MWAHA ONTHOKORORIWA 34
ETXIPO 107 Yehova ti Ntakiheryo Nuulupale na Ophenta
Mwaakhavihere mwa nsivelo ni mwa ikharari ale epanke yoottheka
“[Muluku] orera wawe murima onnawìtthanela orukunuxa murim’á.” — AROM. 2:4.
ELE NINKELA AHU OXUTTERA
Ninrowa woona moota asitokweene a mmulokoni eneereraaya waakhavihera ale epanke soottheka sitokweene.
1. Etthu heeni eneereya vaavo mutthu ompakaawe yoottheka?
YOOSOMA evinre, nohoona moota Paulo aathokoronraawe yoottheka etokweene muloko wa oKorinto. Namattheka ole ahaattharuwa wannatthuneya okumihiwa mmulokoni. Menento, ntoko enooniheraaya yoolepa ya yoosoma ela, atthu akina empaka yoottheka etokweene pooti okhaviheriwa. Awo pooti okhaviheriwa mpaka ottharuwa. (Arom. 2:4) Moota heeni asitokweene a mmulokoni enrowaaya omukhavihera mpaka ottharuwa?
2-3. Etthu heeni nintthuneyaahu opaka wakhala weera munna naari murokora oopaka yoottheka etokweene, ni mwaha wa heeni?
2 Asitokweene a mmulokoni ehinaaye omukhavihera mutthu owo, entthuneya osuwela nnene sene mwaha owo. Mwa yeeyo, etthu heeni nintthuneyaahu opaka wakhala weera munna naari murokora oopaka yoottheka etokweene yeeyo yaarowa omweeriha okumihiwa mmulokoni? Nimooperereke owo orowa waasa nikhavihero na asitokweene a mmulokoni. — Yes. 1:18; Mit. 20:28; 1 Ped. 5:2.
3 Etthu heeni nintthuneyaahu opaka wakhala weera mutthu opanke yoottheka onnakhootta wuuluma ni asitokweene a mmulokoni? Hiyo onnatthuneya orowa wuuluma ni asitokweene a mmulokoni weera mutthu owo aakhele nikhavihero onhaawelaawe. Eyo etthu enoonihera nsivelo mwaha wooweera hiyo khanintthuna omuyeleela munnihu naari murokorihu. Wakhala weera mutthu owo onoovirelela opaka yoottheka, onoorowa onanariha onthamwene awe ni Yehova nave-tho owo onoorowa onanariha mukhalelo wa muloko. Mwa yeeyo, hiyo onnatthuneya opaka itthu moolipa murima mwaha wa nsivelo nahu wa Yehova ni wa mutthu owo. — Nsal. 27:14.
MOOTA ASITOKWEENE A MMULOKONI ENAAKHAVIHERAAYA ALE EMPAKA YOOTTHEKA ETOKWEENE
4. Yoolakela heeni ya asitokweene a mmulokoni vaavo enuulumaaya ni mutthu opanke yoottheka etokweene?
4 Vaavo mutthu a mmulokoni ompakaawe yoottheka etokweene, ekhurupu ya asitokweene a mmulokoni enimwaathanla asitokweene a mmulokoni araru weera yuulume ni mutthu owo.a Awo entthuneya okhala oohiisunnuwiha mene oowiiyeviha. Nnaamweera yeereraka omukhavihera mutthu owo weera attharuwe, awo aasuwela weera khentthuneya omukhanyerera mutthu owo opaka matxentxo. (Ola. 30:19) Asitokweene a mmulokoni aasuwela weera, khaiyene anamattheka ootheene enkela waakhulela miruku ntoko aapankaawe mwene Davidi. (2 Sam. 12:13) Anamattheka akina pooti othanla ohiiwelela miruku sa Yehova. (Eph. 4:6-8) Nnaamweera vareene hiiho, yoolakela ya asitokweene a mmulokoni omweeriha namattheka ottharuwa wawereya vale. Miruku heeni entthuneyaaya ovarihela muteko emaara enuulumaaya ni namattheka owo?
5. Miruku heeni asitokweene a mmulokoni entthuneyaaya wuupuwelelaka emaara yeeyo enuulumaaya ni mutthu otthenke? (2 Timotheyo 2:24-26) (Nwehe efootu.)
5 Asitokweene a mmulokoni ennamoona mutthu opanke yoottheka ntoko eputtiputthi yoosiveleya eriheñye. (Luka 15:4, 6) Tivawonto, emaara yeeyo enrowaaya wuuluma ni mutthu owo, awo khentthuneya okhala ooxupa vaavo enuulumaaya naari okhalano mukhalelo wooxupa, naari nihime ha, awo khenkhalano yoolakela yoowaasa ompakela makoho. Opwaha mwa yeeyo, awo enniilipihera okhalano mikhalelo siri va 2 Timotheyo 2:24-26. (Mmusome.) Asitokweene a mmulokoni, ennakhala oowiiwexexa, ooreera murima, aani, ooreera murima emaara yeeyo eniilipiheraaya omukhavihera mutthu otthenke.
Hiihaale ntoko akukhuli akhalayi, asitokweene a mmulokoni enniilipihera weera etthikihere eputtiputthi yooriheya (Nwehe eparagrafu 5)
6. Moota heeni asitokweene a mmulokoni enrehereraaya murima aya ehaakunveene okumana ni mulipa oottheka? (Aroma 2:4)
6 Asitokweene a mmulokoni ennareherera murima aya. Awo enneerera omutakiha Yehova vaavo enuulumaaya ni mutthu otthenke, yuupuwelaka masu a murummwa Paulo eneera: “[Muluku] orera wawe murima onnawìtthanela orukunuxa murim’á.” (Mmusome Aroma 2:4.) Asitokweene a mmulokoni entthuneya wuupuwelaka weera awo akukhuli enhooleliwa ni Yesu Kristu. (Yes. 11:3, 4; Math. 18:18-20) Ehaakunveene okumana ni mutthu opanke yoottheka, asitokweene a mmulokoni ennapaka nivekelo weera ekwanihere yoolakelaaya omweeriha namattheka ottharuwa. Awo ennathola-thola soolepa, irevista sahu nave ennapaka nivekelo evekaka miruku. Awo ennatthuneya osuwela etthu mutthu owo opankaawe yeeyo emweerinhe opaka yoottheka. — Mir. 20:5.
7-8. Moota heeni asitokweene a mmulokoni entakihaaya opixa murima wa Yehova vaavo enuulumaaya ni mulipa oottheka?
7 Asitokweene a mmulokoni ennatthuneya otakiha opixa murima wa Yehova. Awo entthuneya wuupuwelela moota Yehova aathokoronraawe anamattheka khalayi. Mwa ntakihero, Yehova aaheerera omukhavihera Kayini moopixa murima amuleelaka etthu yaarowa okhumelela wakhala weera anvirelela onyoonyiwa, ni aamuleela-tho weera, wakhala weera aamwiiwelela ammureeliha. (Eph. 4:6, 7) Yehova aahinvaha miruku Davidi anvarihelaka profeta Natani yoowo aavarihenle ntakihero nanvanre murima mwene. (2 Sam. 12:1-7) Ni Yehova aavirelela waarumiha “maprofeti” awe “vohihiyerereya” wa ana a Israeli yaamurukunuwenle. (Yer. 7:24, 25) Owo khaaweherenre atthu awe ottharuwa weera aakhavihere. Opwaha mwa yeeyo, owo aahipatxeriha owooperera weera ettharuwe.
8 Asitokweene a mmulokoni ennatthara ntakihero na Yehova vaavo eneereraaya waakhavihera ale empaka soottheka sitokweene. Ntoko 2 Timotheyo 4:2 onhimaawe, awo ennamukhavihera ‘moopixa murima’ mutthu opanke yoottheka. Enoota emoha ya yoosoma ya eversu ela ehimme ha: “Asitokweene a mmulokoni entthuneya okhala oomaaleleya ni oopixa murima weera emukhavihere namattheka otthuna opaka etthu yooreera. Wakhala weera [mutokweene a mmulokoni] onoonyoonyiwa pooti omweeriha [namattheka] owo ohittharuwa.”
9-10. Moota heeni asitokweene a mmulokoni enrowaaya omukhavihera namattheka wuupuwelela woohima sa mukhalelo awe?
9 Asitokweene a mmulokoni enneerera osuwela itthu sootheene simweerinhe opaka yoottheka. Mwa ntakihero, neereke etthu emweerinhe mukristu ola otteettheiha nroromelo nawe ori weemexera yoosoma awe ya omeekha ni muteko woolaleera? Neereke oohiya ovekela wa Yehova? Neereke ohaakhulela weera sootthuna soonanara simuhooleleke? Neereke oopaka soothanla ahuupuwenle woohima sa matthekulelo? Moota heeni soothanla ntoko iyo sivolenlaaya murima awe? Neereke owo onnasuwela moota soothanla apankaawe viinaano sinvolenlaaya Tiithi awe, Yehova?
10 Vaavo empakaaya makoho oophwanelela ni oohimuulihiha muru, asitokweene a mmulokoni ennamweeriha namattheka wuupuwelela mukhalelo awe woonanara. (Mir. 20:5) Opwaha mwa yeeyo, awo pooti ovarihela matakihero weera emukhavihere mutthu owo woonelela yoottheka awe orweela mwa itthu opankaawe, ntoko Natani aapankaawe ni Davidi. Apaale emaara yoopatxera enuulumaaya ni mutthu owo, mutthu owo onnariipiwa murima mwaha wa etthu opankaawe ni pooti weeraka onoottharuwa.
11. Moota heeni Yesu aathokororaawe anamattheka?
11 Asitokweene a mmulokoni enniilipihera omutakiha Yesu. Yesu aamukhavihera Saulo oTarso ampakelaka nikoho nna: “Saulo, Saulo, [mwaha wa heeni onkitthara-ttharaawe]?” Mwa mukhalelo ene yoola, Yesu aamukhavihera Saulo woonelela mukhalelo awe woonanara. (Mir. 9:3-6) Ni woohima sa muthiyana ole “Yezabeli” Yesu aahimme ha: “Kònvaha . . . ehuhu, wera arukunuxe murima.” — Apok. 2:20, 21.
12-13. Moota heeni asitokweene a mmulokoni enrowaaya onvaha etempu mutthu ole opanke yoottheka weera attharuwe? (Nwehe efootu.)
12 Emutakihaka Yesu, asitokweene a mmulokoni, khenaakuvela wuupuwela weera mutthu opanke yoottheka kharwa attharuwa. Nnaamweera atthu akina ettharuwaka mpuwa mwa muthukumano woopatxera enkhalayano ni asitokweene a mmulokoni, akina pooti oviriha etempu yintxipale. Mwa mukhalelo ene yoola, asitokweene a mmulokoni pooti ovaanela weera etthikele wuuluma nnamattheka owo ekwaha ekina. Pooti weeraka ekwaha yoopatxera yuulummaaya nnamattheka owo, oopatxera wuupuwelela moowiixera woohima sa etthu eyo ni owo pooti opatxera omwaattamela Yehova apakaka nivekelo moowiiyeviha. (Nsal. 32:5; 38:19 [38:18, Tradução do Novo Mundo]) Mwa mukhalelo ene yoola, muthukumano mukina asitokweene a mmulokoni enrowaaya opaka ni owo, namattheka owo pooti woonihera mukhalelo woovirikana ni mukhalelo oonihenraawe ekwaha yoopatxera.
13 Weera emukhavihere namattheka ottharuwa, asitokweene a mmulokoni enniihela nipuro nawe ni ennamureerela murima. Awo ennaweherera ni ennanvekela Yehova weera areelihe wiilipihera waya weera mukristu ole opanke yoottheka atxentxe mikhalelo sawe ni weera attharuwe. — 2 Tim. 2:25, 26.
Asitokweene a mmulokoni pooti wuuluma nnamattheka ohiya paahi ekwaha emoha, weera envahe etempu yoottharuwa (Nwehe eparagrafu 12)
14. Taani ontthuneya ovuwihiwa vaavo namattheka onttharuwaawe, ni mwaha wa heeni?
14 Wakhala weera namattheka oottharuwa, eyo ennanihakalaliha vantxipale! (Luka 15:7, 10) Vanonto, taani emphwanela ovuwihiwa? Asitokweene a mmulokoni? Muupuwele ele Paulo olempaawe woohima sa anamattheka: “Apale Muluku àvahe yawo mahala òrukunuxa murima.” (2 Tim. 2:25) Enoota emoha ya yoosoma ya eversu ela ehimme ha: “Yehova tomweerinhe namattheka otxentxa mukhalelo awe ni ottharuwa, ohiya mutthu, nto ovuwa wootheene avahiwe yoowo. Paulo onnavirelela ohima woohima sa mikhalelo sooreera sinkhumelela vaavo mutthu onttharuwaawe, mutthu owo onnakhalano osuwela weekhaikhai ni onnatthikela makhalelo ooreera, eyo ennamweeriha okhala oolikaneene weera asepe miraakho sa Satana. — 2Tim 2:26.”
15. Moota heeni asitokweene a mmulokoni enrowaaya ovirelela omukhavihera namattheka ottharunwe?
15 Vaavo namattheka onttharuwaawe, asitokweene a mmulokoni ennavirelela omuxekura owo weera aakhele nikhavihero onhaawelaawe weera awereke owanano miraakho sa Satana ni weettela ephiro yooreera. (Aheb. 12:12, 13) Ekhaikhai weera, asitokweene a mmulokoni khaavo mutthu emmuleelaaya woohima sa yoottheka mutthu owo apankaawe. Menento etthu heeni muloko ontthuneyaaya oleeliwa?
“WÀTTARUXE ANAMATTHEKA VAHOLO VA ATTHU OTHENE”
16. Moovarihana ni 1 Timotheyo 5:20, ‘atthu’ heeni Paulo aahimaawe?
16 Mmusome 1 Timotheyo 5:20. Paulo aamulepela masu ala Timotheyo yoowo-tho aari mutokweene a mmulokoni woohima sa moota woowaathokorora “anamattheka.” Owo aatthuna ohima eheeni? Owo khaatthuna ohima weera muloko wootheene wannatthuneya ‘osuwela.’ Opwaha mwa yeeyo, owo aahima atthu yaale yaarowa osuwela yoottheka eyo. Pooti okhala anamoona naari atthu yaawo namattheka owo onrowaawe waaleela. Asitokweene a mmulokoni yaamurowa ohima paahi weera woothokororiwa mwaha ni munna owo ni oottaruxiwa.
17. Wakhala weera yoottheka etokweene yoosuweliwa mmulokoni naari atthu akina yaasuwela, etthu heeni entthuneya ohimmwa, ni mwaha wa heeni?
17 Mwa itthu ikina, yoottheka eyo pooti osuweliwa ni muloko wootheene, naari atthu ootheene pooti osuwela. Wakhala weera eyo enimweereya, ‘atthu enrowa osuwela’ enoohela mpuwa muloko wootheene. Wakhala weera ti hiiho, mutokweene a mmulokoni anoorowa ohima mmulokoni weera munna naari murokora ookumihiwa mmulokoni. Mwaha wa heeni? Paulo onnaakhula eeraka: “Wera othene ekhale ni wova” weera ehipake yoottheka.
18. Moota heeni asitokweene a mmulokoni enrowaaya othokorora nyaha sa anamattheka epatisinwe ehikwaninhe iyaakha 18? (Nwehe efootu.)
18 Etthu heeni asitokweene a mmulokoni entthuneyaaya opaka wakhala weera mutthu oopatisiwa ohikwaninhe iyaakha 18 oopaka yoottheka etokweene? Ekhurupu ya asitokweene a mmulokoni enimwaavekela asitokweene a mmulokoni eeli weera yuulume ni mutthu owo vamoha ni asitiithi awe.b Asitokweene a mmulokoni enimwaasaasa osuwela itthu heeni asitiithi epankaaya weera emukhavihere mwana owo ottharuwa. Wakhala weera mwana owo oottharuwa ni asitiithi aawera omukhavihera, asitokweene a mmulokoni eeli awo pooti othanla ohikeliha vahoolo mwaha owo. Mwaha wooweera Muluku ohaavaha muritti woowaattaruxa anamwane mwa nsivelo asitiithi. (Ola. 6:6, 7; Mir. 6:20; 22:6; Aef. 6:2-4) Asitokweene a mmulokoni enimwaasaasaka osuwela wakhala weera asitiithi ennanvaha mwana owo nikhavihero nenno onhaawelaawe. Vano, nankha wakhala weera mwana owo oopatisiwa khanttharuwa ni onnavirelela okhalano mukhalelo woonanara? Yeereya haawo, ekhurupu ya asitokweene a mmulokoni enoothukumana ni owo vamoha ni asitiithi awe.
Emaara yeeyo mutthu ohikwaninhe iyaakha 18 ompakaawe yoottheka etokweene, asitokweene eeli a mmulokoni enoorowa okumana ni mwaana owo vamoha ni asitiithi awe makristu (Nwehe eparagrafu 18)
“[YEHOVA] T’ÒSAREYA OTHUNKU NI ÒMORELA IKHARARI”
19. Moota heeni asitokweene a mmulokoni eniilipiheraaya omutakiha Yehova vaavo emmuthokororaaya namattheka?
19 Asitokweene a mmulokoni aakhalano muritti yoowo Yehova onaavekelaawe weera ereherereke muloko. (1 Akor. 5:7) Nave-tho awo ennatthuna weera anamattheka ettharuwe wawereya vale. Weera yeereye eyo, asitokweene a mmulokoni ennakhalano moonelo wooreera ni yooweherera. Mwaha wa heeni? Mwaha wooweera awo emmutakiha Yehova yoowo ori ‘oosareya othunku ni oomorela ikharari.’ (Yak. 5:11) Moone moota murummwa Yohani oonihenraawe eyo. Owo olempe ha: “Asinamwan’aka, kinnolepelani seiya, wera muhittheke. Ni attheká mutthu, nòkhalano namwakiha wa Atithi: ti Yesu Kristu Naxariya.” — 1 Yoh. 2:1.
20. Eheeni ninrowaahu woona wa yoosoma yoomalihera ya soosoma iya?
20 Mooriipiha murima, ennakhala emaara ekina mukristu onkhoottaawe ottharuwa. Wakhala weera eyo enimweereya, owo ontthuneya okumihiwa mmulokoni. Moota heeni asitokweene a mmulokoni enrowaaya othokororaka soottheka itokweene? Nnoorowa waakhula nikoho nna wa yoosoma yoomalihera ya soosoma iya.
ETXIPO 103 Axitokweene: Yoovaha ya Yehova
a Khalayi ekhurupu ela, yiitthaniwa ekomite yoothoriha. Mene okhala weera othoriha oneerela eparte ya muteko aya paahi, khaninrowa ovarihela-tho masu ala. Opwaha mwa yeeyo, ninrowa wiitthanaka ekhurupu ya asitokweene a mmulokoni.
b Itthu enleeliwaaya asitiithi sinnavareleya-tho muteko wa amusi a mwaana owo yaawo emmukosoopa.