakaru ekwaha ya Yesu, yaahoona weera ohookhwa, tivawonto yahintankaaya metto sawe. 34 Vano, mmoha aanakhotto aamuhoma mpararini nnivaka, vaanaanoru, yaakhuma ephome ni maahi. 35 Itthu iya sihimmwale nnamoona onne itthu iya seereeyaka, ni onamoona awe ti weekhaikhai ni owo oosuwela weera ele ohimmaawe ekhaikhai. 36 Mweekhaikhai, itthu iya seereñye weera ekwanele Yoolepa eneera: “Khanaavo nikhuva nawe neera nintakiwe.”* 37 Nave-tho, weera ekwanele Yoolepa ekina eneera: “Enonwehexexa ole emuhommaaya.”

38 Noomala itthu iya, Yosefe yoowo aari a wArimatheya (aari mutthareli a Yesu moowiipithiheya mwaha wooweera anwoova ayuda), aamukoha Pilatu waari weera owo wanwereya okumiha murutthu wa Yesu, ni Pilatu aamwaakhulela. Nto, owo aarowa ni aakumiha murutthu wa Yesu. 39 Nikodemu, yoowo* aakumanne ni Yesu ekwaha yoopatxera ohiyu, aarowa-tho akunxeene makhura oowinkhela a emiira, makhura alowe yaalemela ikiilu* 33. 40 Awosa yaakuxa murutthu wa Yesu, enavitikelela ni ikuwo sa iliinyu vamoha ni makhura oowinkhela, moovarihana ni moota ayuda yaarehereraaya murutthu weera wavithiwe. 41 Vano, nipuro nne Yesu iivinwaawevo yaakhala ejardim ni ojardim iwo naakhala nikhuku nnyowani nihitonko ovithiwa mutthu. 42 Woona weera naari nihiku ayuda Yaarehereraaya esaabadu, ni weera nihiye nne naakhuveela, yaavitha mmo murutthu wa Yesu.

20 Nihiku noopatxera na esemana, Maria Madalena aaphiya omahiye oxeexelo, epiphi nlelo ehimalamanle, ni aahoona weera nluku naattiyelinwaayano nihiye naavenxiwa. 2 Vano, owo aavinya atthimakaka anarowa okumana ni Simoni Pedru ni mutthareli mukina, yoowo Yesu aamusivelaawe ni aaweerela: “Aakumihiwa Apwiya mmahiye, ni khanisuwenle woowiini ehiiwalaayawo.”

3 Vano, Pedru ni mutthareli mukina ole yaavinya enarowa omahiye. 4 Ooweeli yaapatxera otthimaka vamoha, mene mutthareli ole mukina aatthimaka moowaakuveya aphiya omahiye Pedru ahinaaye. 5 Uuramaka, aaweha mmahiye ni aahoona ikuwo sa eliinyu sireene mwemmwe, menento khaavolonwe. 6 Avinyaka, Simoni Pedru aamutthara, aaphiya-tho, aavolowa mmahiye ni aahoona ikuwo sa eliinyu sihiiwaleene mmo. 7 Ekuwo yaahelinwe waamuru wawe* khayaakhanle vale vamoha ni ikuwo ikina, mene saaroopinttiwa siheliwa nipuro nikina. 8 Vano, mutthareli mukina ole aapatxenre ophiya omahiye, aavolowa-tho aahoona, ni aaroromela. 9 Mwaha wooweera awosa nlelo khayiiwexexa Yoolepa yaahima weera owo* anvinyererihiwa mookhwaani. 10 Vano atthareli yaatthikela owaani.

11 Nto, Maria aahanle vaate, inlaka waattamela vamahiye. Ariki winla hiihaale, aahuuramela mpuwa mwa mahiye weera oone mpuwa mwa mahiye mmo 12 ni aahoona malaika meeli ewanreene sootteelaru ekilantheene nipuro waahiwalaayavo murutthu wa Yesu, mukina akilantheene waamuru mukina waametto. 13 Malaika awo yaamukoha: “Muthiyana, mwaha wa heeni muninlaanyu?” Ni owo aahaakhula: “Apwiyaka erookuxiwa, ni nkisuwenle yaahiñyaayawo.” 14 Uulumakaru masu ala, owo aarukunuwa ni aamoona Yesu eemenleene vale, mene khaamusuwenle weera aari Yesu. 15 Vano, Yesu aamukoha: “Muthiyana, mwaha wa heeni muninlaanyu? Mummwaasa taani?” Maria uupuwelaka weera aari mulopwana aarehera ejardim, aamweerela: “Apwiya, mwaareene weera ti nyuwo mmukunxe, mukileele mmuhiñyaanyuwo, ni miyo kinoorowa omukuxa.” 16 Yesu aamweerela: “Maria!” Anwehaka Yesu, Maria aaheera ni eheeberi: “Rabi!” (yeeyo entaphulela: “Muhusiha!”). 17 Yesu aamweerela: “Muhikivare,* mwaha wooweera nlelo nkironwe wa Atiithi. Vano, murowe wa asinnaka ni mwaaleele weera: ‘Miyo kinrowa wa Atiithi aka ni wa Atiithi anyu, wa Muluku aka ni wa Muluku anyu.’” 18 Maria Madalena aarowa ni aahaaleela mitthenka iya atthareli: “Miyo koowoona Apwiya!” Ni aahaaleela itthu sootheene Yesu aamulenlaawe.

19 Waaxekuwa nihiku nne, nenno naari nihiku noopatxera na esemana, ni milako sa nipuro nenno atthareli yaaraayamo, saawaliwa, mwaha wooweera yanwoova ayuda. Vano, Yesu aahaakhumelela awosa variyari vaya ni aaweerela: “Murettele okhale ni nyuwo.” 20 Ahimakaru itthu iya, Yesu aawoonihera matata awe ni niparari nawe. Nto, atthareli yaahakalala mwaha woowoona Apwiya. 21 Mwa ekwaha yanaaveeli, Yesu aaweerela-tho: “Murettele okhale ni nyuwo. Hiihaale ntoko Atiithi ekiruminhaaya miyo, Miyo tho kinnoorumihani nyuwosa.” 22 Ahimakaru itthu iya, Yesu aawiiseelela eeraka: “Mwaakhele munepa wootteela. 23 Wakhala weera nyuwo munoolevelela soottheka sa mutthu, owo onooleveleliwa; wakhala weera khamunlevelela soottheka sa mutthu, owo khanleveleliwa.”

24 Mene Tome, mmoha aarummwa ale 12, iitthaniwa Maphapo, khaakhanlevo emaara Yesu aakhumelenlaawe atthareli. 25 Vano, atthareli akina yaamuleela yeeraka: “Hiyo noowoona Apwiya!” Mene owo aaweerela: “Miyo kaahoonaru mmatatani mwaya makhwatta a ipereku yaathorolinwaayamo, ni kaahihelaru ekathaaka vanikhwattani na epereku nno, ni kaahivararu ni ntata

naka niparari yaahoommwaalaaya, nkiwa kiroromela.”

26 Evinreene mahiku 8 atthareli yaathukumana-tho, ni Tome aari vamoha ni yaawo. Nnaamweera milako saari soowaliwa sene, Yesu aahaakhumelela variyari vaya ni aaweerela: “Murettele okhale ni nyuwo.” 27 Avinyaka aamweerela Tome: “Muhele ekatha anyu va, ni moone matata aka; ni muhele mpararini mwaka ntata nanyu. Muhiye ohovela ni muroromeleke.” 28 Tome aamweerela: “Apwiya aka ni Muluku aka!” 29 Yesu aamweerela: “Nyuwo muroromenle mwaha wooweera murookoona? Oohakalala taale eroromenle nnaamweera ehikonne.”

30 Yesu aapaka miiriira sintxipale ohoolo wa atthareli awe, seiyo sihilempwale eroolu ela. 31 Menento iya silempwe weera nyuwo muroromele weera Yesu Kristu Mwaana a Muluku, ni mwaha wa ororomela wanyu, mukhaleno ekumi moorweela mwa nsina nawe.

21 Noovira itthu iya, Yesu aahaakhumelela-tho atthareli awe ephareya ya oTiberiyade. Owo aakhumelenle moota ola: 2 yaari vamoha Simoni Pedru, Tome (yoowo iitthaniwa Maphapo), Nataniyeli a oKana wa oGalileya, anamwane a Zebedeyo ni atthareli awe eeli. 3 Simoni Pedru aaweerelasa: “Kinrowa omesera.” Awosa yaamwaakhula yeeraka: “Hiyo-tho nnoorowa vamoha ni nyuwo.” Nto, yaarowa ni yaavolowa mpaarkuni, mene ohiyu wootheene ole khayaaphwannye etthu.

4 Vaxaaka, Yesu aari muxerexere mwa ephareya, mene atthareli awe khayaasuwela weera aari Yesu. 5 Vano, Yesu aahaakohasa: “Anamwane aka, mookhalano etthu* yootxa?” Yaamwaakhula: “Hooye.” 6 Yesu aaweerela: “Nvonyere ntthavi moono woolopwana wa paarku, ni munoophwanya etthu.” Vano awosa yaavonyera ntthavi, mene khayaawera opurula mwaha wooweera ntthavi naasareya ihopa. 7 Vano, mutthareli Yesu aamusivelaawe vantxipale, aamweerela Pedru: “Ta Apwiya!” Vano, Simoni Pedru iiwalaawe weera yaari Apwiya, aakuxa soowara sawe anawara, woona weera khaawanre etthu* ni aahiivonyera mphareya. 8 Mene atthareli akina yaawiiye enwenleene paarku mukhaanini epurulaka ntthavi noosareya ihopa woona weera khayaarakamenle muxerexere mwa ephareya, saari imeeturu 90 paahi.

9 Ephiyakaru omokoni, yaahoona mooro opattihinweene sooxiwakavo ihopa, ni-tho yaakhala epaawu. 10 Yesu aaweerela: “Nwiihe ihopa ikina iyo mmanlaanyu ovara viinaano va.” 11 Vano, Simoni Pedru aawela mpaarkuni ni anapurula ntthavi aroihaka omokoni; nno naasareya ihopa, ihopa 153 itokotoko. Nnaamweera saakhanle ihopa sintxipale, ntthavi khanaapaseñye. 12 Yesu aaweerela: “Nweeke mutxeeke.” Mene khaavo aatthareli ale aawenre omukoha owo taani mwaha wooweera yaasuwela weera owo aari Pwiya. 13 Vano, Yesu aawaattamela ni aakuxa epaawu anaavaha ni aahaavaha ihopa. 14 Avinyererihiwakaru mookhwaani, ela yaari ekwaha yanaararu Yesu aakhumelenlaawe atthareli awe.

15 Emalihakaru otxa, Yesu aamukoha Simoni Pedru: “Simoni, mwaana a Yohani, munnakisivela opwaha itthu iya?” Simoni, aamwaakhula: “Aani Apwiya, nyuwo moosuwela weera miyo kinnoosivelani.” Yesu aamweerela: “Mutxiheke iputtiputthi saka.” 16 Vano, aamukoha-tho ekwaha yanaaveeli: “Simoni mwaana a Yohani, munnakisivela?” Simoni aahaakhula: “Aani, Apwiya, nyuwo moosuwela weera miyo kinnoosivelani.” Vano Yesu aamweerela: “Mutxiheke iputtiputthi saka.” 17 Yesu aamukoha tho ekwaha yanaararu: “Simoni mwaana a Yohani, munnakisivela?” Pedru aariipiwa murima mwaha woomukoha ekwaha yanaararu eeraaka: “Munnakisivela.” Tivawonto owo aamweerenlaawe: “Apwiya, nyuwo moosuwela itthu sootheene, nyuwo moosuwela weera miyo, kinnoosivelani.” Yesu aamuleela Pedru eeraka: “Mutxiheke iputtiputthi saka. 18 Kinnooleelani ekhaikhai weera: Emaara mwaaraanyu mmiravo, mwannawara ni mwannarowa nipuro mwaatthunaanyu. Mene muuluvala vale, munookela wookola matata anyu, nto mutthu mukina onimooroihani nipuro mwahaatthunaanyu.” 19 Yesu aahimme eyo atthunaka ohima moota okhwa wa Pedru waakelaaya onvuwiha Muluku. Amalihakaru ohima itthu iya, aamweerela: “Pedru, nvirelele okitthara.”

20 Pedru aarukunuwa ni aamoona mutthareli Yesu aamusivelaawe aattharaka, mutthareli ene ti yoole aamuhaamenle Yesu vakakasani emaara yaatxaaya yootxa ya Mpaasika,* amukohaka ha: “Apwiya, taani oneera oovariheni?” 21 Vanonto, Pedru amoonakaru aamweerela Yesu: “Apwiya, eheeni enkela omweereela mulopwana ola?” 22 Yesu aamwaakhula eeraka: “Miyo katthuna vale weera owo akhale mpaka miyo owa, eheeni enooxupani? Nyuwo nvireleleke okitthara.” 23 Nto, yaamwaramwareya variyari va asinna masu ale ooweera mutthareli ole khaakela okhwa. Menento Yesu khaahimme yeeyo weera owo khaakela okhwa, mene aahimme weera: “Miyo katthuna vale weera owo akhale mpaka miyo owa, eheeni enooxupani?”

24 Ola, mutthareli yoowo onhelela onamoona wa itthu iya ni olempe itthu iya, ni hiyo noosuwela weera onamoona awe ti weekhaikhai.

25 Mweekhaikhai, sookhala itthu ikina sintxipale Yesu aapankaawe, nto waakhanle weera itthu sootheene soolempwa kinoona weera elapo, khayaarowa okhalano nipuro noowiiyaathivo iroolu sootheene saakela olempwa.