Muhihiye waataana ni atthu ale animuroromela Yehova. Muluku oniphavela wiira nimurumeeleke yena mwa enamuna yoowiiraana. Nnoowerya opaka eyo, vakhala wiira khannihiya weettela ekeekhai. Mutthu onimwara-mwarya itthu soowoothiwa onnikumiherya okawanyeya mmulokoni. Tivonto, Muluku onnilopola awe ohimyaka wiira “muhaataaneke ni atthu awo”. Akhala wiira khannipaka eyo, hiyo pooti opaceryaka okupali itthu soowoothiwa ni ohimuroromela Yehova. (Arom. 16:​17, 18) Vaavo ninsuwela ahu itthu sa ekeekhai ni nneettela, eyo enninikhaliherya olipiha waamini wahu ni omwaattamela Yehova. (Aef. 4:​15, 16) Ohiya-vo, khaninrowa owokiwa ni soowiixuttiha soohiloka sa Satana. Nave okathi wa maxakha maalupale, khaninrowa ohiya okhala oovareleleya, nikhaliheriwaka ni Yehova. Muhihiye weettela ekeekhai, “nto Muluku a murettele, onookhala ni nyuwo.” — Afil. 4:​8, 9. w24.07 13 itti. 16-17

Yesu aanaathokorerya vanceenexa atthu yaale yaariipiwa murima mwaha wa okhala anatampi. Nave aanaalattula atthu awo wiira akhale awiixutti awe. Yesu aanisuwela wiira atthu annihaawa mwaha wa etampi. Tivo, owo aanaakhaliherya alopwana ni athiyana, yaawo yaahaawa mwaha wa itampi saya. Owo aahirumeela nlikanyiho wiira otthokihenrye. Nlikanyiho nno naahimya so: “Atthu akumi khanirowa wa meetiku, masi aretta tanirowa.” Nave-tho aahihimya wiira: “Miyo nkirwenle owiitthana anaxariya, masi anatampi.” (Math. 9:​12, 13) Nto eyo ti etthu Yesu aapanke awe. Okathi muthiyana mmosa aarapinhe awe inawu sa Yesu ni maithori awe, Yesu aahimulavuliha omureerelaka murima ni aahimulevelela itampi sawe. (Luka 7:​37-50) Yesu aahimwiixuttiha muthiyana ole musamariya, ekeekhai eniphwanyiha okumi, nnaamwi aasuwenle wiira muthiyana ole aakhala ni mulopwana ahaathelanne awe. (Yoh. 4:​7, 17-19, 25, 26) Nave Muluku aahinvaha owerya Yesu wiira omala-malihe okhwa, weiwo okumiheriwe ni etampi. Sai-sai? Yesu aahaahihimuxa atthu. Owo aahaahihimuxa alopwana ni athiyana, nave aahaahihimuxa anamwane ni atthu aalupale. — Math. 11:5. w24.08 4 itti. 9-10

Yehova onrowa ovuwiha sai nsina nawe voohipisa-va? Onoorowa opaka eyo, oruuhaka exariya. Moohipisa, owo onoorowa ompwetexa Babiloonia Muulupale mwaha woowi, itiini sinnimootherya Yehova siwiixuttihaka atthu itthu soowootha. (Wis. 17:​5, 16; 19:​1, 2) Okathi Babiloonia Muulupale onrowa awe opwetexiwa, atthu akina pooti opacerya omukokhorela Yehova ni hiyo. Okathi wa Armagedoni, Yehova onoorowa opwetexa olumwenku wootheene wa Satana, ni waapwetexa atthu ootheene animootherya. Masi onrowa owoopola atthu ootheene animphenta ni animwiiwelela, yaawo aninvuwiha. (Mar. 8:38; 2 Ates. 1:​6-10) Nuumala weehereriwa wookiserya, weiwo onrowa wiiraneya nuuvira Iyaakha 1.000 sa Olamulela wa Kristu, Yehova onrowa wooniherya wiira yena paahi tonireerela okokhoreliwa ni atthu ootheene. (Wis. 20:​7-10) Okathi owo, “elapo enosareya osuwela w’ovuwa w’Apwiya, ntoko vansareyaya màsi mphareya.” (Hab. 2:14) Vanrowa okhala voohakalaliha okathi atthu ootheene anrowa aya onvahaka Yehova ovuwa oniphwanela nsina nawe! w25.01 7 itti. 15-16