YOOSOMA 58
Nvirelele okhala oororomeleya wa Yehova
Makristu ekhaikhai ari oolikaneene weera ehihapuxiwe omukokhorela waya Yehova. Mweekhaikhai ti hiiho munoonelaanyu. Yehova onnahela mwiitti ororomela waya. (Mmusome 1 Sowereya 28:9.) Maxupo heeni ankela weerera omuroromela wahu Yehova, ni nyuwo munkela oviriha moota heeni?
1. Moota heeni atthu akina ankelaaya weerera nroromelo nraahuno ni Yehova?
Atthu akina anoorowa weerera nroromelo nraahuno ni Yehova. Mene nto, taani ankela opaka eyo? Atthu akina ahiiñye ekhaikhai anuuluma itthu soowootha woohima sa mareherero a Muluku, weera epwate nroromelo nahu. Atthu awo, anamavaanyiha. Opwaha mwa yeeyo, ahooleli a ittiini annimwaramwara itthu soowootha woohima sa hiyo ni anneerera waapakiha atthu akina ohiya ekhaikhai. Ti woowopiha wuuluma ni atthu anuuluma itthu soowootha woohima sa Anamoona a Yehova. Nipakeke eyo nihisomaka iliivuru saya, blogs, nihivolowaka musaitini mwaya, ni nihoonaka isaiti saya. Yesu aahima woohima sa atthu ale aneerera oweemexa atthu omurumeela Yehova eeraka: “Mwàhiye! Ari alipa a evasi, yàholelaka a evasi akina. Vano mulipa a evasi amuholelá mukina, òweli aya enemorele munlittini.”—Matheyo 15:14.
Eheeni nyuwo munkelaanyu opaka wakala weera moomusuwela mutthu ohintthuna okhala namoona a Yehova? Nyuwo pooti okhala ooxupeya wakhala weera mutthu owo munnamusivela. Mutthu owo pooti oweerelani weera mpake yoothanla, yoomutthuna owo naari omutthuna Yehova. Mene nto, hiyo onnatthuneya ovirelela okhala oororomeleya wa Yehova opwaha mwa itthu sootheene. (Matheyo 10:37) Mwa yeeyo, ontthuneya wiiwelela malamulo a Yehova nihuulumanaka ni mutthu ori poothe onkela oninyeserera opaka yoothanla ntoko eyo.—Mmusome 1 Akorinto 5:11.
2. Soothanla sahu sinkela woonihera hayi weera ninnamuroromela Yehova?
Mwaha wa nsivelo nraahuno ni Yehova, ninnaneeriha oheerela empari ettiini yoowotha. Eyo enthonyihera weera khanimpaka etthu eri poothe yeeyo enkela woonihera weera ninnakhavihera ettiini yoowotha. Nto eyo enhela mpuwa muteko ahu ni etthu eri yoothene yeeyo envarihana ni ettiini yoowotha. Yehova onnanitxentxeriha oriki: ‘Muloko aka mukhumele vate va muloko ola.’—Apokalise 18:2, 4.
WEERA MUXUTTERE SINTXIPALE
Moone moota heeni nyuwo muhinkelaanyu omuhiya mutthu mukina ariirihaka omuroromela wanyu Yehova. Nave-tho, moone moota heeni nyuwo munkelaanyu woonihera nroromelo nanyu mmukhumaka Babilonia Mutokweene.
3. Mwiikhasoopeke ni sooxuttiha soowotha
Ninkela wuupuwela moota heeni wakhala weera noohiiwa etthu yoonanara woohima sa mareherero a Yehova? Musome Miruku 14:15. Avinyaka mutthekule ni epontu enttharelana:
Mwaha wa heeni ontthuneyaaya wiikasoopa weera nihiroromele itthu sootheene nniwaahu?
Mmusome 2 Yohani 10. Avinyaka mutthekule ni ipontu sinttharelana:
Ninkela oviriha moota heeni mikhalelo sa anamavaanyiha?
Noosuwela weera khoiyo wa miruku wuuluma ni anamavaanyiha. Vano miruku saya sinkela onivoleela hayi?
Munoona weera Yehova aakela woonela hayi wakhala weera ninniiwelela itthu saya ni mareherero aya?
4. Nvirelele okhala oororomeleya wa Muluku nnamweera munna mukina apankeene yoottheka
Wakhala weera noosuwela weera mutthu a mmulokoni oopaka yoottheka etokweene, eheeni ninkelaahu opaka? Moone ele Muluku aalenlaawe ana a israeli etthu yeeraaya epakeke ehuhu ya khalayi. Mmusome Onamakeya 5:1.
Ntoko ehimmaaya eversu, wakhala weera moomusuwela mutthu opanke yoottheka etokweene, eheeni nyuwo mwaakelaanyu wuuluma ni asitokweene? Yoopatxera, waamukhala wooreera omulipiha mutthu owo weera uulume ni asitokweene weera alape soottheka sawe. Okhwipi waya aahipaka eyo, omuroromela wahu Yehova oneeriheke orowa waaleela asitokweene ele nsuwenlaahu. Eyo enkela woonihera weera nookhalano nsivelo noororomeleya . . .
wa Yehova Muluku?
wa mutthu ole otthenke?
wa atthu akina mmulokoni?
Wakhala weera munna ookhalano maxupo, muhihiye omukhavihera!
5. Mwiirakamelihe ni Babilonia Mutokweene
Mmusome Luka 4:8 ni Apokalise 18:4, 5. Avinyaka mutthekule ni ipontu sinttharelana:
Keereke miyo koohiya moomalela ittiini soowootha seiyo miyo kaapakelaaka empari?
Keereke miyo kinneerela empari mareherero anvarihana ni ittiini soowotha?
Keereke muteko aka khonkhavihera ittiini soowotha?
Keereke miyo mweekumini mwaka yookhala etthu kintthunaaka ohiya envarihana ni ettiini yoowotha?
Wakhala weera makoho ala kohaakhula aani, keereke yookhala etthu kintthuneyaaka otxentxa?
Mwa itthu sootheene iya, mpake yoothanla yeeyo enkela woonihera omuroromela wanyu Yehova ni ohiya yoowupuxeraanyu ya murima yooreera.
Mwaakela opaka eheeni wakhala weera moovekeliwa oreherera empa naari etthu eri poothe envarihana ni ettiini yoowotha?
ATTHU AKINA ANEERA: “Miyo kintthuna osuwela woohima sa anamavaanyiha itthu enuulumaaya woohima sa Anamoona a Yehova weera kaakihere ekhaikhai.”
Munona weera ti wamiruku opaka eyo? Mwaha wa heeni?
NYAHA SOOTTHUNEYA
Hiyo nintthuneya oovirelela okhala oororomeleya wa Yehova. Mwa yeeyo, onnatthuneya wiikosoopa ni ohuulumano atthu oohiroromeleya. Nave-tho, ontthuneya ohiya soopaka sa ittiini soowootha moomalela.
Wuuluula
Mwaha wa heeni oraaya woonanara wiiwa, woona, osoma miruku sa anamavanyiha?
Ninkela waathokorora moota heeni atthu ale ahintthuna okhala Anamoona a Yehova?
Ninkela wiiwelela moota heeni yoohimwa ya otthawa ettiini yoowotha?
WEERA MUSUWELE ITTHU SINTXIPALE
Moone moota munkelaanyu opaka wakhala weera atthu akina anitawaliha itthu soowotha woohima sa Anamoona a Yehova.
“Neereke nyuwo moosuwela itthu soothene?” (A Sentinela, Agosto a 2018)
Nyuwo munkela woonelela moota heeni wakhala weera mareherero mamoha ennamukhavihera Babilonia Mutokweene?
“Mukhale oowatteliwa mahiku a ‘mahiku omalihera’” (A Sentinela, Outubro a 2019, eparagrafu 16-18)
Eheeni anamavaanyiha apankaaya weera yeerere onanariha nroromelo nahu?h?
Weera musuwele moota padre mmoha aahinyaawe ettiini yoowotha (xintoísta) musome yooweereya “Miyo kanamwasa Muluku ovinyera enamwanaaka.”
“Biblya onnatxentxa ikumi sa atthu” (A Sentinela, 1.º a Julho a 2011)