40 “Vano, omwene wa neexexe, onrowa okhala woolipa ntoko eyuuma.+ Ntoko siisaale eyuuma enipwexakasa aya ni onyakatta khula etthu, omwene owo onoopwexakasa ni opwetexa moomalela omwene wootheene.+

41 “Nave, ntoko siisaale nwenhe anyu inawu ni ilipwi saari sa eyuuma yootakaaheriwa ni oloko,* omwene owo onookawanyiwa. Masi ntoko nwenhe anyu wiira eyuuma eyo yaahitakaaheriwa ni oloko woowoolowa, omwene owo onoolipa vakhaani mwaha wa eyuuma eyo. 42 Ntoko siisaale ilipwi iyo saari aya sa eyuuma yootakaaheriwa ni oloko, omwene owo onrowa okhala woolipa ni woohilipa.