Okathi mwaninyu onrowa awe wiixuttaka voohimya sa siensia oxikola, onoosuwela itthu sikina sinivarihana ni soopattuxiwa. Miri sikina sookhalana makhuku anlikana aahiiso aniirukurerya. Itoronku sa miri iyo, sookhalana iritta suulupale ni saamukhaani. Enamuna miri iyo sitthokihiwa aya, siniitthaniwa Fractais. Nave sinniphwanyaneya itthu sikina valaponi sipattuxiwe mwa enamuna eyo. Tani opattunxe itthu iyo sootheene ninweha ahu valaponi? Okathi mwaninyu onrowa awe otokosaka itthu sootikiniha Muluku opattunxe awe, eyo enoomukhaliherya okhalana waamini woolipa. Vaavo mwaninyu oninnuwa awe, nyuwo muhaana omukhaliherya wiiwexexa nthowa naya onireerela awe wiiwelela malamulo a Muluku. Nyuwo pooti omuleela mwaninyu wiira Muluku oonivaha Biibiliya, wiira onikhaliheryeke okhala atthu oohakalala. w24.12 16 etti. 8

Yehova aahimwiiriha murummwa Paulo olepa epaphelo, ohimyaka wiira mulopwana ole aapanke etampi yuulupale ohinaphavela ottharuwa, aahaana okumihiwa mmulokoni. (1 Akor. 5:13) Nto anna a mmulokoni yaarowa omuthokoreryaka sai mutthu ole? Paulo aahaaleela wiira yaahaana ohiya weetta ni mutthu owo. Eyo yaataphulela ohiya olya ni mutthu owo. (1 Akor. 5:11) Okathi ninlya ahu ni mutthu, okhala wene ninnivaanela ni mutthu owo. Nto Paulo aaphavela ohimya wiira atthu a mmulokoni, khiyaakhanle ootthekulaka ni mulopwana owo. Eyo yaamukhaliherya muloko ole ohinanarihiwa ni mweettelo awe woohiloka. (1 Akor. 5:​5-7) Nave akhala wiira atthu a mmulokoni yaamuhiya weetta ni mutthu ole, owo aamoona wiira oohiya weettela ephiro ya Yehova. Nave pooti wiira aamoona wiira oopaka etthu yootakhala, nto aamurukunuxa murima awe. w24.08 15 itti. 4-5

Khula eyaakha, aisarayeli yaanitthapela nihiku na vameekhaaya, eyo piiyo, nihiku na ovaha mukuttho wooliverya itampi. Nihiku nlo, namukuttho muulupale, aanivaha mukuttho wa inama wiira sileveleliwe itampi sa aisarayeli. Ekeekhai wiira mikuttho saavahiwa sa inama khisaawerya ottipiha itampi sa atthu moomalela, okhala wiira inama iyo saari saamukhaani nalikanyiha ni apinaatamu. Masi okathi aisarayeli yaattharuwa aya itampi saya ni yanvaha aya mukuttho Yehova aaphavela awe, awo yaanikupali wiira Yehova aamwaalevelela itampi saya ni khaarowa wuupuwela-tho. (Ahep. 10:​1-4) Okathi aisarayeli yaavaha aya mikuttho sa inama, eyo yaaniwuupuxerya wiira yaari atthu oottheka. Nto wiira itampi saya sileveleliwe moomalela, yaahaana opakiwa etthu yaarina efaita yuulupale. Yehova oopaka eyo wiira itampi sa apinaatamu sileveleliwe moomalela. Owo onvahererya Mwanawe amphentexa awe, Yesu, “ekwaha emosa paahi, wiira okuxe itampi sa atthu anceene.” (Ahep. 9:28) Yesu oovaha okumi awe wiira “owoopole atthu anceene.” — Math. 20:28. w25.02 4 itti. 9-10